Asian Games: ಐಚಿ-ನಗೋಯಾದಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಗೇಮ್ಸ್‌ನ 14ನೇ ದಿನ ಭಾರತದ ಪಾಲಿಗೆ ಹೊಸ ಇತಿಹಾಸಕ್ಕೆ ಸಾಕ್ಷಿಯಾಗಿದೆ. ಗಾಲ್ಫ್ ಅಂಗಳದಲ್ಲಿ ಅಪ್ರತಿಮ ಪ್ರದರ್ಶನ ನೀಡಿದ ಪ್ರಣವಿ ಅರಸ್, ಏಷ್ಯನ್ ಗೇಮ್ಸ್ ಮಹಿಳೆಯರ ವೈಯಕ್ತಿಕ ಗಾಲ್ಫ್ ಸ್ಪರ್ಧೆಯಲ್ಲಿ ದೇಶಕ್ಕೆ ಚೊಚ್ಚಲ ಚಿನ್ನದ ಪದಕ ಗೆದ್ದುಕೊಟ್ಟು ದಾಖಲೆ ಬರೆದಿದ್ದಾರೆ. ಕೇವಲ ವೈಯಕ್ತಿಕವಲ್ಲದೆ, ಅದಿತಿ ಅಶೋಕ್ ಮತ್ತು ದೀಕ್ಷಾ ಡಾಗರ್ ಅವರ ಜೊತೆಗೂಡಿ ಮಹಿಳಾ ಗಾಲ್ಫ್ ತಂಡ ವಿಭಾಗದಲ್ಲೂ ಬೆಳ್ಳಿ ಪದಕಕ್ಕೆ ಮುತ್ತಿಕ್ಕುವಲ್ಲಿ ಪ್ರಣವಿ ಪ್ರಮುಖ ಪಾತ್ರ ವಹಿಸಿದರು.
ಇತ್ತ ಬಿಲ್ಲುಗಾರಿಕೆ (ಆರ್ಚರಿ) ಕ್ರೀಡೆಯಲ್ಲೂ ಭಾರತ ಮತ್ತೊಂದು ಸುವರ್ಣ ಮೈಲಿಗಲ್ಲು ತಲುಪಿದೆ. ಮಹಿಳೆಯರ ವೈಯಕ್ತಿಕ ರಿಕರ್ವ್ ವಿಭಾಗದ ಉಸಿರುಗಟ್ಟಿಸುವ ಫೈನಲ್ ಹಣಾಹಣಿಯಲ್ಲಿ 17 ವರ್ಷದ ಕುಮ್‌ಕುಮ್ ಮೊಹೊಡ್ ದಕ್ಷಿಣ ಕೊರಿಯಾದ ಓ ಯೆಜಿನ್ ವಿರುದ್ಧ 6-5 ಅಂತರದ ರೋಚಕ ಜಯ ಸಾಧಿಸಿ ಬಂಗಾರ ಮುಡಿಗೇರಿಸಿಕೊಂಡರು. ಈ ಗೆಲುವಿನೊಂದಿಗೆ ಅವರು 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್‌ಗೆ ಭಾರತದ ಪರ ಕೋಟಾ ಖಚಿತಪಡಿಸಿಕೊಂಡರು.
ಪುರುಷರ ರಿಕರ್ವ್ ಪ್ಲೇ-ಆಫ್‌ನಲ್ಲಿ ನೀರಜ್ ಚೌಹಾಣ್ ತಮ್ಮದೇ ತಂಡದ ಧೀರಜ್ ಬೊಮ್ಮದೇವರ ವಿರುದ್ಧ 6-4 ರಿಂದ ಗೆದ್ದು ಕಂಚಿನ ಪದಕ ಪಡೆದರು. ಇದರಿಂದ ಭಾರತ ಬಿಲ್ಲುಗಾರಿಕೆಯಲ್ಲಿ ಒಟ್ಟು 9 ಪದಕಗಳೊಂದಿಗೆ (5 ಚಿನ್ನ, 2 ಬೆಳ್ಳಿ, 2 ಕಂಚು) ಭರ್ಜರಿ ಅಭಿಯಾನ ಮುಗಿಸಿದೆ.
ಇನ್ನೊಂದೆಡೆ ಕುಸ್ತಿ ಅಖಾಡದಲ್ಲೂ ಭಾರತಕ್ಕೆ ಎರಡು ಚಿನ್ನದ ಭರವಸೆ ಮೂಡಿದೆ. ಪುರುಷರ 57 ಕೆಜಿ ಫ್ರೀಸ್ಟೈಲ್ ಸೆಮಿಫೈನಲ್‌ನಲ್ಲಿ ಅಮನ್ ಸೆಹ್ರಾವತ್ 14-8 ರಿಂದ ಭರ್ಜರಿ ಕಮ್‌ಬ್ಯಾಕ್ ಮಾಡಿ ಫೈನಲ್‌ಗೆ ಲಗ್ಗೆಯಿಟ್ಟರೆ, ಮಹಿಳೆಯರ 53 ಕೆಜಿ ವಿಭಾಗದಲ್ಲಿ ಅಂತಿಮ್ ಪಂಘಾಲ್ ಚೀನಾದ ಜಿನ್ ಜಾಂಗ್ ವಿರುದ್ಧ 6-1 ಜಯ ಸಾಧಿಸಿ ಚಿನ್ನದ ಪದಕದ ಕಾಳಗಕ್ಕೆ ಸಜ್ಜಾಗಿದ್ದಾರೆ. ಈ ಅದ್ಭುತ ಯಶಸ್ಸುಗಳಿಂದ ಪದಕ ಪಟ್ಟಿಯಲ್ಲಿ 5ನೇ ಸ್ಥಾನಕ್ಕೇರಿರುವ ಭಾರತ, ಅಗ್ರ 4ರೊಳಗೆ ಮುಗಿಸಲು ದಿಟ್ಟ ಹೆಜ್ಜೆಯಿರಿಸಿದೆ.
