ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿ (CCEA) ಮಹತ್ವದ ನಿರ್ಧಾರ ಕೈಗೊಂಡಿದ್ದು, ರೈಲ್ವೆ ಸಚಿವಾಲಯದ ಒಟ್ಟು ₹23,437 ಕೋಟಿ ವೆಚ್ಚದ ಮೂರು ಪ್ರಮುಖ ಮಲ್ಟಿ-ಟ್ರ್ಯಾಕಿಂಗ್ ಯೋಜನೆಗಳಿಗೆ ಅನುಮೋದನೆ ನೀಡಿದೆ. ಈ ಯೋಜನೆಗಳು ದೇಶದ ರೈಲು ಮಾರ್ಗ ಸಾಮರ್ಥ್ಯವನ್ನು ಹೆಚ್ಚಿಸಿ, ಸಂಪರ್ಕ ಮತ್ತು ಲಾಜಿಸ್ಟಿಕ್ ದಕ್ಷತೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶ ಹೊಂದಿವೆ.
ಅನುಮೋದನೆ ಪಡೆದ ಯೋಜನೆಗಳು: ನಾಗ್ಡಾ–ಮಥುರಾ 3ನೇ ಮತ್ತು 4ನೇ ರೈಲು ಮಾರ್ಗ, ಗುಂತಕಲ್–ವಾಡಿ 3ನೇ ಮತ್ತು 4ನೇ ರೈಲು ಮಾರ್ಗ, ಬುರ್ವಾಲ್–ಸೀತಾಪುರ್ 3ನೇ ಮತ್ತು 4ನೇ ರೈಲು ಮಾರ್ಗ
ಈ ಮೂರು ಯೋಜನೆಗಳು ಒಟ್ಟಾರೆ ಸುಮಾರು 901 ಕಿ.ಮೀ. ರೈಲು ಜಾಲವನ್ನು ವಿಸ್ತರಿಸಲಿದ್ದು, ಮಧ್ಯಪ್ರದೇಶ, ರಾಜಸ್ಥಾನ, ಉತ್ತರ ಪ್ರದೇಶ, ಕರ್ನಾಟಕ, ಆಂಧ್ರಪ್ರದೇಶ ಮತ್ತು ತೆಲಂಗಾಣ ಸೇರಿದಂತೆ 19 ಜಿಲ್ಲೆಗಳಿಗೆ ವ್ಯಾಪಿಸುತ್ತವೆ. ಸುಮಾರು 83 ಲಕ್ಷ ಜನಸಂಖ್ಯೆ ಹೊಂದಿರುವ 4,161 ಹಳ್ಳಿಗಳಿಗೆ ಸಂಪರ್ಕ ಸುಧಾರಣೆ ಆಗಲಿದೆ.
ಈ ಯೋಜನೆಗಳು ಪ್ರಧಾನ ಮಂತ್ರಿಯ ‘ಗತಿ ಶಕ್ತಿ ರಾಷ್ಟ್ರೀಯ ಮಾಸ್ಟರ್ ಪ್ಲಾನ್’ ಅಡಿಯಲ್ಲಿ ರೂಪಗೊಂಡಿದ್ದು, ಜನರು, ಸರಕುಗಳು ಮತ್ತು ಸೇವೆಗಳ ನಿರಂತರ ಚಲನೆಗೆ ನೆರವಾಗಲಿವೆ. ಹೆಚ್ಚುವರಿ ರೈಲು ಮಾರ್ಗಗಳಿಂದ ದಟ್ಟಣೆ ಕಡಿಮೆಯಾಗಿದ್ದು, ರೈಲ್ವೆ ಕಾರ್ಯಾಚರಣೆಗಳ ವೇಗ ಮತ್ತು ವಿಶ್ವಾಸಾರ್ಹತೆ ಹೆಚ್ಚಲಿದೆ.
ಸರಕು ಸಾಗಣೆಯ ದೃಷ್ಟಿಯಿಂದ, ಕಲ್ಲಿದ್ದಲು, ಸಿಮೆಂಟ್, ಉಕ್ಕು, ಆಹಾರ ಧಾನ್ಯಗಳು ಮತ್ತು ರಸಗೊಬ್ಬರಗಳ ಸಾಗಣೆಗೆ ಈ ಮಾರ್ಗಗಳು ಪ್ರಮುಖವಾಗಿವೆ. ಸಾಮರ್ಥ್ಯ ವೃದ್ಧಿಯಿಂದ ವರ್ಷಕ್ಕೆ 60 ಮಿಲಿಯನ್ ಟನ್ ಹೆಚ್ಚುವರಿ ಸರಕು ಸಾಗಣೆ ಸಾಧ್ಯವಾಗಲಿದೆ. ಇದರಿಂದ ಲಾಜಿಸ್ಟಿಕ್ ವೆಚ್ಚ ಕಡಿಮೆಯಾಗುವುದರ ಜೊತೆಗೆ ಪರಿಸರದ ಮೇಲಿನ ಒತ್ತಡವೂ ಇಳಿಯಲಿದೆ. ಅಂದಾಜು 37 ಕೋಟಿ ಲೀಟರ್ ಇಂಧನ ಉಳಿತಾಯ ಮತ್ತು 185 ಕೋಟಿ ಕೆಜಿ CO2 ಹೊರಸೂಸುವಿಕೆ ಕಡಿತವಾಗುವ ನಿರೀಕ್ಷೆಯಿದೆ.
ಈ ಯೋಜನೆಗಳು ಮಹಾಕಾಳೇಶ್ವರ, ರಣಥಂಬೋರ್ ರಾಷ್ಟ್ರೀಯ ಉದ್ಯಾನ, ಮಥುರಾ, ವೃಂದಾವನ, ಮಂತ್ರಾಲಯ ಸೇರಿದಂತೆ ಪ್ರಮುಖ ಪ್ರವಾಸಿ ತಾಣಗಳಿಗೆ ರೈಲು ಸಂಪರ್ಕವನ್ನು ಸುಧಾರಿಸುವುದರಿಂದ ಪ್ರವಾಸೋದ್ಯಮಕ್ಕೂ ಉತ್ತೇಜನ ಸಿಗಲಿದೆ.
ಈ ಕುರಿತು ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ಪ್ರತಿಕ್ರಿಯಿಸಿ, ಗುಂತಕಲ್–ವಾಡಿ 230 ಕಿ.ಮೀ. ರೈಲು ಮಾರ್ಗಕ್ಕೆ ₹4,757 ಕೋಟಿ ಹೂಡಿಕೆ ಕರ್ನಾಟಕದ ರೈಲ್ವೆ ಮೂಲಸೌಕರ್ಯ ಮತ್ತು ಕೈಗಾರಿಕಾ ಬೆಳವಣಿಗೆಗೆ ಮಹತ್ವದ ಉತ್ತೇಜನ ನೀಡಲಿದೆ ಎಂದು ಹೇಳಿದ್ದಾರೆ. ರಾಯಚೂರು, ಯಾದಗಿರಿ ಮತ್ತು ಕಲಬುರಗಿ ಜಿಲ್ಲೆಗಳಲ್ಲಿ ರೈಲು ಸಂಪರ್ಕ ಸುಧಾರಣೆಯಿಂದ ಕೈಗಾರಿಕಾ ಚಟುವಟಿಕೆಗಳು ವೇಗ ಪಡೆಯಲಿವೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಒಟ್ಟಾರೆ, ಈ ಯೋಜನೆಗಳು ದೇಶದ ಆರ್ಥಿಕ ಅಭಿವೃದ್ಧಿಗೆ ಮಾತ್ರವಲ್ಲ, ಗ್ರಾಮೀಣ ಮತ್ತು ಕೈಗಾರಿಕಾ ಸಂಪರ್ಕ ಬಲಪಡಿಸಲು ಮಹತ್ವದ ಹೆಜ್ಜೆಯಾಗಿ ಪರಿಗಣಿಸಲಾಗುತ್ತಿದೆ.
