ಲಡಾಖ್ನ ಲೇಹ್ ನಗರದಲ್ಲಿ ಬುದ್ಧ ಪೂರ್ಣಿಮೆಯ ಸಂದರ್ಭದಲ್ಲಿ ಅಪರೂಪದ ಆಧ್ಯಾತ್ಮಿಕ ಘಟನೆ ನಡೆಯುತ್ತಿದ್ದು, Gautama Buddha ಅವರ ಪವಿತ್ರ ಅವಶೇಷಗಳನ್ನು ಸಾರ್ವಜನಿಕ ಪ್ರದರ್ಶನಕ್ಕೆ ಇಡಲಾಗಿದೆ. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಈ ಐತಿಹಾಸಿಕ ಪ್ರದರ್ಶನಕ್ಕೆ ಚಾಲನೆ ನೀಡಿದ್ದಾರೆ, ಇದು ಭಕ್ತರಲ್ಲಿ ಅಪಾರ ಭಕ್ತಿಭಾವವನ್ನು ಮೂಡಿಸಿದೆ.
ಇಂದಿನಿಂದ ಮೇ14 ರವರೆಗೆ ದರ್ಶನ: 1898ರಲ್ಲಿ ಪಿಪ್ರಾಹ್ವಾ ಪ್ರದೇಶದಲ್ಲಿ ಪತ್ತೆಯಾದ ಗೌತಮ ಬುದ್ಧರ ಮೂಳೆ ತುಣುಕುಗಳನ್ನು ಮೊದಲ ಬಾರಿಗೆ ಸಾರ್ವಜನಿಕರಿಗೆ ಪ್ರದರ್ಶಿಸಲಾಗುತ್ತಿದೆ. ಇಂದಿನಿಂದ (ಮೇ 02) ಈ ಅಪರೂಪದ ದರ್ಶನಕ್ಕಾಗಿ ಬೆಳಗ್ಗಿನ ಜಾವದಿಂದಲೇ ಲೇಹ್ನ ಜೀವತ್ಸಲ್ ಮೈದಾನದಲ್ಲಿ ಸಾವಿರಾರು ಭಕ್ತರು ಸಾಲುಗಟ್ಟಿ ನಿಂತಿರುವ ದೃಶ್ಯ ಕಂಡುಬಂದಿದೆ.
ಈ ಮಹತ್ವದ ಕಾರ್ಯಕ್ರಮವನ್ನು ಭಾರತದ ಸಂಸ್ಕೃತಿ ಸಚಿವಾಲಯ ಮತ್ತು ಅಂತರರಾಷ್ಟ್ರೀಯ ಬೌದ್ಧ ಒಕ್ಕೂಟವು ಸಂಯುಕ್ತವಾಗಿ ಆಯೋಜಿಸಿದ್ದು, ಮೇ 2 ರಿಂದ ಮೇ 14ರವರೆಗೆ ಲಡಾಖ್ನ ವಿವಿಧ ಸ್ಥಳಗಳಲ್ಲಿ ನಡೆಯಲಿದೆ.
ದರ್ಶನ ಸ್ಥಳಗಳ ವೇಳಾಪಟ್ಟಿ: ಮೇ 2 – 10: ಜೀವತ್ಸಲ್, ಚೋಗ್ಲಾಮ್ಸರ್, ಲೇಹ್ ಹಾಗೂ ಮೇ 11 – 12: ಝನ್ಸ್ಕಾರ್, ಕಾರ್ಗಿಲ್ ಜಿಲ್ಲೆ ಮತ್ತು ಮೇ 13 – 14: ಧರ್ಮ ಕೇಂದ್ರ, ಲೇಹ್ನಲ್ಲಿ ದರ್ಶನಕ್ಕಾಗಿ ಅವಕಾಶ.
ಈ ಅವಶೇಷಗಳನ್ನು ಮೂಲತಃ ನವದೆಹಲಿ ರಾಷ್ಟ್ರೀಯ ವಸ್ತುಸಂಗ್ರಹಾಲಯದಿಂದ ಲಡಾಖ್ಗೆ ತರಲಾಗಿದ್ದು, ಮೇ 15ರಂದು ಮತ್ತೆ ದೆಹಲಿಗೆ ಹಿಂತಿರುಗಿಸಲಾಗುತ್ತದೆ.
ಈ ಅವಶೇಷಗಳನ್ನು ಹಿಂದೆ ಥೈಲ್ಯಾಂಡ್, ಮಂಗೋಲಿಯಾ, ವಿಯೆಟ್ನಾಂ, ರಷ್ಯಾ, ಸಿಂಗಾಪುರ್, ಭೂತಾನ್, ಶ್ರೀಲಂಕಾ ಮತ್ತು ಮ್ಯಾನ್ಮಾರ್ ಸೇರಿದಂತೆ ಹಲವಾರು ದೇಶಗಳಲ್ಲಿ ಪ್ರದರ್ಶಿಸಲಾಗಿದ್ದರೂ, ಭಾರತದೊಳಗೆ ಮೂಲ ಸಂರಕ್ಷಿತ ಸ್ಥಳದಿಂದ ಹೊರಗೆ ತಂದು ಸಾರ್ವಜನಿಕ ಪ್ರದರ್ಶನಕ್ಕೆ ಇಡುತ್ತಿರುವುದು ಅಪರೂಪದ ಘಟನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಸಂದರ್ಭದಲ್ಲಿ ವಿವಿಧ ದೇಶಗಳ ರಾಯಭಾರಿಗಳು, ಬೌದ್ಧ ಸಂಘಟನೆಗಳ ಪ್ರತಿನಿಧಿಗಳು ಹಾಗೂ ಹಲವಾರು ಗಣ್ಯರು ಭಾಗವಹಿಸುತ್ತಿದ್ದು, ಬೌದ್ಧ ಪರಂಪರೆಯ ಸಾಂಸ್ಕೃತಿಕ ವೈಭವವನ್ನು ಪ್ರತಿಬಿಂಬಿಸುವ ನೃತ್ಯ, ಪ್ರಾರ್ಥನೆ ಮತ್ತು ಧಾರ್ಮಿಕ ಕಾರ್ಯಕ್ರಮಗಳು ನಡೆಯುತ್ತಿವೆ.
ಈ ಅಪರೂಪದ ದರ್ಶನವು ಲಡಾಖ್ ಪ್ರದೇಶದಲ್ಲಿ ಆಧ್ಯಾತ್ಮಿಕತೆ ಮತ್ತು ಪ್ರವಾಸೋದ್ಯಮಕ್ಕೆ ಹೊಸ ಉತ್ತೇಜನ ನೀಡುವ ನಿರೀಕ್ಷೆಯಿದೆ.
