ಕುನೋದಲ್ಲಿ ಸಂಭ್ರಮ: ಚಿರತೆ ಗಾಮಿನಿಯಿಂದ ಮೂರು ಮರಿಗಳಿಗೆ ಜನ್ಮ

ಚೀತಾ ಯೋಜನೆಗೆ ಹೊಸ ಬಲ: ಕುನೋದಲ್ಲಿ ಮೂರು ಚಿರತೆ ಮರಿಗಳ ಜನನ – ಭಾರತದಲ್ಲಿ ಚಿರತೆಗಳ ಸಂಖ್ಯೆ 38ಕ್ಕೆ ಏರಿಕೆ

ನವದೆಹಲಿ/ಶಿಯೋಪುರ: ದಕ್ಷಿಣ ಆಫ್ರಿಕಾದಿಂದ ಭಾರತಕ್ಕೆ ಚಿರತೆಗಳ ಆಗಮನದ ಬಳಿಕ, ಮಧ್ಯಪ್ರದೇಶದ ಕುನೋ ರಾಷ್ಟ್ರೀಯ ಉದ್ಯಾನವನದಲ್ಲಿ ಹೊಸ ಅಧ್ಯಾಯ ಆರಂಭವಾಗಿದೆ. ಇಲ್ಲಿನ ಚಿರತೆ ಗಾಮಿನಿ ಮೂರು ಆರೋಗ್ಯವಂತ ಮರಿಗಳಿಗೆ ಜನ್ಮ ನೀಡಿದ್ದು, ವನ್ಯಜೀವಿ ಸಂರಕ್ಷಣಾ ಕ್ಷೇತ್ರದಲ್ಲಿ ಮಹತ್ವದ ಸಾಧನೆಯಾಗಿ ಗುರುತಿಸಲಾಗಿದೆ.

ಈ ಕುರಿತು ಕೇಂದ್ರ ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವ ಭೂಪೇಂದರ್ ಯಾದವ್ ಮಾಹಿತಿ ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: ರಾಜ್ಯದ ಜೈಲುಗಳಲ್ಲಿ ಬದಲಾವಣೆ: ಜೈಲಿನಲ್ಲೇ ಸ್ಕಿಲ್ ಡೆವಲಪ್‌ಮೆಂಟ್ – ಖೈದಿಗಳ ಭವಿಷ್ಯಕ್ಕೆ ಹೊಸ ದಾರಿ

ಸಚಿವರಿಂದ ಅಧಿಕೃತ ಮಾಹಿತಿ: ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿರುವ ಸಚಿವರು, “ದಕ್ಷಿಣ ಆಫ್ರಿಕಾದಿಂದ ಚಿರತೆಗಳು ಬಂದ ಮೂರು ವರ್ಷಗಳು ಪೂರ್ಣಗೊಂಡ ಸಂದರ್ಭದಲ್ಲೇ ಕುನೊದಲ್ಲಿ ಗಾಮಿನಿ ಮೂರು ಮರಿಗಳಿಗೆ ಜನ್ಮ ನೀಡಿರುವುದು ಸಂತಸದ ಸಂಗತಿ. ಇದು ಚೀತಾ ಯೋಜನೆಯ ಯಶಸ್ಸಿನ ಸಂಕೇತವಾಗಿದೆ” ಎಂದು ತಿಳಿಸಿದ್ದಾರೆ.

ಮೂರು ಹೊಸ ಮರಿಗಳ ಆಗಮನದೊಂದಿಗೆ ಭಾರತದಲ್ಲಿ ಜನಿಸಿದ ಚಿರತೆ ಮರಿಗಳ ಸಂಖ್ಯೆ 27ಕ್ಕೆ ಏರಿಕೆಯಾಗಿದೆ. ಇದರಿಂದ ದೇಶದಲ್ಲಿನ ಒಟ್ಟು ಚಿರತೆಗಳ ಸಂಖ್ಯೆ ಇದೀಗ 38ಕ್ಕೆ ತಲುಪಿದೆ ಎಂದು ಅವರು ತಿಳಿಸಿದ್ದಾರೆ.

ಇದನ್ನೂ ಓದಿ: AI ಶೃಂಗಸಭೆ ವಿವಾದ: ರೋಬೋಟ್ ನಾಯಿಯ ಕುರಿತು ಗಾಲ್ಗೋಟಿಯಾಸ್ ವಿವಿ ಸ್ಪಷ್ಟನೆ

ಚೀತಾ ಯೋಜನೆಗೆ ಮತ್ತಷ್ಟು ಬಲ: ಪ್ರತಿ ಚಿರತೆ ಮಗು ಜನನವು ಪ್ರಾಜೆಕ್ಟ್ ಚೀತಾ ಯೋಜನೆಯ ಅಡಿಪಾಯವನ್ನು ಮತ್ತಷ್ಟು ಬಲಪಡಿಸುತ್ತದೆ ಎಂದು ಭೂಪೇಂದರ್ ಯಾದವ್ ಹೇಳಿದ್ದಾರೆ. ಕ್ಷೇತ್ರ ಸಿಬ್ಬಂದಿ ಮತ್ತು ಪಶುವೈದ್ಯಕೀಯ ತಂಡಗಳ ಹಗಲು-ರಾತ್ರಿ ಶ್ರಮ, ಸಹನೆ ಮತ್ತು ಸಮರ್ಪಣೆಯ ಫಲವೇ ಈ ಯಶಸ್ಸು ಎಂದು ಅವರು ಪ್ರಶಂಸಿಸಿದ್ದಾರೆ.

“ಗಾಮಿನಿ ಮತ್ತು ಅವಳ ಮೂರು ಮರಿಗಳು ಬಲಿಷ್ಠವಾಗಿ ಬೆಳೆಯಲಿ. ಭಾರತದಲ್ಲಿ ಚಿರತೆ ಪುನರುತ್ಥಾನದ ಕಥೆಯನ್ನು ವೇಗ ಮತ್ತು ಗೌರವದೊಂದಿಗೆ ಮುಂದಕ್ಕೆ ಕೊಂಡೊಯ್ಯಲಿ” ಎಂದು ಶುಭಾಶಯ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: 45 ವರ್ಷಗಳ ಕೊಡುಗೆ ಏನು? ದೇಶಪಾಂಡೆಗೆ ಸುನೀಲ್ ಹೆಗಡೆ ಸವಾಲು

ಕುನೊ – ಚಿರತೆ ಪುನರ್‌ಪ್ರವೇಶದ ಕೇಂದ್ರ: ಮಧ್ಯಪ್ರದೇಶದ ಶಿಯೋಪುರ್ ಜಿಲ್ಲೆಯಲ್ಲಿ ಇರುವ ಕುನೊ ರಾಷ್ಟ್ರೀಯ ಉದ್ಯಾನವನವನ್ನು ಭಾರತದ ಚಿರತೆ ಪುನರ್‌ಪ್ರವೇಶ ಯೋಜನೆಗಾಗಿ ಪ್ರಮುಖ ಕೇಂದ್ರವಾಗಿ ಆಯ್ಕೆ ಮಾಡಲಾಗಿದೆ. ಈ ಯೋಜನೆಯನ್ನು ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನವಾದ ಸೆಪ್ಟೆಂಬರ್ 17, 2022ರಂದು ಅಧಿಕೃತವಾಗಿ ಆರಂಭಿಸಲಾಗಿತ್ತು. ಅಳಿವಿನಂಚಿನಲ್ಲಿದ್ದ ಚಿರತೆಯನ್ನು ಭಾರತಕ್ಕೆ ಮತ್ತೆ ಪರಿಚಯಿಸುವುದು ಈ ಯೋಜನೆಯ ಪ್ರಮುಖ ಗುರಿಯಾಗಿದೆ.

ಆರಂಭದ ದಿನಗಳ ಸವಾಲುಗಳು: 2022ರಲ್ಲಿ ದಕ್ಷಿಣ ಆಫ್ರಿಕಾದಿಂದ ತರಲಾಗಿದ್ದ 12 ಚಿರತೆಗಳ ಪೈಕಿ ಒಂದು ಅನಾರೋಗ್ಯದಿಂದ ಸಾವನ್ನಪ್ಪಿತ್ತು. ಇದಲ್ಲದೆ, ಕುನೊದಲ್ಲಿ ಪರಿಚಯಿಸಲಾದ 8 ಚಿರತೆಗಳ ಪೈಕಿ ಸಾಶಾ ಹೆಸರಿನ ಹೆಣ್ಣು ಚಿರತೆ ಕಿಡ್ನಿ ಸೋಂಕಿನಿಂದ ಮೃತಪಟ್ಟಿತ್ತು. ನಂತರ ಉದಯ್ ಎಂಬ ಗಂಡು ಚಿರತೆಯೂ ಅನಾರೋಗ್ಯದಿಂದ ಸಾವನ್ನಪ್ಪಿತ್ತು.

ಇದನ್ನೂ ಓದಿ: ಸಾವಿರಾರು ವಿದ್ಯಾರ್ಥಿಗಳ ಮಾರ್ಗದರ್ಶಕ ಡಾ. ರಾಘವೇಂದ್ರ ರಾವ್ ಇನ್ನಿಲ್ಲ

ಈ ಸವಾಲುಗಳ ನಡುವೆಯೂ, ಯೋಜನೆ ಕ್ರಮೇಣ ಯಶಸ್ಸಿನ ಹಾದಿಯಲ್ಲಿ ಸಾಗುತ್ತಿರುವುದು ಗಾಮಿನಿಯ ಮರಿಗಳ ಜನನದಿಂದ ಮತ್ತೊಮ್ಮೆ ಸಾಬೀತಾಗಿದೆ.

ವನ್ಯಜೀವಿ ಸಂರಕ್ಷಣೆಗೆ ಹೊಸ ಭರವಸೆ: ಗಾಮಿನಿಯಿಂದ ಮೂರು ಮರಿಗಳಿಗೆ ಜನ್ಮ ನೀಡಿರುವುದು ಕುನೊ ಉದ್ಯಾನವನಕ್ಕೆ ಮಾತ್ರವಲ್ಲ, ದೇಶದ ವನ್ಯಜೀವಿ ಸಂರಕ್ಷಣಾ ಪ್ರಯತ್ನಗಳಿಗೆ ಹೊಸ ಭರವಸೆ ತಂದಿದೆ. ಇದು ಭಾರತದಲ್ಲಿ ಚಿರತೆಗಳ ಭವಿಷ್ಯ ಸುರಕ್ಷಿತವಾಗುವತ್ತ ಸಾಗುತ್ತಿರುವ ಮಹತ್ವದ ಹೆಜ್ಜೆಯಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.