ನವದೆಹಲಿ: ಸ್ವಿಟ್ಜರ್‌ಲ್ಯಾಂಡ್ ತನ್ನ ವೈವಿಧ್ಯಮಯ ಚೀಸ್‌ಗಳಿಗಾಗಿ ವಿಶ್ವದಾದ್ಯಂತ ಪ್ರಸಿದ್ಧವಾಗಿರುವ ಸಂದರ್ಭದಲ್ಲಿ, ಪ್ರಧಾನಿ ನರೇಂದ್ರ ಮೋದಿ ಅವರು ಸ್ವಿಸ್ ಅಧ್ಯಕ್ಷ ಗೈ ಪಾರ್ಮೆಲಿನ್ ಅವರಿಗೆ ಭಾರತದ ಮೂರು ವಿಶೇಷ ಚೀಸ್‌ಗಳನ್ನು ಉಡುಗೊರೆಯಾಗಿ ನೀಡುವ ಮೂಲಕ ದೇಶದ ಬೆಳೆಯುತ್ತಿರುವ ಚೀಸ್ ತಯಾರಿಕಾ ಪರಂಪರೆಯನ್ನು ಪರಿಚಯಿಸಿದ್ದಾರೆ. ಗುಲ್ಮಾರ್ಗ್, ಕೊನಾರ್ಕ್ ಮತ್ತು ಯೀಯೂರ್ ಎಂಬ ಮೂರು ಚೀಸ್‌ಗಳನ್ನು ಮೋದಿ ಅವರು ಸೋಮವಾರ ನವದೆಹಲಿಯಲ್ಲಿ ಪಾರ್ಮೆಲಿನ್ ಅವರೊಂದಿಗಿನ ಭೇಟಿಯ ವೇಳೆ ಉಡುಗೊರೆಯಾಗಿ ನೀಡಿದ್ದಾರೆ.
ಗುಲ್ಮಾರ್ಗ್ ಫ್ರೆಂಚ್ ಶೈಲಿಯ ಬ್ರಿ (Brie) ಚೀಸ್ ಆಗಿದ್ದು, ಹೃದಯಾಕಾರದ ಮೃದುವಾದ ಮತ್ತು ಕ್ರೀಮಿ ವಿನ್ಯಾಸ ಹೊಂದಿದೆ. ಪಾಶ್ಚರೀಕರಿಸಿದ ಹಸುವಿನ ಹಾಲಿನಿಂದ ತಯಾರಿಸಲಾಗುವ ಈ ಚೀಸ್‌ಗೆ ಬಿಳಿ ಮೇಲ್ಚರ್ಮ ಮತ್ತು ಮಣ್ಣಿನ, ಅಣಬೆಯಂತಹ ಸುವಾಸನೆಯ ಗುಣಗಳಿವೆ. 2026ರ ಬ್ರೆಜಿಲ್‌ನ Mundial do Queijo do Brasil ಸ್ಪರ್ಧೆಯಲ್ಲಿ ಗುಲ್ಮಾರ್ಗ್‌ಗೆ ಸೂಪರ್ ಗೋಲ್ಡ್ ಪ್ರಶಸ್ತಿ ದೊರೆತಿದೆ.
ಕೊನಾರ್ಕ್ ಫ್ರೆಂಚ್ ಟೊಮ್ಮೆ ಶೈಲಿಯಿಂದ ಪ್ರೇರಿತವಾದ ನೈಸರ್ಗಿಕ ಮೇಲ್ಚರ್ಮದ ಚೀಸ್. ಮೃದುವಾದ ವಿನ್ಯಾಸ, ಮಣ್ಣಿನ ಹಾಗೂ ಖಾರದ ಸುವಾಸನೆ ಮತ್ತು ನಿಂಬೆಯಂತಿರುವ ಅಂತಿಮ ರುಚಿ ಇದರ ವಿಶೇಷತೆ. ಈ ಚೀಸ್ 2023ರ ನಾರ್ವೆ ವಿಶ್ವ ಚೀಸ್ ಪ್ರಶಸ್ತಿಗಳಲ್ಲಿ ಚಿನ್ನ ಹಾಗೂ 2025ರಲ್ಲಿ ಸ್ವಿಟ್ಜರ್‌ಲ್ಯಾಂಡ್‌ನಲ್ಲಿ ಬೆಳ್ಳಿ ಪ್ರಶಸ್ತಿ ಗಳಿಸಿದೆ.
ಮೂರನೇಯದಾದ ಯೀಯೂರ್ ಸ್ವಿಸ್ ಗ್ರುಯೆರ್ ಚೀಸ್‌ನಿಂದ ಪ್ರೇರಣೆ ಪಡೆದ ಮೌಂಟನ್ ಶೈಲಿಯ ಚೀಸ್. ಸುಮಾರು 8ರಿಂದ 9 ತಿಂಗಳುಗಳ ಕಾಲ ಪಕ್ವಗೊಳಿಸಲಾಗುವ ಇದರಲ್ಲಿ ಕಾಯಿಯಂತಹ, ಸಿಹಿ ಹಾಗೂ ಗಿಡಮೂಲಿಕೆಯ ಸುವಾಸನೆ ಬೆಳೆಯುತ್ತದೆ. ಗುಲಾಬಿ ದಳಗಳು ಮತ್ತು ಫೆನ್ನೆಲ್‌ನಿಂದ ಅಲಂಕರಿಸಲಾದ ಇದರ ಮೇಲ್ಚರ್ಮ ಭಾರತೀಯ ಮತ್ತು ಆಲ್ಪೈನ್ ಚೀಸ್ ಪರಂಪರೆಯ ವಿಶಿಷ್ಟ ಸಂಯೋಜನೆಯನ್ನು ತೋರಿಸುತ್ತದೆ. ಉತ್ತಮವಾಗಿ ಕರಗುವ ಗುಣ ಹೊಂದಿರುವುದರಿಂದ ಫಂಡ್ಯೂ ಹಾಗೂ ಗ್ರಿಲ್ ಮಾಡಿದ ಆಹಾರಗಳಿಗೂ ಇದು ಸೂಕ್ತವಾಗಿದೆ.
ಸ್ವಿಸ್ ಅಧ್ಯಕ್ಷ ಗೈ ಪಾರ್ಮೆಲಿನ್ ಅವರು ಅಕ್ಟೋಬರ್ 5ರಿಂದ 7ರವರೆಗೆ ಭಾರತ ಪ್ರವಾಸದಲ್ಲಿದ್ದಾರೆ. ಇದು ಅವರ ಮೊದಲ ಅಧಿಕೃತ ರಾಜ್ಯ ಪ್ರವಾಸವಾಗಿದ್ದು, 2026ರಲ್ಲಿ ಭಾರತಕ್ಕೆ ಅವರ ಎರಡನೇ ಭೇಟಿಯಾಗಿದೆ. ಅಕ್ಟೋಬರ್ 5ರಂದು ಪ್ರಧಾನಿ ಮೋದಿ ಮತ್ತು ಪಾರ್ಮೆಲಿನ್ ನಡುವೆ ನಡೆದ ಮಾತುಕತೆಯಲ್ಲಿ ವ್ಯಾಪಾರ, ಹೂಡಿಕೆ, ತಂತ್ರಜ್ಞಾನ, ವಿಜ್ಞಾನ, ನಾವೀನ್ಯತೆ ಮತ್ತು ವೃತ್ತಿಪರರ ಸಂಚಾರ ಸೇರಿದಂತೆ ಹಲವು ಕ್ಷೇತ್ರಗಳ ಸಹಕಾರದ ಕುರಿತು ಚರ್ಚೆ ನಡೆದಿದೆ.
ಭಾರತ-ಯುರೋಪಿಯನ್ ಫ್ರೀ ಟ್ರೇಡ್ ಅಸೋಸಿಯೇಷನ್‌ (EFTA) ನಡುವಿನ ವ್ಯಾಪಾರ ಮತ್ತು ಆರ್ಥಿಕ ಪಾಲುದಾರಿಕೆ ಒಪ್ಪಂದ (TEPA) ಜಾರಿಗೆ ಬಂದು ಒಂದು ವರ್ಷ ಪೂರ್ಣಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಪಾರ್ಮೆಲಿನ್ ಅವರ ಭಾರತ ಪ್ರವಾಸ ಮಹತ್ವ ಪಡೆದಿದೆ. ಅಕ್ಟೋಬರ್ 7ರಂದು ಎರಡನೇ ಭಾರತ-EFTA ಪ್ರಾಸ್ಪೆರಿಟಿ ಶೃಂಗಸಭೆಯೂ ನಡೆಯಲಿದೆ. ಈ ಹಿನ್ನೆಲೆಯಲ್ಲಿ ಮೂರು ಭಾರತೀಯ ಚೀಸ್‌ಗಳ ಉಡುಗೊರೆ ಎರಡೂ ದೇಶಗಳ ನಡುವಿನ ಆರ್ಥಿಕ ಮತ್ತು ಸಾಂಸ್ಕೃತಿಕ ಸಂಬಂಧಗಳಿಗೆ ವಿಭಿನ್ನವಾದ ಸವಿರುಚಿಯ ಸ್ಪರ್ಶ ನೀಡಿದೆ.
- ದುಡ್ಡು ಸುರಿದರೆ ಸಿನಿಮಾ ಓಡುತ್ತೆ ಎಂಬುದು ಭ್ರಮೆ
- ‘ಪ್ರೇಮದ ಊರಲಿ’ ಚಿತ್ರಕ್ಕೆ ಭರ್ಜರಿ ಗೆಲುವು: ಸಕ್ಸಸ್ ಮೀಟ್‌ನಲ್ಲಿ ಕಣ್ಣೀರಿಟ್ಟ ಚಿತ್ರತಂಡ
- ಮೈಸೂರು ದಸರಾ 2026: ಸೂರ್ಯ ಕಿರಣ್ ವೈಮಾನಿಕ ಪ್ರದರ್ಶನಕ್ಕೆ ಕೇಂದ್ರ ಸರ್ಕಾರ ಅಸ್ತು!
- ಸ್ವಿಸ್ ಅಧ್ಯಕ್ಷರಿಗೆ ಭಾರತೀಯ ಚೀಸ್ : ಪ್ರಧಾನಿಯ ವಿಶಿಷ್ಠ ಉಡುಗೊರೆ!
- ಅಕ್ರಮ ವಲಸಿಗರ ವಿರುದ್ಧ ಕಠಿಣ ಕ್ರಮ : 150 ಬಾಂಗ್ಲಾದೇಶಿ ಗಡೀಪಾರು
