ಶಿಕ್ಷಕರ ದಿನದಂದು ಮಹತ್ವದ ಘೋಷಣೆ : ಸುಪ್ರೀಂ ಕೋರ್ಟ್‌ನಿಂದ ಹೊಸ ಮಾಸಿಕ ಉಪನ್ಯಾಸ ಸರಣಿ

ಸಿಜೆಐ ಸೂರ್ಯ ಕಾಂತ್ ಮಹತ್ವದ ಘೋಷಣೆ; ಸುಪ್ರೀಂ ಕೋರ್ಟ್‌ನಲ್ಲಿ ಪ್ರತಿ ತಿಂಗಳು ಕಾನೂನು ಉಪನ್ಯಾಸ – ‘ಒಂದು ಪ್ರಮುಖ ವಿಚಾರ, ಪ್ರತಿ ತಿಂಗಳು’ ಹೊಸ ಮಾಸಿಕ ಉಪನ್ಯಾಸ ಸರಣಿ

ನವದೆಹಲಿ: ಕಾನೂನು, ನ್ಯಾಯ ಮತ್ತು ಕಾನೂನು ಶಿಕ್ಷಣಕ್ಕೆ ಸಂಬಂಧಿಸಿದ ಸಮಕಾಲೀನ ವಿಚಾರಗಳ ಕುರಿತು ಸಂವಾದ ಹಾಗೂ ವಿಚಾರ ವಿನಿಮಯಕ್ಕೆ ಹೊಸ ವೇದಿಕೆ ಕಲ್ಪಿಸುವ ಉದ್ದೇಶದಿಂದ ಸುಪ್ರೀಂ ಕೋರ್ಟ್ ಮಾಸಿಕ ಉಪನ್ಯಾಸ ಸರಣಿಯನ್ನು ಆರಂಭಿಸಲಿದೆ ಎಂದು ಭಾರತದ ಮುಖ್ಯ ನ್ಯಾಯಮೂರ್ತಿ (CJI) ಸೂರ್ಯ ಕಾಂತ್ ಘೋಷಿಸಿದ್ದಾರೆ. ಶಿಕ್ಷಕರ ದಿನವಾದ ಸೆಪ್ಟೆಂಬರ್ 5ರಂದು ಈ ಮಹತ್ವದ ಘೋಷಣೆ ಮಾಡಲಾಗಿದೆ.

‘One Important Idea. Every Month’ ಎಂಬ ಪರಿಕಲ್ಪನೆಯಡಿ ಈ ಉಪನ್ಯಾಸ ಸರಣಿ ನಡೆಯಲಿದೆ. ಕಾನೂನು ವ್ಯವಸ್ಥೆ ಹಾಗೂ ಸಮಾಜದ ಮೇಲೆ ಪರಿಣಾಮ ಬೀರುವ ಪ್ರಮುಖ ಸಮಕಾಲೀನ ವಿಷಯಗಳನ್ನು ಪ್ರತಿ ತಿಂಗಳು ಚರ್ಚೆಗೆ ತೆಗೆದುಕೊಳ್ಳುವ ಉದ್ದೇಶವನ್ನು ಹೊಂದಿದೆ.

ಪ್ರತಿ ಆವೃತ್ತಿಯಲ್ಲಿ ಖ್ಯಾತ ನ್ಯಾಯಶಾಸ್ತ್ರಜ್ಞರು, ಕಾನೂನು ತಜ್ಞರು, ಕಾನೂನು ಶಿಕ್ಷಣತಜ್ಞರು ಅಥವಾ ವಿವಿಧ ಕ್ಷೇತ್ರಗಳ ಪರಿಣಿತರು ಮುಖ್ಯ ಉಪನ್ಯಾಸ ನೀಡಲಿದ್ದಾರೆ. ಬಳಿಕ ‘Ideas Dialogue’ ಮೂಲಕ ಯುವ ವಕೀಲರು, ಕಾನೂನು ವಿದ್ಯಾರ್ಥಿಗಳು ಮತ್ತು ಸಂಶೋಧಕರು ಚರ್ಚೆಯಲ್ಲಿ ಭಾಗವಹಿಸಿ ಪ್ರಶ್ನೆಗಳನ್ನು ಕೇಳಲು ಅವಕಾಶ ಕಲ್ಪಿಸಲಾಗುತ್ತದೆ.

ಸಾಮಾನ್ಯ ಉಪನ್ಯಾಸ ಕಾರ್ಯಕ್ರಮಕ್ಕಿಂತ ಭಿನ್ನವಾಗಿ, ನ್ಯಾಯಾಂಗ ಸಂಸ್ಥೆಗಳು, ವಕೀಲ ಸಮುದಾಯ, ಶೈಕ್ಷಣಿಕ ವಲಯ ಹಾಗೂ ಯುವ ಕಾನೂನು ವೃತ್ತಿಪರರ ನಡುವೆ ನಿರಂತರ ಸಂವಾದಕ್ಕೆ ಈ ಸರಣಿಯನ್ನು ಬಳಸಿಕೊಳ್ಳುವ ಉದ್ದೇಶವಿದೆ. ಕಾನೂನು ಮತ್ತು ನ್ಯಾಯ ಕ್ಷೇತ್ರದಲ್ಲಿ ಹೊಸ ಆಲೋಚನೆಗಳು ಹಾಗೂ ವಿಚಾರ ವಿನಿಮಯಕ್ಕೆ ಇದು ನಿಯಮಿತ ವೇದಿಕೆಯಾಗಲಿದೆ.

ಉಪನ್ಯಾಸಗಳನ್ನು ವೃತ್ತಿಪರವಾಗಿ ದಾಖಲಿಸಿ, ಅವುಗಳ ಸಂಪಾದಿತ ಪ್ರತಿಲಿಪಿ ಹಾಗೂ ಸಂಕ್ಷಿಪ್ತ ‘Ideas Papers’ ರೂಪದಲ್ಲಿಯೂ ಸಂಗ್ರಹಿಸುವ ಪ್ರಸ್ತಾವವಿದೆ. ಕಾರ್ಯಕ್ರಮಗಳನ್ನು ಲೈವ್‌ಸ್ಟ್ರೀಮ್ ಮಾಡುವುದರ ಜೊತೆಗೆ, ದೇಶದ ವಿವಿಧ ಭಾಗಗಳ ಕಾನೂನು ಮತ್ತು ಶೈಕ್ಷಣಿಕ ಸಮುದಾಯಕ್ಕೆ ಹೆಚ್ಚಿನ ಪ್ರವೇಶ ಕಲ್ಪಿಸಲು ಭಾರತೀಯ ಭಾಷೆಗಳಲ್ಲಿ ಸಾರಾಂಶಗಳನ್ನು ನೀಡುವ ಉದ್ದೇಶವೂ ಇದೆ.

ಈ ಉಪಕ್ರಮದ ಮೊದಲ ಆವೃತ್ತಿ ಸೆಪ್ಟೆಂಬರ್ 2026ರಲ್ಲಿ ನಡೆಯಲಿದೆ. ಬಳಿಕ ಪ್ರತಿ ತಿಂಗಳು ಒಂದು ಆವೃತ್ತಿಯನ್ನು ಆಯೋಜಿಸುವ ಯೋಜನೆ ಇದೆ. ಇದರ ಮೂಲಕ ಸುಪ್ರೀಂ ಕೋರ್ಟ್‌ನಲ್ಲಿ ಸಮಕಾಲೀನ ಕಾನೂನು ಚಿಂತನೆ, ನ್ಯಾಯಾಂಗ ವಿಚಾರಧಾರೆ ಮತ್ತು ಕಾನೂನು ಶಿಕ್ಷಣದ ಕುರಿತು ನಿರಂತರ ಬೌದ್ಧಿಕ ವೇದಿಕೆಯನ್ನು ರೂಪಿಸುವ ನಿರೀಕ್ಷೆಯಿದೆ.

ಶಿಕ್ಷಕರ ದಿನದಂದು ಘೋಷಿಸಲಾದ ಈ ಉಪಕ್ರಮವು ಕಾನೂನು ಶಿಕ್ಷಣ ಮತ್ತು ನ್ಯಾಯಾಂಗ ಚಿಂತನೆಯ ನಡುವಿನ ಸಂಪರ್ಕವನ್ನು ಮತ್ತಷ್ಟು ಬಲಪಡಿಸುವ ಪ್ರಯತ್ನವಾಗಿದ್ದು, ಅನುಭವಿ ಕಾನೂನು ತಜ್ಞರು ಮತ್ತು ಯುವ ಪೀಳಿಗೆಯ ನಡುವೆ ವಿಚಾರ ವಿನಿಮಯಕ್ಕೆ ಅವಕಾಶ ಕಲ್ಪಿಸಲಿದೆ.

ಪ್ರತಿ ಹೊಸ ಅಪ್‌ಡೇಟ್‌ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್‌ಡೇಟ್‌ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.