ಬುಲಂದ್ಶಹರ್ ಕೋರ್ಟ್ನಲ್ಲಿ ವಿಚಿತ್ರ ಘಟನೆ: ₹2 ಲಕ್ಷ ಇದ್ದ ಚೀಲ ಕಸಿದು ಮರದ ಮೇಲಿಂದ ನೋಟುಗಳನ್ನು ಎಸೆದ ಕೋತಿ
ಬುಲಂದ್ಶಹರ್ (ಉತ್ತರ ಪ್ರದೇಶ): ನ್ಯಾಯಾಲಯ ಆವರಣದಲ್ಲಿ ಕೋತಿಗಳ ಉಪಟಳ ಸಾಮಾನ್ಯವಾಗಿದ್ದರೂ, ಉತ್ತರ ಪ್ರದೇಶದ ಬುಲಂದ್ಶಹರ್ನಲ್ಲಿ ನಡೆದ ಘಟನೆಯೊಂದು ಎಲ್ಲರನ್ನೂ ಅಚ್ಚರಿಗೊಳಿಸಿದೆ. ನ್ಯಾಯಾಲಯ ಸಂಕೀರ್ಣದೊಳಗೆ ಕೋತಿಯೊಂದು ಸುಮಾರು ₹2 ಲಕ್ಷ ನಗದು ಇದ್ದ ಚೀಲವನ್ನು ಕಸಿದುಕೊಂಡು ಮರದ ಮೇಲಿಂದ ನೋಟುಗಳನ್ನು ಚೆಲ್ಲಾಪಿಲ್ಲಿ ಮಾಡಿದ್ದು, ಸ್ಥಳದಲ್ಲಿ ಕೆಲಕಾಲ ಗೊಂದಲದ ವಾತಾವರಣ ನಿರ್ಮಾಣವಾಯಿತು.
ಭೂ ನೋಂದಣಿಗೆ ಸಂಬಂಧಿಸಿದ ಪ್ರಕ್ರಿಯೆ ಪೂರ್ಣಗೊಳಿಸಲು ವ್ಯಕ್ತಿಯೊಬ್ಬರು ನ್ಯಾಯಾಲಯಕ್ಕೆ ಆಗಮಿಸಿದ್ದರು. ಆಸ್ತಿ ವ್ಯವಹಾರಕ್ಕೆ ಅಗತ್ಯವಿದ್ದ ಸ್ಟಾಂಪ್ ಪೇಪರ್ಗಳನ್ನು ಖರೀದಿಸಲು ಸುಮಾರು ₹2 ಲಕ್ಷ ನಗದು ಚೀಲದಲ್ಲಿ ಇರಿಸಲಾಗಿತ್ತು. ವರದಿಗಳ ಪ್ರಕಾರ, ವಕೀಲ ಆಮಿರ್ ಅವರ ಸಹೋದ್ಯೋಗಿ ರವೀಂದ್ರ ಲೋಧಿ ಈ ಹಣವನ್ನು ಹೊತ್ತುಕೊಂಡು ಹೋಗುತ್ತಿದ್ದರು.
ಈ ವೇಳೆ ಹಠಾತ್ತನೆ ಬಂದ ಕೋತಿಯೊಂದು ಅವರ ಕೈಯಲ್ಲಿದ್ದ ಚೀಲವನ್ನು ಕಸಿದುಕೊಂಡು ಸಮೀಪದ ಬೇವಿನ ಮರದ ಮೇಲೆ ಹತ್ತಿತು. ಚೀಲ ಮರಳಿ ಪಡೆಯಲು ಜನರು ಕೂಗಾಟ ನಡೆಸಿ, ಕಲ್ಲುಗಳನ್ನು ಎಸೆದು ಕೋತಿಯನ್ನು ಹೆದರಿಸಲು ಯತ್ನಿಸಿದರು. ಆದರೆ ಕೋತಿ ಮರದ ಎತ್ತರದ ಕೊಂಬೆಯ ಮೇಲೆ ಕುಳಿತು ಯಾವುದೇ ಭಯವಿಲ್ಲದೆ ಚೀಲವನ್ನು ತೆರೆದಿತು.
ನಂತರ ಚೀಲದಲ್ಲಿದ್ದ ನೋಟುಗಳ ಕಟ್ಟೆಗಳನ್ನು ಹೊರತೆಗೆದು ಒಂದರ ಹಿಂದೆ ಒಂದರಂತೆ ಮರದ ಮೇಲಿಂದ ಕೆಳಗೆ ಎಸೆಯಲು ಆರಂಭಿಸಿತು. ಆರಂಭದಲ್ಲಿ ಜನರಿಗೆ ಏನಾಗುತ್ತಿದೆ ಎಂಬುದು ಅರ್ಥವಾಗಲಿಲ್ಲ. ಆದರೆ ಕೆಳಗೆ ಬೀಳುತ್ತಿದ್ದವು ₹500 ಮುಖಬೆಲೆಯ ನೋಟುಗಳು ಎಂದು ತಿಳಿದ ಕೂಡಲೇ, ಜನರು ಹಣ ಸಂಗ್ರಹಿಸಲು ಮುಗಿಬಿದ್ದರು.
ನ್ಯಾಯಾಲಯದ ಸಿಬ್ಬಂದಿ, ವಕೀಲರು, ದಾವೆದಾರರು ಹಾಗೂ ಸಾರ್ವಜನಿಕರು ನೋಟುಗಳನ್ನು ಎತ್ತಿಕೊಳ್ಳಲು ಓಡಾಡುತ್ತಿರುವ ದೃಶ್ಯ ಕೆಲಕಾಲ ಕುತೂಹಲ ಮತ್ತು ಗೊಂದಲ ಉಂಟುಮಾಡಿತು. ಹಲವರು ಈ ದೃಶ್ಯವನ್ನು ಮೊಬೈಲ್ನಲ್ಲಿ ಸೆರೆಹಿಡಿದಿದ್ದು, ಅದರ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ದೀರ್ಘ ಪ್ರಯತ್ನದ ಬಳಿಕ ಕೋತಿಯಿಂದ ಚೀಲವನ್ನು ವಾಪಸ್ ಪಡೆಯಲಾಯಿತು. ಆದರೆ ಮೂಲ ಮೊತ್ತವಾದ ಸುಮಾರು ₹2 ಲಕ್ಷದಲ್ಲಿ ₹40 ಸಾವಿರದಷ್ಟು ಹಣ ಕಾಣೆಯಾಗಿರುವುದು ತಿಳಿದುಬಂದಿದೆ. ಸ್ಥಳದಲ್ಲಿದ್ದ ಕೆಲವರು ತಮ್ಮ ಬಳಿ ಸಿಕ್ಕ ಹಣವನ್ನು ಹಿಂದಿರುಗಿಸಿದರೂ, ಸಂಪೂರ್ಣ ಮೊತ್ತವನ್ನು ಮರುಪಡೆಯಲು ಸಾಧ್ಯವಾಗಿಲ್ಲ ಎಂದು ವರದಿಯಾಗಿದೆ.
ಬುಲಂದ್ಶಹರ್ ನ್ಯಾಯಾಲಯ ಆವರಣದಲ್ಲಿ ಕೋತಿಗಳ ಕಾಟ ಹೊಸದಲ್ಲ. ಆದಾಗ್ಯೂ, ಕೋತಿಯೊಂದು ಮರದ ಮೇಲಿಂದ ನೋಟುಗಳನ್ನು ಎಸೆದು ಜನರನ್ನು ಹಣ ಸಂಗ್ರಹಿಸಲು ಓಡಾಡುವಂತೆ ಮಾಡಿದ ಘಟನೆ ಅಪರೂಪವಾಗಿದ್ದು, ಇದೀಗ ದೇಶಾದ್ಯಂತ ಚರ್ಚೆಗೆ ಗ್ರಾಸವಾಗಿದೆ.
