ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ಬಾಂಧವ್ಯವು ಕೇವಲ ಎರಡು ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧವಲ್ಲ; ಇದು ಸುಮಾರು 2,000 ವರ್ಷಗಳ ಸುದೀರ್ಘ ಇತಿಹಾಸ ಹೊಂದಿರುವ ನಾಗರಿಕತೆಯ ಬೆಸುಗೆ. ಅನಾದಿ ಕಾಲದಿಂದಲೂ ಸಂಸ್ಕೃತಿ ಮತ್ತು ವ್ಯಾಪಾರದ ಮೂಲಕ ಬೆಸೆದಿದ್ದ ಈ ಕೊಂಡಿ, ಇಂದು ಪ್ರಧಾನಿ ನರೇಂದ್ರ ಮೋದಿ ಅವರ ದೂರದೃಷ್ಟಿಯ ನಾಯಕತ್ವದಲ್ಲಿ ವಿಶ್ವದ ಅತ್ಯಂತ ಬಲಿಷ್ಠ ‘ವ್ಯೂಹಾತ್ಮಕ ಪಾಲುದಾರಿಕೆ’ಯಾಗಿ ರೂಪಾಂತರಗೊಂಡಿದೆ.
ಹಳೆಯ ನೆನಪುಗಳನ್ನು ಕೇವಲ ಇತಿಹಾಸವಾಗಿ ನೋಡದೆ, ಅವುಗಳನ್ನೇ ಅಡಿಪಾಯವನ್ನಾಗಿಸಿಕೊಂಡು ಭವಿಷ್ಯದ ತಂತ್ರಜ್ಞಾನ ಮತ್ತು ಭದ್ರತೆಯ ಸೌಧವನ್ನು ಎರಡೂ ದೇಶಗಳು ಜಂಟಿಯಾಗಿ ನಿರ್ಮಿಸುತ್ತಿವೆ.
ಸಂಸ್ಕೃತಿಯೇ ಸಂಬಂಧದ ಬುನಾದಿ: ರಾಮಾಯಣ, ಮಹಾಭಾರತ, ಸಂಸ್ಕೃತ ಭಾಷೆ ಮತ್ತು ಗರುಡನಂತಹ ಹಂಚಿಕೆಯ ಸಾಂಸ್ಕೃತಿಕ ಗುರುತುಗಳು ಇಂದು ಕೇವಲ ಇತಿಹಾಸದ ಪುಟಗಳಲ್ಲ; ಅವು ಎರಡೂ ದೇಶಗಳ ನಡುವಿನ ನಂಬಿಕೆಯ ಆಧಾರಸ್ತಂಭಗಳಾಗಿವೆ. ಇಂಡೋನೇಷ್ಯಾ ಅಧ್ಯಕ್ಷ ಪ್ರಬೋವೊ ಸುಬಿಯಾಂಟೊ ಅವರು ತಮ್ಮಲ್ಲಿ ‘ಭಾರತೀಯ ಡಿಎನ್ಎ’ ಇದೆ ಎಂದು ಹೇಳಿರುವುದು ಭಾರತದ ಬೆಳೆಯುತ್ತಿರುವ ಸಾಂಸ್ಕೃತಿಕ ಪ್ರಭಾವಕ್ಕೆ ಸಾಕ್ಷಿಯಾಗಿದೆ.
ಪ್ರಧಾನಿ ಮೋದಿಯವರ ‘ವಿಕಾಸ್ ಭಿ, ವಿರಾಸತ್ ಭಿ’ (ಅಭಿವೃದ್ಧಿಯ ಜೊತೆಗೆ ಪರಂಪರೆ) ಎಂಬ ಮಂತ್ರದಡಿ, ಇಂಡೋನೇಷ್ಯಾದಲ್ಲಿರುವ ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾದ 9ನೇ ಶತಮಾನದ ‘ಪ್ರಂಬನನ್ ಹಿಂದೂ ದೇವಾಲಯ’ದ ಸಂರಕ್ಷಣೆಗೆ ಭಾರತ ನೆರವು ನೀಡುತ್ತಿದೆ. ಇದು ಹಂಚಿಕೆಯ ಸಾಂಸ್ಕೃತಿಕ ಪರಂಪರೆಯನ್ನು ಕಾಪಾಡುವ ಭಾರತದ ಬದ್ಧತೆಯನ್ನು ಎತ್ತಿ ತೋರಿಸುತ್ತದೆ.
ರಾಜತಾಂತ್ರಿಕ ಇತಿಹಾಸವನ್ನು ಗಮನಿಸಿದರೆ, 1965ರ ಯುದ್ಧದ ಸಮಯದಲ್ಲಿ ಇಂಡೋನೇಷ್ಯಾ ಪಾಕಿಸ್ತಾನವನ್ನು ಬೆಂಬಲಿಸಿತ್ತು. ಆದರೆ ಇಂದು ಮೋದಿಯವರ ಚಾಣಾಕ್ಷ ವಿದೇಶಾಂಗ ನೀತಿಯಿಂದಾಗಿ ಇಂಡೋನೇಷ್ಯಾ ಭಾರತದ ಅತ್ಯಂತ ಆಪ್ತ ವ್ಯೂಹಾತ್ಮಕ ಪಾಲುದಾರನಾಗಿ ಬದಲಾಗಿದೆ. ಭಾರತದಿಂದ ಬ್ರಹ್ಮೋಸ್ ಸುಪರ್ಸಾನಿಕ್ ಕ್ರೂಸ್ ಕ್ಷಿಪಣಿಗಳು ಮತ್ತು ಅಸ್ತ್ರ (Astra) ಕ್ಷಿಪಣಿಗಳನ್ನು ಖರೀದಿಸಲು ಇಂಡೋನೇಷ್ಯಾ ಒಪ್ಪಂದ ಮಾಡಿಕೊಂಡಿದೆ.
ಅಷ್ಟೇ ಅಲ್ಲದೆ, ಇಂಡೋನೇಷ್ಯಾದ ರಕ್ಷಣಾ ಅಧಿಕಾರಿಗಳಿಗೆ ಭಾರತದ ಎನ್ಡಿಎ (NDA) ಮತ್ತು ಡಿಎಸ್ಎಸ್ಸಿ (DSSC) ಸಂಸ್ಥೆಗಳಲ್ಲಿ ತರಬೇತಿ ನೀಡಲು ನಿರ್ಧರಿಸಲಾಗಿದೆ. ಇನ್ನು ಅತ್ಯಂತ ಪ್ರಮುಖವಾಗಿ, ಮಲಕ್ಕಾ ಜಲಸಂಧಿಯ ಸಮೀಪವಿರುವ ಆಯಕಟ್ಟಿನ ‘ಸಬಾಂಗ್ ಬಂದರು’ ಅನ್ನು ಎರಡೂ ದೇಶಗಳು ಜಂಟಿಯಾಗಿ ಅಭಿವೃದ್ಧಿಪಡಿಸಲಿವೆ. ಇದು ಹಿಂದೂ ಮಹಾಸಾಗರದಲ್ಲಿ ಸಮುದ್ರ ಭದ್ರತೆ ಮತ್ತು ಜಾಗತಿಕ ವ್ಯಾಪಾರಕ್ಕೆ ಭಾರಿ ಬಲ ನೀಡಲಿದೆ.
ಶಿಕ್ಷಣ, ತಂತ್ರಜ್ಞಾನ ಮತ್ತು ಡಿಜಿಟಲ್ ಕ್ರಾಂತಿ: ಭಾರತದ ಸಾಫ್ಟ್ ಪವರ್ ಈಗ ಕೇವಲ ಯೋಗ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಸೀಮಿತವಾಗಿಲ್ಲ. ಐಐಎಂ ಬೆಂಗಳೂರು ತನ್ನ ಮೊದಲ ವಿದೇಶಿ ಕ್ಯಾಂಪಸ್ ಅನ್ನು ಇಂಡೋನೇಷ್ಯಾದಲ್ಲಿ ತೆರೆಯುತ್ತಿದೆ. ಈ ಮೂಲಕ ಭಾರತದ ಪ್ರೀಮಿಯಂ ಮ್ಯಾನೇಜ್ಮೆಂಟ್ ಶಿಕ್ಷಣ ಬ್ರ್ಯಾಂಡ್ ಈಗ ಆಗ್ನೇಯ ಏಷ್ಯಾಕ್ಕೂ ಲಗ್ಗೆ ಇಟ್ಟಿದೆ. ಆರ್ಥಿಕ ವಹಿವಾಟಿನಲ್ಲಿ ಭಾರತದ ಯುಪಿಐ (UPI) ಮತ್ತು ಇಂಡೋನೇಷ್ಯಾದ ಕ್ಯೂಆರ್ಐಎಸ್ (QRIS) ಸಂಯೋಜನೆಗೆ ಚಿಂತನೆ ನಡೆದಿದೆ.
ಅಲ್ಲದೆ, ಇಂಡೋನೇಷ್ಯಾ ತನ್ನದೇ ಆದ ಎಲೆಕ್ಟ್ರಾನಿಕ್ ವೋಟಿಂಗ್ ಯಂತ್ರಗಳನ್ನು (EVM) ಅಭಿವೃದ್ಧಿಪಡಿಸಲು ಭಾರತದ ಚುನಾವಣಾ ಆಯೋಗವು ತಾಂತ್ರಿಕ ನೆರವು ನೀಡಲಿದೆ. ಬಾಹ್ಯಾಕಾಶ ಸಂಶೋಧನೆಯಲ್ಲೂ ಎರಡೂ ರಾಷ್ಟ್ರಗಳು ಕೈಜೋಡಿಸಿದ್ದು, ಉಪಗ್ರಹ ತಂತ್ರಜ್ಞಾನದ ಮೂಲಕ ಕೃಷಿ ಮತ್ತು ವಿಪತ್ತು ನಿರ್ವಹಣೆಗೆ ಹೊಸ ದಾರಿ ಕಂಡುಕೊಳ್ಳಲಿವೆ.
ಆರ್ಥಿಕತೆ ಮತ್ತು ಸಾಮಾಜಿಕ ಕಲ್ಯಾಣ: ಇಂಡೋನೇಷ್ಯಾದ 28 ಕೋಟಿ ಜನರಿಗೆ ಕೈಗೆಟುಕುವ ದರದಲ್ಲಿ ಭಾರತೀಯ ಔಷಧಿಗಳು ಲಭ್ಯವಾಗುವಂತೆ ಮಹತ್ವದ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಇದರೊಂದಿಗೆ ಭಾರತವು ತನ್ನ ‘ಬಿಸಿಯೂಟ ಯೋಜನೆ’ ಮತ್ತು ‘ಸಾರ್ವಜನಿಕ ವಿತರಣಾ ವ್ಯವಸ್ಥೆ’ಯ ಯಶಸ್ವಿ ಮಾದರಿಗಳನ್ನು ಇಂಡೋನೇಷ್ಯಾ ಜೊತೆ ಹಂಚಿಕೊಂಡಿದೆ. ಕೃಷಿ ಕ್ಷೇತ್ರದಲ್ಲಿ ಆಹಾರ ಭದ್ರತೆಯನ್ನು ಹೆಚ್ಚಿಸಲು ಭಾರತವು 100 ಟನ್ ಉತ್ತಮ ಗುಣಮಟ್ಟದ ಗೋಧಿ ಬೀಜಗಳನ್ನು ಇಂಡೋನೇಷ್ಯಾಕ್ಕೆ ಪೂರೈಸುವುದಾಗಿ ಘೋಷಿಸಿದೆ.
ಪ್ರಧಾನಿ ಮೋದಿಯವರ ‘ಮಹಾಸಾಗರ’ ದೃಷ್ಟಿಕೋನದಡಿ ಹಿಂದೂ ಮಹಾಸಾಗರ ಮತ್ತು ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ಶಾಂತಿ, ಸ್ಥಿರತೆ ಮತ್ತು ಎಲ್ಲರನ್ನೂ ಒಳಗೊಳ್ಳುವ ಬೆಳವಣಿಗೆಗೆ ಎರಡೂ ರಾಷ್ಟ್ರಗಳು ಬದ್ಧವಾಗಿವೆ. ಪ್ರಧಾನಿ ಮೋದಿಯವರಿಗೆ ಇಂಡೋನೇಷ್ಯಾದ ಅತ್ಯುನ್ನತ ನಾಗರಿಕ ಪ್ರಶಸ್ತಿ ‘ಬಿತಾಂಗ್ ಅದಿಪುರ್ಣ’ ನೀಡಿ ಗೌರವಿಸಿರುವುದು ಈ ಸ್ನೇಹದ ಆಳ ಮತ್ತು ಜಾಗತಿಕ ನಾಯಕತ್ವಕ್ಕೆ ಸಂದ ಗೌರವವಾಗಿದೆ.
ಪುರಾತನ ಕಾಲದಲ್ಲಿ ಭಾರತೀಯ ವ್ಯಾಪಾರಿಗಳು ಮತ್ತು ಬೌದ್ಧ ಭಿಕ್ಷುಗಳು ನಿರ್ಮಿಸಿದ್ದ ಆ ನಂಬಿಕೆಯ ಸೇತುವೆ, ಇಂದು ಆಧುನಿಕ ತಂತ್ರಜ್ಞಾನ ಮತ್ತು ಮಿಲಿಟರಿ ಶಕ್ತಿಯ ರೂಪದಲ್ಲಿ ಮರುಹುಟ್ಟು ಪಡೆದಿದೆ. ಇದು ಭಾರತದ ವಿದೇಶಾಂಗ ನೀತಿಯ ಮಹತ್ತರ ಯಶಸ್ಸಾಗಿದೆ.
