ಬಸ್ ಪ್ರಯಾಣಿಕರಿಗೆ ಬೆಲೆ ಏರಿಕೆ ಬಿಸಿ: ಮೆಜೆಸ್ಟಿಕ್‌ನಿಂದ ಬನಶಂಕರಿಗೆ ₹35, ಮೈಸೂರಿಗೆ ₹197!
ಬೆಂಗಳೂರು: ಹಾಲು ಮತ್ತು ಮೊಸರಿನ ಬೆಲೆ ಏರಿಕೆಯ ಬೆನ್ನಲ್ಲೇ ಕರ್ನಾಟಕದ ಸಾರ್ವಜನಿಕ ಸಾರಿಗೆ ಪ್ರಯಾಣಿಕರಿಗೂ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ರಾಜ್ಯ ಸರ್ಕಾರವು ಕೆಎಸ್‌ಆರ್‌ಟಿಸಿ, ಬಿಎಂಟಿಸಿ, ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ನಿಗಮ (NWKRTC) ಹಾಗೂ ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮ (KKRTC) ವ್ಯಾಪ್ತಿಯ ಬಸ್ ಪ್ರಯಾಣ ದರವನ್ನು ಪರಿಷ್ಕರಿಸಿದ್ದು, ನವೆಂಬರ್ 4–5ರ ಮಧ್ಯರಾತ್ರಿಯಿಂದಲೇ ನೂತನ ದರಗಳು ಜಾರಿಗೆ ಬರಲಿವೆ. ಸಾಮಾನ್ಯ ಕೆಎಸ್‌ಆರ್‌ಟಿಸಿ ಸೇವೆಗಳಲ್ಲಿ ಗರಿಷ್ಠ ₹9 ಹೆಚ್ಚಳವಾಗಿದ್ದರೆ, ಬಿಎಂಟಿಸಿ ನಗರ ಬಸ್‌ಗಳ ದರದಲ್ಲಿ ಬಹಳಷ್ಟು ಏರಿಕೆಯಾಗಿದೆ.
ಸಾರಿಗೆ ಸಚಿವ ಭೈರತಿ ಸುರೇಶ್ ಅವರು ಬೆಂಗಳೂರಿನಲ್ಲಿ ದರ ಪರಿಷ್ಕರಣೆಯನ್ನು ಪ್ರಕಟಿಸಿದ್ದು, ಡೀಸೆಲ್ ಬೆಲೆ ಏರಿಕೆ, ನೌಕರರ ವೇತನ, ನಿರ್ವಹಣೆ ಮತ್ತು ಇತರ ಕಾರ್ಯಾಚರಣೆಯ ವೆಚ್ಚಗಳ ಹೆಚ್ಚಳವೇ ದರ ಏರಿಕೆಗೆ ಪ್ರಮುಖ ಕಾರಣ ಎಂದು ತಿಳಿಸಿದ್ದಾರೆ. ನಾಲ್ಕೂ ಸಾರಿಗೆ ನಿಗಮಗಳ ಒಟ್ಟು ಆರ್ಥಿಕ ಹೊರೆ ಹಾಗೂ ಬಾಕಿ ಪಾವತಿಗಳನ್ನು ಗಮನದಲ್ಲಿಟ್ಟುಕೊಂಡು ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಬೆಂಗಳೂರಿನ ಬಿಎಂಟಿಸಿ ಪ್ರಯಾಣಿಕರಿಗೆ ಹೊಸ ದರ ಎಷ್ಟು?
ಬೆಂಗಳೂರು ನಗರದೊಳಗೆ ಸಂಚರಿಸುವ ಸಾಮಾನ್ಯ ಬಸ್‌ಗಳ ಟಿಕೆಟ್ ದರದಲ್ಲಿ ಗಮನಾರ್ಹ ಬದಲಾವಣೆಯಾಗಿದೆ. 2 ಕಿ. ಮೀ ವರೆಗಿನ ಪ್ರಯಾಣಕ್ಕೆ ರೂ 4 ರಷ್ಟು ದರ ಹೆಚ್ಚಳವಾಗಿದ್ದು, 2 ಕಿ. ಮೀ ನಿಂದ 4 ಕಿ. ಮೀ ವರೆಗಿನ ಪ್ರಯಾಣಕ್ಕೆ ರೂ 6 ರಷ್ಟು ದರ ಹೆಚ್ಚಳವಾಗಿದ್ದು, ದೂರದ ಪ್ರಯಾಣಕ್ಕೆ ಗರಿಷ್ಠ ದರ 12 ರೂ ಹೆಚ್ಚಳವಾಗಿದೆ.
ಪ್ರಮುಖ ಸ್ಥಳಗಳಿಗೆ ಸಾಮಾನ್ಯ ಸಾರಿಗೆ ಸೇವೆಗಳ ಪ್ರಯಾಣ ದರದ ವಿವರಗಳು
| ಎಲ್ಲಿಂದ | ಎಲ್ಲಿಗೆ | ಪ್ರಸ್ತುತ ದರ | ಪರಿಷ್ಕೃತ ದರ |
|---|---|---|---|
| ಕೆಂಪೇಗೌಡ ಬಸ್ ನಿಲ್ದಾಣ | ಶಿವಾಜಿನಗರ | ₹ 12 | ₹ 18 |
| ಕೆಂಪೇಗೌಡ ಬಸ್ ನಿಲ್ದಾಣ | ಯಶವಂತಪುರ | ₹ 18 | ₹ 25 |
| ಕೆಂಪೇಗೌಡ ಬಸ್ ನಿಲ್ದಾಣ | ಬನಶಂಕರಿ | ₹ 23 | ₹ 35 |
| ಕೆಂಪೇಗೌಡ ಬಸ್ ನಿಲ್ದಾಣ | ಅತ್ತಿಬೆಲೆ | ₹ 30 | ₹ 42 |
| ಕೆಂಪೇಗೌಡ ಬಸ್ ನಿಲ್ದಾಣ | ವಿಜಯನಗರ | ₹ 18 | ₹ 25 |
| ಕೆಂಪೇಗೌಡ ಬಸ್ ನಿಲ್ದಾಣ | ಕಾಡುಗೋಡಿ | ₹ 30 | ₹ 40 |
| ಕೆ. ಆರ್. ಮಾರುಕಟ್ಟೆ | ನೆಲಮಂಗಲ | ₹ 30 | ₹ 40 |
| ಕೆ. ಆರ್. ಮಾರುಕಟ್ಟೆ | ಹೊಸಕೋಟೆ | ₹ 30 | ₹ 40 |
ವಜ್ರ ಎಸಿ ಬಸ್‌ಗಳಿಗೂ ದರ ಏರಿಕೆ : ಬಿಎಂಟಿಸಿಯ ಹವಾನಿಯಂತ್ರಿತ ವಜ್ರ ಬಸ್‌ಗಳಲ್ಲಿ ಪ್ರಯಾಣಿಸುವವರಿಗೂ ದರ ಹೆಚ್ಚಳ ಅನ್ವಯವಾಗಲಿದೆ.
| ಎಲ್ಲಿಂದ | ಎಲ್ಲಿಗೆ | ಪ್ರಸ್ತುತ ದರ | ಪರಿಷ್ಕೃತ ದರ |
|---|---|---|---|
| ಸೆಂಟ್ರಲ್‌ ಸಿಲ್ಕ್ ಬೋರ್ಡ್ | ಹೆಬ್ಬಾಳ | ₹ 55 | ₹ 65 |
| ಬನಶಂಕರಿ | ಐಟಿಪಿಎಲ್‌ | ₹ 50 | ₹ 60 |
| ಕೆ.ಆರ್. ಪುರ | ಸೆಂಟ್ರಲ್‌ ಸಿಲ್ಕ್ ಬೋರ್ಡ್ | ₹ 40 | ₹ 55 |
| ಸೆಂಟ್ರಲ್‌ ಸಿಲ್ಕ್ ಬೋರ್ಡ್ | ಕಾಡುಗೋಡಿ | ₹ 50 | ₹ 60 |
| ಕೆಂಪೇಗೌಡ ಬಸ್ ನಿಲ್ದಾಣ | ಅತ್ತಿಬೆಲೆ | ₹ 60 | ₹ 70 |
ಬೆಂಗಳೂರು ಹೊರವಲಯ ಮತ್ತು ಅಂತರನಗರ ಪ್ರಯಾಣವೂ ದುಬಾರಿ : ಬೆಂಗಳೂರು ನಗರದಿಂದ ಹೊರ ಜಿಲ್ಲೆಗಳಿಗೆ ಸಂಚರಿಸುವ ಎಕ್ಸ್‌ಪ್ರೆಸ್ ಬಸ್‌ಗಳ ಪ್ರಯಾಣ ದರದಲ್ಲಿಯೂ ಏರಿಕೆ ಮಾಡಲಾಗಿದೆ. ಟೋಲ್ ಶುಲ್ಕ ಮತ್ತು ಇತರ ಹೆಚ್ಚುವರಿ ಶುಲ್ಕಗಳನ್ನು ಹೊರತುಪಡಿಸಿ ಪ್ರಮುಖ ಮಾರ್ಗಗಳ ಹೊಸ ದರಗಳು ಹೀಗಿವೆ
| ಎಲ್ಲಿಂದ | ಎಲ್ಲಿಗೆ | ಪ್ರಸ್ತುತ ದರ | ಪರಿಷ್ಕೃತ ದರ |
|---|---|---|---|
| ಕೆಂಪೇಗೌಡ ಬಸ್ ನಿಲ್ದಾಣ | ಮೈಸೂರು | ₹ 160 | ₹ 197 |
| ಕೆಂಪೇಗೌಡ ಬಸ್ ನಿಲ್ದಾಣ | ಮಂಡ್ಯ | ₹ 110 | ₹ 136 |
| ಕೆಂಪೇಗೌಡ ಬಸ್ ನಿಲ್ದಾಣ | ತುಮಕೂರು | ₹ 81 | ₹ 100 |
| ಕೆಂಪೇಗೌಡ ಬಸ್ ನಿಲ್ದಾಣ | ಹಾಸನ | ₹ 219 | ₹ 270 |
| ಕೆಂಪೇಗೌಡ ಬಸ್ ನಿಲ್ದಾಣ | ಚಿಕ್ಕಮಗಳೂರು | ₹ 295 | ₹ 363 |
ಶಕ್ತಿ ಯೋಜನೆಯ ಮಹಿಳಾ ಪ್ರಯಾಣಿಕರಿಗೆ ವಿನಾಯಿತಿ ಮುಂದುವರಿಕೆ : ದರ ಏರಿಕೆಯ ನಡುವೆಯೂ ಕರ್ನಾಟಕದ ನಿವಾಸಿ ಮಹಿಳೆಯರಿಗೆ ಶಕ್ತಿ ಯೋಜನೆಯಡಿ ರಾಜ್ಯದೊಳಗಿನ ಸರ್ಕಾರಿ ಸಾಮಾನ್ಯ ಹಾಗೂ ಇತರ ಅರ್ಹ ನಾನ್‌ಎಸಿ ಬಸ್‌ಗಳಲ್ಲಿ ಉಚಿತ ಪ್ರಯಾಣ ಸೌಲಭ್ಯ ಮುಂದುವರಿಯಲಿದೆ. ಐಷಾರಾಮಿ ಮತ್ತು ಹವಾನಿಯಂತ್ರಿತ ಬಸ್‌ಗಳಿಗೆ ಈ ಉಚಿತ ಪ್ರಯಾಣದ ಸೌಲಭ್ಯ ಅನ್ವಯಿಸುವುದಿಲ್ಲ.
ದರ ಏರಿಕೆಗೆ ಕಾರಣವೇನು? : ಸಾರಿಗೆ ಸಚಿವರ ಪ್ರಕಾರ, ಡೀಸೆಲ್ ಬೆಲೆ ಪ್ರತಿ ಲೀಟರ್‌ಗೆ ₹10.47ರಷ್ಟು ಹೆಚ್ಚಳವಾಗಿದ್ದು, ಇದರಿಂದ ಸಾರಿಗೆ ನಿಗಮಗಳಿಗೆ ವಾರ್ಷಿಕ ಸುಮಾರು ₹500 ಕೋಟಿ ಹೆಚ್ಚುವರಿ ಹೊರೆ ಉಂಟಾಗಿದೆ. ನಿಗಮಗಳ ಒಟ್ಟು ವೆಚ್ಚದಲ್ಲಿ ಸುಮಾರು ಶೇ.80ರಷ್ಟು ಹಣ ಡೀಸೆಲ್ ಮತ್ತು ಸಿಬ್ಬಂದಿ ವೆಚ್ಚಕ್ಕೆ ವಿನಿಯೋಗವಾಗುತ್ತಿದೆ. ನೌಕರರ ವೇತನ, ನಿರ್ವಹಣೆ ಹಾಗೂ ಇತರ ಕಾರ್ಯಾಚರಣೆಯ ವೆಚ್ಚಗಳೂ ಹೆಚ್ಚಾಗಿವೆ.
ಸಾರಿಗೆ ನಿಗಮಗಳ ಆರ್ಥಿಕ ಸ್ಥಿತಿಯನ್ನು ಸುಧಾರಿಸುವುದು ಮತ್ತು ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನು ನಿರಂತರವಾಗಿ ನಿರ್ವಹಿಸುವ ಉದ್ದೇಶದಿಂದ ದರ ಪರಿಷ್ಕರಣೆ ಮಾಡಲಾಗಿದೆ ಎಂದು ಸರ್ಕಾರ ಸಮರ್ಥಿಸಿಕೊಂಡಿದೆ.
ಹಾಲು, ಮೊಸರು ಹಾಗೂ ಇದೀಗ ಬಸ್ ಪ್ರಯಾಣ ದರ ಏರಿಕೆಯಾಗಿರುವುದರಿಂದ ಸಾಮಾನ್ಯ ಕುಟುಂಬಗಳ ಮಾಸಿಕ ಖರ್ಚು ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ವಿಶೇಷವಾಗಿ ಪ್ರತಿದಿನ ಕೆಲಸ, ಶಿಕ್ಷಣ ಹಾಗೂ ಉದ್ಯೋಗದ ನಿಮಿತ್ತ ಬಸ್‌ಗಳನ್ನು ಅವಲಂಬಿಸುವ ಪ್ರಯಾಣಿಕರು ತಮ್ಮ ಪ್ರಯಾಣದ ಬಜೆಟ್‌ನಲ್ಲಿ ಬದಲಾವಣೆ ಮಾಡಿಕೊಳ್ಳಬೇಕಾದ ಅನಿವಾರ್ಯತೆ ಎದುರಾಗಿದೆ.
- ಬಿಗ್‌ ಬಾಸ್‌ನಲ್ಲಿ ಎಮೋಷನಲ್: ಪತ್ರ ಕಳೆದುಕೊಂಡರೂ ಗಾನವಿಯನ್ನು ತಬ್ಬಿ ಸಮಾಧಾನ ಮಾಡಿದ ಆಸಿಯಾ!
- ಸಿಲಿಕಾನ್ ಸಿಟಿ ಜನರು ಪ್ರಯಾಣ ಬೆಳೆಸುವ ಮುನ್ನ ಹೊಸ ದರ ಗಮನಿಸಿ
- ಶಾಶ್ವತ ಅಧಿಕಾರದ ಭ್ರಮೆಯಲ್ಲಿ ಸಿಎಂ, ಖರ್ಗೆ
- ‘ಲಕ್ಷ್ಮಿಪುತ್ರ’ ಚಿತ್ರದ ‘ಐ ಲವ್ ಯೂ ಪರಿಮಳ’ ಹಾಡು ರಿಲೀಸ್: ನವೆಂಬರ್‌ಕ್ಕೆ ನಟ ಚಿಕ್ಕಣ್ಣ ಸಿನಿಮಾ ತೆರೆಗೆ!
- ವಿರಾಟ್ ಅಬ್ಬರ: ನ್ಯೂಜಿಲೆಂಡ್ ವಿರುದ್ಧದ ಏಕದಿನ ಪಂದ್ಯದಲ್ಲಿ ಭಾರತಕ್ಕೆ ಶುಭಾರಂಭ
