ಬೆಂಗಳೂರು: ವಿಜ್ಞಾನ ಕಬ್ಬಿಣದ ಕಡಲೆ ಅಲ್ಲ, ಅರ್ಥ ಮಾಡಿಕೊಳ್ಳಲಾಗದ ವಿಷಯವೂ ಅಲ್ಲ. ಅದೊಂದು ವಿನೋದ, ಬಗೆದಷ್ಟೂ ತಿಳಿದುಕೊಳ್ಳುವ ಆಸಕ್ತಿ ನಿಮಗಿದ್ದರೆ, ನಿಮ್ಮ ಮಕ್ಕಳಿಗೆ ಕಲಿಸಬೇಕೆಂದಿದ್ದರೆ ಬೆಂಗಳೂರು ಜಯನಗರದ ಹೃದಯ ಭಾಗದಲ್ಲಿರುವ ‘ದಿ ಪರಮ್ ಸೈನ್ಸ್ ಎಕ್ಸ್ಪೀರಿಯನ್ಸ್ ಸೆಂಟರ್‌’ಗೆ ಬನ್ನಿ. ಈ ಕೇಂದ್ರದಲ್ಲಿ ಪ್ರಾಯೋಗಿಕ ಕಲಿಕೆಗೆ ಅವಕಾಶ ಇದ್ದು, ಜೀವನದಲ್ಲಿ ವಿಜ್ಞಾನ ಹೇಗೆ ಅಡಗಿದೆ? ಎಂಬುದನ್ನು ಇಲ್ಲಿ ಅರಿಯಬಹುದು. ಅಲ್ಲದೆ, ವಿಜ್ಞಾನದಲ್ಲಿ ತಂತ್ರಜ್ಞಾನದ ಬಳಕೆಯನ್ನೂ ಕಲಿಯಬಹುದು.
ವಿಜ್ಞಾನ ದೈನಂದಿನ ಜೀವನದ ಭಾಗ. ಅದು ಎಷ್ಟು ಸರಳ ಎಂಬುದನ್ನು ಪಾರ್ಸೆಕ್ (ParSEC) ಸೆಂಟರ್‌ನಲ್ಲಿ ತಿಳಿಯಬಹುದು. ಇಂಥದ್ದೊಂದು ಪ್ರಾಯೋಗಿಕ ಗ್ಯಾಲರಿ ಜನಪ್ರಿಯತೆಗಳಿಸಿದೆ. ಹಾಗಾದರೆ, ಈ ಪರಮ್ ಸೈನ್ಸ್ ಎಕ್ಸ್ಪೀರಿಯನ್ಸ್ ಕೇಂದ್ರವು ಕೇವಲ ಶಿಕ್ಷಣಕ್ಕೆ ಸಂಬಂಧಪಟ್ಟಂತೆ ಮಾತ್ರ ಸೀಮಿತವೇ ಎಂದು ನೋಡುವುದಾದರೆ, ಇಲ್ಲ ಎಂಬುದು ಉತ್ತರ. ಇಲ್ಲಿ ಮಕ್ಕಳ ಕಲಿಕಾ ಮಟ್ಟವನ್ನು, ಚಿಂತನಾ ಲಹರಿಯನ್ನು ಒರೆಗೆ ಹಚ್ಚುವ ಕೆಲಸ ಆಗುತ್ತದೆ. ವಿಜ್ಞಾನದ ಬಗೆಗಿನ ಪರಿಕಲ್ಪನೆಯನ್ನು ಬದಲಾಯಿಸುವ ಇದು, ಮಕ್ಕಳ ಸ್ಮೃತಿಪಟಲದಲ್ಲಿ ಸುಲಭವಾಗಿ ಅಚ್ಚೊತ್ತಲಿದೆ.
ವಿಜ್ಞಾನ ಮತ್ತು ತಂತ್ರಜ್ಞಾನದ ಕುರಿತು ಎಲ್ಲ ವಯೋಮಾನದವರಿಗೆ ವಿಜ್ಞಾನ ಕಲಿಕೆ ಬಗ್ಗೆ ಉತ್ಸಾಹವನ್ನು ಹುಟ್ಟು ಹಾಕುವ ಗುರಿಯನ್ನು ಪರಮ್ ಸಂಸ್ಥೆ ಹೊಂದಿದೆ. ಪಾರ್ಸೆಕ್ ‘ವಿಜ್ಞಾನ ಗ್ಯಾಲರಿ ‘ ಮಾತ್ರವಲ್ಲ, ಇದೊಂದು ನಾವೀನ್ಯತೆಯ ಕೇಂದ್ರವಾಗಿದ್ದು, ʻವಿಜ್ಞಾನದಲ್ಲಿನ ಮೋಜುʼ ಎಲ್ಲರ ಅನುಭವಕ್ಕೆ ಬರಲಿದೆ.
ಹೇಗಿದೆ ಪಾರ್ಸೆಕ್ ವಿಜ್ಞಾನ ಲೋಕ?: ಪಾರ್ಸೆಕ್ ಸೆಂಟರ್‌ಗೆ ಕಾಲಿಟ್ಟರೆ ಸಾಕು ವಿಜ್ಞಾನ ಲೋಕ ತೆರೆದುಕೊಳ್ಳುತ್ತದೆ. ವಿಜ್ಞಾನದ ಕೌತುಕಗಳ ಬಗ್ಗೆ ನೀವು ಖುದ್ದು ಅನುಭವವನ್ನು ಪಡೆದುಕೊಳ್ಳಬಹುದಾಗಿದೆ. ವಿಜ್ಞಾನದ ಜೊತೆ ಜೊತೆಗೆ ನೀವು ಸಾಗುತ್ತಿರುವ ಅನುಭವ ನಿಮ್ಮದಾಗುತ್ತದೆ. ತಂತ್ರಜ್ಞಾನದಲ್ಲಿ ವಿಜ್ಞಾನದ ಬಳಕೆ ಹೇಗಿದೆ? ಇದಕ್ಕೂ ವಿಜ್ಞಾನಕ್ಕೂ ಏನು ಸಂಬಂಧ ಎಂದು ಸ್ವತಃ ತಿಳಿದುಕೊಳ್ಳಬಹುದಾಗಿದೆ.
ಅಂದಹಾಗೆ, ಪಾರ್ಸೆಕ್ ಸೈನ್ಸ್ ಗ್ಯಾಲರಿಯಲ್ಲಿ ಒಟ್ಟು 7 ಗ್ಯಾಲರಿಯನ್ನು ರೂಪಿಸಲಾಗಿದೆ. ಇಂಟ್ರೊಡಕ್ಷನ್‌ ಗ್ಯಾಲರಿ, ಕೈನೆಟಿಕ್ ಗ್ಯಾಲರಿ, ಟ್ಯಾಕ್ಟೈಲ್‌ ಗ್ಯಾಲರಿ, ಡಿಜಿಟಲ್ ಗ್ಯಾಲರಿ, ಪಜಲ್ ಗ್ಯಾಲರಿ ಮತ್ತು ಲೈಟ್‌ ಗ್ಯಾಲರಿ, ಇಲ್ಯೂಷನ್ ಗ್ಯಾಲರಿ ಎಂಬುದಾಗಿ ವಿಭಾಗಿಸಲಾಗಿದೆ.
ಮೊದಲ ಗ್ಯಾಲರಿಯಲ್ಲಿ ಪರಮ್ ಕುರಿತಾದ ಕಿರು ಪರಿಚಯ ಮಾಡಿಕೊಡಲಾಗುತ್ತದೆ. ಕೈನೆಟಿಕ್ ಗ್ಯಾಲರಿಯಲ್ಲಿ ಮೋಷನ್‌ ಮೂಮೆಂಟ್ಸ್ ಇದ್ದರೆ, ವಿಜ್ಞಾನ ತತ್ವಗಳ ಆಧಾರದ ಮೇಲೆ ಲೈಟ್‌ ಗ್ಯಾಲರಿಯಲ್ಲಿ ಬೆಳಕಿನ ಚಮತ್ಕಾರ ಕಾಣಬಹುದು. ಟ್ಯಾಕ್ಟೈಲ್‌ ಗ್ಯಾಲರಿಯಲ್ಲಿ ನೀವು ಸ್ವತಃ ಸ್ಪರ್ಶಿಸಿ ವಿಜ್ಞಾನದ ಅನುಭವವನ್ನು ಪಡೆದುಕೊಳ್ಳುತ್ತೀರಿ.
ಡಿಜಿಟಲ್ ಗ್ಯಾಲರಿಯಲ್ಲಿ ಕೃತಕ ಬುದ್ಧಿಮತ್ತೆಯನ್ನು (Artificial intelligence) ಅಳವಡಿಸಲಾಗಿದೆ. ಈ ಮೂಲಕ ವಿದ್ಯಾರ್ಥಿಗಳು ಅಥವಾ ಜನ ಸಾಮಾನ್ಯರು ಡಿಜಿಟಲ್ ಸ್ಕ್ರೀನ್‌ ಅನುಭವವನ್ನು ಪಡೆದುಕೊಳ್ಳಬಹುದಾಗಿದೆ. ಕಲೆ ಮತ್ತು ವಿಜ್ಞಾನ ಒಟ್ಟುಗೂಡಿರುವ ಪಜಲ್ ಗ್ಯಾಲರಿಯಲ್ಲಿ ನಿಮ್ಮ ಮೆದುಳನ್ನು ಚುರುಕುಗೊಳಿಸುವ ಚಟುವಟಿಕೆಗಳಿವೆ. ಇದಲ್ಲದೆ, ಇಲ್ಯೂಷನ್ ಗ್ಯಾಲರಿಯಲ್ಲಿ ನಿಮಗೊಂದು ಅದ್ಭುತವೇ ಕಾಣಸಿಗುತ್ತದೆ. ಇಲ್ಲಿ ಮನುಷ್ಯನಲ್ಲಿರುವ ನವರಸಗಳನ್ನು ಎಕ್ಸ್ಪೀರಿಯನ್ಸ್ ಮಾಡಬಹುದಾಗಿದೆ ಎಂದರೆ ನೀವು ನಂಬಲೇಬೇಕು.
ಒಟ್ಟಾರೆ ಈ 7 ಗ್ಯಾಲರಿಗಳಿಂದ 100ಕ್ಕೂ ಹೆಚ್ಚು ಪ್ರಾತ್ಯಕ್ಷಿಕೆಗಳನ್ನು ಕಾಣಬಹುದಾಗಿದೆ. ಮನುಷ್ಯನಂತೆ ಹೆಜ್ಜೆ ಹಾಕುವ ಬೈಸಿಕಲ್‌ ಇರಬಹುದು, ಬೆರಳ ತುದಿಯಲ್ಲೇ ಆಡಿಸಬಹುದಾದ ತಂತ್ರಜ್ಞಾನಗಳನ್ನು ಅರಿಯಬಹುದು. ಇದೇ ರೀತಿಯಾಗಿ ವಿಭಿನ್ನವಾದ ಹಲವಾರು ಆಸಕ್ತಿದಾಯಕ, ತಿಳಿದುಕೊಳ್ಳಲೇಬೇಕಾದ ಅಂಶಗಳು ಇಲ್ಲಿರಲಿದೆ.
ಭೇಟಿಗಾಗಿ ಮಾಹಿತಿ: ಈ ಗ್ಯಾಲರಿ ತೆರೆಯುವ ಸಮಯ. ಮಂಗಳವಾರ–ಶುಕ್ರವಾರ ಬೆಳಗ್ಗೆ 10 ರಿಂದ ಸಂಜೆ 6 ಗಂಟೆವರೆಗೆ. ಶನಿವಾರ-ಭಾನುವಾರ ಬೆಳಗ್ಗೆ 11 ರಿಂದ ಸಂಜೆ 7 ಗಂಟೆವರೆಗೆ. ವಾರದ ರಜೆ ಸೋಮವಾರ.
ಜಯನಗರದಲ್ಲಿರುವ ಈ ಸೈನ್ಸ್ ಗ್ಯಾಲರಿಗೆ ಎಲ್ಲೆಡೆ ಅಭೂತಪೂರ್ವ ಸ್ಪಂದನೆ ಸಿಕ್ಕಿದೆ. ಮಕ್ಕಳು ಹಾಗೂ ಪೋಷಕರು ಕೌತುಕದಿಂದ ಮಾಹಿತಿಯನ್ನು ಪಡೆದುಕೊಳ್ಳುತ್ತಿದ್ದಾರೆ. ಇನ್ನು ಮಹಾನಗರಿ ಬೆಂಗಳೂರು ವಿಶಾಲವಾಗಿರುವುದರಿಂದ ಬೇರೆಡೆಯೂ ಕೇಂದ್ರ ತೆರೆಯುವಂತೆ ಜನರಿಂದ ಸಂಸ್ಥೆಗೆ ಒತ್ತಡ ಬಂದಿದೆ. ಹೀಗಾಗಿ ಪರಮ್ ಸಂಸ್ಥೆಯು ಬೆಂಗಳೂರಿನ ವೈಟ್‌ಫೀಲ್ಡ್‌ ಸೇರಿದಂತೆ ಇತರೆಡೆಯೂ ಕೇಂದ್ರಗಳನ್ನು ತೆರೆಯುವ ಯೋಜನೆಯನ್ನು ಹೊಂದಿದೆ.
ಪರಮ್ ವಿಜ್ಞಾನ ಮತ್ತು ಸಂಸ್ಕೃತಿ ಕೇಂದ್ರ: ಬೆಂಗಳೂರಿನ ಮಾಗಡಿ ರಸ್ತೆಯ ಚನ್ನೇನಹಳ್ಳಿಯಲ್ಲಿ ಸುಮಾರು 15 ಎಕರೆ ಜಾಗದಲ್ಲಿ ಪರಮ್ ವಿಜ್ಞಾನ ಮತ್ತು ಸಂಸ್ಕೃತಿ ಕೇಂದ್ರ ನಿರ್ಮಾಣಗೊಳ್ಳುತ್ತಿದೆ. ಈ ಕೇಂದ್ರವು, ಭಾರತದಲ್ಲಿ ರೂಪುಗೊಳ್ಳುತ್ತಿರುವ ಅತಿದೊಡ್ಡ ಮಲ್ಟಿ ಎಕ್ಸ್ಪೀರಿಯನ್ಸ್ ತಾಣವಾಗಿದೆ.
ಇದು ವಿಜ್ಞಾನ, ಇತಿಹಾಸ, ಕಲೆ ಮತ್ತು ಸಂಸ್ಕೃತಿಯ ಬೆಳವಣಿಗೆಗೆ ವೇದಿಕೆಯನ್ನು ಒದಗಿಸಿಕೊಡಲಿದೆ. ಇಲ್ಲಿ, ವೈಜ್ಞಾನಿಕ ಆವಿಷ್ಕಾರಗಳೂ, ಸಾಂಸ್ಕೃತಿಕ ಕಲಿಕಾ ಸೌಲಭ್ಯಗಳೂ ಇರಲಿವೆ. ಅಲ್ಲದೇ, ಇದು ಇವೆಲ್ಲದ್ದಕ್ಕೂ ಏಷ್ಯಾದಲ್ಲಿಯೇ ಅತ್ಯುತ್ಕೃಷ್ಟ ಸೌಲಭ್ಯಗಳನ್ನು ಹೊಂದಿರುವ ತಾಣವಾಗಲಿದೆ. ಕಲಿಕೆಗೂ, ಮನೋರಂಜನಾತ್ಮಕ ಚಟುವಟಿಕೆಗಳಿಗೂ ಬೃಹತ್‌ ಕೇಂದ್ರ ತಾಣವಾಗಿ ರೂಪುಗೊಳ್ಳುತ್ತಿದೆ.
ಕೇಂದ್ರದಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ಸಮ್ಮೇಳನ ಭವನ, ಪ್ರದರ್ಶನ ಭವನ, ವಿಜ್ಞಾನ ಕೇಂದ್ರ ಹಾಗೂ ಅತ್ಯುತ್ತಮ ಸೌಲಭ್ಯಗಳುಳ್ಳ ಅತಿಥಿ ಗೃಹಗಳು ನಿರ್ಮಾಣಗೊಳ್ಳುತ್ತಿವೆ. ಈ ಕೇಂದ್ರದ ಮೂಲಕ ಸೇವಾ ಸಂಸ್ಥೆಯು ಯುವ ಮನಸ್ಸುಗಳಿಗೆ ಆಧುನಿಕ ವಿಜ್ಞಾನ (Modern Science) ಮತ್ತು ಭಾರತೀಯ ಪ್ರಾಚೀನ ವಿಜ್ಞಾನ (Ancient Indian Science) , ಇತಿಹಾಸ, ಸಂಸ್ಕೃತಿ, ಕಲೆಯ ಬಗ್ಗೆ ಆಸಕ್ತಿ ಮೂಡಿಸುವ ಉದ್ದೇಶ ಹೊಂದಿದೆ.
