ಚಿಕ್ಕಮಗಳೂರು: ಕಾಫಿ ಬೆಳೆಗೆ ಹೆಸರುವಾಸಿಯಾಗಿರುವ ಚಿಕ್ಕಮಗಳೂರು ಜಿಲ್ಲೆಯ ರೈತರು ಇದೀಗ ಸಾಂಪ್ರದಾಯಿಕ ಬೆಳೆಗಳ ಜೊತೆಗೆ ಆವಕಾಡೊ ಬೆಳೆಯುವ ಮೂಲಕ ಹೆಚ್ಚುವರಿ ಆದಾಯ ಗಳಿಸುತ್ತಿರುವುದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಆಗಸ್ಟ್ 30ರಂದು ಪ್ರಸಾರವಾದ 137ನೇ ‘ಮನ್ ಕಿ ಬಾತ್’ ಕಾರ್ಯಕ್ರಮದಲ್ಲಿ ಪ್ರಧಾನಿ ಮೋದಿ ದೇಶದ ವಿವಿಧ ಭಾಗಗಳ ರೈತರ ಹೊಸ ಕೃಷಿ ಪ್ರಯೋಗಗಳನ್ನು ಪ್ರಸ್ತಾಪಿಸುವ ಸಂದರ್ಭದಲ್ಲಿ ಚಿಕ್ಕಮಗಳೂರು ರೈತರ ಪ್ರಯತ್ನವನ್ನು ಶ್ಲಾಘಿಸಿದ ನಂತರ, ಕೃಷಿ ವಲಯ ಮತ್ತು ಮಾರುಕಟ್ಟೆಯಲ್ಲಿ ಆವಕಾಡೊ ಬೆಳೆಗೆ ಹೊಸ ಚೈತನ್ಯ ಮೂಡಿದೆ.
ಚಿಕ್ಕಮಗಳೂರಿನ ಕೆಲವು ರೈತರು ತಮ್ಮ ಕಾಫಿ ತೋಟಗಳ ನಡುವೆ ಆವಕಾಡೊ ಗಿಡಗಳನ್ನು ಬೆಳೆಸುತ್ತಿದ್ದಾರೆ. ಇದರಿಂದ ಈಗಾಗಲೇ ಬೆಳೆಯುತ್ತಿರುವ ಕಾಫಿಯ ಜೊತೆಗೆ ಕಾಳುಮೆಣಸು ಮತ್ತು ಆವಕಾಡೊದಿಂದಲೂ ಹೆಚ್ಚುವರಿ ಆದಾಯ ಪಡೆಯಲು ಸಾಧ್ಯವಾಗುತ್ತಿದೆ ಎಂದು ಪ್ರಧಾನಿ ಮೋದಿ ಹೇಳಿದರು.
ಮಾದರಿ ಕೃಷಿಯಾಗಿ ಮನ್ನಣೆ: ಈ ಹಿಂದೆ ಭಾರತದಲ್ಲಿ ಹೆಚ್ಚಿನ ಜನರಿಗೆ ತಿಳಿಯದೇ ಇದ್ದ, ಕಡಿಮೆ ಬೇಡಿಕೆಯಿದ್ದ ಈ ಹಣ್ಣು, ಈಗ ಪ್ರೀಮಿಯಂ ಹೆಲ್ತ್ ಮಾರ್ಕೆಟ್ನಲ್ಲಿ (Premium Health Markets) ಹೊಸ ಟ್ರೆಂಡ್ ಸೃಷ್ಟಿಸಿದೆ. ಕಾಫಿ ತೋಟಗಳ ನಡುವೆ ಉಪಬೆಳೆಯಾಗಿ (Intercropping) ಆವಕಾಡೊ ಬೆಳೆಯುವ ಚಿಕ್ಕಮಗಳೂರಿನ ರೈತರ ಈ ಮಾದರಿಯನ್ನು ದೇಶದ ಇತರೆ ಭಾಗಗಳ ರೈತರೂ ಸಹ ಆದಾಯ ಹೆಚ್ಚಿಸಿಕೊಳ್ಳಲು ಇತ್ತೀಚಿನ ಅತ್ಯುತ್ತಮ ಉದಾಹರಣೆಯಾಗಿ ಸ್ವೀಕರಿಸುತ್ತಿದ್ದಾರೆ
ಆವಕಾಡೊ ಬೆಳೆ ರೈತರಿಗೆ ಹೊಸ ಅವಕಾಶ : ಮನ್ ಕಿ ಬಾತ್ನಲ್ಲಿ ಆವಕಾಡೊ ಬೆಳೆಯುತ್ತಿರುವ ರೈತರ ಕುರಿತು ಮಾತನಾಡಿದ ಪ್ರಧಾನಿ ಮೋದಿ, ಹಿಂದೆ ಭಾರತದಲ್ಲಿ ಹೆಚ್ಚು ಪರಿಚಿತವಾಗಿರದ ಈ ಹಣ್ಣು ಈಗ ನಗರ ಪ್ರದೇಶಗಳಲ್ಲಿ ಅದರಲ್ಲೂ ಆರೋಗ್ಯ ಮತ್ತು ಪ್ರೀಮಿಯಂ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚಿಸಿಕೊಂಡಿದೆ ಎಂದು ವಿವರಿಸಿದರು. ಈ ಬದಲಾವಣೆ ರೈತರಿಗೆ ಹೊಸ ಮಾರುಕಟ್ಟೆ ಹಾಗೂ ಆದಾಯದ ಅವಕಾಶಗಳನ್ನು ಸೃಷ್ಟಿಸುತ್ತಿದೆ ಎಂದು ಅವರು ಹೇಳಿದರು.
ಆಂಧ್ರಪ್ರದೇಶದ ಕಡಪ್ಪದ ವರದರಾಜ್ ಮತ್ತು ತಮಿಳುನಾಡಿನ ಕೊಡೈಕೆನಾಲ್ನ ಚಂದ್ರಶೇಖರನ್ ಅವರ ಆವಕಾಡೊ ಕೃಷಿಯ ಉದಾಹರಣೆಗಳನ್ನೂ ಪ್ರಧಾನಿ ಹಂಚಿಕೊಂಡರು. ವರದರಾಜ್ ಅವರು ಆವಕಾಡೊ ಬೆಳೆಯ ಮೂಲಕ ಸುಮಾರು ನಾಲ್ಕು ಟನ್ಗಳಷ್ಟು ಉತ್ಪಾದನೆ ಮಾಡಿ ಸ್ಥಳೀಯ ಅಂಗಡಿಗಳಿಗೆ ನೇರವಾಗಿ ಪೂರೈಸುತ್ತಿದ್ದಾರೆ ಎಂದು ಮೋದಿ ತಿಳಿಸಿದರು.
ಕಾಫಿ ತೋಟದ ನಡುವೆ ಹೊಸ ಬೆಳೆ : ಚಿಕ್ಕಮಗಳೂರಿನ ವಿಶೇಷತೆಯೆಂದರೆ, ಇಲ್ಲಿನ ರೈತರು ಈಗಾಗಲೇ ಇರುವ ಕಾಫಿ ತೋಟದ ಪರಿಸರವನ್ನು ಬಳಸಿಕೊಂಡು ಆವಕಾಡೊ ಬೆಳೆಯನ್ನು ಅಳವಡಿಸಿಕೊಳ್ಳುತ್ತಿದ್ದಾರೆ. ಇದರಿಂದ ಒಂದೇ ಜಮೀನಿನಲ್ಲಿ ವಿವಿಧ ಬೆಳೆಗಳಿಂದ ಆದಾಯ ಪಡೆಯುವ ಅವಕಾಶ ಸೃಷ್ಟಿಯಾಗುತ್ತಿದೆ.
ಪ್ರಧಾನಿ ಮೋದಿ, ಕಾಫಿ ಮತ್ತು ಕಾಳುಮೆಣಸಿನ ಜೊತೆಗೆ ಆವಕಾಡೊ ಬೆಳೆಯುವುದರಿಂದ ರೈತರ ಆದಾಯಕ್ಕೆ ಮತ್ತೊಂದು ಮೂಲ ಸೇರ್ಪಡೆಯಾಗಿದೆ ಎಂದು ಶ್ಲಾಘಿಸಿದರು. ಈ ರೀತಿಯ ಕೃಷಿ ವೈವಿಧ್ಯೀಕರಣವು ರೈತರ ಆದಾಯದ ಅವಕಾಶಗಳನ್ನು ವಿಸ್ತರಿಸುವ ಉದಾಹರಣೆಯಾಗಿದೆ.
ಈ ವಿಚಾರವನ್ನು ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಕೂಡ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಚಿಕ್ಕಮಗಳೂರು ರೈತರ ಆವಕಾಡೊ ಕೃಷಿ ಪ್ರಯತ್ನವನ್ನು ಪ್ರಧಾನಿ ಮೋದಿ ಮನ್ ಕಿ ಬಾತ್ನಲ್ಲಿ ಉಲ್ಲೇಖಿಸಿರುವುದನ್ನು ಗಮನ ಸೆಳೆದಿದ್ದಾರೆ.
ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆಯ ನಿರೀಕ್ಷೆ: ಪ್ರಧಾನಿಯವರ ಭಾಷಣದ ಬೆನ್ನಲ್ಲೇ, ಆರೋಗ್ಯ ಜಾಗೃತಿ ಹೊಂದಿರುವ ನಗರವಾಸಿಗಳಲ್ಲಿ ಇತ್ತೀಚಿನ ದಿನಗಳಲ್ಲಿ ಆವಕಾಡೊಗೆ ಬೇಡಿಕೆ ಹೆಚ್ಚುತ್ತಿದ್ದು, ದೇಶಾದ್ಯಂತ ಇದರ ಮಾರುಕಟ್ಟೆ ಮೌಲ್ಯ ಮತ್ತು ಬೆಲೆಗಳು ಮತ್ತಷ್ಟು ಹೆಚ್ಚಾಗುವ ನಿರೀಕ್ಷೆಯಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಮತ್ತು ಸಾರ್ವಜನಿಕರು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚಿಸುತ್ತಿದ್ದಾರೆ
ಒಟ್ಟಿನಲ್ಲಿ, ಕಾಫಿ ಬೆಳೆಯೊಂದೇ ಪ್ರಮುಖ ಆದಾಯ ಮೂಲವಾಗಿದ್ದ ಪ್ರದೇಶದಲ್ಲಿ ಆವಕಾಡೊದಂತಹ ಹೊಸ ಬೆಳೆಗಳನ್ನು ಅಳವಡಿಸಿಕೊಂಡು ಹೆಚ್ಚುವರಿ ಆದಾಯ ಗಳಿಸುವ ಚಿಕ್ಕಮಗಳೂರು ರೈತರ ಪ್ರಯತ್ನ ಇದೀಗ ರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿದೆ.
ಪ್ರತಿ ಹೊಸ ಅಪ್ಡೇಟ್ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್ಡೇಟ್ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.
