ಹೆಂಡ್ತೀನ ಕೊಲೆ ಮಾಡಿದ… ಪೆಟ್ಟಿಗೆಯಲ್ಲಿಟ್ಟು ಸಿಮೆಂಟ್ ಸುರಿದ ಗಂಡ! ಒಂದು ಚೀಟಿಯಿಂದ ಹೊರಬಂತು ಭಯಾನಕ ಸತ್ಯ?

ಗುಜರಾತ್‌ನ ಸೂರತ್ ನಗರದಲ್ಲಿ ನಡೆದ ಒಂದು ಪ್ರಕರಣ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದೆ. ಆರಂಭದಲ್ಲಿ ಕೇವಲ ನಾಪತ್ತೆ ಪ್ರಕರಣವೆಂದು ದಾಖಲಾಗಿದ್ದ ಘಟನೆ, ಅಂತಿಮವಾಗಿ ಪತಿಯೇ ತನ್ನ ಪತ್ನಿಯನ್ನು ಬರ್ಬರವಾಗಿ ಹತ್ಯೆ ಮಾಡಿ, ಆಕೆಯ ದೇಹವನ್ನು ಹಳೇ ಮನೆಯ ಪೆಟ್ಟಿಗೆಯಲ್ಲಿ ಅಡಗಿಸಿಟ್ಟಿರುವ ಘೋರ ಸತ್ಯವಾಗಿ ಹೊರಹೊಮ್ಮಿದೆ.

ಘಟನೆಯ ಹಿನ್ನೆಲೆ:
ವಿಶಾಲ್ ಸಾಳ್ವೆ ಎಂಬ ವ್ಯಕ್ತಿ ಪೊಲೀಸ್ ಠಾಣೆಗೆ ಬಂದು ನೀಡಿದ್ದ. ತನ್ನ 39 ವರ್ಷದ ಪತ್ನಿ ಶಿಲ್ಪಾ ಸಾಳ್ವೆ ಕಳೆದ ನಾಲ್ಕು ದಿನಗಳಿಂದ ನಾಪತ್ತೆಯಾಗಿದ್ದಾರೆ ಎಂದು ವಿಶಾಲ್ ಕಣ್ಣೀರು ಹಾಕುತ್ತಾ ದೂರನ್ನು ದಾಖಲಿಸಿದ್ದ. ಶಿಲ್ಪಾ ವೃತ್ತಿಯಲ್ಲಿ ಡಯೆಟಿಷಿಯನ್ ಆಗಿ ಕೆಲಸ ಮಾಡುತ್ತಿದ್ದರು. ಪೊಲೀಸರು ಆರಂಭದಲ್ಲಿ ಇದನ್ನು ಸಾಮಾನ್ಯ ನಾಪತ್ತೆ ಪ್ರಕರಣವೆಂದೇ ಭಾವಿಸಿ ತನಿಖೆ ಕೈಗೆತ್ತಿಕೊಂಡಿದ್ದರು. ಆದರೆ ವಿಶಾಲ್ ನೀಡಿದ ಹೇಳಿಕೆಗಳು ಮತ್ತು ಸಮಯದ ಲೆಕ್ಕಾಚಾರದಲ್ಲಿ ವ್ಯತ್ಯಾಸ ಕಂಡುಬಂದಾಗ ಪೊಲೀಸರಿಗೆ ಅನುಮಾನ ಶುರುವಾಯಿತು.

ತಿರುವು ನೀಡಿದ ಹಸ್ತಾಕ್ಷರದ ಚೀಟಿ:
ತನಿಖೆ ತೀವ್ರಗೊಂಡಂತೆ ಪೊಲೀಸರಿಗೆ ಈ ದಂಪತಿಯ ಅಪ್ರಾಪ್ತ ಮಗನ ಬಳಿ ಒಂದು ಕೈಬರಹದ ಚೀಟಿ ಸಿಕ್ಕಿತು. ಅದು ಸ್ವತಃ ವಿಶಾಲ್ ಬರೆದಿದ್ದ ಪತ್ರವಾಗಿತ್ತು. ಅದರಲ್ಲಿ “ನಾನು ದೊಡ್ಡ ತಪ್ಪು ಮಾಡಿದ್ದೇನೆ, ಶಿಲ್ಪಾ ಇನ್ನು ಬದುಕಿಲ್ಲ” ಎಂದು ವಿಶಾಲ್ ತಪ್ಪೊಪ್ಪಿಕೊಂಡಿದ್ದ. ಈ ಒಂದು ಪತ್ರ ನಾಪತ್ತೆ ಪ್ರಕರಣವನ್ನು ಕ್ಷಣಾರ್ಧದಲ್ಲಿ ಕೊಲೆ ತನಿಖೆಯಾಗಿ ಬದಲಿಸಿತು.

ಇದನ್ನು ಓದಿ: http://ಬಾಲ್ಯ ವಿವಾಹಕ್ಕೆ ಅಕ್ಕ ಪಡೆಯ ಬ್ರೇಕ್ : ಪ್ರಕರಣ ದಾಖಲು

ಹಳೇ ಮನೆಯಲ್ಲಿ ಕಂಡ ಭೀಕರ ದೃಶ್ಯ:
ಪೊಲೀಸರು ತಕ್ಷಣ ಕಾರ್ಯಪ್ರವೃತ್ತರಾಗಿ ಸಲಾಬತ್‌ಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿರುವ ವಿಶಾಲ್‌ನ ಹಳೆಯ ಮತ್ತು ಪಾಳುಬಿದ್ದ ಮನೆಯ ಮೇಲೆ ದಾಳಿ ನಡೆಸಿದರು. ಬೀಗ ಒಡೆದು ಒಳಗೆ ಹೋದ ಪೊಲೀಸರಿಗೆ ಅಲ್ಲಿ ಭೀಕರ ವಾಸನೆ ಬಂದಿದೆ. ಮನೆಯ ಮೂಲೆಯಲ್ಲಿದ್ದ ಒಂದು ಮರದ ಪೆಟ್ಟಿಗೆಯಿಂದ ಆ ವಾಸನೆ ಬರುತ್ತಿರುವುದು ಪತ್ತೆಯಾಯಿತು. ಆ ಪೆಟ್ಟಿಗೆಯನ್ನು ತೆರೆದ ಪೊಲೀಸರು ದಂಗಾಗಿ ಹೋದರು. ಅಲ್ಲಿ ಶಿಲ್ಪಾ ಅವರ ಕೊಳೆತ ಶವವಿತ್ತು. ಅಷ್ಟೇ ಅಲ್ಲದೆ, ಶವದಿಂದ ವಾಸನೆ ಬಾರದಂತೆ ತಡೆಯಲು ವಿಶಾಲ್ ಶವದ ಮೇಲೆ ಸಿಮೆಂಟ್ ಅನ್ನು ಸುರಿದು ಮುಚ್ಚಿ ಹಾಕಿದ್ದ.

ಕೊಲೆಗೆ ಕಾರಣವೇನು?
ಪ್ರಾಥಮಿಕ ತನಿಖೆಯ ಪ್ರಕಾರ, ವಿಶಾಲ್ ತನ್ನ ಪತ್ನಿಯ ಮೇಲೆ ಅಕ್ರಮ ಸಂಬಂಧದ ಶಂಕೆ ಹೊಂದಿದ್ದ ಎನ್ನಲಾಗಿದೆ. ದಂಪತಿಗಳ ನಡುವೆ ಕಳೆದ ಕೆಲವು ಸಮಯದಿಂದ ಸಣ್ಣಪುಟ್ಟ ವಿಷಯಕ್ಕೂ ಜಗಳ ನಡೆಯುತ್ತಿತ್ತು. ಇದೇ ಸಿಟ್ಟಿನಲ್ಲಿ ವಿಶಾಲ್, ಪತ್ನಿ ಶಿಲ್ಪಾಳನ್ನು ಕೊಲೆ ಮಾಡಿ ಹಳೇ ಮನೆಯಲ್ಲಿ ಬಚ್ಚಿಟ್ಟು, ನಂತರ ಏನೂ ಅರಿಯದವನಂತೆ ಪೊಲೀಸ್ ಠಾಣೆಗೆ ಬಂದು ದೂರು ನೀಡಿದ್ದ. ಶಿಲ್ಪಾ ನಾಪತ್ತೆಯಾಗಿದ್ದಾರೆ ಎಂದು ದೂರು ನೀಡುವ ನಾಲ್ಕು ದಿನಗಳ ಮೊದಲೇ ಆಕೆಯ ಕೊಲೆಯಾಗಿತ್ತು ಎಂದು ಅಂದಾಜಿಸಲಾಗಿದೆ.

ತಲೆಮರೆಸಿಕೊಂಡ ಆರೋಪಿ:
ಪ್ರಸ್ತುತ ಶಿಲ್ಪಾ ಅವರ ಶವವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ಪೊಲೀಸರ ಕಣ್ಣಿಗೆ ಮಣ್ಣೆರಚಿ ನಾಪತ್ತೆ ನಾಟಕವಾಡಿದ್ದ ವಿಶಾಲ್ ಸಾಳ್ವೆ, ಈಗ ತಲೆಮರೆಸಿಕೊಂಡಿದ್ದಾನೆ. ಆತನನ್ನು ಪತ್ತೆಹಚ್ಚಲು ಪೊಲೀಸರು ಸಿಸಿಟಿವಿ ಕ್ಯಾಮೆರಾ ಹಾಗೂ ಮೊಬೈಲ್ ಲೊಕೇಶನ್‌ಗಳ ಸಹಾಯ ಪಡೆಯುತ್ತಿದ್ದು, ಶೀಘ್ರದಲ್ಲೇ ಆತನನ್ನು ಬಂಧಿಸುವ ವಿಶ್ವಾಸದಲ್ಲಿದ್ದಾರೆ.

ಸಂಸಾರದಲ್ಲಿನ ಸಂಶಯ ಮತ್ತು ಕಲಹ ಒಂದು ಸುಂದರ ಕುಟುಂಬವನ್ನು ಹೇಗೆ ನಾಶಮಾಡುತ್ತದೆ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ಸೂರತ್ ಪೊಲೀಸರ ಹದ್ದಿನ ಕಣ್ಣಿನ ತನಿಖೆಯಿಂದಾಗಿ, ತಪ್ಪೊಪ್ಪಿಗೆಯ ಪತ್ರವೊಂದು ಈ ಕೊಲೆ ರಹಸ್ಯವನ್ನು ಜಗತ್ತಿನ ಮುಂದೆ ತಂದಿದೆ.