ಅರ್ಜೆಂಟೀನಾದ ಫುಟ್ಬಾಲ್ ಸೂಪರ್ಸ್ಟಾರ್ ಲಿಯೊನೆಲ್ ಮೆಸ್ಸಿ ಅವರು ಅಂತಾರಾಷ್ಟ್ರೀಯ ಫುಟ್ಬಾಲ್ಗೆ ವಿದಾಯ ಘೋಷಿಸಿದ್ದಾರೆ.
ಈ ಕುರಿತು ಅವರು ಸಾಮಾಜಿಕ ಜಾಲತಾಣ ಇನ್ಸ್ಟಾಗ್ರಾಂನಲ್ಲಿ ಭಾವನಾತ್ಮಕ ಪೋಸ್ಟ್ ಹಂಚಿಕೊಂಡಿದ್ದಾರೆ.
‘ಫೈನಲ್ ಪಂದ್ಯದ ಬಳಿಕ ಸಾಕಷ್ಟು ಸಮಯ ಯೋಚಿಸಿದ್ದೇನೆ. ಅರ್ಜೆಂಟೀನಾ ರಾಷ್ಟ್ರೀಯ ತಂಡದಿಂದ ನಿವೃತ್ತಿಯಾಗುವ ನಿರ್ಧಾರಕ್ಕೆ ಬಂದಿದ್ದೇನೆ. ಈ ನಿರ್ಧಾರ ನೋವು ತಂದಿದೆ, ಈಗಲೂ ನನ್ನ ಹೃದಯಕ್ಕೆ ನೋವಾಗುತ್ತಿದೆ. ಆದರೆ ಇದೇ ಸರಿಯಾದ ಸಮಯ ಎಂದು ಅರ್ಥ ಮಾಡಿಕೊಂಡಿದ್ದೇನೆ’ ಎಂದು ಮೆಸ್ಸಿ ಹೇಳಿದ್ದಾರೆ.
‘ಕಳೆದ ಕೆಲವು ವರ್ಷಗಳಲ್ಲಿ ಮಾತ್ರವಲ್ಲ, ಅದಕ್ಕೂ ಮುನ್ನವೂ ನಾನು ಅರ್ಜೆಂಟೀನಾ ಜೆರ್ಸಿಗಾಗಿ ಎಲ್ಲವನ್ನೂ ನೀಡಿದ್ದೇನೆ. ಈ ತಂಡದ ಪರ ಹೋರಾಡಿದ್ದೇನೆ. ದೇಶವಾಸಿಗಳಿಗೆ ಸಂತೋಷ ನೀಡಬೇಕು, ಫುಟ್ಬಾಲ್ ಮೂಲಕ ಅರ್ಜೆಂಟೀನಾದವರಾಗಿರುವ ಹೆಮ್ಮೆ ಮೂಡಿಸಬೇಕು ಎಂಬುದೇ ನನ್ನ ಉದ್ದೇಶವಾಗಿತ್ತು’ ಎಂದು ಅವರು ತಿಳಿಸಿದ್ದಾರೆ.
‘ಇನ್ನು ಹೆಚ್ಚು ಸಮಯ ಉಳಿದಿಲ್ಲ. ಜೀವನದಲ್ಲಿ ಒಂದೊಂದೇ ಅಧ್ಯಾಯ ಮುಕ್ತಾಯಗೊಳ್ಳುತ್ತಿದೆ. ಅರ್ಜೆಂಟೀನಾ ತಂಡದ ಅಧ್ಯಾಯವನ್ನು ಮುಗಿಸುವುದು ನನಗೆ ತುಂಬಾ ನೋವು ತಂದಿದೆ. ನಾನು ರಾಷ್ಟ್ರೀಯ ತಂಡವನ್ನು ಪ್ರೀತಿಸಿದ್ದೇನೆ, ಪ್ರೀತಿಸುತ್ತೇನೆ ಮತ್ತು ಸದಾ ಪ್ರೀತಿಸುತ್ತಲೇ ಇರುತ್ತೇನೆ. ನನ್ನಿಂದ ನೀಡಲು ಸಾಧ್ಯವಿದ್ದುದನ್ನೆಲ್ಲ ನೀಡಿದ್ದೇನೆ. ನನ್ನ ಹಿಂದೆ ಬರುವ ಅತ್ಯುತ್ತಮ ಯುವ ಆಟಗಾರರು ತಂಡದಲ್ಲಿ ಸ್ಥಾನ ಪಡೆಯಲು ಅರ್ಹರಾಗಿದ್ದಾರೆ’ ಎಂದು ಮೆಸ್ಸಿ ಹೇಳಿದ್ದಾರೆ.
ರಾಷ್ಟ್ರೀಯ ತಂಡದೊಂದಿಗೆ ಕಳೆದ 20 ವರ್ಷಗಳ ಪ್ರೀತಿ, ಬೆಂಬಲ ಮತ್ತು ಅಭಿಮಾನಕ್ಕೆ ಧನ್ಯವಾದ ಅರ್ಪಿಸಿರುವ ಮೆಸ್ಸಿ, ‘ತಂಡದ ಒಳಗಿನಿಂದ ಅಭಿಮಾನಿಗಳ ಕೂಗು ಕೇಳುವುದನ್ನು ನಾನು ತುಂಬಾ ಮಿಸ್ ಮಾಡಿಕೊಳ್ಳುತ್ತೇನೆ. ಇನ್ನು ಮುಂದೆ ನಾನು ನಿಮ್ಮಂತೆಯೇ ಹೊರಗಿನಿಂದ ತಂಡವನ್ನು ಬೆಂಬಲಿಸುತ್ತೇನೆ. ಒಳ್ಳೆಯ ಸಮಯದಲ್ಲಷ್ಟೇ ಅಲ್ಲ, ಕಷ್ಟದ ಸಂದರ್ಭದಲ್ಲೂ ಇನ್ನಷ್ಟು ಬಲವಾಗಿ ಅರ್ಜೆಂಟೀನಾವನ್ನು ಬೆಂಬಲಿಸುತ್ತೇನೆ’ ಎಂದು ಹೇಳಿದ್ದಾರೆ.
ತಮ್ಮ ಕುಟುಂಬ, ತರಬೇತುದಾರರು, ಸಹ ಆಟಗಾರರು ಹಾಗೂ ತಂಡದ ಅಧಿಕಾರಿಗಳಿಗೂ ಮೆಸ್ಸಿ ಧನ್ಯವಾದ ತಿಳಿಸಿದ್ದಾರೆ. ‘ನನ್ನ ಸಹ ಆಟಗಾರರೊಂದಿಗೆ ಸೇರಿ ನಿಮಗೆ ಕನಸುಗಳಂತಹ ಕ್ಷಣಗಳನ್ನು ಉಡುಗೊರೆಯಾಗಿ ನೀಡಿದ್ದೇನೆ ಎಂಬ ಹೆಮ್ಮೆ ಮತ್ತು ನೆಮ್ಮದಿಯೊಂದಿಗೆ ಹೊರಡುತ್ತಿದ್ದೇನೆ. ನಿಮ್ಮೊಂದಿಗೆ ಈ ಎಲ್ಲವನ್ನು ಅನುಭವಿಸಿದ್ದು ನಂಬಲಾಗದ ಪ್ರಯಾಣ’ ಎಂದು ಅವರು ಭಾವುಕರಾಗಿದ್ದಾರೆ.
ಕೊನೆಯಲ್ಲಿ, ‘ದೇವರಿಗೆ ಧನ್ಯವಾದಗಳು, ನನ್ನನ್ನು ಅರ್ಜೆಂಟೀನಾದವನನ್ನಾಗಿ ಮಾಡಿದ್ದಕ್ಕಾಗಿ. ವಾಮೋಸ್ ಅರ್ಜೆಂಟೀನಾ!’ ಎಂದು ಮೆಸ್ಸಿ ಬರೆದುಕೊಂಡಿದ್ದಾರೆ.
ತಂದೆಯ ನಿಧನದ ಬಳಿಕ ಮತ್ತಷ್ಟು ದೃಢವಾದ ನಿರ್ಧಾರ: ಮೆಸ್ಸಿ ತಮ್ಮ ಪೋಸ್ಟ್ನಲ್ಲಿ ಮತ್ತೊಂದು ಮಹತ್ವದ ವಿಚಾರವನ್ನೂ ಬಹಿರಂಗಪಡಿಸಿದ್ದಾರೆ. ‘ಈ ಮಾತುಗಳನ್ನು ನಾನು ಫೈನಲ್ ಪಂದ್ಯದ ಎರಡು ದಿನಗಳ ಬಳಿಕ, ಜುಲೈ 21ರಂದು ಬರೆದಿದ್ದೆ. ಇಂದು ನನ್ನ ತಂದೆಯ ನಿಧನದ ಬಳಿಕ ಈ ನಿರ್ಧಾರದ ಬಗ್ಗೆ ಹಿಂದೆಂದಿಗಿಂತಲೂ ಹೆಚ್ಚು ದೃಢವಾಗಿದ್ದೇನೆ’ ಎಂದು ಅವರು ತಿಳಿಸಿದ್ದಾರೆ.
ಮೆಸ್ಸಿಯ ಈ ಘೋಷಣೆ ವಿಶ್ವ ಫುಟ್ಬಾಲ್ ಅಭಿಮಾನಿಗಳಿಗೆ ಭಾವುಕ ಕ್ಷಣವಾಗಿದ್ದು, ಅರ್ಜೆಂಟೀನಾ ತಂಡದೊಂದಿಗಿನ ಅವರ ಎರಡು ದಶಕಗಳ ಸುದೀರ್ಘ ಪಯಣಕ್ಕೆ ಅಂತ್ಯ ಹಾಡಿದಂತಾಗಿದೆ.
