ಭುವನೇಶ್ವರ: ಕೇವಲ ನಾಲ್ಕು ವರ್ಷದ ಬಾಲಕಿ ಚೆಸ್ ಜಗತ್ತಿನಲ್ಲಿ ಐತಿಹಾಸಿಕ ಸಾಧನೆ ಮಾಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಒಡಿಶಾದ ಎಲೆನಾ ಮಿಶ್ರಾ ಅವರು ಅಧಿಕೃತ FIDE ರೇಟಿಂಗ್ ಹೊಂದಿರುವ ಅತ್ಯಂತ ಕಿರಿಯ ಮಹಿಳಾ ಆಟಗಾರ್ತಿಯಾಗಿ ಹೊಸ ಮೈಲಿಗಲ್ಲು ನಿರ್ಮಿಸಿದ್ದಾರೆ.
ಸೆಪ್ಟೆಂಬರ್ 2026ರ FIDE ರೇಟಿಂಗ್ ಪಟ್ಟಿಯಲ್ಲಿ ಎಲೆನಾ ಮಿಶ್ರಾ ಅವರ ಹೆಸರು ದಾಖಲಾಗಿದ್ದು, ಬ್ಲಿಟ್ಜ್ ವಿಭಾಗದಲ್ಲಿ ಅವರು 1432 ರೇಟಿಂಗ್ ಪಡೆದಿದ್ದಾರೆ. ಈ ಮೂಲಕ 2022 ಅಥವಾ ನಂತರ ಜನಿಸಿದ ಮಹಿಳಾ ಆಟಗಾರ್ತಿಯರಲ್ಲಿ ಅಧಿಕೃತ FIDE ರೇಟಿಂಗ್ ಹೊಂದಿರುವ ಏಕೈಕ ಆಟಗಾರ್ತಿಯಾಗಿ ಎಲೆನಾ ಗುರುತಿಸಿಕೊಂಡಿದ್ದಾರೆ ಎಂದು ವರದಿಯಾಗಿದೆ.
ಎಲೆನಾ ಅವರು ಈ ಅಪರೂಪದ ಸಾಧನೆಯನ್ನು ಇತ್ತೀಚೆಗೆ ಭುವನೇಶ್ವರದ ಮದರ್ಸ್ ಪಬ್ಲಿಕ್ ಸ್ಕೂಲ್ನಲ್ಲಿ ನಡೆದ Odisha State Blitz FIDE Rating Open Chess Championship 2026ನಲ್ಲಿ ಭಾಗವಹಿಸುವ ಮೂಲಕ ಸಾಧಿಸಿದ್ದಾರೆ. ಟೂರ್ನಿಯ ಫಲಿತಾಂಶಗಳಲ್ಲಿಯೂ ಎಲೆನಾ ಮಿಶ್ರಾ ಅವರ ಹೆಸರು ದಾಖಲಾಗಿದ್ದು, ಅವರ ಬ್ಲಿಟ್ಜ್ ರೇಟಿಂಗ್ 1432 ಆಗಿದೆ.
ನಾಲ್ಕು ವರ್ಷ, ಆರು ತಿಂಗಳು ಮತ್ತು 16 ದಿನಗಳ ವಯಸ್ಸಿನಲ್ಲಿ ಎಲೆನಾ ಈ ಸಾಧನೆ ಮಾಡಿದ್ದಾರೆ. ಸಾಮಾನ್ಯವಾಗಿ ಈ ವಯಸ್ಸಿನಲ್ಲಿ ಮಕ್ಕಳು ಚೆಸ್ನ ಮೂಲ ನಿಯಮಗಳು ಹಾಗೂ ಕಾಯಿಗಳ ಚಲನವಲನ ಕಲಿಯುವ ಹಂತದಲ್ಲಿರುತ್ತಾರೆ. ಆದರೆ ಎಲೆನಾ ಈಗಾಗಲೇ ಅಧಿಕೃತ ಅಂತರರಾಷ್ಟ್ರೀಯ ರೇಟಿಂಗ್ ಪಟ್ಟಿಗೆ ಸೇರ್ಪಡೆಯಾಗಿರುವುದು ಭಾರತೀಯ ಚೆಸ್ನ ಭವಿಷ್ಯದ ಪ್ರತಿಭೆಗಳ ಕುರಿತು ಮತ್ತೊಮ್ಮೆ ಗಮನ ಸೆಳೆಯುವಂತೆ ಮಾಡಿದೆ.
ಎಲೆನಾ ಅವರ ಸಾಧನೆಗೆ ಒಡಿಶಾ ಮುಖ್ಯಮಂತ್ರಿ ಮೋಹನ್ ಚರಣ್ ಮಾಝಿ ಅಭಿನಂದನೆ ಸಲ್ಲಿಸಿದ್ದಾರೆ. ಇಷ್ಟು ಚಿಕ್ಕ ವಯಸ್ಸಿನಲ್ಲೇ ಚೆಸ್ ಜಗತ್ತಿನಲ್ಲಿ ತಮ್ಮ ಛಾಪು ಮೂಡಿಸಿರುವ ಎಲೆನಾ ಅವರ ಪ್ರತಿಭೆ, ಪರಿಶ್ರಮ ಮತ್ತು ದೃಢಸಂಕಲ್ಪ ಶ್ಲಾಘನೀಯ ಎಂದು ಮುಖ್ಯಮಂತ್ರಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಭಾರತ ಈಗಾಗಲೇ ವಿಶ್ವ ಚೆಸ್ನಲ್ಲಿ ಪ್ರಮುಖ ಶಕ್ತಿಯಾಗಿ ಗುರುತಿಸಿಕೊಂಡಿದೆ. ವಿಶ್ವ ಚಾಂಪಿಯನ್ಗಳಾದ ವಿಶ್ವನಾಥನ್ ಆನಂದ್, ಡಿ. ಗುಕೇಶ್ ಸೇರಿದಂತೆ ಹಲವು ಪ್ರತಿಭಾವಂತ ಆಟಗಾರರು ದೇಶದ ಚೆಸ್ಗೆ ಜಾಗತಿಕ ಮಟ್ಟದಲ್ಲಿ ಖ್ಯಾತಿ ತಂದಿದ್ದಾರೆ. ಈ ಸಾಲಿಗೆ ಅತ್ಯಂತ ಕಿರಿಯ ವಯಸ್ಸಿನಲ್ಲೇ ಎಲೆನಾ ಮಿಶ್ರಾ ಅವರಂತಹ ಹೊಸ ಪ್ರತಿಭೆಯ ಸೇರ್ಪಡೆ ಭಾರತೀಯ ಚೆಸ್ನ ಭವಿಷ್ಯದ ಬಗ್ಗೆ ಮತ್ತಷ್ಟು ನಿರೀಕ್ಷೆ ಮೂಡಿಸಿದೆ.
ಎಲೆನಾ ಅವರ ಈ ಸಾಧನೆ ಕೇವಲ ವೈಯಕ್ತಿಕ ದಾಖಲೆ ಮಾತ್ರವಲ್ಲದೆ, ಚಿಕ್ಕ ವಯಸ್ಸಿನಲ್ಲೇ ಮಕ್ಕಳಲ್ಲಿ ಚೆಸ್ ಸೇರಿದಂತೆ ಬೌದ್ಧಿಕ ಕ್ರೀಡೆಗಳತ್ತ ಆಸಕ್ತಿ ಬೆಳೆಸುವ ಮಹತ್ವವನ್ನೂ ತೋರಿಸುತ್ತದೆ. ಮುಂದಿನ ದಿನಗಳಲ್ಲಿ ಎಲೆನಾ ಇನ್ನಷ್ಟು ಟೂರ್ನಿಗಳಲ್ಲಿ ಭಾಗವಹಿಸಿ ತಮ್ಮ ರೇಟಿಂಗ್ ಹಾಗೂ ಸಾಧನೆಗಳನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳುವ ನಿರೀಕ್ಷೆಯಿದೆ.
ಪ್ರತಿ ಹೊಸ ಅಪ್ಡೇಟ್ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್ಡೇಟ್ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.
