ಮುಂಬೈ: ಪುರುಷರು, ಮಹಿಳೆಯರು ಮತ್ತು ಅಂಧ ಮಹಿಳೆಯರ ಸಹಿತ ಭಾರತದ ಮೂರೂ ಕ್ರಿಕೆಟ್ ವಿಶ್ವಕಪ್ ವಿಜೇತ ತಂಡಗಳನ್ನು ಮುಂಬೈನಲ್ಲಿ ಸೋಮವಾರ ರಾತ್ರಿ ನಡೆದ ‘ಯುನೈಟೆಡ್ ಇನ್ ಟ್ರಯಂಫ್’ (ವಿಜಯೋತ್ಸವದಲ್ಲಿ ಒಗ್ಗೂಡು) ಎರಡನೇ ಆವೃತ್ತಿಯ ಸಮಾರಂಭದಲ್ಲಿ ಸನ್ಮಾನಿಸಲಾಯಿತು.
“ನಾವು ಹೊಸ ವರ್ಷವನ್ನು ಬಹಳ ವಿಶೇಷ ಸಂದರ್ಭದೊಂದಿಗೆ ಪ್ರಾರಂಭಿಸಿದ್ದೇವೆ ಎಂದು ನಾನು ಭಾವಿಸುತ್ತೇನೆ. ಪುರುಷರ ಕ್ರಿಕೆಟ್ ತಂಡ, ಮಹಿಳಾ ಕ್ರಿಕೆಟ್ ತಂಡ ಮತ್ತು ಭಾರತದ ಅಂಧ ಮಹಿಳಾ ಕ್ರಿಕೆಟ್ ತಂಡ ಒಳಗೊಂಡಂತೆ ಮೂರು ಕ್ರಿಕೆಟ್ ತಂಡಗಳು ಒಂದೇ ಸೂರಿನಡಿ ಸೇರಿದವು. ನಮಗೆ ಅಪಾರ ಸಂತೋಷ ಮತ್ತು ಆನಂದವನ್ನು ನೀಡಿದ್ದಕ್ಕಾಗಿ ನಾವು ಅವರನ್ನು ಪ್ರತಿಯೊಬ್ಬ ಭಾರತೀಯನ ಪರವಾಗಿ ಸನ್ಮಾನಿಸಿದೆವು” ಎಂದು ನೀತಾ ಅಂಬಾನಿ ಹೇಳಿದರು.
ಕ್ರೀಡೆಯ ವಿಶಿಷ್ಟ ಶಕ್ತಿ ಮತ್ತು ಅದರ ಪರಿವರ್ತನೆಯ ಪ್ರಭಾವದ ಬಗ್ಗೆ ಮಾತನಾಡುತ್ತಾ ನೀತಾ ಅಂಬಾನಿ ಅವರು, “ಕ್ರೀಡೆಯು ಹೃದಯಗಳನ್ನು ಮತ್ತು ಭಾರತವನ್ನು ಒಂದುಗೂಡಿಸುತ್ತದೆ. ನಾವು ಈ ವಿಜಯೋತ್ಸವದಲ್ಲಿ ಒಂದಾಗಿದ್ದೇವೆ. ನಾವು ಅವರ ಸಾಧನೆಗಳನ್ನು ಸಂಭ್ರಮಿಸಿದೆವು ಮತ್ತು ಅವರ ಅವರ ವಿಜಯಗಳನ್ನು ಆನಂದಿಸಿದೆವು” ಎಂದರು.
ಇದನ್ನೂ ಓದಿ: ಧಾರವಾಡ ಹೈಕೋರ್ಟ್ಗೆ ಬಾಂಬ್ ಬೆದರಿಕೆ
ಭಾರತದ ಮೂರು ವಿಶ್ವಕಪ್ ವಿಜೇತ ತಂಡಗಳ ಸಾರಥಿಗಳಾದ ರೋಹಿತ್ ಶರ್ಮಾ, ಹರ್ಮಾನ್ಪ್ರೀತ್ ಕೌರ್ ಮತ್ತು ಕನ್ನಡತಿ ದೀಪಿಕಾ ಟಿ.ಸಿ. ಈ ಸಂಭ್ರಮಾಚರಣೆಯ ಕೇಂದ್ರಬಿಂದುವಾಗಿದ್ದರು. ಅವರ ನಾಯಕತ್ವ, ಸ್ಥಿತಿಸ್ಥಾಪಕತ್ವ ಮತ್ತು ನಂಬಿಕೆಯು ಈ ಐತಿಹಾಸಿಕ ವಿಜಯಗಳನ್ನು ರೂಪಿಸಿವೆ ಮತ್ತು ರಾಷ್ಟ್ರಕ್ಕೆ ಸ್ಫೂರ್ತಿ ತುಂಬಿದೆ.
ಮೂರು ವಿಶ್ವಕಪ್ ವಿಜೇತ ತಂಡಗಳ ಪ್ರಮುಖ ಸದಸ್ಯರಾದ ಜಸ್ಪ್ರೀತ್ ಬುಮ್ರಾ, ಸೂರ್ಯಕುಮಾರ್ ಯಾದವ್, ಸ್ಮೃತಿ ಮಂದನಾ, ಜೆಮೀಮಾ ರೋಡ್ರಿಗಸ್, ಗಂಗಾ ಕದಮ್ ಮತ್ತು ಕ್ರಿಕೆಟ್ ದಿಗ್ಗಜರಾದ ಸಚಿನ್ ತೆಂಡೂಲ್ಕರ್, ಸುನೀಲ್ ಗಾವಸ್ಕರ್, ರವಿಚಂದ್ರನ್ ಅಶ್ವಿನ್, ಒಲಿಂಪಿಕ್ಸ್ ಮತ್ತು ಪ್ಯಾರಾಲಿಂಪಿಕ್ ದಿಗ್ಗಜರಾದ ಮುರಳಿಕಾಂತ್ ಪೆಟ್ಕರ್, ದೀಪಾ ಮಲಿಕ್ ಹಾಗೂ ದೇವೇಂದ್ರ ಜಜಾರಿಯಾ, ಭಾರತೀಯ ಚಿತ್ರರಂಗದ ಪ್ರಮುಖ ತಾರೆಯರಾದ ಅಮಿತಾಬ್ ಬಚ್ಚನ್ ಮತ್ತು ಶಾರುಖ್ ಖಾನ್ ಅವರ ಉಪಸ್ಥಿತಿಯೂ ಈ ಸಮಾರಂಭದಲ್ಲಿತ್ತು. ಈ ಮೂಲಕ ಇದು ಭಾರತದ ಅತ್ಯಂತ ಗೌರವಾನ್ವಿತ ಮತ್ತು ಜನಪ್ರಿಯತೆ ಪಡೆದ ಐಕಾನ್ಗಳ ಅಪರೂಪದ ಮತ್ತು ಪ್ರಬಲ ಸಂಗಮಕ್ಕೆ ಸಾಕ್ಷಿಯಾಯಿತು.
ಇದನ್ನೂ ಓದಿ: ಸ್ಪಷ್ಟ ನೀರು ಯಾವಾಗಲೂ ಶುದ್ಧ ನೀರು ಎಂದರ್ಥವಲ್ಲ: ಜಲ ವಿಜ್ಞಾನಿ ಡಾ. ಅನಿಲ್ ಕುಮಾರ್
ರೋಹಿತ್ ಶರ್ಮ ಸಾರಥ್ಯದಲ್ಲಿ ಭಾರತ ತಂಡ 2024ರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಚಾಂಪಿಯನ್ ಪಟ್ಟಕ್ಕೇರಿತ್ತು. ಭಾರತ ಮಹಿಳಾ ಕ್ರಿಕೆಟ್ ತಂಡ 2025ರಲ್ಲಿ ತವರಿನಲ್ಲೇ ನಡೆದ ಏಕದಿನ ವಿಶ್ವಕಪ್ನಲ್ಲಿ ಹರ್ಮಾನ್ಪ್ರೀತ್ ಕೌರ್ ಸಾರಥ್ಯದಲ್ಲಿ ಚೊಚ್ಚಲ ಐಸಿಸಿ ಟ್ರೋಫಿ ಗೆಲುವಿನ ಸಾಧನೆ ಮಾಡಿತ್ತು. 2025ರಲ್ಲಿ ನಡೆದ ಅಂಧ ಮಹಿಳೆಯರ ಟಿ20 ವಿಶ್ವಕಪ್ ಚೊಚ್ಚಲ ಆವೃತ್ತಿಯಲ್ಲಿ ಭಾರತ ತಂಡ ದೀಪಿಕಾ ಟಿ.ಸಿ. ನಾಯಕತ್ವದಲ್ಲಿ ಪ್ರಶಸ್ತಿ ಗೆದ್ದುಕೊಂಡಿತ್ತು.
