ಬೆಂಗಳೂರು: ಉದ್ಯೋಗ ಮತ್ತು ಶಿಕ್ಷಣದ ಅನ್ವೇಷಣೆಯಲ್ಲಿ ಸಿಲಿಕಾನ್ ಸಿಟಿಗೆ ಬರುವವರ ಸಂಖ್ಯೆ ದಿನೇ ದಿನೇ ಏರುತ್ತಿದೆ. ಈ ಬೇಡಿಕೆಯನ್ನು ಬಂಡವಾಳ ಮಾಡಿಕೊಂಡಿರುವ ಸಾವಿರಾರು ಪೇಯಿಂಗ್ ಗೆಸ್ಟ್ (PG) ವಸತಿಗೃಹಗಳು ನಗರದಾದ್ಯಂತ ತಲೆ ಎತ್ತಿವೆ. ಆದ್ರೆ ಕನಿಷ್ಠ ಸುರಕ್ಷತಾ ನಿಯಮಗಳನ್ನು ಗಾಳಿಗೆ ತೂರಿ ಕಾರ್ಯನಿರ್ವಹಿಸುತ್ತಿರುವ ಪಿಜಿಗಳ ವಿರುದ್ಧ ಈಗ ಜಿಬಿಎ(GBA) ಅಧಿಕಾರಿಗಳು ಕಠಿಣ ಕ್ರಮಕ್ಕೆ ಮುಂದಾಗಿದ್ದಾರೆ. ನಗರದ ವಿವಿಧ ಭಾಗಗಳಲ್ಲಿ ನಡೆಸಿದ ತಪಾಸಣೆಯ ನಂತರ, ನಿಯಮ ಉಲ್ಲಂಘಿಸಿದ 574 ಪಿಜಿಗಳಿಗೆ ನೋಟಿಸ್ ಜಾರಿ ಮಾಡಲಾಗಿದ್ದು, ಇದು ಮಾಲೀಕರಲ್ಲಿ ನಡುಕ ಹುಟ್ಟಿಸಿದೆ ಎನ್ನಲಾಗುತ್ತಿದೆ.
ತಪಾಸಣೆಗೆ ಕಾರಣವೇನು?: ಬೆಂಗಳೂರಿನಲ್ಲಿ ಇತ್ತೀಚೆಗೆ ನಡೆದ ಕೆಲವು ಅಹಿತಕರ ಘಟನೆಗಳು ಮತ್ತು ಬೆಂಕಿ ಅವಘಡಗಳ ಹಿನ್ನೆಲೆಯಲ್ಲಿ, PGಗಳ ಸುರಕ್ಷತೆಯ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ಆತಂಕ ವ್ಯಕ್ತವಾಗಿತ್ತು. ಅನೇಕ ಪಿಜಿಗಳು ಕಿರಿದಾದ ಜಾಗದಲ್ಲಿ ನೂರಾರು ಜನರನ್ನು ಕೂಡಿ ಹಾಕಿವೆ. ಅಗ್ನಿಶಾಮಕ ಉಪಕರಣಗಳ ಕೊರತೆ, ಸರಿಯಾದ ಗಾಳಿ ಬೆಳಕಿನ ವ್ಯವಸ್ಥೆ ಇಲ್ಲದಿರುವುದು ಮತ್ತು ಕಳಪೆ ಗುಣಮಟ್ಟದ ಆಹಾರದ ಬಗ್ಗೆ ದೂರುಗಳು ಕೇಳಿಬಂದಿದ್ದವು. ಈ ಹಿನ್ನೆಲೆಯಲ್ಲಿ ಜಿಬಿಎ(GBA) ಅಧಿಕಾರಿಗಳ ತಂಡ ನಗರದಾದ್ಯಂತ ಕಾರ್ಯಾಚರಣೆ ಕೈಗೊಂಡಿದೆ.
ನೋಟಿಸ್ನಲ್ಲಿ ಏನಿದೆ?: ನೋಟಿಸ್ ಪಡೆದ 574 PGಗಳಿಗೆ ಈ ಕೆಳಗಿನ ಪ್ರಮುಖ ಅಂಶಗಳನ್ನು ಪಾಲಿಸಲು ಗಡುವು ನೀಡಲಾಗಿದೆ.
ಅಧಿಕೃತ ಪರವಾನಗಿ: ವಾಣಿಜ್ಯ ಉದ್ದೇಶಕ್ಕಾಗಿ ಬಳಸುತ್ತಿರುವ ಕಟ್ಟಡಗಳಿಗೆ ಕಡ್ಡಾಯವಾಗಿ BBMPಯಿಂದ ಟ್ರೇಡ್ ಲೈಸೆನ್ಸ್ ಪಡೆಯಬೇಕು.
ಅಗ್ನಿ ಸುರಕ್ಷತೆ: ಅಗ್ನಿಶಾಮಕ ದಳದಿಂದ ಅನುಮತಿ (NOC) ಪಡೆಯುವುದು ಮತ್ತು ಪ್ರತಿ ಮಹಡಿಯಲ್ಲಿ ಅಗ್ನಿಶಾಮಕ ವಸ್ತು ಅಳವಡಿಸುವುದು ಕಡ್ಡಾಯ.
ಸಿಟಿಸಿಟಿವಿ ಅಳವಡಿಕೆ: ವಾಸಿಸುವವರ ಸುರಕ್ಷತೆಗಾಗಿ ಪ್ರವೇಶ ದ್ವಾರ ಮತ್ತು ಕಾರಿಡಾರ್ಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಬೇಕು.
ಸ್ವಚ್ಛತೆ: ಅಡುಗೆ ಮನೆ ಮತ್ತು ಶೌಚಾಲಯಗಳಲ್ಲಿ ಕಟ್ಟುನಿಟ್ಟಾದ ಶುಚಿತ್ವವನ್ನು ಪಾಲಿಸಬೇಕು.
ಮುಚ್ಚುವ ಎಚ್ಚರಿಕೆ: ನಿರ್ದಿಷ್ಟ ಸಮಯದೊಳಗೆ ಈ ನಿಯಮಗಳನ್ನು ಪಾಲಿಸದಿದ್ದರೆ ಅಥವಾ ಪ್ರತಿಕ್ರಿಯೆ ನೀಡದಿದ್ದರೆ, ಅಂತಹ ಪಿಜಿ (PG)ಗಳ ಪರವಾನಗಿ ರದ್ದುಗೊಳಿಸಿ, ಅವುಗಳನ್ನು ಶಾಶ್ವತವಾಗಿ ಬೀಗ ಹಾಕಿ ಮುಚ್ಚಲಾಗುವುದು ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ. ಈ ಕ್ರಮದಿಂದಾಗಿ ಲಕ್ಷಾಂತರ ಪಿಜಿ ನಿವಾಸಿಗಳಲ್ಲಿ ನೆಮ್ಮದಿಯ ಭಾವನೆ ಮೂಡಿದ್ದರೂ, ಸ್ಥಳಾಂತರದ ಭೀತಿಯೂ ಎದುರಾಗಿದೆ.
ನಿಯಮಬದ್ಧ ಪಿಜಿ (PG)ಗಳಿಂದ ಮಾತ್ರ ಬೆಂಗಳೂರಿನ ಬ್ರ್ಯಾಂಡ್ ಮೌಲ್ಯ ಉಳಿಯಲು ಸಾಧ್ಯ. ಜಿಬಿಎ(GBA)ಯ ಈ ಕಟ್ಟುನಿಟ್ಟಿನ ಕ್ರಮವು ವಾಸಿಸುವವರ ಪ್ರಾಣರಕ್ಷಣೆಗೆ ಪೂರಕವಾಗಿದೆ ಎನ್ನಲಾಗುತ್ತಿದೆ.
