ಬಹುಭಾಷೇಲಿ ಬಿಡುಗಡೆಗೆ ಸಜ್ಜಾದ ‘ದಿ ರೈಸ್ ಆಫ್ ಅಶೋಕ’

ಬೆಂಗಳೂರು: ಕನ್ನಡ ಚಿತ್ರರಂಗದ ಪ್ರತಿಭಾವಂತ ನಟ ಸತೀಶ್ ನೀನಾಸಂ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ ‘ದಿ ರೈಸ್ ಆಫ್ ಅಶೋಕ’ ಬಿಡುಗಡೆಗೆ ಮುಹೂರ್ತ ನಿಗದಿಯಾಗಿದೆ. ಫೆಬ್ರವರಿ 27ರಂದು ‘ಅಶೋಕ’ ಪ್ರೇಕ್ಷಕರ ಮುಂದೆ ದರ್ಶನ ನೀಡಲಿದ್ದು, ಈ ಚಿತ್ರದ ಬಗ್ಗೆ ಅಭಿಮಾನಿಗಳು ಹಾಗೂ ಸಿನಿರಸಿಕರಲ್ಲಿ ಭಾರಿ ಕುತೂಹಲ ಮೂಡಿದೆ.

ಈಗಾಗಲೇ ಬಿಡುಗಡೆಗೊಂಡಿರುವ ‘ಮಾದೇವ…’, ‘ಯಾಕೋ ಯಾಕೋ…’ ಹಾಗೂ ‘ಕಲ್ಯಾಣವೇ ಗೌರಿ…’ ಹಾಡುಗಳು ಮತ್ತು ಚಿತ್ರದ ಝಲಕ್ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆ ಗಳಿಸಿಕೊಂಡಿವೆ. ಈ ಹಿನ್ನೆಲೆ ಸಿನಿಮಾ ಬಿಡುಗಡೆಗೂ ಮುನ್ನ ಮತ್ತೊಂದು ಹೊಸ ಹಾಡು ಮತ್ತು ಅಧಿಕೃತ ಟ್ರೇಲರ್ ಬಿಡುಗಡೆ ಮಾಡುವ ಯೋಜನೆಯನ್ನು ಚಿತ್ರತಂಡ ರೂಪಿಸಿದೆ.

ಕನ್ನಡ, ತಮಿಳು, ತೆಲುಗು ಭಾಷೆಗಳಲ್ಲಿ ಬಿಡುಗಡೆ: ‘ದಿ ರೈಸ್ ಆಫ್ ಅಶೋಕ’ ಸಿನಿಮಾ ಕನ್ನಡದ ಜೊತೆಗೆ ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿಯೂ ಬಿಡುಗಡೆಯಾಗಲಿದೆ. ಮೂರೂ ಭಾಷೆಗಳಲ್ಲಿ ಪ್ರತಿಷ್ಠಿತ ವಿತರಣಾ ಸಂಸ್ಥೆಗಳು ಈ ಚಿತ್ರವನ್ನು ಥಿಯೇಟರ್‌ಗಳಿಗೆ ತರಲು ಮುಂದಾಗಿರುವುದು, ಚಿತ್ರತಂಡದ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ.

ಬಹುಭಾಷಾ ಬಿಡುಗಡೆಯಿಂದಾಗಿ, ಅಶೋಕ ಚಿತ್ರವು ರಾಜ್ಯದ ಹೊರಗೂ ಹೆಚ್ಚಿನ ಪ್ರೇಕ್ಷಕರನ್ನು ಸೆಳೆಯುವ ನಿರೀಕ್ಷೆ ಮೂಡಿದೆ. ಈಗಾಗಲೇ ವಿವಿಧ ವಲಯಗಳಿಂದ ಉತ್ತಮ ಪ್ರತಿಕ್ರಿಯೆ ಲಭಿಸುತ್ತಿರುವುದರಿಂದ, ಸಿನಿಮಾ ವಾಣಿಜ್ಯವಾಗಿಯೂ ಯಶಸ್ಸು ಸಾಧಿಸಲಿದೆ ಎಂಬ ಭರವಸೆ ಮೂಡಿದೆ.

ನಟನೆಯ ಜೊತೆಗೆ ನಿರ್ಮಾಣ, ಸಾಹಿತ್ಯ ಮತ್ತು ಗಾಯನದಲ್ಲೂ ಸತೀಶ್: ಈ ಚಿತ್ರದಲ್ಲಿ ಸತೀಶ್ ನೀನಾಸಂ ಅವರು ಕೇವಲ ನಾಯಕ ನಟನಾಗಿ ಮಾತ್ರವಲ್ಲದೆ, ಸಾಹಿತ್ಯ, ಗಾಯನ ಮತ್ತು ನಿರ್ಮಾಣದಲ್ಲಿಯೂ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಬಹುಮುಖ ಪ್ರತಿಭೆಯಾಗಿ ಗುರುತಿಸಿಕೊಂಡಿರುವ ಸತೀಶ್, ಈ ಚಿತ್ರದ ಮೂಲಕ ತಮ್ಮ ಸೃಜನಶೀಲತೆಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ.

ಚಿತ್ರದ ನಾಯಕಿಯಾಗಿ ಸಪ್ತಮಿ ಗೌಡ ಅಭಿನಯಿಸಿದ್ದು, ಸತೀಶ್–ಸಪ್ತಮಿ ಜೋಡಿ ಪ್ರೇಕ್ಷಕರಲ್ಲಿ ವಿಶೇಷ ನಿರೀಕ್ಷೆ ಮೂಡಿಸಿದೆ.

‘ದಿ ರೈಸ್ ಆಫ್ ಅಶೋಕ’ ಚಿತ್ರವನ್ನು ವಿನೋದ್ ವಿ. ಧೋಂಡಾಳೆ ಮತ್ತು ಮನು ಶೇಡ್ಗಾರ್ ನಿರ್ದೇಶಿಸಿದ್ದಾರೆ. ಈ ಸಿನಿಮಾ ವೃದ್ಧಿ ಕ್ರಿಯೇಷನ್ ಮತ್ತು ಸತೀಶ್ ಪಿಕ್ಚರ್ ಹೌಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಣವಾಗಿದೆ. ಚಿತ್ರಕ್ಕೆ ಸತೀಶ್ ನೀನಾಸಂ ಜೊತೆಗೆ ವರ್ಧನ್ ಹರಿ ಮತ್ತು ಜೈಷ್ಣವಿ ಬಂಡವಾಳ ಹೂಡಿದ್ದಾರೆ.

ತಾಂತ್ರಿಕ ತಂಡ: ಸಂಗೀತ: ಪೂರ್ಣಚಂದ್ರ ತೇಜಸ್ವಿ, ಕಥೆ: ದಯಾನಂದ್ ಟಿ.ಕೆ, ಛಾಯಾಗ್ರಹಣ: ಲವಿತ್, ನಿರ್ಮಾಣ: ವೃದ್ಧಿ ಕ್ರಿಯೇಷನ್, ಸತೀಶ್ ಪಿಕ್ಚರ್ ಹೌಸ್,

ತಾರಾಗಣ: ಬಿ. ಸುರೇಶ್, ಸಂಪತ್ ಮೈತ್ರೇಯ, ಗೋಪಾಲಕೃಷ್ಣ ದೇಶಪಾಂಡೆ, ಯಶ್ ಶೆಟ್ಟಿ, ಇತರರು ಅನುಭವೀ ಕಲಾವಿದರ ಮತ್ತು ತಾಂತ್ರಿಕ ಬಳಗದ ಸಂಯೋಜನೆಯಿಂದ ಚಿತ್ರಕ್ಕೆ ಹೆಚ್ಚಿನ ಬಲ ದೊರೆತಿದೆ.

ಬಿಡುಗಡೆಗೂ ಮುನ್ನ ಹೆಚ್ಚುತ್ತಿರುವ ನಿರೀಕ್ಷೆ: ಹಾಡುಗಳು, ಝಲಕ್ ಮತ್ತು ಪ್ರಚಾರ ಚಟುವಟಿಕೆಗಳಿಂದಾಗಿ ‘ದಿ ರೈಸ್ ಆಫ್ ಅಶೋಕ’ ಈಗಾಗಲೇ ಸಿನಿ ಪ್ರೇಮಿಗಳ ಗಮನ ಸೆಳೆದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಚಿತ್ರದ ಕುರಿತ ಚರ್ಚೆ ಹೆಚ್ಚಾಗುತ್ತಿದ್ದು, ಫೆಬ್ರವರಿ 27ರಂದು ತೆರೆಗೆ ಬರಲಿರುವ ಈ ಸಿನಿಮಾ ಉತ್ತಮ ಆರಂಭ ಪಡೆಯುವ ನಿರೀಕ್ಷೆಯಿದೆ.

ಚಿತ್ರದ ಕಥಾವಸ್ತು, ಸಂಗೀತ ಮತ್ತು ಅಭಿನಯ ಪ್ರೇಕ್ಷಕರ ಮನ ಗೆಲ್ಲುವ ಭರವಸೆ ಮೂಡಿಸಿದ್ದು, ‘ಅಶೋಕ’ ಸತೀಶ್ ನೀನಾಸಂ ಅವರ ವೃತ್ತಿಜೀವನದಲ್ಲಿ ಮತ್ತೊಂದು ಮಹತ್ವದ ಹೆಜ್ಜೆಯಾಗಲಿದೆ ಎನ್ನಲಾಗುತ್ತಿದೆ.