ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆ ರಾಜಕೀಯ ವಲಯದಲ್ಲೂ ಚರ್ಚೆಗೆ ಕಾರಣವಾಗಿದೆ.
ಮುಖ್ಯಮಂತ್ರಿ ರೇಖಾ ಗುಪ್ತಾ, ಮಾಜಿ ಮುಖ್ಯಮಂತ್ರಿ ಹಾಗೂ ಆಮ್ ಆದ್ಮಿ ಪಕ್ಷದ ರಾಷ್ಟ್ರೀಯ ಸಂಚಾಲಕ ಅರವಿಂದ್ ಕೇಜ್ರಿವಾಲ್ ಸೇರಿದಂತೆ 31.6 ಲಕ್ಷಕ್ಕೂ ಹೆಚ್ಚು ಮತದಾರರಿಗೆ ದಾಖಲೆಗಳಲ್ಲಿನ ವ್ಯತ್ಯಾಸಗಳ ಹಿನ್ನೆಲೆಯಲ್ಲಿ ನೋಟಿಸ್ ಜಾರಿ ಮಾಡಲಾಗಿದೆ.
ಆಗಸ್ಟ್ 31ರಂದು ದೆಹಲಿಯ ಕರಡು ಮತದಾರರ ಪಟ್ಟಿ ಪ್ರಕಟವಾಗಿತ್ತು. ಇದಾದ ಸುಮಾರು ಮೂರು ವಾರಗಳ ಬಳಿಕ ಮುಖ್ಯ ಚುನಾವಣಾಧಿಕಾರಿ ಕಚೇರಿ SIR ವೇಳೆ ಗುರುತಿಸಲಾದ ವ್ಯತ್ಯಾಸಗಳ ಆಧಾರದ ಮೇಲೆ ನೋಟಿಸ್ ಪಡೆದ ಮತದಾರರ ಪಟ್ಟಿಯನ್ನು ಸಾರ್ವಜನಿಕಗೊಳಿಸಿದೆ. ನೋಟಿಸ್ ಪಡೆದವರು ಅಗತ್ಯ ದಾಖಲೆಗಳೊಂದಿಗೆ ಚುನಾವಣಾಧಿಕಾರಿಗಳಿಗೆ ತಮ್ಮ ಪ್ರತಿಕ್ರಿಯೆ ಸಲ್ಲಿಸಬೇಕಾಗಿದೆ.
97.53 ಲಕ್ಷ ಮತದಾರರ ಕರಡು ಪಟ್ಟಿ: SIR ಬಳಿಕ ಪ್ರಕಟವಾದ ಕರಡು ಮತದಾರರ ಪಟ್ಟಿಯಲ್ಲಿ 97,53,577 ಮತದಾರರಿದ್ದಾರೆ. ಜೂನ್ 30ರ ಮತದಾರರ ಪಟ್ಟಿಯಲ್ಲಿದ್ದ 1,45,10,299 ಮತದಾರರಿಗೆ ಹೋಲಿಸಿದರೆ ಕರಡು ಪಟ್ಟಿಯ ಸಂಖ್ಯೆ ಸುಮಾರು 32.8% ಕಡಿಮೆಯಾಗಿದೆ.
ನೋಟಿಸ್ಗಾಗಿ ಗುರುತಿಸಲಾದ ಮತದಾರರನ್ನು ಪ್ರಮುಖವಾಗಿ ಎರಡು ವರ್ಗಗಳಾಗಿ ವಿಂಗಡಿಸಲಾಗಿದೆ:
No Mapping: ಪ್ರಸ್ತುತ ಮತದಾರರ ವಿವರಗಳನ್ನು ಹಿಂದಿನ SIR ಮತದಾರರ ಪಟ್ಟಿಯೊಂದಿಗೆ, ಮುಖ್ಯವಾಗಿ 2002ರ ಹಿಂದಿನ ಪರಿಷ್ಕರಣೆಯ ದಾಖಲೆಯೊಂದಿಗೆ ಸಂಪರ್ಕಿಸಲು ಸಾಧ್ಯವಾಗದ ಪ್ರಕರಣಗಳು.
Logical Discrepancies: ಹಿಂದಿನ ಮತದಾರರ ಪಟ್ಟಿಯೊಂದಿಗೆ ಹೋಲಿಸಿದಾಗ ಹೆಸರು, ಜನ್ಮದಿನಾಂಕ, ಪೋಷಕರ ವಿವರ ಅಥವಾ ವಯಸ್ಸಿನಂತಹ ಮಾಹಿತಿಯಲ್ಲಿ ತಾರ್ಕಿಕ ವ್ಯತ್ಯಾಸ ಕಂಡುಬಂದ ಪ್ರಕರಣಗಳು.
ಒಟ್ಟಾರೆ ಕರಡು ಪಟ್ಟಿಯಲ್ಲಿರುವ 33.13 ಲಕ್ಷ ಮತದಾರರನ್ನು ನೋಟಿಸ್ಗಾಗಿ ಗುರುತಿಸಲಾಗಿದ್ದು, ಶನಿವಾರದ ವೇಳೆಗೆ 31.63 ಲಕ್ಷಕ್ಕೂ ಹೆಚ್ಚು ಮಂದಿಗೆ ನೋಟಿಸ್ ಜಾರಿಯಾಗಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕೇಜ್ರಿವಾಲ್ ಕುಟುಂಬಕ್ಕೂ ನೋಟಿಸ್: ಮಾಜಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಮಾತ್ರವಲ್ಲದೆ ಅವರ ಪತ್ನಿ ಸುನೀತಾ ಕೇಜ್ರಿವಾಲ್, ತಂದೆ ಗೋಬಿಂದ್ ರಾಮ್ ಕೇಜ್ರಿವಾಲ್, ತಾಯಿ ಗೀತಾ ದೇವಿ ಹಾಗೂ ಪುತ್ರ ಪುಲ್ಕಿತ್ ಕೇಜ್ರಿವಾಲ್ ಅವರಿಗೂ ನೋಟಿಸ್ ನೀಡಲಾಗಿದೆ.
ಚುನಾವಣಾಧಿಕಾರಿಗಳ ಪ್ರಕಾರ, ಕೇಜ್ರಿವಾಲ್ ಹಾಗೂ ಕುಟುಂಬ ಸದಸ್ಯರು ಸಲ್ಲಿಸಿದ್ದ Enumeration Formಗಳಲ್ಲಿ ಹಿಂದಿನ ಪರಿಷ್ಕರಣೆಯ ಮತದಾರರ ಪಟ್ಟಿಯೊಂದಿಗೆ ವಿವರಗಳನ್ನು ಸಂಪರ್ಕಿಸಲು ಅಗತ್ಯವಿದ್ದ ಸಂಪೂರ್ಣ ಮಾಹಿತಿ ಇರಲಿಲ್ಲ. ಹೀಗಾಗಿ ಅವರನ್ನು ‘Unmapped with Last SIR’ ವರ್ಗದಲ್ಲಿ ಗುರುತಿಸಲಾಗಿದೆ.
ಆದರೆ ನೋಟಿಸ್ ಬಂದಿರುವುದರಿಂದಲೇ ಮತದಾರರ ಪಟ್ಟಿಯಿಂದ ಹೆಸರು ಅಂತಿಮವಾಗಿ ಹೊರಗುಳಿಯುತ್ತದೆ ಎಂದರ್ಥವಲ್ಲ. ಅಗತ್ಯ ದಾಖಲೆಗಳನ್ನು ಸಲ್ಲಿಸಿ ತಮ್ಮ ಅರ್ಹತೆಯನ್ನು ಸಾಬೀತುಪಡಿಸಲು ಮತದಾರರಿಗೆ ಅವಕಾಶವಿದೆ. ಕೇಜ್ರಿವಾಲ್ ಮತ್ತು ಕುಟುಂಬದ ದಾಖಲೆಗಳ ಪರಿಶೀಲನೆಯ ಬಳಿಕ ಅವರ ಹೆಸರುಗಳನ್ನು ಅಂತಿಮ ಪಟ್ಟಿಯಲ್ಲಿ ಸೇರಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ನವದೆಹಲಿ ERO ತಿಳಿಸಿದೆ.
ರೇಖಾ ಗುಪ್ತಾ ಪ್ರಕರಣದಲ್ಲಿ ಏನಾಯಿತು?: ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತಾ ಅವರಿಗೂ ‘Logical Discrepancy’ ಆಧಾರದ ಮೇಲೆ ನೋಟಿಸ್ ನೀಡಲಾಗಿತ್ತು. ಅವರ ಮತದಾರರ ದಾಖಲೆಯಲ್ಲಿ ಪೋಷಕರೊಂದಿಗೆ ವಯಸ್ಸಿನ ಅಂತರ 15 ವರ್ಷಕ್ಕಿಂತ ಕಡಿಮೆ ಎಂದು ದಾಖಲಾಗಿರುವುದು ವ್ಯತ್ಯಾಸಕ್ಕೆ ಕಾರಣವಾಗಿತ್ತು.
ಆದರೆ ಅಧಿಕಾರಿಗಳು ಬಳಿಕ ಅವರ ದಾಖಲೆಗಳು ಮತ್ತು ಸಂಬಂಧಿತ ಮಾಹಿತಿಯನ್ನು ಪರಿಶೀಲಿಸಿದ್ದಾರೆ. ರೇಖಾ ಗುಪ್ತಾ ಅವರ ಮತದಾರರ ದಾಖಲೆಯನ್ನು ಪರಿಶೀಲನೆಯ ನಂತರ ಮಾನ್ಯಗೊಳಿಸಲಾಗಿದ್ದು, ಶಾಳಿಮಾರ್ ಬಾಗ್ ವಿಧಾನಸಭಾ ಕ್ಷೇತ್ರದ ಅಂತಿಮ ಮತದಾರರ ಪಟ್ಟಿಯಲ್ಲಿ ಸೇರಿಸಲು ‘ಪಾರ್ಕ್’ ಮಾಡಲಾಗಿದೆ ಎಂದು ಚುನಾವಣಾ ಅಧಿಕಾರಿಗಳು ತಿಳಿಸಿದ್ದಾರೆ. ಅಂತಿಮ ಪಟ್ಟಿ ನವೆಂಬರ್ 4ರಂದು ಪ್ರಕಟವಾಗಲಿದೆ.
ಇತರ ರಾಜಕೀಯ ನಾಯಕರಿಗೂ ನೋಟಿಸ್: SIR ಪಟ್ಟಿಯಲ್ಲಿನ ವ್ಯತ್ಯಾಸಗಳ ಆಧಾರದ ಮೇಲೆ ಮಾಜಿ ದೆಹಲಿ ಬಿಜೆಪಿ ಅಧ್ಯಕ್ಷ ವೀರೇಂದ್ರ ಸಚ್ದೇವ, ಅವರ ಪತ್ನಿ ಹಾಗೂ ಸಹೋದರ ಸೇರಿದಂತೆ ಇತರ ರಾಜಕೀಯ ಮುಖಂಡರ ಹೆಸರುಗಳೂ ಕಾಣಿಸಿಕೊಂಡಿವೆ. ಸಚ್ದೇವ ಅವರ ಪ್ರಕರಣದಲ್ಲಿ ಸ್ವಂತ ಹೆಸರಿನಲ್ಲಿನ ವ್ಯತ್ಯಾಸವನ್ನು ‘Logical Discrepancy’ ಎಂದು ಗುರುತಿಸಲಾಗಿದೆ.
