ನವದೆಹಲಿ: ಆರು ತಿಂಗಳವರೆಗಿನ ಶಿಶುಗಳ ಪೌಷ್ಟಿಕಾಂಶ ಸುರಕ್ಷತೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಮಹತ್ವದ ಕ್ರಮಕ್ಕೆ ಮುಂದಾಗಿದೆ. ಆರು ತಿಂಗಳವರೆಗಿನ ಶಿಶುಗಳಿಗಾಗಿ ತಯಾರಿಸುವ ಆಹಾರ ಉತ್ಪನ್ನಗಳಲ್ಲಿ ಸುಕ್ರೋಸ್ (Sucrose) ಮತ್ತು ಫ್ರಕ್ಟೋಸ್ (Fructose) ಸೇರಿಸುವುದನ್ನು ನಿಷೇಧಿಸುವ ಪ್ರಸ್ತಾವನೆಯನ್ನು ಒಳಗೊಂಡ ಕರಡು ತಿದ್ದುಪಡಿಯನ್ನು ಪ್ರಾಧಿಕಾರ ಪ್ರಕಟಿಸಿದೆ.
ಶಿಶು ಪೌಷ್ಟಿಕಾಂಶ ನಿಯಮಗಳಲ್ಲಿ ಬದಲಾವಣೆಗೆ ಪ್ರಸ್ತಾವನೆ : FSSAI ಪ್ರಕಟಿಸಿರುವ ಕರಡು ತಿದ್ದುಪಡಿಯು 2020ರ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ (ಶಿಶು ಪೌಷ್ಟಿಕಾಂಶ ಆಹಾರ) ನಿಯಮಗಳಿಗೆ ಸಂಬಂಧಿಸಿದೆ. ಪ್ರಸ್ತುತ ನಿಯಮಗಳಲ್ಲಿ ಲ್ಯಾಕ್ಟೋಸ್ ಮತ್ತು ಗ್ಲೂಕೋಸ್ ಪಾಲಿಮರ್‌ಗಳನ್ನು ಆದ್ಯತೆಯ ಕಾರ್ಬೋಹೈಡ್ರೇಟ್ ಮೂಲಗಳಾಗಿ ಪರಿಗಣಿಸಲಾಗಿದೆ. ಕೆಲವು ಸಂದರ್ಭಗಳಲ್ಲಿ ಸುಕ್ರೋಸ್ ಮತ್ತು ಫ್ರಕ್ಟೋಸ್ ಬಳಕೆಗೆ ನಿರ್ದಿಷ್ಟ ಷರತ್ತುಗಳೊಂದಿಗೆ ಅವಕಾಶವಿದೆ.
ಹೊಸ ಪ್ರಸ್ತಾವನೆಯ ಪ್ರಕಾರ, ಆರು ತಿಂಗಳವರೆಗಿನ ಶಿಶುಗಳಿಗಾಗಿ ಉದ್ದೇಶಿಸಲಾದ ಉತ್ಪನ್ನಗಳಿಗೆ ಸುಕ್ರೋಸ್ ಮತ್ತು ಫ್ರಕ್ಟೋಸ್ ಸೇರಿಸುವುದನ್ನು ನಿರ್ಬಂಧಿಸಲು ಉದ್ದೇಶಿಸಲಾಗಿದೆ. ಇದರಿಂದ ಶಿಶು ಆಹಾರ ಉತ್ಪನ್ನಗಳ ಸಂಯೋಜನೆಗೆ ಸಂಬಂಧಿಸಿದ ನಿಯಮಗಳು ಮತ್ತಷ್ಟು ಕಟ್ಟುನಿಟ್ಟಾಗುವ ನಿರೀಕ್ಷೆಯಿದೆ.
ಮೊದಲ ಆರು ತಿಂಗಳ ಪೌಷ್ಟಿಕಾಂಶಕ್ಕೆ ಹೆಚ್ಚಿನ ಆದ್ಯತೆ : ಮಗುವಿನ ಜೀವನದ ಮೊದಲ ಆರು ತಿಂಗಳು ಬೆಳವಣಿಗೆ ಮತ್ತು ಪೌಷ್ಟಿಕಾಂಶದ ದೃಷ್ಟಿಯಿಂದ ಅತ್ಯಂತ ಮಹತ್ವದ ಅವಧಿಯಾಗಿದೆ. ಈ ಹಂತದಲ್ಲಿ ಸೂಕ್ತ ಪೋಷಣೆಯನ್ನು ಉತ್ತೇಜಿಸುವುದು, ಶಿಶುಗಳ ಆರೋಗ್ಯಕರ ಬೆಳವಣಿಗೆಗೆ ಬೆಂಬಲ ನೀಡುವುದು ಮತ್ತು ಆರಂಭಿಕ ಹಂತದಲ್ಲಿ ಹೆಚ್ಚುವರಿ ಸಕ್ಕರೆಗಳ ಬಳಕೆಯನ್ನು ನಿಯಂತ್ರಿಸುವುದು ಈ ಪ್ರಸ್ತಾವನೆಯ ಪ್ರಮುಖ ಉದ್ದೇಶವಾಗಿದೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಕೂಡ ಮಗುವಿನ ಮೊದಲ ಆರು ತಿಂಗಳವರೆಗೆ ಕೇವಲ ಎದೆಹಾಲು ನೀಡುವಂತೆ ಶಿಫಾರಸು ಮಾಡುತ್ತದೆ. ವೈದ್ಯಕೀಯ ಕಾರಣಗಳಿಂದ ವಿಶೇಷ ಶಿಶು ಆಹಾರದ ಅಗತ್ಯವಿರುವ ಸಂದರ್ಭಗಳಲ್ಲಿ ವೈದ್ಯರ ಸಲಹೆ ಪಾಲಿಸುವುದು ಮುಖ್ಯ.
ಸಾರ್ವಜನಿಕರಿಂದ ಸಲಹೆ, ಆಕ್ಷೇಪಣೆಗಳಿಗೆ ಅವಕಾಶ : ಇದು ಸದ್ಯಕ್ಕೆ ಅಂತಿಮವಾಗಿ ಜಾರಿಗೊಂಡ ನಿಯಮವಲ್ಲ; ಕರಡು ತಿದ್ದುಪಡಿಯಾಗಿದೆ. ಕರಡು ಪ್ರಕಟಣೆಯ ಪ್ರಕಾರ, ಅಧಿಕೃತ ಗೆಜೆಟ್ ಸಾರ್ವಜನಿಕರಿಗೆ ಲಭ್ಯವಾದ ದಿನಾಂಕದಿಂದ 60 ದಿನಗಳ ಅವಧಿ ಮುಗಿದ ನಂತರ ತಿದ್ದುಪಡಿಯ ಕುರಿತು ಪರಿಗಣನೆ ನಡೆಯಲಿದೆ. ಈ ಅವಧಿಯಲ್ಲಿ ಸಂಬಂಧಿತ ವ್ಯಕ್ತಿಗಳು ಮತ್ತು ಸಂಸ್ಥೆಗಳು ತಮ್ಮ ಸಲಹೆ ಹಾಗೂ ಆಕ್ಷೇಪಣೆಗಳನ್ನು FSSAIಗೆ ಸಲ್ಲಿಸಬಹುದು.
