ಚಿತ್ರ: ಫ್ಲರ್ಟ್
ನಿರ್ದೇಶನ: ಚಂದನ್ ಕುಮಾರ್
ನಿರ್ಮಾಣ: ಚಂದನ್ ಕುಮಾರ್
ತಾರಾಗಣ: ಚಂದನ್ ಕುಮಾರ್, ನಿಮಿಕಾ ರತ್ನಾಕರ್, ಗಿರಿ, ಸಾಧುಕೋಕಿಲ, ಶ್ರುತಿ ಹಾಗೂ ಅವಿನಾಶ್ ಮುಂತಾದವರು.
ರೇಟಿಂಗ್ಸ್: 3.5
ಜಿ.ಆರ್.ಬಿ
ಈಗಿನ ಜನರೇಷನ್ ಹುಡುಗರು ಫ್ಲರ್ಟ್ ಮಾಡುವುದರಲ್ಲಿ ನಿಸ್ಸೀಮರು. ಹುಡುಗರು ಬೀಸುವ ಬಲೆಗೆ ಹುಡುಗೀರು ಬೀಳುತ್ತಾರೋ, ಇಲ್ಲವೋ ಎಂಬುದು ಒಂದೆಡೆಯಾದರೆ… ಕೆಲವೊಮ್ಮೆ ಚೆಂದದ ಹುಡುಗೀರು ಹುಡುಗನ ಜೇಬು ಖಾಲಿ ಮಾಡಲೆಂದೇ ಸ್ಕೀಮು ಹಾಕಿರುವಂತೆ ಮುಗಿ ಬೀಳುತ್ತಾರೆ. ಹುಡುಗರೂ ಏನು ಕಡಿಮೆಯಿಲ್ಲ ಎಂಬಂತೆ ಸಿಕ್ಕ ಹೆಣ್ಣನ್ನು ಸರಿಯಾಗಿ `ಬಳಸಿ’ಕೊಳ್ಳಬೇಕು ಎಂಬ ಹಪಾಹಪಿಯಲ್ಲೇ ಮುಳುಗಿರುತ್ತಾರೆ. ಇಂಥ ಕೆಲವು ಹುಡುಗ-ಹುಡುಗಿಯ ಕಥೆಯೇ ಫ್ಲರ್ಟ್.
ಮಾಮೂಲಿ ಧಾಟಿಯ ಕಥೆ ಹಾಗೂ ನಿರೂಪಣೆಗಳ ಆಚೆಗೆ ಮತ್ತಿನ್ನೇನೋ ಮಾಡಬೇಕೆಂಬ ತುಡಿತದಿಂದ ಚಂದನ್ ಫ್ಲರ್ಟ್ ಮಾಡಿದ್ದಾರೆ ಎಂಬುದು ಪ್ರತಿಯೊಂದು ದೃಶ್ಯಗಳಲ್ಲೂ ಗೋಚರಿಸುತ್ತದೆ. ಯೂತ್‌ಫುಲ್ ಕಥೆಯೊಂದಿಗೆ ನಿರ್ದೇಶನಕ್ಕಿಳಿದಿರುವ ಚಂದನ್, ಪ್ರಿತಿಯಷ್ಟೇ ಸ್ನೇಹಕ್ಕೂ ಜಾಗ ಮಾಡಿಕೊಟ್ಟಿದ್ದಾರೆ. ಹಾಗೆಯೇ ಒಂದು ಅಚ್ಚುಕಟ್ಟಾದ ಸಿನಿಮಾಕ್ಕೆ ಬೇಕಾಗುವ ಸರಕುಗಳನ್ನು ಒಟ್ಟುಗೂಡಿಸಿ ಚೆಂದನೆಯ ಫೋಟೋ ತೆಗೆದಂತೆ ಭಾಸವಾಗುವ ಹಾಗೆ ಇಡೀ ಸಿನಿಮಾ ಕಟ್ಟಿಕೊಟ್ಟಿದ್ದಾರೆ. ಹೀಗಾಗಿ ಸಿನಿಮಾದುದ್ದಕ್ಕೂ ಲವ್ ಲವಿಕೆ ಎದ್ದು ಕಾಣುತ್ತದೆ.
ಪ್ರೀತಿಯಷ್ಟೇ ಸ್ನೇಹವೂ ಮುಖ್ಯ ಎಂಬುದನ್ನು ಹಲವು ನಿದರ್ಶನಗಳನ್ನು ನೀಡುತ್ತಾ ಹಾಡಿನಲ್ಲೂ ವ್ಯಕ್ತಪಡಿಸಿರುವುದು ಚಂದನ್ ಜಾಣ್ಮೆಗೆ ಹಿಡಿದ ಕನ್ನಡಿ. ಚಂದನ್ ಇಲ್ಲಿ ನಾಯಕ ಪಾತ್ರವನ್ನೂ ನಿಭಾಯಿಸಿದ್ದು, ಎರಡು ಶೇಡ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಯಾವುದೇ ತರಾತುರಿ ಮಾಡದೇ ಸಿನಿಮಾ ಮಾಡಿರುವ ಚಂದನ್, ನಟನೆ ಮತ್ತು ನಿರ್ದೇಶನದಲ್ಲೂ ಅಷ್ಟೇ ಆರಾಮದಾಯಕವಾಗಿ ಸಿನಿಮಾವನ್ನು ಕೊಂಡೊಯ್ದಿದ್ದಾರೆ.
ಸಿನಿಮಾದುದ್ದಕ್ಕೂ ಅವರ ಪಾತ್ರಕ್ಕೆ ಸಾಥ್ ನೀಡಿರುವುದು ಗಿರಿ. ನಾನಾ ಮಜಲುಗಳಿರುವ ಗಿರಿ ಪಾತ್ರಕ್ಕೆ ಬೇರೆ ಯಾರೂ ಹೊಂದಿಕೆಯಾಗುವುದಿಲ್ಲವೇನೋ ಎಂಬಷ್ಟು ಸಹಜವಾಗಿ ನಟಿಸಿದ್ದಾರೆ.ಕ್ಲೈಮ್ಯಾಕ್ಸ್‌ನಲ್ಲಿ ಮೂಡಿಬರುವ ಟ್ವಿಸ್ಟ್‌ಗಳು ಚಿತ್ರದ ಪ್ರಮುಖ ಅಂಶ. ಸಾಧುಕೋಕಿಲ ಇದ್ದಷ್ಟು ಹೊತ್ತು ನಗಿಸುತ್ತಾರೆ. ನಿಮಿಕಾ ರತ್ನಾಕರ್ ಕೆಲವೊಮ್ಮೆ ಕಣ್ಣು ಕುಕ್ಕುವಷ್ಟು ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದಾರೆ. ಶ್ರುತಿ, ಅವಿನಾಶ್ ಮುಂತಾದವರ ನಟನೆ ಸೊಗಸಾಗಿದೆ. ಜೆಸ್ಸಿ ಗಿಫ್ಟ್ ಹಾಗೂ ನಕುಲ್ ಅಭಯಂಕರ್ ಸಂಗೀತ ಚಿತ್ರದ ಪ್ಲಸ್ ಪಾಯಿಂಟ್‌ಗಳಲ್ಲೊಂದು.
