ರಿಚಾರ್ಜ್ ದರ ಹೆಚ್ಚಳದ ಚಿಂತೆ ಬೇಡ ಒಂದು ವರ್ಷ ರೀಚಾರ್ಜ್ ದರ ಏರಿಕೆಯಿಲ್ಲ! : ಯಾರಿಗೆ ಲಭ್ಯ? ಏನೆಲ್ಲಾ ಪ್ರಯೋಜನ? ಇಲ್ಲಿದೆ ಸಂಪೂರ್ಣ ಮಾಹಿತಿ
ನವದೆಹಲಿ: ಟೆಲಿಕಾಂ ಕ್ಷೇತ್ರದಲ್ಲಿ ಸುಂಕ ಪರಿಷ್ಕರಣೆ ಕುರಿತ ಚರ್ಚೆಗಳು ನಡೆಯುತ್ತಿರುವ ಬೆನ್ನಲ್ಲೇ ರಿಲಯನ್ಸ್ ಜಿಯೋ ತನ್ನ Jio Prime Membership ಅನ್ನು ಮತ್ತೆ ಪರಿಚಯಿಸಿದೆ. ₹300 ಒನ್ಟೈಮ್ ಶುಲ್ಕದ ಈ ಸದಸ್ಯತ್ವದ ಪ್ರಮುಖ ಆಕರ್ಷಣೆ, ಅರ್ಹ ರೀಚಾರ್ಜ್ ಯೋಜನೆಗಳನ್ನು ಸೆಪ್ಟೆಂಬರ್ 5, 2027ರವರೆಗೆ ಪ್ರಸ್ತುತ ದರದಲ್ಲೇ ಮುಂದುವರಿಸುವ ಬೆಲೆ ಖಾತರಿ.
ಹೊಸ ಮತ್ತು ಈಗಿರುವ ಜಿಯೋ ಪ್ರಿಪೇಯ್ಡ್ ಹಾಗೂ ಪೋಸ್ಟ್ಪೇಯ್ಡ್ ಗ್ರಾಹಕರು ಈ ಸದಸ್ಯತ್ವ ಪಡೆಯಬಹುದು. ಇತರ ನೆಟ್ವರ್ಕ್ನ ಗ್ರಾಹಕರು ಹೊಸ ಜಿಯೋ ಸಂಪರ್ಕ ಪಡೆಯುವ ಮೂಲಕ ಅಥವಾ ಜಿಯೋಗೆ ಪೋರ್ಟ್ ಆಗುವ ಮೂಲಕ ಸದಸ್ಯರಾಗಬಹುದು. MyJio ಆ್ಯಪ್, Jio.com, ಜಿಯೋ ಸ್ಟೋರ್ಗಳು ಹಾಗೂ ಅಧಿಕೃತ ಪಾಲುದಾರ ಮಳಿಗೆಗಳ ಮೂಲಕ ಸದಸ್ಯತ್ವ ಪಡೆಯಲು ಅವಕಾಶವಿದೆ.
ಒಂದು ವರ್ಷ ದರ ಏರಿಕೆಯ ಚಿಂತೆ ಇಲ್ಲ : ಜಿಯೋ ಪ್ರೈಮ್ ಸದಸ್ಯತ್ವದ ಪ್ರಮುಖ ಲಾಭವೆಂದರೆ ಪ್ರಸ್ತುತ ರೀಚಾರ್ಜ್ ದರಕ್ಕೆ ಬೆಲೆ ರಕ್ಷಣೆ. ಸದಸ್ಯತ್ವ ಪಡೆದ ಗ್ರಾಹಕರು ಅರ್ಹ ಜಿಯೋ ಯೋಜನೆಗಳನ್ನು ಭವಿಷ್ಯದಲ್ಲಿ ದರ ಪರಿಷ್ಕರಣೆ ನಡೆದರೂ ಖಾತರಿ ಅವಧಿಯಲ್ಲಿ ಇಂದಿನ ದರದಲ್ಲೇ ರೀಚಾರ್ಜ್ ಮಾಡಿಕೊಳ್ಳಬಹುದು. ಈ ಬೆಲೆ ರಕ್ಷಣೆಯ ಅವಧಿ ಸೆಪ್ಟೆಂಬರ್ 5, 2027ರವರೆಗೆ ಇರಲಿದೆ. ಇದರಿಂದ ಮುಂಬರುವ ದಿನಗಳಲ್ಲಿ ಟೆಲಿಕಾಂ ಸುಂಕ ಹೆಚ್ಚಳವಾದರೂ, ಪ್ರೈಮ್ ಸದಸ್ಯರಿಗೆ ಅದು ತಕ್ಷಣದ ಪರಿಣಾಮ ಬೀರುವುದಿಲ್ಲ ಎಂಬುದು ಯೋಜನೆಯ ಪ್ರಮುಖ ಆಕರ್ಷಣೆಯಾಗಿದೆ.
₹600 ಮೌಲ್ಯದ ಕ್ಯಾಶ್ಬ್ಯಾಕ್ ವೋಚರ್ : ₹300 ಸದಸ್ಯತ್ವ ಶುಲ್ಕದ ಜೊತೆಗೆ ಜಿಯೋ ಒಟ್ಟು ₹600 ಮೌಲ್ಯದ ಎರಡು ಕ್ಯಾಶ್ಬ್ಯಾಕ್ ವೋಚರ್ಗಳನ್ನು ನೀಡುತ್ತಿದೆ. ಹೊಸ JioHome ಅಥವಾ JioPC ಸಂಪರ್ಕಕ್ಕೆ ₹300 ವೋಚರ್ ಹಾಗೂ ಸ್ನೇಹಿತರು ಅಥವಾ ಕುಟುಂಬದ ಸದಸ್ಯರಿಗಾಗಿ ಹೊಸ ಜಿಯೋ ಸಿಮ್ ಸಂಪರ್ಕ ಪಡೆದಾಗ ಮತ್ತೊಂದು ₹300 ವೋಚರ್ ಬಳಸಬಹುದು.
ಇದರ ಜೊತೆಗೆ ಪ್ರೈಮ್ ಸದಸ್ಯರಿಗೆ ಆದ್ಯತೆಯ ಗ್ರಾಹಕ ಸೇವೆ, ಹೊಸ ಜಿಯೋ ಉತ್ಪನ್ನಗಳು, ಸೇವೆಗಳು ಮತ್ತು ಟ್ರಯಲ್ಗಳಿಗೆ ಆರಂಭಿಕ ಪ್ರವೇಶ ಸೇರಿದಂತೆ ಹೆಚ್ಚುವರಿ ಸೌಲಭ್ಯಗಳೂ ದೊರೆಯಲಿವೆ.
₹299 ರೀಚಾರ್ಜ್ ಮುಂದುವರಿಕೆ : ಜಿಯೋ ಬಳಕೆದಾರರಿಗೆ ಮತ್ತೊಂದು ಪ್ರಮುಖ ಸುದ್ದಿಯೆಂದರೆ ₹299ರ ಜನಪ್ರಿಯ ಪ್ರಿಪೇಯ್ಡ್ ಯೋಜನೆಯನ್ನು ಮುಂದುವರಿಸುವುದಾಗಿ ಕಂಪನಿ ಸ್ಪಷ್ಟಪಡಿಸಿದೆ. ಈ ಯೋಜನೆಯಲ್ಲಿ ದಿನಕ್ಕೆ 1.5GB ಡೇಟಾ ಮತ್ತು 28 ದಿನಗಳ ವ್ಯಾಲಿಡಿಟಿ ಸೇರಿದಂತೆ ಹಲವು ಪ್ರಯೋಜನಗಳಿವೆ. ಇತ್ತೀಚೆಗೆ ಪ್ರತಿಸ್ಪರ್ಧಿ ಏರ್ಟೆಲ್ ತನ್ನ ₹299 ಸೇರಿದಂತೆ ಕೆಲವು 1.5GB ದೈನಂದಿನ ಡೇಟಾ ಯೋಜನೆಗಳನ್ನು ಸ್ಥಗಿತಗೊಳಿಸಿರುವ ಹಿನ್ನೆಲೆಯಲ್ಲಿ ಜಿಯೋ ನಿರ್ಧಾರ ಗಮನ ಸೆಳೆದಿದೆ.
₹299 ಯೋಜನೆಗೆ ಹೆಚ್ಚುವರಿಯಾಗಿ Google Cloud ಸ್ಟೋರೇಜ್, Google Gemini Pro ಮತ್ತು JioHotstar ಸೇರಿದಂತೆ ಕೆಲವು ಪ್ರಯೋಜನಗಳನ್ನು ಜಿಯೋ ಸೇರಿಸಿದೆ ಎಂದು ವರದಿಯಾಗಿದೆ.
ಸುಂಕ ಹೆಚ್ಚಳಕ್ಕೆ ಮುನ್ನ ಗ್ರಾಹಕ ರಕ್ಷಣೆ? : ಜಿಯೋ ಪ್ರೈಮ್ ಮರುಪ್ರಾರಂಭಿಸಿರುವ ಸಮಯ ಟೆಲಿಕಾಂ ಮಾರುಕಟ್ಟೆಯಲ್ಲಿ ಕುತೂಹಲ ಮೂಡಿಸಿದೆ. ಭವಿಷ್ಯದಲ್ಲಿ ಮೊಬೈಲ್ ಸುಂಕ ಹೆಚ್ಚಾಗಬಹುದು ಎಂಬ ನಿರೀಕ್ಷೆಗಳ ನಡುವೆ ಒಂದು ವರ್ಷ ದರ ಖಾತರಿ ನೀಡಿರುವುದನ್ನು ಕೆಲವರು ಮುಂದಿನ ಸುಂಕ ಪರಿಷ್ಕರಣೆಯ ಸೂಚನೆ ಎಂದು ನೋಡುತ್ತಿದ್ದಾರೆ.
ಆದರೆ ಜಿಯೋ ಈ ಯೋಜನೆಯನ್ನು ದರ ಏರಿಕೆಯ ಮುನ್ಸೂಚನೆಯಾಗಿ ಅಲ್ಲ, ಗ್ರಾಹಕರಿಗೆ ಬೆಲೆ ಸ್ಥಿರತೆಯನ್ನು ನೀಡುವ ಕ್ರಮವಾಗಿ ಬಿಂಬಿಸಿದೆ. ಏರ್ಟೆಲ್ನ ಕೆಲವು ಕಡಿಮೆ ದರದ ಯೋಜನೆಗಳ ಬದಲಾವಣೆಗಳ ನಡುವೆ ಜಿಯೋ ತನ್ನ ಗ್ರಾಹಕರನ್ನು ಉಳಿಸಿಕೊಳ್ಳಲು ಈ ಕೊಡುಗೆಯನ್ನು ಬಳಸುತ್ತಿರುವುದು ಟೆಲಿಕಾಂ ಸ್ಪರ್ಧೆಯ ಮತ್ತೊಂದು ಪ್ರಮುಖ ಬೆಳವಣಿಗೆಯಾಗಿದೆ.
ಒಟ್ಟಿನಲ್ಲಿ, ₹300ಕ್ಕೆ ಜಿಯೋ ಪ್ರೈಮ್ ಸದಸ್ಯತ್ವ ಪಡೆದು ಅರ್ಹ ರೀಚಾರ್ಜ್ಗಳ ದರವನ್ನು ಸೆಪ್ಟೆಂಬರ್ 2027ರವರೆಗೆ ರಕ್ಷಿಸಿಕೊಳ್ಳುವ ಅವಕಾಶ ಗ್ರಾಹಕರಿಗೆ ದೊರೆತಿದೆ. ಅದರ ಜೊತೆಗೆ ಕ್ಯಾಶ್ಬ್ಯಾಕ್, ಆದ್ಯತೆಯ ಸೇವೆ ಮತ್ತು ಆರಂಭಿಕ ಉತ್ಪನ್ನ ಪ್ರವೇಶದಂತಹ ಹೆಚ್ಚುವರಿ ಸೌಲಭ್ಯಗಳೂ ಸಿಗಲಿವೆ. ಸದಸ್ಯತ್ವವು ಆಗಸ್ಟ್ 20ರಿಂದ MyJio ಆ್ಯಪ್ ಸೇರಿದಂತೆ ವಿವಿಧ ಜಿಯೋ ಚಾನೆಲ್ಗಳಲ್ಲಿ ಲಭ್ಯವಾಗಲಿದೆ.
- ‘ಟಾಸ್’ ಸಿನಿಮಾದ ‘ಹೆಲೋ ಹೆಲೋ ನೀಲಾಂಬರಿ’ ಹಾಡು ಬಿಡುಗಡೆ
- ಮಣ್ಣಿನ ನಾಗನ ಬದಲು ನಿಜ ನಾಗರಹಾವಿಗೆ ಪೂಜೆ!
- ಸರ್ಕಾರಿ ಹಾಸ್ಟೆಲ್ ಆಹಾರ ಧಾನ್ಯ ಅಕ್ರಮ ಸಾಗಣೆಗೆ ಸಜ್ಜು: 21 ಕ್ವಿಂಟಲ್ ಅಕ್ಕಿ–ಗೋಧಿ ಪತ್ತೆ
- ಕೆಪಿಎಸ್ಸಿ ಅಕ್ರಮ: ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಮನೆ ಸೇರಿ 21 ಸ್ಥಳಗಳಲ್ಲಿ ಇಡಿ ದಾಳಿ
- ಕ್ಯಾಸಲ್ ರಾಕ್ನಿಂದ ಗೋವಾಕ್ಕೆ ಪ್ರಕೃತಿ ಸೊಬಗಿನ ರೈಲು ಪಯಣ
