ಕೇಂದ್ರ ಬಜೆಟ್ ಕುರಿತು ಉದ್ಯಮ ತಜ್ಞರ ಒಳನೋಟಗಳು

ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು 2026-27ನೇ ಸಾಲಿನ ಕೇಂದ್ರ ಬಜೆಟ್‌ ಮಂಡನೆ ಮಾಡಿದ್ದಾರೆ. ಸತತ 9ನೇ ಬಾರಿಗೆ ನಿರ್ಮಲಾ ಸೀತಾರಾಮನ್‌ ಮಂಡಿಸುತ್ತಿರುವ ಬಜೆಟ್ ಇದಾಗಿದೆ. ಬಜೆಟ್‌ನಲ್ಲಿ ಸಾಕಷ್ಟು ಅಂಶಗಳನ್ನು, ಮಹತ್ವದ ಘೋಷಣೆಗಳನ್ನು ಮಾಡಿದ್ದಾರೆ. ಇದರಲ್ಲಿ ಕೇಂದ್ರ ಬಜೆಟ್ ಕುರಿತು ಉದ್ಯಮ ತಜ್ಞರ ಒಳನೋಟಗಳು.

ಅರ್ಜುನ್ ರಂಗ, ಸೈಕಲ್ ಪ್ಯೂರ್ ಅಗರಬತ್ತಿ ವ್ಯವಸ್ಥಾಪಕ ನಿರ್ದೇಶಕರು: ದೀರ್ಘಾವಧಿಯಲ್ಲಿ ದೇಶದ ಸಾಮರ್ಥ್ಯ ವೃದ್ಧಿ ಮತ್ತು ಹಣಕಾಸಿನ ಶಿಸ್ತಿನ ಯಶಸ್ವಿ ಮಿಶ್ರಣವಾಗಿ ಬಜೆಟ್ ಕಾಣಿಸುತ್ತಿದೆ. ಭಾರತೀಯ ಶ್ರೀಗಂಧದ ಪರಿಸರ ವ್ಯವಸ್ಥೆ ಮತ್ತು ಹೆಚ್ಚಿನ ಮೌಲ್ಯದ ಕೃಷಿಯನ್ನು ಪುನರುಜ್ಜೀವನಗೊಳಿಸುವತ್ತ ಬಜೆಟ್ ಗಮನಹರಿಸಿದೆ. ಅಲ್ಲದೇ, ಎಂಎಸ್ಎಂಇ ಬೆಳವಣಿಗೆಗೆ ಬಜೆಟ್‌ನಲ್ಲಿ ನೀಡಿರುವ ಬೆಂಬಲವು ಸ್ವಾವಲಂಬಿ ಭಾರತಕ್ಕೆ ಪೂರಕವಾಗಿದೆ. 10,000 ಕೋಟಿ ರೂ.ಗಳ ಎಸ್ಎಂಇ ಬೆಳವಣಿಗೆ ನಿಧಿ ಮತ್ತು ಸ್ವಾವಲಂಬಿ ಭಾರತ ನಿಧಿಯ ಮೂಲಕ ಉದ್ಯಮವನ್ನು ಉತ್ತೇಜಿಸುವ ಬಜೆಟ್‌ನ ಉಪಕ್ರಮಗಳು ಎಂಎಸ್ಎಂಇಗಳ ಬೆಳವಣಿಗೆ ಮತ್ತು ದ್ರವ್ಯತೆಯನ್ನು ಹೆಚ್ಚಿಸುವ ಭರವಸೆ ನೀಡುತ್ತವೆ. ಗ್ರಾಮೀಣ ಪ್ರದೇಶಗಳಲ್ಲಿ ಉದ್ಯಮಶೀಲತೆಯನ್ನು ಹೆಚ್ಚಿಸಲು ಲಕ್ಪತಿ ದೀದಿ ಕಾರ್ಯಕ್ರಮಗಳ ಮೂಲಕ ಗ್ರಾಮೀಣ ಪ್ರದೇಶಗಳಲ್ಲಿ ಉದ್ಯಮಶೀಲತೆಯನ್ನು ಉತ್ತೇಜಿಸಲು ಬಜೆಟ್ ಆದ್ಯತೆ ನೀಡಿದೆ. ಶ್ರೇಣಿ II ಮತ್ತು ಶ್ರೇಣಿ III ನಗರಗಳನ್ನು ಅಭಿವೃದ್ಧಿಪಡಿಸುವುದರ ಮೇಲೆ ಸರಕಾರವು ಹೆಚ್ಚು ಒತ್ತು ನೀಡಿದ್ದು, ಇದರಿಂದ ದೇಶದಲ್ಲಿ ವಿಕೇಂದ್ರೀಕೃತ ಬೆಳವಣಿಗೆಯನ್ನು ಉತ್ತೇಜಿಸಿದಂತಾಗಿದೆ. ಇದು ಮೈಸೂರಿನಂತಹ ಸ್ಥಳಗಳು ಜಾಗತಿಕವಾಗಿ ಅಭಿವೃದ್ಧಿ ಹೊಂದಲು ಅನುವು ಮಾಡಿಕೊಡುತ್ತದೆ. ಬಜೆಟ್ ನ ಈ ಕ್ರಮಗಳು ಎಂಎಸ್ ಎಂಇಗಳನ್ನು ಆಧುನೀಕರಿಸುವುದು, ಹೊಸ ಉದ್ಯೋಗಗಳನ್ನು ಸೃಷ್ಟಿಸುವುದು ಮತ್ತು ಭಾರತದ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿವೆ.

ಡಾ. ನಿಶಾಂತ್ ಸಪ್ರಾ, ಸಹಾಯಕ ಪ್ರಾಧ್ಯಾಪಕರು, ಟಿ.ಎ. ಪೈ ಮ್ಯಾನೇಜ್ಮೆಂಟ್ ಇನ್ಸ್ಟಿಟ್ಯೂಟ್ (TAPMI), ಮಣಿಪಾಲ್ ಅಕಾಡೆಮಿ ಆಫ್ ಹೈಯರ್ ಎಜುಕೇಷನ್: ಭಾರತೀಯ ಮ್ಯಾನೇಜ್ಮೆಂಟ್ ಶಿಕ್ಷಣಕ್ಕೆ ಕೇಂದ್ರ ಬಜೆಟ್-2026 ಹೆಚ್ಚಿನ ಕೊಡುಗೆಯನ್ನು ನೀಡಿದೆ. ಡೇಟಾ ಸೆಂಟರ್ಗಳು ಮತ್ತು ಜಾಗತಿಕ ಕ್ಲೌಡ್ ಸೇವೆಗಳಿಗೆ ‘ತೆರಿಗೆ ರಜೆ’ ನೀಡಿರುವುದರಿಂದ ದೇಶದ ಡಿಜಿಟಲ್ ಮೂಲಸೌಕರ್ಯವನ್ನು ಬಲಗೊಳ್ಳುತ್ತದೆ. ಕ್ಲೌಡ್ ತಂತ್ರಜ್ಞಾನ, ಡೇಟಾ ಮತ್ತು ಎಐ ಅನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಲು ಮತ್ತು ಭವಿಷ್ಯದ ನಾಯಕರನ್ನು ಸಿದ್ಧಪಡಿಸಲು TAPMI ಯ ಎಐ ಆಂಡ್ ಡೇಟಾ ಸೈನ್ಸ್ ನಲ್ಲಿ ಎಂಬಿಎ ಅನ್ನು ಕಾರ್ಯತಂತ್ರವಾಗಿ ವಿನ್ಯಾಸಗೊಳಿಸಲಾಗಿದೆ. ಇದಲ್ಲದೆ, ಬಜೆಟ್ನಲ್ಲಿನ ಪ್ರಸ್ತಾವಿತ ವಿಶ್ವವಿದ್ಯಾಲಯ ಟೌನ್ಶಿಪ್ ನ ಮಾದರಿಯು ಅನುಭವದ ಕಲಿಕೆಯನ್ನು ಹೆಚ್ಚಿಸುತ್ತದೆ. ಅಲ್ಲದೇ, ಉದ್ಯಮ, ಶೈಕ್ಷಣಿಕ ಮತ್ತು ಸರ್ಕಾರದ ನಡುವೆ ಬಲವಾದ ಸಹಯೋಗವನ್ನು ಬೆಳೆಸುತ್ತದೆ.

ಡಾ. ನಿತಿನ್ ಗಾರ್ಗ್, ಐಎಸ್ಎಂಇ (ISME) ಬೆಂಗಳೂರು ಸಂಸ್ಥಾಪಕರು: ಉನ್ನತ ಶಿಕ್ಷಣವನ್ನು ಈಗ ಉದ್ಯೋಗಾವಕಾಶಕ್ಕೆ ನೇರವಾಗಿ ಬೆಸೆಯಬೇಕು. ಶಿಕ್ಷಣವನ್ನು ಉದ್ಯಮ-ಸಂಯೋಜಿತ ಕೌಶಲ್ಯಗಳು ಮತ್ತು ಕಾರ್ಪೊರೇಟ್ ಮಾನ್ಯತೆಯೊಂದಿಗೆ ಸಂಯೋಜಿಸುವ ರಚನಾತ್ಮಕ ಮಾರ್ಗಗಳಿಗೆ ಒತ್ತು ನೀಡಬೇಕು. ಕೌಶಲ್ಯವುಳ್ಳ ಪ್ರತಿಭೆಗಳ ಸಂಖ್ಯೆಯನ್ನು ಹೆಚ್ಚಿಸಲು ಮತ್ತು ತಾಂತ್ರಿಕ ಪಾತ್ರಗಳಲ್ಲಿ ಮಹಿಳೆಯರ ಭಾಗವಹಿಸುವಿಕೆಯನ್ನು ಉತ್ತೇಜಿಸಲು ಶ್ರೇಣಿ 2 ಮತ್ತು ಶ್ರೇಣಿ 3 ನಗರಗಳ ಮೇಲೆ ಬಜೆಟ್ ಗಮನ ಹರಿಸಿದೆ. ಇದು ಉತ್ತಮ ಕ್ರಮ. ಬಜೆಟ್ನಲ್ಲಿ ಪ್ರಸ್ತಾಪಿಸಲಾದ ʼಕಾರ್ಪೊರೇಟ್ ಮಿತ್ರʼಗಳ ಪರಿಚಯವು ಕೌಶಲ್ಯಗಳನ್ನು ರೂಪಿಸುವಲ್ಲಿ ಮತ್ತು ಪದವೀಧರರಿಗೆ ಮಾರ್ಗದರ್ಶನ ನೀಡುವಲ್ಲಿ ಪರಿಣಾಮಕಾರಿ. ಕೈಗಾರಿಕೆಗಳನ್ನು ಸಕ್ರಿಯ ಪಾಲುದಾರರನ್ನಾಗಿ ಒಳಗೊಳ್ಳುವ ಗುರಿಯನ್ನು ಬಜೆಟ್ ಹೊಂದಿದೆ. ಈ ವಿಧಾನವು ಶೈಕ್ಷಣಿಕ ಮತ್ತು ಉದ್ಯಮದ ನಡುವಿನ ಅಂತರವನ್ನು ಕಡಿಮೆ ಮಾಡುವ ಗುರಿಯನ್ನು ಹೊಂದಿದೆ, ಆರ್ಥಿಕ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವ ವೈವಿಧ್ಯಮಯ ಮತ್ತು ಭವಿಷ್ಯಕ್ಕೆ ಸಿದ್ಧವಾಗಿರುವ ಕಾರ್ಯಪಡೆಯನ್ನು ಬೆಳೆಸುತ್ತದೆ.

ತ್ಯಾಗು ವಳ್ಳಿಯಪ್ಪ, ಸ್ಕೇಲ್ (SCALE) ಸಂಸ್ಥಾಪಕರು ಮತ್ತು ಸೋನಾ ವಳ್ಳಿಯಪ್ಪ ಗ್ರೂಪ್ ಅಧ್ಯಕ್ಷರು: ದೇಶದಲ್ಲಿ ವಿಕಸನಗೊಳ್ಳುತ್ತಿರುವ ಆರ್ಥಿಕತೆಗೆ ಕೌಶಲ್ಯಹೊಂದಿದ ಕಾರ್ಯಪಡೆಯನ್ನು ಅಭಿವೃದ್ಧಿಪಡಿಸುವತ್ತ ನಿರ್ಣಾಯಕ ಹೆಜ್ಜೆಯಾಗಿ ‘ಶಿಕ್ಷಣದಿಂದ ಉದ್ಯೋಗ ಮತ್ತು ಉದ್ಯಮ’ ಸ್ಥಾಯಿ ಸಮಿತಿಯ ಪ್ರಸ್ತಾವನೆಯನ್ನು ಸರಕಾರ ಬಜೆಟ್ನಲ್ಲಿ ಮಾಡಿದೆ. ಕೌಶಲ್ಯ ಅಭಿವೃದ್ಧಿ ಮತ್ತು ಉದಯೋನ್ಮುಖ ತಂತ್ರಜ್ಞಾನಗಳಿಗೆ ಒತ್ತು ನೀಡುವ ಮೂಲಕ, ಈ ಉಪಕ್ರಮವು ಶಿಕ್ಷಣವನ್ನು ಉದ್ಯಮದ ಅಗತ್ಯತೆಗಳೊಂದಿಗೆ ಜೋಡಿಸುವ ಗುರಿಯನ್ನು ಹೊಂದಿದೆ, ಭವಿಷ್ಯಕ್ಕೆ ಪ್ರತಿಭಾವಂತರು ಸಜ್ಜುಗೊಂಡಿರುವುದನ್ನು ಖಚಿತ ಪಡಿಸುವ ಮತ್ತು ಉದ್ಯಮದ ಅಗತ್ಯಕ್ಕೆ ಅನುಗುಣವಾಗಿ ಶಿಕ್ಷಣವನ್ನು ರೂಪಿಸಲು ಈ ಪ್ರಸ್ತಾವನೆಯು ನೆರವಾಗುತ್ತದೆ. ಭಾರತದ ಸೇವಾ ವಲಯದಲ್ಲಿ ದೀರ್ಘಕಾಲೀನ ಹೂಡಿಕೆ ಮತ್ತು ಬೆಳವಣಿಗೆಯನ್ನು ಉತ್ತೇಜಿಸುತ್ತವೆ.

ಶಾಂತಿ ರಾಘವನ್, ಎನೇಬಲ್ ಇಂಡಿಯಾ (EnAble India) ಸಂಸ್ಥಾಪಕರು: ವಿಕಲಚೇತನರು ಕೇವಲ ಯೋಜನೆಯ ಫಲಾನುಭವಿಗಳಲ್ಲ, ಅವರು ಉದ್ಯಮಿಗಳಾಗಿ ಮತ್ತು ವೃತ್ತಿಪರರಾಗಿ ಆರ್ಥಿಕತೆಗೆ ಸಕ್ರಿಯ ಕೊಡುಗೆ ನೀಡಬಲ್ಲರು. ಬಜೆಟ್ ನಲ್ಲಿ ಕೌಶಲ್ಯ ಅಭಿವೃದ್ಧಿಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದ್ದು, ವಿಕಲಚೇತನರಿಗೆ ಹಲವಾರು ವೃತ್ತಿಜೀವನದ ಹಾದಿಗಳನ್ನು ಮುಕ್ತಗೊಳಿಸುವ ಉದ್ದೇಶವನ್ನು ಬಜೆಟ್ ಹೊಂದಿದೆ. ಕಳೆದ 26 ವರ್ಷಗಳಲ್ಲಿ ಎನೇಬಲ್ ಇಂಡಿಯಾ ಸುಮಾರು 30 ವಲಯಗಳಲ್ಲಿ 400 ಹುದ್ದೆಗಳನ್ನು ಸೃಷ್ಟಿಸಿದೆ. ‘ತರಬೇತಿ ಮತ್ತು ನೇಮಕ’ದಂಥ ಉಪಕ್ರಮದ ಮೂಲಕ ಬದುಕುವ ದಾರಿಗಳನ್ನು ಬಜೆಟ್ ತೆರೆದಿಡಬಹುದು.

ಯೋಗೇಶ್ ಪಂಡಿತ್, ಡೈರೆಕ್ಟರ್ – ಪ್ರಾಡಕ್ಟ್ ಆಕ್ಸಿಲರೇಶನ್, ಎಫ್ಎಸ್ಐಡಿ (FSID): ಬಜೆಟ್ ನಲ್ಲಿ 2,000 ಉದ್ಯಮ ಕ್ಲಸ್ಟರ್ಗಳ ಪುನಶ್ಚೇತನ ಮತ್ತು ₹10,000 ಕೋಟಿ ಎಂಎಸ್ಎಂಇ (MSME) ಬೆಳವಣಿಗೆ ನಿಧಿಯ ಪ್ರಸ್ತಾವನೆಯಿದೆ. ಇದು ಭಾರತದ ಉತ್ಪಾದನಾ ಪರಿಸರ ವ್ಯವಸ್ಥೆಯನ್ನು ತಳಮಟ್ಟದಲ್ಲಿ ಬಲಪಡಿಸುವ ಪ್ರಬಲ ಕ್ರಮವಾಗಿದೆ. ಕೈಗಾರಿಕಾ ಸಮೂಹಗಳಲ್ಲಿ BÃ…wI ಅನ್ನು ಸಂಯೋಜಿಸುವುದರಿಂದ ಎಂಎಸ್ಎಂಇಗಳು ಮೂಲಸೌಕರ್ಯ, ತಂತ್ರಜ್ಞಾನ ಮತ್ತು ಕೌಶಲ್ಯಪೂರ್ಣ ಪ್ರತಿಭೆಯನ್ನು ಪಡೆಯಲು ಅನುಕೂಲವಾಗುತ್ತದೆ. ಇದು ನಾವೀನ್ಯತೆಯ ಮೂಲಕ ಮೌಲ್ಯ ಸರಪಳಿಯನ್ನು ಮೇಲಕ್ಕೆತ್ತಲು ಅನುವು ಮಾಡಿಕೊಡುತ್ತದೆ.

ಆತಶ್ ಶಾ, ಎಸ್ವಿಪಿ ಮತ್ತು ಬ್ಯುಸಿನೆಸ್ ಹೆಡ್, ಮಣಿಪಾಲ್ ಅಕಾಡೆಮಿ ಆಫ್ ಬಿಎಫ್ಎಸ್ಐ: ಕೇಂದ್ರ ಬಜೆಟ್ ನಿಜಕ್ಕೂ ಹಣಕಾಸು ವಲಯಕ್ಕೆ ಸ್ಥಿರತೆಯನ್ನು ನೀಡುವಂತಿದೆ ಮತ್ತು ಪ್ರಾಯೋಗಿಕವಾಗಿಯೂ ಇದೆ. ಇದು ವ್ಯವಸ್ಥೆಯ ಪರಾಮರ್ಶೆ ಮತ್ತು ಎನ್ಎಫ್ಎಸ್ಸಿ ಬಲವರ್ಧನೆಯ ಮೂಲಕ ಬ್ಯಾಂಕಿಂಗ್ ವಲಯವನ್ನು ಬಲಗೊಳಿಸುವ ಮತ್ತು ಆಸ್ತಿಯ ಗುಣಮಟ್ಟ ವೃದ್ಧಿಸುವ ನಿಟ್ಟಿನಲ್ಲಿಸೂಕ್ತವಾಗಿದೆ. ‘ವಿಕಸಿತ್ ಭಾರತ್’ಗಾಗಿ ಉನ್ನತ ಮಟ್ಟದ ಬ್ಯಾಂಕಿಂಗ್ ಸಮಿತಿಯ ರಚನೆಯು ಹಣಕಾಸು ಸೇರ್ಪಡೆ ಮತ್ತು ಗ್ರಾಹಕ ಹಿತರಕ್ಷಣೆಗೆ ಪೂರಕವಾಗಿದೆ. ಬಿಎಫ್ಎಸ್ಐ ವಲಯದ ಬೆಳವಣಿಗೆಗೆ ಒತ್ತು ಸಿಕ್ಕಿದಂತಾಗಿದೆ.

ಪ್ರೊ. ರಾಮ್ ಕುಮಾರ್ ಕಾಕಾನಿ, ಆರ್ ವಿ ವಿಶ್ವವಿದ್ಯಾಲಯದ ಕುಲಪತಿ: ಸಂಶೋಧನೆ, ಡಿಜಿಟಲ್ ಮೂಲಸೌಕರ್ಯ ಮತ್ತು ಎಐ ಕಲಿಕೆಗೆ ಈ ಬಜೆಟ್ ಒತ್ತು ನೀಡುವ ಮೂಲಕ ಉನ್ನತ ಶಿಕ್ಷಣದ ಆದ್ಯತೆಗಳನ್ನು ಬಲಪಡಿಸುತ್ತಿದೆ. ಬಜೆಟ್ ನಲ್ಲಿರುವ ಫೆಲೋಶಿಪ್ಗಳು ಮತ್ತು ಕೈಗಾರಿಕಾ ಪಾಲುದಾರಿಕೆಗಳಂತಹ ಉಪಕ್ರಮಗಳು ನಾವೀನ್ಯತೆ-ನೇತೃತ್ವದ ಬೋಧನೆ ಮತ್ತು ಉದ್ಯೋಗಾವಕಾಶವನ್ನು ಹೆಚ್ಚಿಸುತ್ತವೆ. ಕೃತಕ ಬುದ್ಧಿಮತ್ತೆ-ಚಾಲಿತ ಶಿಕ್ಷಣದ ಪ್ರಚಾರ ಮತ್ತು ಆರೆಂಜ್ ಆರ್ಥಿಕತೆಯ ಗುರುತಿಸುವಿಕೆಯು ಸೃಜನಶೀಲತೆ ಮತ್ತು ತಂತ್ರಜ್ಞಾನದ ಸಂಗಮದಲ್ಲಿ ಪ್ರತಿಭೆಗಳನ್ನು ಪೋಷಿಸಲು ಸಹಾಯ ಮಾಡುತ್ತದೆ. ಇದು ಆರ್ವಿ ವಿಶ್ವವಿದ್ಯಾಲಯದ ಅಂತರಶಿಸ್ತೀಯ ವಿಧಾನದೊಂದಿಗೆ ಹೊಂದಿಕೆಯಾಗುತ್ತದೆ,

ಪ್ರೊ. ಬಿ. ರವಿ, ನಿರ್ದೇಶಕರು, ಎನ್ಐಟಿಕೆ ಸುರತ್ಕಲ್: ಹೊಸದಾಗಿ ಸ್ಥಾಪಿಸಲಾದ ‘ಶಿಕ್ಷಣದಿಂದ ಉದ್ಯೋಗ ಮತ್ತು ಉದ್ಯಮ’ ಸಮಿತಿಯ ಮಹತ್ವ ದೊಡ್ಡದು. ಇದು ಶಿಕ್ಷಣವನ್ನು ಉದ್ಯಮದ ಅಗತ್ಯಗಳಿಗೆ ಅನುಗುಣವಾಗಿ ಜೋಡಿಸುವುದು ಮತ್ತು ಉದ್ಯಮಶೀಲತಾ ಕೌಶಲ್ಯಗಳನ್ನು ಬೆಳೆಸುವ ಗುರಿಯನ್ನು ಹೊಂದಿದೆ. ಎಐ ನಂತಹ ಉದಯೋನ್ಮುಖ ತಂತ್ರಜ್ಞಾನಗಳನ್ನು ಬಳಸಿಕೊಳ್ಳುವ ಮೂಲಕ, ಈ ಉಪಕ್ರಮವು ಭವಿಷ್ಯದ ಉದ್ಯೋಗ ಮಾರುಕಟ್ಟೆಗಳಿಗೆ ವಿದ್ಯಾರ್ಥಿಗಳನ್ನು ಸಿದ್ಧಪಡಿಸುತ್ತದೆ ಮತ್ತು ವಿಕಸಿತ ಭಾರತ್ ಅನ್ನು ಬೆಂಬಲಿಸುತ್ತದೆ. ಉದ್ಯಮದ ನಾಯಕರೊಂದಿಗೆ ವ್ಯಾಪಕ ಚರ್ಚೆಗಳ ಮೂಲಕ ಅಭಿವೃದ್ಧಿಪಡಿಸಲಾದ NITK ಸುರತ್ಕಲ್ನ ನವೀಕರಿಸಿದ ಪಠ್ಯಕ್ರಮವು ವಿದ್ಯಾರ್ಥಿಗಳು ತಮ್ಮ ಆಕಾಂಕ್ಷೆಗಳಿಗೆ ಹೊಂದಿಕೆಯಾಗುವ ವೃತ್ತಿ ಆಯ್ಕೆಗಳನ್ನು ಅನ್ವೇಷಿಸಲು ಅವಕಾಶ ನೀಡುತ್ತದೆ.

ಸಂಜಯ್ ಪಡೋಡೆ, ಸಂಕಲ್ಪ್ (Sankalp) ಅಧ್ಯಕ್ಷರು: ಶಿಕ್ಷಣವನ್ನು ಉದ್ಯೋಗ ಮತ್ತು ನಾವೀನ್ಯತೆಯೊಂದಿಗೆ ಜೋಡಿಸುವ ಮೂಲಕ ಈ ಬಜೆಟ್ ಯುವಜನರ ಮೇಲೆ ಕೇಂದ್ರೀಕೃತವಾಗಿದೆ. ‘ಕಿತ್ತಳೆ ಆರ್ಥಿಕತೆ’ಯ ಮಹತ್ವವನ್ನು ಮತ್ತು ಭವಿಷ್ಯಕ್ಕೆ ಸಿದ್ಧವಾಗಿರುವ ಉದ್ಯೋಗಿಗಳ ಕಾರ್ಯಪಡೆಯನ್ನು ರಚಿಸುವ ಗುರಿಯನ್ನು ಬಜೆಟ್ನಲ್ಲಿ ಹೇಳಲಾಗಿದೆ. IFIM ಬಿಸಿನೆಸ್ ಸ್ಕೂಲ್ ಮತ್ತು ವಿಜಯಭೂಮಿ ವಿಶ್ವವಿದ್ಯಾಲಯದಂತಹ ಸಂಸ್ಥೆಗಳೂ ಸೇರಿದಂತೆ ಸಂಕಲ್ಪ ಸಮೂಹದಲ್ಲಿ, ಉದ್ಯಮ-ಸಂಯೋಜಿತ ಪಠ್ಯಕ್ರಮ ಮತ್ತು ಅಂತರಶಿಸ್ತೀಯ ಕಲಿಕೆಗೆ ಬೆಂಬಲವಿದೆ.

ಜಿ. ಶಂಕರ್ ರಾಮ್, ಪೆಪ್ಸ್ ಇಂಡಸ್ಟ್ರೀಸ್ ಪ್ರೈವೇಟ್ ಲಿಮಿಟೆಡ್ನ ವ್ಯವಸ್ಥಾಪಕ ನಿರ್ದೇಶಕ: ದೇಶದಲ್ಲಿ ಸದೃಢ ಮತ್ತು ಹೆಚ್ಚು ಸ್ಪರ್ಧಾತ್ಮಕ ಉತ್ಪಾದನಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ನಿಟ್ಟಿನಲ್ಲಿ ನಿರ್ಣಾಯಕ ಬದಲಾವಣೆಯನ್ನು ಬಜೆಟ್ ಸೂಚಿಸುತ್ತಿದೆ. 200 ಪಾರಂಪರಿಕ ಕೈಗಾರಿಕಾ ಕ್ಲಸ್ಟರ್ಗಳ ಪುನರುಜ್ಜೀವನ ಮತ್ತು ಕಂಟೇನರ್ ತಯಾರಿಕೆಗೆ 10,000 ಕೋಟಿ ರೂ. ಹೂಡಿಕೆಯಂತಹ ಬಜೆಟ್ನ ಉಪಕ್ರಮಗಳು ಮೂಲಸೌಕರ್ಯವನ್ನು ಆಧುನೀಕರಿಸಲು ನೆರವಾಗುತ್ತವೆ. ಅಲ್ಲದೇ, ಕೌಶಲ್ಯ ಸಾಮರ್ಥ್ಯಗಳನ್ನು ಬಲಪಡಿಸಲು ಉತ್ತೇಜನವನ್ನು ಪ್ರತಿಬಿಂಬಿಸುತ್ತವೆ. ಈ ಕ್ರಮಗಳು ಸುಧಾರಿತ ತಂತ್ರಜ್ಞಾನಗಳನ್ನು ಉತ್ಪಾದಕರು ಅಳವಡಿಸಿಕೊಳ್ಳಲು, ಉತ್ಪಾದಕ ಸಾಮರ್ಥ್ಯವನ್ನು ವಿಸ್ತರಿಸಲು ಮತ್ತು ಹೊಸ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಲು ಅನುವು ಮಾಡಿಕೊಡುತ್ತದೆ. ದೇಶೀಯ ಮತ್ತು ಜಾಗತಿಕ ಮಾರುಕಟ್ಟೆಗಳೊಂದಿಗೆ ಆಳವಾದ ಏಕೀಕರಣವನ್ನು ಬೆಂಬಲಿಸುವ ಮೂಲಕ, ಉತ್ಪಾದನೆಯನ್ನು ಭಾರತದ ದೀರ್ಘಕಾಲೀನ ಆರ್ಥಿಕ ಬೆಳವಣಿಗೆಯ ಪ್ರಮುಖ ಚಾಲಕನಾಗಿ ಬಜೆಟ್ ಇಟ್ಟಿದೆ.

ಕಿರಣ್ ವೇಣುಗೋಪಾಲ್, ಬ್ರಿಕ್ಸ್ ಅಂಡ್ ಮೈಲ್ಸ್ಟೋನ್ಸ್ (Bricks and Milestones) ಸಂಸ್ಥಾಪಕರು ಮತ್ತು ಸಿಇಒ: ಮೂಲಸೌಕರ್ಯ ಅಪಾಯ ಖಾತರಿ ನಿಧಿ ಮತ್ತು ಸಿಪಿಎಸ್ಇ ಆಸ್ತಿಗಳ ನಗದೀಕರಣಕ್ಕಾಗಿ ಮೀಸಲಾದ ರಿಯಲ್ ಎಸ್ಟೇಟ್ ಇನ್ವೆಸ್ಟ್ ಮೆಂಟ್ ಟ್ರಸ್ಟ್ ಗಳನ್ನು(ಆರ್ ಇಐಟಿ) ಸ್ಥಾಪಿಸುವುದರಿಂದ ಸಕಾರಾತ್ಮಕ ಪರಿಣಾಮ ಉಂಟಾಗುತ್ತದೆ. ಈ ಉಪಕ್ರಮಗಳು ರಿಯಲ್ ಎಸ್ಟೇಟ್ ಮತ್ತು ಮೂಲಸೌಕರ್ಯದಲ್ಲಿ ಬಂಡವಾಳ ಹರಿವು ಮತ್ತು ಸ್ಥಿರತೆಯನ್ನು ಹೆಚ್ಚಿಸಬಹುದು, ಆಸ್ತಿ ಮರುಬಳಕೆ ಮತ್ತು ನಗರ ಅಭಿವೃದ್ಧಿಗೆ ಸಾಂಸ್ಥಿಕ ಹೂಡಿಕೆಯನ್ನು ಆಕರ್ಷಿಸಲು ಅನುವು ಮಾಡಿಕೊಡುತ್ತದೆ. ಹೆಚ್ಚುವರಿಯಾಗಿ, ಅನಿವಾಸಿ ವಹಿವಾಟುಗಳಿಗೆ ಟಿಡಿಎಸ್ ಅನುಸರಣೆಯನ್ನು ಸರಳಗೊಳಿಸುವುದರಿಂದ ವ್ಯವಹಾರವು ಸುಲಭವಾಗುತ್ತದೆ. ಒಟ್ಟಾರೆ, ಈ ಕ್ರಮಗಳು ಹೆಚ್ಚು ಪಾರದರ್ಶಕ ಮತ್ತು ಹೂಡಿಕೆ ಸ್ನೇಹಿ ರಿಯಲ್ ಎಸ್ಟೇಟ್ ವಾತಾವರಣವನ್ನು ಉತ್ತೇಜಿಸುತ್ತವೆ, ಇದು ರಿಯಲ್ ಎಸ್ಟೇಟ್ ಮತ್ತು ಮೂಲ ಸೌಕರ್ಯ ವಲಯದಲ್ಲಿ ಬಂಡವಾಳದ ಹರಿವು ಮತ್ತು ಸ್ಥಿರವಾದ ಬೆಳವಣಿಗೆಯನ್ನು ಹೆಚ್ಚಿಸುತ್ತದೆ.

ಭವೇಶ್ ಗೋಸ್ವಾಮಿ, ಕ್ಲೌಡ್ದಟ್ (CloudThat) ಸಿಇಒ ಮತ್ತು ಸಂಸ್ಥಾಪಕರು: ಭಾರತದ ಸೇವಾ ಮತ್ತು ತಂತ್ರಜ್ಞಾನ ವಲಯದಲ್ಲಿ ಕೌಶಲ್ಯ, ಉದ್ಯೋಗ ಮತ್ತು ರಫ್ತುಗಳನ್ನು ಸಂಯೋಜಿಸುವ ಗುರಿಯನ್ನು ಬಜೆಟ್ ಹೊಂದಿದೆ. ತಂತ್ರಜ್ಞಾನವು ಉದ್ಯೋಗದ ಪರಿಕಲ್ಪನೆಯನ್ನೇ ಮರು ರೂಪಿಸುತ್ತಿದ್ದು, ಶಿಕ್ಷಣದಲ್ಲಿ ಎಐ ಮತ್ತು ಸಕಾಲದಲ್ಲಿ ಕೌಶಲ ಅಭಿವೃದ್ಧಿಗೆ ಬಜೆಟ್ ಒತ್ತು ನೀಡಿರುವುದು ಸಕಾಲಿಕವಾಗಿದೆ. ಶ್ರೇಣಿ 2 ಮತ್ತು ಶ್ರೇಣಿ 3 ನಗರಗಳಲ್ಲಿನ ವೃತ್ತಿಪರ ಸಂಸ್ಥೆಗಳನ್ನು ಬೆಂಬಲಿಸುವ ಉಪಕ್ರಮಗಳು ಸ್ವಾಗತಾರ್ಹ. ವಿದೇಶಿ ಕ್ಲೌಡ್ ಸೇವಾ ಪೂರೈಕೆದಾರರಿಗೆ 2047 ರವರೆಗೆ ತೆರಿಗೆ ರಜೆ ನೀಡುವ ಪ್ರಸ್ತಾವನೆಯು ಶ್ಲಾಘನೀಯ. ಈ ಕ್ರಮವು ಭಾರತವನ್ನು ಜಾಗತಿಕ ಹಬ್ ಆಗಿ ರೂಪಿಸುತ್ತದೆ. ತೆರಿಗೆ ರಜೆಯ ಪ್ರಸ್ತಾಪವು ಹೂಡಿಕೆಯನ್ನು ಆಕರ್ಷಿಸುತ್ತದೆ.

ಸತೀಶ್ ಸಿಜಿ, ಕ್ಯಾಸಾಗ್ರ್ಯಾಂಡ್ (Casagrand) ಉಪ ವ್ಯವಸ್ಥಾಪಕ ನಿರ್ದೇಶಕರು: ಮೂಲಸೌಕರ್ಯಕ್ಕೆ ಸರ್ಕಾರದ ಬದ್ಧತೆಯನ್ನು ಬಜೆಟ್ನಲ್ಲಿ ಗಮನಿಸಬಹುದು. ಬಂಡವಾಳ ವೆಚ್ಚವನ್ನು 12.2 ಲಕ್ಷ ಕೋಟಿ ರೂ.ಗೆ ಬಜೆಟ್ನಲ್ಲಿ ಹೆಚ್ಚಿಸಲಾಗಿದೆ. ಶ್ರೇಣಿ II ಮತ್ತು III ನಗರಗಳ ಮೇಲಿನ ಸರಕಾರದ ಗಮನವು ವಸತಿ ರಿಯಲ್ ಎಸ್ಟೇಟ್ ಅನ್ನು ಮಹತ್ವದ ವಲಯವಾಗಿ ಪರಿವರ್ತಿಸುತ್ತದೆ ಮತ್ತು ಡೆವಲಪರ್ಗಳಿಗೆ ಅವಕಾಶಗಳನ್ನು ಒದಗಿಸುತ್ತದೆ. ಪಟ್ಟಿ ಮಾಡಲಾದ ಈಕ್ವಿಟಿಗಳಲ್ಲಿ ಹೂಡಿಕೆ ಮಿತಿಗಳನ್ನು ದ್ವಿಗುಣಗೊಳಿಸುವಂತಹ ಎನ್ಆರ್ಐಗಳಿಗಾಗಿ ಬಜೆಟ್ನ ಸುಧಾರಣೆಗಳು ಸ್ವಾಗತಾರ್ಹ. ಇವು ಭಾರತದ ಆಕರ್ಷಣೆಯನ್ನು ಹೆಚ್ಚಿಸುತ್ತವೆ ಮತ್ತು ಪ್ರೀಮಿಯಂ ವಸತಿಗಾಗಿ ಬೇಡಿಕೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆ. ಆದಾಗ್ಯೂ, ಬಜೆಟ್ನಲ್ಲಿ ಕೈಗೆಟುಕುವ ವಸತಿಗಾಗಿ ಬೆಂಬಲವಿಲ್ಲ. ಇದು ಲಕ್ಷಾಂತರ ಮಧ್ಯಮ ಮತ್ತು ಕಡಿಮೆ-ಆದಾಯದ ಮನೆ ಖರೀದಿದಾರರಿಗೆ ನಿರಾಶೆಯನ್ನು ತಂದಿದೆ. ವಸತಿ ವೆಚ್ಚವನ್ನು ಕಡಿಮೆ ಮಾಡಲು ಮತ್ತು ಹಣಕಾಸು ಸುಧಾರಿಸಲು ನಿರೀಕ್ಷಿತ ಕ್ರಮಗಳಿದ್ದವು, ಆದರೆ ಅವು ಕಾರ್ಯರೂಪಕ್ಕೆ ಬಂದಿಲ್ಲ. ಹೆಚ್ಚುವರಿಯಾಗಿ, ನಿರ್ಮಾಣ ಹಂತದಲ್ಲಿರುವ ಆಸ್ತಿಗಳಿಗೆ GST ದರಗಳು ಮತ್ತು ITC ಅರ್ಹತೆಯ ಬಗ್ಗೆ ನಡೆಯುತ್ತಿರುವ ಅಸ್ಪಷ್ಟತೆಯು ಡೆವಲಪರ್ಗಳಿಗೆ ಅಡ್ಡಿಯಾಗುತ್ತಿವೆ.

ಆಶಿಶ್ ಕುಮಾರ್ ಚೌಹಾಣ್, ಎನ್ಎಸ್ಇ (NSE) ಎಂಡಿ ಮತ್ತು ಸಿಇಒ: ಬಜೆಟ್‌ನಲ್ಲಿ ಹಣಕಾಸಿನ ಶಿಸ್ತನ್ನು ಕಾಯ್ದುಗೊಂಡು ಉತ್ತಮ ಆರ್ಥಿಕ ಬೆಳವಣಿಗೆಯನ್ನು ಸಮತೋಲನಗೊಳಿಸುವತ್ತ ಗಮನ ಹರಿಸಲಾಗಿದೆ. ವಿತ್ತೀಯ ಕೊರತೆಯ ಗುರಿಯನ್ನು ಜಿಡಿಪಿಯ 4.4% ರಿಂದ 4.3% ಕ್ಕೆ ಇಳಿಸಲಾಗಿದೆ. ಅಲ್ಲದೇ ಸಾಲ ಪ್ರಮಾಣ ತಗ್ಗಿಸುವ ಗುರಿಯನ್ನು ಬಜೆಟ್ ಹೊಂದಿದೆ. ಇದು ಸ್ಥೂಲ ಆರ್ಥಿಕ ಸ್ಥಿರತೆಯನ್ನು ಸೂಚಿಸುತ್ತದೆ. ಖಾಸಗಿ ಹೂಡಿಕೆಯನ್ನು ಆಕರ್ಷಿಸಲು ಸಾರ್ವಜನಿಕ ಬಂಡವಾಳದಲ್ಲಿ 12% ಹೆಚ್ಚಳ ಮಾಡಲಾಗಿದೆ. ಹಣಕಾಸು ಮಾರುಕಟ್ಟೆಗಳನ್ನು ಬಲಗೊಳಿಸಲು ಒತ್ತು ನೀಡಲಾಗಿದೆ. ಮುನಿಸಿಪಲ್ ಬಾಂಡ್ಗಳ ಮೂಲಕ ನಗರ ಹಣಕಾಸುಗಾಗಿ ಬೆಂಬಲ ನೀಡಲಾಗಿದೆ. ನಾವೀನ್ಯತೆ ಮತ್ತು ಉದ್ಯೋಗ ಸೃಷ್ಟಿಯನ್ನು ಉತ್ತೇಜಿಸಲು ಸೆಮಿಕಂಡಕ್ಟರ್ಗಳು, AI ಮತ್ತು ಬಯೋ-ಫಾರ್ಮಾದಂತಹ ಕಾರ್ಯತಂತ್ರದ ವಲಯಗಳಿಗೆ ಆದ್ಯತೆ ಬಜೆಟ್ ಒತ್ತು ನೀಡಿದೆ. ಒಟ್ಟಾರೆಯಾಗಿ, 2047 ರ ವಿಕಸಿತ ಭಾರತ್ ಕಡೆಗೆ ಭಾರತದ ಬೆಳವಣಿಗೆಗೆ ಬಲವಾದ ಅಡಿಪಾಯವನ್ನು ಬಜೆಟ್ ಹಾಕಿದೆ.

ಅಭಿಲೇಷ್ ಗುಪ್ತಾ, ಥಿಂಕ್ ಗ್ಯಾಸ್ (THINK Gas) ಎಂಡಿ ಮತ್ತು ಸಿಇಒ: ನೈಸರ್ಗಿಕ ಅನಿಲವನ್ನು ಪರಿವರ್ತನಾ ಇಂಧನವಾಗಿ ಬಜೆಟ್ ಬಲಪಡಿಸಿದೆ. ಸಿಎನ್ಜಿ ಮತ್ತು ಪಿಎನ್ಜಿ ಜೊತೆಗೆ ಸಂಕುಚಿತ ಜೈವಿಕ ಅನಿಲವನ್ನು (CBG) ಬೆರೆಸುವುದನ್ನು ಕಡ್ಡಾಯಗೊಳಿಸಿರುವುದು ಹಸಿರು ಭಾರತದತ್ತಸರಕಾರದ ದೃಷ್ಟಿಕೋನವನ್ನು ತೋರಿಸುತ್ತದೆ. ಕಾರ್ಬನ್ ನಿಗ್ರಹಕ್ಕಾಗಿ 20,000 ಕೋಟಿ ರೂ. ವೆಚ್ಚ ಮತ್ತು 2070 ರ ವೇಳೆಗೆ ‘ನಿವ್ವಳ-ಶೂನ್ಯ’ದ ಮೇಲೆ ಗಮನ ಕೇಂದ್ರೀಕರಿಸಲಾಗಿದೆ. ಇದು ಸರ್ಕಾರವು ಪರಿಸರ ಜವಾಬ್ದಾರಿಯ ಬಗ್ಗೆ ಗಂಭೀರವಾಗಿದೆ

ಡಾ. ವಿ ಮೋಹನ್, ಡಾ. ಮೋಹನ್ ಡಯಾಬಿಟಿಸ್ ಸ್ಪೆಷಾಲಿಟಿಸ್ ಸೆಂಟರ್ ಅಧ್ಯಕ್ಷರು: ಬಜೆಟ್ ನಲ್ಲಿ ₹10,000 ಕೋಟಿಯ ‘ಬಯೋಫಾರ್ಮಾ ಶಕ್ತಿ’ (BioPharma Shakti) ಉಪಕ್ರಮವು ಸ್ವಾಗತಾರ್ಹ. ಇದು ಮಧುಮೇಹ ಮತ್ತು ಕ್ಯಾನ್ಸರ್ ವಿರೋಧಿ ಔಷಧಿಗಳ ವೆಚ್ಚವನ್ನು ಕಡಿಮೆ ಮಾಡಲು ಮತ್ತು ಭಾರತವನ್ನು ಜಾಗತಿಕ ಬಯೋಫಾರ್ಮಾ ಹಬ್ ಆಗಿ ರೂಪಿಸಲು ಸಹಾಯ ಮಾಡುತ್ತದೆ. ಅಲ್ಲದೇ, ಲಕ್ಷಾಂತರ ಭಾರತೀಯರಿಗೆ ಆರೋಗ್ಯ ರಕ್ಷಣೆಯ ನೀಡಲಿದೆ. ಸರಕಾರದ ಕ್ರಮವು ಸಂಶೋಧನೆಯನ್ನು ಬಲಪಡಿಸುತ್ತದೆ.