ಲಂಡನ್: ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC) 2026ರಲ್ಲಿ ಇಂಗ್ಲೆಂಡ್ ಮತ್ತು ವೇಲ್ಸ್ನಲ್ಲಿ ನಡೆಯಲಿರುವ ಮಹಿಳಾ ಟಿ20 ವಿಶ್ವಕಪ್ಗಾಗಿ (ICC Women’s T20 World Cup 2026) ದಾಖಲೆಯ ಬಹುಮಾನ ನಿಧಿಯನ್ನು ಘೋಷಿಸಿದೆ. ಈ ಬಾರಿ ಒಟ್ಟು ಬಹುಮಾನ ಮೊತ್ತವು ಸುಮಾರು $8.76 ಮಿಲಿಯನ್ (ಸುಮಾರು ₹82 ಕೋಟಿ) ಆಗಿದ್ದು, ಇದು 2024ರ ಟೂರ್ನಿಯಿಗಿಂತ 10% ಹೆಚ್ಚಾಗಿದೆ.
ಐಸಿಸಿ ಪ್ರಕಟಿಸಿರುವ ಮಾಹಿತಿಯ ಪ್ರಕಾರ, ವಿಶ್ವಕಪ್ ವಿಜೇತ ತಂಡಕ್ಕೆ $2.34 ಮಿಲಿಯನ್ (ಸುಮಾರು ₹19.5 ಕೋಟಿ) ಬಹುಮಾನ ಸಿಗಲಿದೆ. ರನ್ನರ್ ಅಪ್ ತಂಡಕ್ಕೆ $1.17 ಮಿಲಿಯನ್ (ಸುಮಾರು ₹9.7 ಕೋಟಿ) ನೀಡಲಾಗುತ್ತದೆ. ವಿಶೇಷವಾಗಿ, ಟೂರ್ನಿಯಲ್ಲಿ ಭಾಗವಹಿಸುವ ಎಲ್ಲಾ 12 ತಂಡಗಳಿಗೂ ಕನಿಷ್ಠ $250,000 (ಸುಮಾರು ₹2 ಕೋಟಿ) ಖಾತರಿ ಬಹುಮಾನ ನೀಡಲಾಗುವುದು.
ಗುಂಪು ಹಂತದ ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ ಪ್ರತಿಯೊಂದು ಪಂದ್ಯಕ್ಕೂ ತಂಡಗಳಿಗೆ $31,154 ಬಹುಮಾನ ನೀಡಲಾಗುತ್ತದೆ. ಇದು ಮಹಿಳಾ ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಬಹುಮಾನ ನಿಧಿಯಾಗಿದೆ.
ಐಸಿಸಿ ಸಿಇಒ ಸಂಜೋಗ್ ಗುಪ್ತಾ (Sanjog Gupta) ಈ ಬೆಳವಣಿಗೆಯನ್ನು ಮಹಿಳಾ ಕ್ರಿಕೆಟ್ನ ವೇಗವಾದ ಬೆಳವಣಿಗೆಯ ಸಂಕೇತವೆಂದು ಬಣ್ಣಿಸಿದ್ದಾರೆ. ಪುರುಷರ ಮತ್ತು ಮಹಿಳಾ ಕ್ರಿಕೆಟ್ ನಡುವಿನ ಬಹುಮಾನ ಸಮಾನತೆಯತ್ತ ಇದು ಮಹತ್ವದ ಹೆಜ್ಜೆ ಎಂದು ಅವರು ಹೇಳಿದ್ದಾರೆ. ಐಸಿಸಿ ಅಧ್ಯಕ್ಷ ಜೈ ಶಾ (Jay Shah) ಅವರ ನಾಯಕತ್ವದಲ್ಲಿಯೇ ಈ ಬದಲಾವಣೆ ಸಾಧ್ಯವಾಗಿದೆ ಎಂಬ ಅಭಿಪ್ರಾಯ ಅಭಿಮಾನಿಗಳಿಂದ ವ್ಯಕ್ತವಾಗಿದೆ.
ಟೂರ್ನಿ ಜೂನ್ 12ರಿಂದ ಜುಲೈ 5, 2026ರವರೆಗೆ ನಡೆಯಲಿದ್ದು, ಒಟ್ಟು 12 ತಂಡಗಳು ಪಾಲ್ಗೊಳ್ಳಲಿವೆ. 24 ದಿನಗಳ ಕಾಲ ನಡೆಯುವ ಈ ಪಂದ್ಯಾವಳಿಯಲ್ಲಿ 33 ಪಂದ್ಯಗಳು ಏಳು ಪ್ರಮುಖ ಮೈದಾನಗಳಲ್ಲಿ ನಡೆಯಲಿವೆ.
ಭಾರತ ತಂಡವು ಗ್ರೂಪ್ 1ರಲ್ಲಿ ಸ್ಥಾನ ಪಡೆದಿದ್ದು, ಬಲಿಷ್ಠ ಆಸ್ಟ್ರೇಲಿಯಾ ತಂಡ ಹಾಗೂ ಪಾಕಿಸ್ತಾನ ತಂಡಗಳನ್ನು ಎದುರಿಸಲಿದೆ. ಸೆಮಿಫೈನಲ್ ಪಂದ್ಯಗಳು ಜೂನ್ 30 ಮತ್ತು ಜುಲೈ 2 ರಂದು ಓವಲ್ ಕ್ರೀಡಾಂಗಣದಲ್ಲಿ ನಡೆಯಲಿದ್ದು, ಫೈನಲ್ ಪಂದ್ಯ ಜುಲೈ 5ರಂದು ಐತಿಹಾಸಿಕ ಲಾರ್ಡ್ಸ್ ಮೈದಾನದಲ್ಲಿ ಜರುಗಲಿದೆ.
ಈ ಘೋಷಣೆ ಮಹಿಳಾ ಕ್ರಿಕೆಟ್ಗೆ ಹೊಸ ಉತ್ತೇಜನ ನೀಡುವ ಜೊತೆಗೆ ಜಾಗತಿಕ ಮಟ್ಟದಲ್ಲಿ ಮಹಿಳಾ ಕ್ರೀಡೆಗೆ ಹೆಚ್ಚುತ್ತಿರುವ ಗೌರವವನ್ನು ಪ್ರತಿಬಿಂಬಿಸುತ್ತದೆ.
