ತಮಿಳುನಾಡಿನ ರಾಜಕೀಯ ಇತಿಹಾಸದಲ್ಲೇ ಹಿಂದೆಂದೂ ಕಾಣದಂತಹ ರೋಚಕ ತಿರುವು ಈಗ ಎದುರಾಗಿದೆ. 234 ಸದಸ್ಯ ಬಲದ ತಮಿಳುನಾಡು ವಿಧಾನಸಭೆಯಲ್ಲಿ ಮ್ಯಾಜಿಕ್ ನಂಬರ್ 118ನ್ನು ತಲುಪಲು ದಳಪತಿ ವಿಜಯ್ ನೇತೃತ್ವದ ಟಿ.ವಿ.ಕೆ (TVK) ಪರದಾಡುತ್ತಿರುವ ಬೆನ್ನಲ್ಲೇ, ಎಡಪ್ಪಾಡಿ ಪಳನಿಸ್ವಾಮಿ ಅವರ ಒಂದು ಪೋಸ್ಟ್ ಇಡೀ ರಾಜ್ಯದ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ.
ಕೇವಲ 107 ಸ್ಥಾನಗಳನ್ನು ಗೆದ್ದು ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದ ವಿಜಯ್ ಅವರಿಗೆ ಈಗ ಮೈತ್ರಿಕೂಟದ ಬೆಂಬಲದ ಅನಿವಾರ್ಯತೆ ಇದೆ. ಈಗಾಗಲೇ ಕಾಂಗ್ರೆಸ್ ಮತ್ತು ಎಡಪಕ್ಷಗಳು ವಿಜಯ್ಗೆ ಹಸಿರು ನಿಶಾನೆ ತೋರಿಸಿವೆ. ಆದರೆ, ಸರ್ಕಾರ ರಚನೆಯ ಅಂತಿಮ ಚಿತ್ರಣ ಮಾತ್ರ ಇನ್ನೂ ನಿಗೂಢವಾಗಿಯೇ ಉಳಿದಿದೆ. ಇಂತಹ ಬಿಗುವಿನ ಸಂದರ್ಭದಲ್ಲಿ ಎಐಎಡಿಎಂಕೆ ಮುಖ್ಯಸ್ಥ ಎಡಪ್ಪಾಡಿ ಪಳನಿಸ್ವಾಮಿ ಅವರು ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಂಡಿರುವ ಸಂದೇಶವೊಂದು ಹೊಸ ಚರ್ಚೆಗೆ ನಾಂದಿ ಹಾಡಿದೆ.
ಯಾವುದೇ ಪಕ್ಷದ ಹೆಸರನ್ನು ಉಲ್ಲೇಖಿಸದೆ, “ತಮಿಳುನಾಡಿನಲ್ಲಿ ಸರ್ಕಾರ ರಚಿಸುತ್ತಿರುವ ಪಕ್ಷಕ್ಕೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳು” ಎಂದು ಎಡಪ್ಪಾಡಿ ಪಳನಿಸ್ವಾಮಿ ಬರೆದುಕೊಂಡಿದ್ದಾರೆ. ಈ “ಸರ್ಕಾರ ರಚಿಸುತ್ತಿರುವ ಪಕ್ಷ” ಎಂಬ ಪ್ರಯೋಗವೇ ಈಗ ರಾಜಕೀಯ ಪಂಡಿತರ ನಿದ್ದೆ ಗೆಡಿಸಿದೆ. ವಿಜಯ್ ಅವರಿಗೆ ಪರೋಕ್ಷವಾಗಿ ಬೆಂಬಲ ಸೂಚಿಸುವ ಅಥವಾ ಅವರ ಬಳಿ ಸಂಖ್ಯಾಬಲ ಇದೆ ಎಂಬ ಸುಳಿವನ್ನು ಪಳನಿಸ್ವಾಮಿ ನೀಡುತ್ತಿದ್ದಾರೆಯೇ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ.
ಇನ್ನೊಂದೆಡೆ, ರಾಜ್ಯಪಾಲ ರಾಜೇಂದ್ರ ವಿಶ್ವನಾಥ್ ಅರ್ಲೇಕರ್ ಅವರ ನಡೆ ಕೂಡ ಕುತೂಹಲ ಮೂಡಿಸಿದೆ. ಈಗಾಗಲೇ ಹಲವಾರು ಬಾರಿ ರಾಜ್ಭವನಕ್ಕೆ ಭೇಟಿ ನೀಡಿ ವಿಜಯ್ ಹಕ್ಕು ಮಂಡಿಸಿದ್ದರೂ, ಸ್ಪಷ್ಟವಾದ ಬಹುಮತದ ಪುರಾವೆಗಾಗಿ ರಾಜ್ಯಪಾಲರು ಕಾಯುತ್ತಿದ್ದಾರೆ. ಈ ಮಧ್ಯೆ ವಿಸಿಕೆ (VCK) ಪಕ್ಷದ ಅಂತಿಮ ನಿರ್ಧಾರವೇ ಈಗ ನಿರ್ಣಾಯಕ ಎನಿಸಿದೆ. ಶಾಸಕರ ನಾಪತ್ತೆ, ತಡರಾತ್ರಿಯ ಸಂಧಾನಗಳು ಮತ್ತು ಖಾತೆಗಳ ಹಂಚಿಕೆಯ ಕುರಿತಾದ ಚೌಕಾಸಿಗಳಿಂದಾಗಿ ಫೋರ್ಟ್ ಸೇಂಟ್ ಜಾರ್ಜ್ನ ಗದ್ದುಗೆ ಯಾರ ಪಾಲಾಗಲಿದೆ ಎಂಬುದು ಒಂದು ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾದಂತೆ ಮಾರ್ಪಟ್ಟಿದೆ.
ಎಐಎಡಿಎಂಕೆ ಸಂಸದರೊಬ್ಬರು “ನಮ್ಮ ನಾಯಕನೇ ಮುಖ್ಯಮಂತ್ರಿಯಾಗಲಿದ್ದಾರೆ” ಎಂಬ ಹೇಳಿಕೆ ನೀಡಿರುವುದು ಈ ಗೊಂದಲವನ್ನು ಮತ್ತಷ್ಟು ಹೆಚ್ಚಿಸಿದೆ. ಒಟ್ಟಿನಲ್ಲಿ, ತಮಿಳುನಾಡಿನ ರಾಜಕೀಯ ರಣರಂಗದಲ್ಲಿ ವಿಜಯ್ ಅವರ ಎಂಟ್ರಿ ದೊಡ್ಡ ಬದಲಾವಣೆಗೆ ಮುನ್ನುಡಿ ಬರೆಯುತ್ತಿದೆಯೇ ಅಥವಾ ಮೈತ್ರಿ ರಾಜಕಾರಣದ ಚಕ್ರವ್ಯೂಹದಲ್ಲಿ ಹೊಸ ಸಮೀಕರಣಗಳು ಜನ್ಮತಾಳುತ್ತಿವೆಯೇ ಎಂಬುದನ್ನು ಕಾದು ನೋಡಬೇಕಿದೆ.
