SK Home Ad
Home ಸುದ್ದಿ ದೇಶ ‘ದೇವರ ವಿರೋಧಿ ಹಣೆಪಟ್ಟಿ ಕಟ್ಟಿಕೊಳ್ತಿದ್ದಾರಾ ಸಿಎಂ ವಿಜಯ್?’: ಅಣ್ಣಾಮಲೈ ಕೆಂಡಾಮಂಡಲ!

‘ದೇವರ ವಿರೋಧಿ ಹಣೆಪಟ್ಟಿ ಕಟ್ಟಿಕೊಳ್ತಿದ್ದಾರಾ ಸಿಎಂ ವಿಜಯ್?’: ಅಣ್ಣಾಮಲೈ ಕೆಂಡಾಮಂಡಲ!

0
6

ತಮಿಳುನಾಡಿನ ಮಧುರೈನಲ್ಲಿರುವ ತಿರುಪ್ಪರಂಕುಂಡ್ರಂ ಬೆಟ್ಟದ ಮೇಲೆ ಕಾರ್ತಿಕ ದೀಪ ಬೆಳಗಿಸುವ ವಿಚಾರ ಮತ್ತೆ ತೀವ್ರ ರಾಜಕೀಯ ಸಂಘರ್ಷಕ್ಕೆ ಕಾರಣವಾಗಿದೆ. ಮಾಜಿ ಬಿಜೆಪಿ ರಾಜ್ಯಾಧ್ಯಕ್ಷ ಹಾಗೂ ‘ವಿ ದಿ ಲೀಡರ್ಸ್’ ಸಂಘಟನೆಯ ಮುಖ್ಯಸ್ಥ ಕೆ. ಅಣ್ಣಾಮಲೈ ಅವರು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ನೇತೃತ್ವದ ಟಿವಿಕೆ (TVK) ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದು, ಹಿಂದಿನ ಡಿಎಂಕೆ ಸರ್ಕಾರದಂತೆಯೇ ವಿಜಯ್ ಸರ್ಕಾರವೂ “ದೇವರ ವಿರೋಧಿ” (Anti-God) ನಿಲುವನ್ನು ತಾಳುತ್ತಿದೆ ಎಂದು ಆರೋಪಿಸಿದ್ದಾರೆ.

ಮಧುರೈನ ತಿರುಪ್ಪರಂಕುಂಡ್ರಂ ಬೆಟ್ಟದ ತುದಿಯಲ್ಲಿರುವ ಪ್ರಾಚೀನ ಕಲ್ಲಿನ ಸ್ತಂಭವಾದ ‘ದೀಪತ್ತೂಣ್’ ಬಳಿ ಕಾರ್ತಿಕ ದೀಪ ಬೆಳಗಿಸಲು ಭಕ್ತರಿಗೆ ಅವಕಾಶ ನೀಡುವಂತೆ ಮದ್ರಾಸ್ ಹೈಕೋರ್ಟ್ ಆದೇಶ ನೀಡಿದ್ದರೂ, ರಾಜ್ಯ ಸರ್ಕಾರ ಅದನ್ನು ಜಾರಿಗೊಳಿಸದೆ ಕಾನೂನು ಹೋರಾಟದ ಮೂಲಕ ವಿಳಂಬ ಮಾಡುತ್ತಿದೆ ಎಂದು ಅಣ್ಣಾಮಲೈ ದೂರಿದ್ದಾರೆ.

ವರ್ಷಕ್ಕೊಮ್ಮೆ ಭಕ್ತರು ಶಾಂತಿಯುತವಾಗಿ ಬೆಟ್ಟಕ್ಕೆ ತೆರಳಿ ದೀಪ ಬೆಳಗುವುದರಿಂದ ಯಾರಿಗೆ ಏನು ತೊಂದರೆಯಾಗುತ್ತದೆ ಎಂದು ಪ್ರಶ್ನಿಸಿರುವ ಅವರು, ರಾಜಕೀಯ ಕಾರಣಗಳಿಗಾಗಿ ಧಾರ್ಮಿಕ ಸಂಪ್ರದಾಯವನ್ನು ತಡೆಯುವುದು ಸರಿಯಲ್ಲ ಎಂದು ಹೇಳಿದ್ದಾರೆ.

ಮತ್ತೊಂದೆಡೆ, ನವೆಂಬರ್ 12ರಂದು ಸುಪ್ರೀಂ ಕೋರ್ಟ್ಗೆ ಅಫಿಡವಿಟ್ ಸಲ್ಲಿಸಿರುವ ತಮಿಳುನಾಡು ಸರ್ಕಾರ, ದೇವಾಲಯ ಮತ್ತು ಬೆಟ್ಟವನ್ನು ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ (ASI) ನಿಯಂತ್ರಣಕ್ಕೆ ನೀಡುವ ಹಾಗೂ ದೀಪತ್ತೂಣ್ನಲ್ಲಿ ನಿರಂತರವಾಗಿ ದೀಪ ಬೆಳಗಿಸುವ ಅರ್ಜಿಯನ್ನು ವಿರೋಧಿಸಿದೆ.

ಕಳೆದ 150 ವರ್ಷಗಳಿಂದ ಉಚ್ಚಿಪಿಳ್ಳೈಯಾರ್ ದೇವಾಲಯದ ಸಮೀಪದ ದೀಪ ಮಂಟಪದಲ್ಲೇ ದೀಪ ಬೆಳಗುವ ಸಂಪ್ರದಾಯವಿದೆ ಹಾಗೂ ಬೆಟ್ಟದ ಮೇಲೆ ದರ್ಗಾ ಕೂಡ ಇರುವುದರಿಂದ ಸಾರ್ವಜನಿಕ ಶಾಂತಿ ಮತ್ತು ಕಾನೂನು ಸುವ್ಯವಸ್ಥೆಯ ದೃಷ್ಟಿಯಿಂದ ಹೊಸ ಸ್ಥಳದಲ್ಲಿ ದೀಪ ಬೆಳಗಲು ಅನುಮತಿ ನೀಡುವುದು ಸೂಕ್ತವಲ್ಲ ಎಂದು ವಿಜಯ್ ಸರ್ಕಾರ ತನ್ನ ನಿಲುವನ್ನು ಸಮರ್ಥಿಸಿಕೊಂಡಿದೆ.

ನವೆಂಬರ್ 24ರಂದು ಕಾರ್ತಿಕ ಮಹಾದೀಪ ನಡೆಯಲಿದ್ದು, ನವೆಂಬರ್ 17ರಂದು ಸುಪ್ರೀಂ ಕೋರ್ಟ್ನಲ್ಲಿ ಈ ಅರ್ಜಿಯ ವಿಚಾರಣೆ ನಡೆಯಲಿರುವುದು ತೀವ್ರ ಕುತೂಹಲ ಮೂಡಿಸಿದೆ.