ಯುರೋಪ್ ಟ್ರಾವೆಲ್ ಇನ್ನಷ್ಟು ಸುಲಭ: ಫ್ರಾನ್ಸ್ ಹೊಸ ನಿಯಮ ಜಾರಿ
ನವದೆಹಲಿ: ಭಾರತೀಯ ಪ್ರಯಾಣಿಕರಿಗೆ ಮಹತ್ವದ ಸೌಲಭ್ಯ ಒದಗಿಸುವ ನಿರ್ಧಾರವಾಗಿ, ಭಾರತದಲ್ಲಿನ ಫ್ರಾನ್ಸ್ ರಾಯಭಾರ ಕಚೇರಿ ಹೊಸ ಮಾರ್ಗಸೂಚಿ ಪ್ರಕಟಿಸಿದೆ. ಸಾಮಾನ್ಯ ಪಾಸ್ಪೋರ್ಟ್ ಹೊಂದಿರುವ ಭಾರತೀಯರು ಮೂರನೇ ದೇಶಕ್ಕೆ ಪ್ರಯಾಣಿಸುವ ವೇಳೆ ಫ್ರಾನ್ಸ್ನ ವಿಮಾನ ನಿಲ್ದಾಣಗಳಲ್ಲಿ ಲೇಓವರ್ ಇದ್ದರೆ, ಇನ್ನು ಮುಂದೆ ‘ಎರ್ಪೋರ್ಟ್ ಟ್ರಾನ್ಸಿಟ್ ವೀಸಾ’ (ATV) ಅಗತ್ಯವಿಲ್ಲ ಎಂದು ಘೋಷಿಸಲಾಗಿದೆ.
ಈ ಹೊಸ ನಿಯಮವು ವಿಶೇಷವಾಗಿ ಫ್ರಾನ್ಸ್ನ ವಿಮಾನ ನಿಲ್ದಾಣಗಳ ಅಂತರರಾಷ್ಟ್ರೀಯ ಸಾರಿಗೆ ವಲಯ (International Transit Area)ದಲ್ಲಿ ಉಳಿಯುವ ಪ್ರಯಾಣಿಕರಿಗೆ ಅನ್ವಯವಾಗುತ್ತದೆ. ಅಂದರೆ, ಪ್ರಯಾಣಿಕರು ವಿಮಾನ ನಿಲ್ದಾಣದ ಒಳಗಡೆಯೇ ಉಳಿದುಕೊಂಡು ಮುಂದಿನ ವಿಮಾನವನ್ನು ಹಿಡಿದರೆ, ಅವರಿಗೆ ಯಾವುದೇ ಹೆಚ್ಚುವರಿ ವೀಸಾ ಪ್ರಕ್ರಿಯೆ ಅಗತ್ಯವಿರುವುದಿಲ್ಲ.
ಪ್ರಯಾಣಿಕರಿಗೆ ಏನು ಲಾಭ? : ಈ ಕ್ರಮದಿಂದ ಯುರೋಪ್ ಮೂಲಕ ಪ್ರಯಾಣಿಸುವ ಭಾರತೀಯರಿಗೆ ಸಮಯ ಮತ್ತು ವೆಚ್ಚ ಎರಡರಲ್ಲೂ ಉಳಿತಾಯವಾಗಲಿದೆ. ಇದುವರೆಗೆ ಫ್ರಾನ್ಸ್ ಮೂಲಕ ಲೇಓವರ್ ಮಾಡುವಾಗ ATV ವೀಸಾ ಪಡೆಯುವುದು ಅನಿವಾರ್ಯವಾಗಿತ್ತು. ಹೊಸ ನಿಯಮದಿಂದ ಆ ಅಡೆತಡೆ ನಿವಾರಣೆಯಾಗಿದೆ.
ದ್ವಿಪಕ್ಷೀಯ ಮಾತುಕತೆಯ ಫಲ : ಈ ನಿರ್ಧಾರವು ಭಾರತ–ಫ್ರಾನ್ಸ್ ನಡುವಿನ ರಾಜತಾಂತ್ರಿಕ ಸಂಬಂಧಗಳ ಬಲವರ್ಧನೆಯ ಸಂಕೇತವಾಗಿದೆ. ಭಾರತದ ವಿದೇಶಾಂಗ ಸಚಿವಾಲಯ ಈ ಕ್ರಮವನ್ನು ಸ್ವಾಗತಿಸಿದ್ದು, ಇದು ನರೇಂದ್ರ ಮೋದಿ ಮತ್ತು ಎಮ್ಯಾನುಯೆಲ್ ಮ್ಯಾಕ್ರನ್ ನಡುವಿನ ಮಾತುಕತೆಯಲ್ಲಿ ಒಪ್ಪಂದಗೊಂಡ ವಿಷಯವೆಂದು ತಿಳಿಸಿದೆ.
ಇತ್ತೀಚಿನ ಮಾಹಿತಿ ಪ್ರಕಾರ, ಈ ನಿಯಮವು ತಕ್ಷಣದಿಂದಲೇ ಜಾರಿಗೆ ಬಂದಿದ್ದು, ಟ್ರಾನ್ಸಿಟ್ ಪ್ರಯಾಣವನ್ನು ಸುಲಭಗೊಳಿಸಲು ವಿಮಾನ ಕಂಪನಿಗಳು ಹಾಗೂ ವಿಮಾನ ನಿಲ್ದಾಣಗಳಿಗೆ ಸೂಚನೆ ನೀಡಲಾಗಿದೆ. ಪ್ರಯಾಣಿಕರು ತಮ್ಮ ಮುಂದಿನ ಗಮ್ಯಸ್ಥಾನಕ್ಕೆ ಮಾನ್ಯ ವೀಸಾ ಹೊಂದಿರಬೇಕು ಮತ್ತು ವಿಮಾನ ನಿಲ್ದಾಣದ ಅಂತರರಾಷ್ಟ್ರೀಯ ವಲಯವನ್ನು ಬಿಟ್ಟು ಹೊರಗೆ ಹೋಗಬಾರದು ಎಂಬ ಷರತ್ತುಗಳನ್ನು ಪಾಲಿಸಬೇಕು.
ಪ್ರಯಾಣ ಕ್ಷೇತ್ರಕ್ಕೆ ಉತ್ತೇಜನ : ಈ ಕ್ರಮದಿಂದ ಭಾರತದಿಂದ ಯುರೋಪ್ ಮತ್ತು ಅಮೆರಿಕಾ ಕಡೆ ಪ್ರಯಾಣಿಸುವವರ ಸಂಖ್ಯೆ ಹೆಚ್ಚುವ ನಿರೀಕ್ಷೆಯಿದೆ. ಜೊತೆಗೆ, ಫ್ರಾನ್ಸ್ ವಿಮಾನ ನಿಲ್ದಾಣಗಳ ಬಳಕೆ ಹೆಚ್ಚಾಗುವ ಸಾಧ್ಯತೆ ಇದೆ.
