ಶ್ವಾಸಕೋಶದ ತೀವ್ರ ಸೋಂಕಿನಿಂದ ಬಳಲುತ್ತಿರುವ 75 ವರ್ಷದ ಹಿರಿಯ ಜೀವ ರಾಧೇಶ್ಯಾಮ್ ಅವರ ಕೊನೆಯ ದಿನಗಳಲ್ಲಿ ಜೊತೆಯಾಗಿರಬೇಕೆಂದು ದೇಶದ ವಿವಿಧ ಮೂಲೆಗಳಿಂದ ಬಂದಿದ್ದ ಇಡೀ ಅಗರ್ವಾಲ್ ಕುಟುಂಬಕ್ಕೆ ವಿಧಿ ಕ್ರೂರವಾಗಿ ಆಟವಾಡಿದೆ. ದೆಹಲಿಯ ಸಾಕೇತ್ನಲ್ಲಿರುವ ಮ್ಯಾಕ್ಸ್ ಆಸ್ಪತ್ರೆಯ ಹತ್ತಿರದಲ್ಲೇ ತಂಗಿದ್ದ ಇವರ ಕುಟುಂಬದ 8 ಸದಸ್ಯರು ಹೋಟೆಲ್ನಲ್ಲಿ ಸಂಭವಿಸಿದ ಭೀಕರ ಅಗ್ನಿ ಅವಘಡದಲ್ಲಿ ಜೀವಂತವಾಗಿ ದಹನವಾಗಿರುವ ಅತ್ಯಂತ ಕರುಣಾಜನಕ ಘಟನೆ ನಡೆದಿದೆ.
ಕೆಲವೇ ದಿನಗಳ ಮುನ್ನವಷ್ಟೇ ವೈದ್ಯರು ರಾಧೇಶ್ಯಾಮ್ ಅವರಿಗೆ ಹೆಚ್ಚು ಸಮಯ ಉಳಿದಿಲ್ಲ ಎಂದು ತಿಳಿಸಿದಾಗ, ಕುಟುಂಬಸ್ಥರೆಲ್ಲರೂ ಅವರೊಂದಿಗೆ ಗರಿಷ್ಠ ಸಮಯ ಕಳೆಯಲು ಆಸ್ಪತ್ರೆಯ ಸಮೀಪದ ಹೋಟೆಲ್ನಲ್ಲಿ ಕೊಠಡಿಗಳನ್ನು ಕಾಯ್ದಿರಿಸಿದ್ದರು. ರಾಧೇಶ್ಯಾಮ್ ಅವರ ಧರ್ಮಪತ್ನಿ ಪ್ರೇಮಲತಾ (70), ಗುರುಗ್ರಾಮದ ಪ್ರಾಸಿಕ್ಯೂಟಿವ್ ಇನ್ಸುರೆಟೆಕ್ ಕಂಪನಿಯೊಂದರಲ್ಲಿ ಮುಖ್ಯ ಹಣಕಾಸು ಅಧಿಕಾರಿಯಾಗಿದ್ದ (CFO) ಮಗ ವಿವೇಕ್ (47), ಸೌಂದರ್ಯ ಸ್ಪರ್ಧೆಯ ಕಿರೀಟ ಮುಡಿಗೇರಿಸಿಕೊಂಡಿದ್ದ ಸೊಸೆ ತರ್ಜಾನಿ (42), ಮತ್ತು ಇತ್ತೀಚೆಗಷ್ಟೇ 10ನೇ ತರಗತಿಯಲ್ಲಿ ಶೇಕಡಾ 97 ರಷ್ಟು ಅಂಕ ಗಳಿಸಿದ್ದ 16 ವರ್ಷದ ಮೊಮ್ಮಗಳು ಪರ್ಲ್ ಈ ದುರಂತಕ್ಕೆ ಬಲಿಯಾಗಿದ್ದಾರೆ.
ಇವರ ಜೊತೆಗೆ ಸೇರಲೆಂದೇ ಬೆಂಗಳೂರಿನಲ್ಲಿ ಬಿ.ಟೆಕ್ ಓದುತ್ತಿದ್ದ ಹಿರಿಯ ಮೊಮ್ಮಗಳು ಜಿವಿಶಾ ಅಲಿಯಾಸ್ ಏಂಜೆಲ್ (20), ಘಟನೆ ನಡೆಯುವುದಕ್ಕೆ ಕೆಲವೇ ಗಂಟೆಗಳ ಮುನ್ನವಷ್ಟೇ ವಿಮಾನದ ಮೂಲಕ ದೆಹಲಿ ತಲುಪಿದ್ದಳು. ಇಷ್ಟೇ ಅಲ್ಲದೆ, ಪ್ರೇಮಲತಾ ಅವರ ಸೋದರಿ ಕಮಲಾ (52), ಸೋದರ ಅಶೋಕ್ (56) ಅವರು ಕೂಡ ರಾಜಸ್ಥಾನದ ಕಿಶನ್ಗಢದಿಂದ ಬಂದು ಇವರ ಜೊತೆಯಾಗಿದ್ದು, ದುರಂತದಲ್ಲಿ ಸಾವನ್ನಪ್ಪಿದ್ದಾರೆ. ಅವರೊಂದಿಗೆ ಬಂದಿದ್ದ ಮತ್ತೊಬ್ಬ ಸಂಬಂಧಿ ಜವೇರಿ ಇಂದಿಗೂ ಪತ್ತೆಯಾಗಿಲ್ಲ.
ಬೆಳಗ್ಗೆ 8:45 ರ ಸುಮಾರಿಗೆ ಬೆಂಕಿ ಕಾಣಿಸಿಕೊಂಡ ತಕ್ಷಣ ವಿವೇಕ್ ಅವರು ತಬ್ಬಿಬ್ಬಾಗಿ ತಮ್ಮ ಸೋದರಸಂಬಂಧಿಗೆ ಫೋನ್ ಮಾಡಿ ರಕ್ಷಣೆಗಾಗಿ ಅಂಗಲಾಚಿದ್ದರು. ಸುದ್ದಿ ಕೇಳಿ ತಕ್ಷಣ ಸ್ಥಳಕ್ಕೆ ಧಾವಿಸಿದ ಅವರ ತಂಗಿ ಸ್ವಾತಿ ಮತ್ತು ಇತರ ಸಂಬಂಧಿಕರು ವಿವೇಕ್ ಅವರನ್ನು ಹೊರಗೆಳೆದು ಸಿ.ಪಿ.ಆರ್ ನೀಡಲು ಪ್ರಯತ್ನಿಸಿದರೂ, ಅಷ್ಟರಲ್ಲಾಗಲೇ ತೀವ್ರವಾದ ಹೊಗೆಯನ್ನು ಶ್ವಾಸಕೋಶಕ್ಕೆ ಎಳೆದುಕೊಂಡಿದ್ದ ವಿವೇಕ್ ಕೊನೆಯುಸಿರೆಳೆದಿದ್ದರು. ಕಿರಿದಾದ ರಸ್ತೆಯ ಕಾರಣದಿಂದಾಗಿ ಅಗ್ನಿಶಾಮಕ ವಾಹನಗಳು ಬರಲು ಸುಮಾರು 45 ನಿಮಿಷ ತಡವಾಗಿತ್ತು ಎಂದು ಕುಟುಂಬದವರು ಗಂಭೀರ ಆರೋಪ ಮಾಡಿದ್ದಾರೆ.
ಇತ್ತ ಸೊಸೆ ತರ್ಜಾನಿ ಅವರ ದೇಹ ಗುರುತೇ ಸಿಗದಂತೆ ಸುಟ್ಟು ಕರಕಲಾಗಿದ್ದು, ಕೇವಲ ಅವರು ಧರಿಸಿದ್ದ ಆಭರಣಗಳನ್ನು ನೋಡಿ ದೇಹವನ್ನು ಗುರುತಿಸಬೇಕಾದ ಪರಿಸ್ಥಿತಿ ಬಂದಿತ್ತು. ವಿದ್ಯಾಭ್ಯಾಸಕ್ಕಾಗಿ ಮನೆಯಿಂದ ದೂರವಿದ್ದ ಮಗಳು ಏಂಜೆಲ್ ದೇಹ ಇಂದು ಬೇರೆ ಆಸ್ಪತ್ರೆಯಲ್ಲಿದ್ದು, ಸಾವಿನಲ್ಲೂ ಅವಳು ಕುಟುಂಬದಿಂದ ದೂರ ಉಳಿಯುವಂತಾಯಿತು ಎಂದು ಸಂಬಂಧಿಕರು ಕಣ್ಣೀರಿಟ್ಟಿದ್ದಾರೆ.
ಈ ಎಲ್ಲ ಘಟನೆಗಳ ನಡುವೆ ಅತ್ಯಂತ ಕರುಣಾಜನಕ ಸಂಗತಿಯೆಂದರೆ, ಯಾವ ಅಜ್ಜನನ್ನು ನೋಡಲು ಈ ಇಡೀ ಕುಟುಂಬ ಒಟ್ಟಿಗೆ ಸೇರಿತ್ತೋ, ಆ ಅಸ್ವಸ್ಥ ರಾಧೇಶ್ಯಾಮ್ ಅವರಿಗೆ ತಮ್ಮ ಇಡೀ ಕುಟುಂಬವೇ ನಾಶವಾಗಿದೆ ಎಂಬ ಕಹಿ ಸತ್ಯ ಇಂದಿಗೂ ತಿಳಿದಿಲ್ಲ. ಅವರ ಆರೋಗ್ಯದ ಸ್ಥಿತಿಯನ್ನು ಪರಿಗಣಿಸಿ ಈ ಆಘಾತವನ್ನು ತಡೆದುಕೊಳ್ಳುವ ಶಕ್ತಿ ಅವರಿಗಿಲ್ಲ ಎಂದು ನೆಂಟರು ಈ ಕಟು ಸತ್ಯವನ್ನು ಅವರಿಂದ ಮುಚ್ಚಿಟ್ಟಿದ್ದಾರೆ. ಕೇವಲ ಒಂದು ಅಗ್ನಿ ಅವಘಡದ ನಿರ್ಲಕ್ಷ್ಯಕ್ಕೆ ಸಿಲುಕಿ, ಪ್ರೀತಿ ಮತ್ತು ನಗುವಿನಿಂದ ತುಂಬಿದ್ದ ಆ ಅಗರ್ವಾಲ್ ಕುಟುಂಬ ಇಂದು ಕೇವಲ ಬೂದಿಯ ರಾಶಿಯಾಗಿ ಮತ್ತು ಎಂದಿಗೂ ಮರೆಯಲಾಗದ ಕಣ್ಣೀರಿನ ಇತಿಹಾಸವಾಗಿ ಉಳಿದುಹೋಗಿದೆ.
