ಮಾಸಾಂತ್ಯಕ್ಕೆ ಸೃಜನ್‌ GST

ಬೆಂಗಳೂರು: ಟಿವಿ ಲೋಕದ ಜನಪ್ರಿಯ ನಟ ಸೃಜನ್ ಲೋಕೇಶ್ ನಿರ್ದೇಶಕರಾಗಿ ಮೊದಲ ಹೆಜ್ಜೆ ಇಟ್ಟಿರುವ ಬಹುನಿರೀಕ್ಷಿತ ಸಿನಿಮಾ ‘ಜಿಎಸ್‌ಟಿ (Ghost in Trouble)’ ನವೆಂಬರ್ 28ರಂದು ತೆರೆಗೆ ಬರಲಿದೆ. ಈಗಾಗಲೇ ಬಿಡುಗಡೆಯಾದ ಚಿತ್ರದ ಟ್ರೇಲರ್‌ಗೆ ಉತ್ತಮ ಪ್ರತಿಕ್ರಿಯೆ ದೊರಕಿದ್ದು, ಕುಟುಂಬವರ್ಗಕ್ಕೂ ಮನರಂಜನೆಗೂ ಸೂಕ್ತವಾದ ಕಾಮಿಡಿ–ಥ್ರಿಲ್ ಶೈಲಿಯ ಚಿತ್ರವಾಗಿ ಜಿಎಸ್‌ಟಿ ಸಿನೆಮಾದ ಬಗ್ಗೆ ಚರ್ಚೆ ಹೆಚ್ಚಾಗಿದೆ.

ಈ ಚಿತ್ರವನ್ನು ಸಂದೇಶ್ ಪ್ರೊಡಕ್ಷನ್ಸ್ ಅಡಿಯಲ್ಲಿ ನಿರ್ಮಾಪಕ ಸಂದೇಶ್ ನಾಗರಾಜ್ ನಿರ್ಮಿಸಿದ್ದಾರೆ. ನಿರ್ದೇಶನದ ಜೊತೆಗೆ ನಾಯಕ ಪಾತ್ರವನ್ನೂ ಸೃಜನ್ ಅವರು ನಿರ್ವಹಿಸಿದ್ದು, ಅವರ ನಿರ್ದೇಶನದ ಮೊದಲ ಚಿತ್ರಕ್ಕೆ ಸೆನ್ಸಾರ್ ಮಂಡಳಿ ‘U/A’ ಪ್ರಮಾಣಪತ್ರ ನೀಡಿದೆ. ಚಿತ್ರದ ನಿರ್ಮಾಪಕ ಸಂದೇಶ್ ನಾಗರಾಜ್ ಅವರು ಕೂಡಾ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಚಿತ್ರದ ವಿಶೇಷವೇನೆಂದರೆ—ಸೃಜನ್ ತಮ್ಮ ನಿರ್ದೇಶನದ ಚೊಚ್ಚಲ ಚಿತ್ರದಲ್ಲೇ ತಮ್ಮ ಕುಟುಂಬ ಸದಸ್ಯರಾದ ತಾಯಿ ಗಿರಿಜಾ ಲೋಕೇಶ್ ಮತ್ತು ಮಗ ಸುಕೃತ್ ಅವರಿಗೆ ಆ್ಯಕ್ಷನ್–ಕಟ್ ಹೇಳುವ ಅಪರೂಪದ ಅವಕಾಶ ದೊರೆತಿದೆ. ಚಿತ್ರವು ಸಂಪೂರ್ಣ ಮನರಂಜನೆ ಆಧಾರಿತವಾಗಿದ್ದು, “Ghost in Trouble” ಎಂಬ ಉಪಶೀರ್ಷಿಕೆ ಸಿನಿಮಾದ ಥೀಂನತ್ತ ಗಮನ ಸೆಳೆಯುತ್ತಿದೆ.

ಚಿತ್ರದಲ್ಲಿ ಸೃಜನ್‌ಗೆ ನಾಯಕಿಯಾಗಿ ರಜನಿ ಭಾರದ್ವಾಜ್ ಅಭಿನಯಿಸಿದ್ದಾರೆ. ಪ್ರಮೋದ್ ಶೆಟ್ಟಿ, ಶೋಭರಾಜ್, ಶರತ್ ಲೋಹಿತಾಶ್ವ, ನಿವೇದಿತಾ, ಅರವಿಂದ್ ರಾವ್, ತಬಲ ನಾಣಿ, ರವಿಶಂಕರ್ ಗೌಡ, ವಿನೋದ್ ಗೊಬ್ಬರಗಾಲ ಮುಂತಾದವರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಸಂಗೀತ ನಿರ್ದೇಶನವನ್ನು ಚಂದನ್ ಶೆಟ್ಟಿ ನಿರ್ವಹಿಸಿದ್ದು, ಹಾಡು–ಹಿನ್ನಲೆ ಸಂಗೀತ ಎರಡೂ ಚಿತ್ರದ ಪ್ರಮುಖ ಆಕರ್ಷಣೆಗಳಾಗಲಿವೆ ಎಂದು ಚಿತ್ರತಂಡ ಭರವಸೆ ನೀಡಿದೆ. ಛಾಯಾಗ್ರಹಣವನ್ನು ಗುಂಡ್ಲುಪೇಟೆ ಸುರೇಶ್ ನಿರ್ವಹಿಸಿದ್ದು, ಮನರಂಜನೆಗೆ ತಕ್ಕಂತೆ ಬಣ್ಣಬಣ್ಣದ ಫ್ರೇಮ್‌ಗಳನ್ನು ಕ್ಯಾಮೆರಾ ಸೆರೆಹಿಡಿದಿದೆ. ಸಂಭಾಷಣೆಯನ್ನು ರಾಜಶೇಖರ್ ಬರೆದಿದ್ದಾರೆ.

ಸುಮಾರು ಎರಡು ವರ್ಷಗಳ ಹಿಂದೆ ಶೂಟಿಂಗ್ ಆರಂಭಿಸಿ ಮುಗಿಸಿದ ಈ ಚಿತ್ರ ಈಗ ಬಿಡುಗಡೆಯ ಹಂತ ತಲುಪಿದ್ದು, ಕನ್ನಡ ಚಿತ್ರರಂಗಕ್ಕೆ ಹೊಸ ನಿರ್ದೇಶಕನಾಗಿ ಸೃಜನ್ ಲೋಕೇಶ್ ಯಾವ ರೀತಿಯ ಗುರುತು ಮೂಡಿಸುತ್ತಾರೆ ಎಂಬ ಕುತೂಹಲ ಚಿತ್ರರಸಿಕರ ನಡುವೆ ಹೆಚ್ಚಾಗಿದೆ.