ಧಾರವಾಡ ಕೃಷಿ ಮೇಳ 2026: ರೈತ ಬಾಂಧವರು ಹಾಗೂ ಕೃಷಿ ಆಸಕ್ತರು ಚಾತಕ ಪಕ್ಷಿಯಂತೆ ಕಾಯುತ್ತಿರುವ ದಿನ ಬಂದೇ ಬಿಟ್ಟಿದೆ. ರಾಜ್ಯದ ಅತಿ ದೊಡ್ಡ ರೈತ ಜಾತ್ರೆ ಎಂದೇ ಪ್ರಖ್ಯಾತಿಯಾಗಿರುವ ‘ಧಾರವಾಡ ಕೃಷಿ ಮೇಳ-2026’ಕ್ಕೆ ಅಧಿಕೃತ ದಿನಾಂಕ ನಿಗದಿಯಾಗಿದೆ.
ಇದೇ ಸೆಪ್ಟೆಂಬರ್ 25 ರಿಂದ 28 ರವರೆಗೆ ಧಾರವಾಡ ಕೃಷಿ ವಿಶ್ವವಿದ್ಯಾಲಯದ ವಿಶಾಲವಾದ ಆವರಣದಲ್ಲಿ, ಸತತ ನಾಲ್ಕು ದಿನಗಳ ಕಾಲ ಈ ಬೃಹತ್ ಕೃಷಿ ಜಾತ್ರೆ ನಡೆಯಲಿದೆ.
ಈ ಬಾರಿಯ ಸ್ಪೆಷಲ್ ಏನು?: ಪ್ರತಿ ವರ್ಷ ಒಂದೊಂದು ವಿಶೇಷ ಧ್ಯೇಯವಾಕ್ಯದೊಂದಿಗೆ ಬರುವ ಕೃಷಿ ಮೇಳ, ಈ ಬಾರಿ “ಸಶಕ್ತ ಮಹಿಳೆ – ಸುಸ್ಥಿರ ಕೃಷಿ” ಎಂಬ ಅರ್ಥಪೂರ್ಣ ಘೋಷವಾಕ್ಯದೊಂದಿಗೆ ಬರುತ್ತಿದೆ. ಕೃಷಿ ವಲಯದಲ್ಲಿ ಮಹಿಳೆಯರು ವಹಿಸುತ್ತಿರುವ ಮಹತ್ವದ ಪಾತ್ರವನ್ನು ಗೌರವಿಸುವ ನಿಟ್ಟಿನಲ್ಲಿ, ಈ ವರ್ಷದ ಇಡೀ ಮೇಳವನ್ನು ಸಂಪೂರ್ಣವಾಗಿ ‘ಮಹಿಳಾ ರೈತರಿಗೆ’ ಅರ್ಪಿಸಲಾಗುತ್ತಿದೆ. ಮಹಿಳಾ ಸ್ವಸಹಾಯ ಸಂಘಗಳ ಸಾಧನೆಗಳ ಪ್ರದರ್ಶನ ಹಾಗೂ ಸಾಧಕ ರೈತ ಮಹಿಳೆಯರ ಜೊತೆ ವಿಶೇಷ ಸಂವಾದ ಕಾರ್ಯಕ್ರಮಗಳು ಈ ಬಾರಿಯ ಕೃಷಿ ಮೇಳದ ಪ್ರಮುಖ ಹೈಲೈಟ್ ಆಗಿವೆ.
ಮೇಳದಲ್ಲಿ ಏನೆಲ್ಲಾ ಪ್ರದರ್ಶನಗಳಿವೆ?
ನಾಲ್ಕು ದಿನಗಳ ಕಾಲ ನಡೆಯುವ ಈ ಮೇಳವು ರೈತರಿಗೆ ಆಧುನಿಕ ತಂತ್ರಜ್ಞಾನಗಳ ಹೊಸ ಲೋಕವನ್ನೇ ಪರಿಚಯಿಸಲಿದೆ. ವಿಶೇಷವಾಗಿ:
ಡ್ರೋನ್ ಕೃಷಿ: ಕೃಷಿಯಲ್ಲಿ ಡ್ರೋನ್ಗಳ ಬಳಕೆ ಹೇಗೆ? ಆಧುನಿಕ ಯಂತ್ರೋಪಕರಣಗಳ ಲೈವ್ ಪ್ರಾತ್ಯಕ್ಷಿಕೆ (Demo) ಇರಲಿದೆ.
ನೈಸರ್ಗಿಕ ಒಲವು: ಸಾವಯವ ಕೃಷಿ ಪದ್ಧತಿಗಳು, ಪೋಷಕಾಂಶ ಹಾಗೂ ಸಮಗ್ರ ಬೆಳೆ ಮತ್ತು ಕೀಟ ನಿರ್ವಹಣೆ.
ನೀರಿನ ಉಳಿತಾಯ: ಮಳೆನೀರು ಕೊಯ್ಲು, ಮತ್ತು ಅಂತರ್ಜಲ ಮರುಪೂರಣದ ಬಗ್ಗೆ ತಜ್ಞರಿಂದ ಮಾಹಿತಿ.
ಪಶುಪಾಲನೆ: ಹೈಟೆಕ್ ಜಾನುವಾರು ಪ್ರದರ್ಶನ, ಮೇವಿನ ಬೆಳೆಗಳು ಮತ್ತು ಪಶು ಸಂಗೋಪನೆ ತಂತ್ರಜ್ಞಾನಗಳ ಪ್ರದರ್ಶನ.
ತೋಟಗಾರಿಕೆ: ಹೈಟೆಕ್ ತೋಟಗಾರಿಕೆ, ವಿಸ್ಮಯಕಾರಿ ಕೀಟ ಪ್ರಪಂಚ ಹಾಗೂ ಆಕರ್ಷಕ ಫಲ-ಪುಷ್ಪಗಳ ಮೇಳ.
ಇಷ್ಟೇ ಅಲ್ಲದೆ, ರೈತರು ತಮಗೆ ಕಾಡುತ್ತಿರುವ ಕೃಷಿ ಸಮಸ್ಯೆಗಳ ಬಗ್ಗೆ ತಜ್ಞರೊಂದಿಗೆ ನೇರವಾಗಿ ಮುಖಾಮುಖಿಯಾಗಿ ಸಮಾಲೋಚನೆ ನಡೆಸಬಹುದು. ಟ್ರ್ಯಾಕ್ಟರ್ ಸೇರಿದಂತೆ ಹೈಟೆಕ್ ಯಂತ್ರೋಪಕರಣಗಳ ಮಳಿಗೆಗಳು, ಬೀಜ ಮೇಳ ಹಾಗೂ ಬಾಯಲ್ಲಿ ನೀರೂರಿಸುವ ಆಹಾರದ ಮಳಿಗೆಗಳು ಇಲ್ಲಿರಲಿವೆ.
ಮಳಿಗೆ ಕಾಯ್ದಿರಿಸಲು ಸಂಪರ್ಕಿಸಿ: ಈ ಬೃಹತ್ ಕೃಷಿ ಮೇಳದಲ್ಲಿ ತಮ್ಮ ಕೃಷಿ ಉತ್ಪನ್ನಗಳು ಅಥವಾ ಯಂತ್ರೋಪಕರಣಗಳ ಮಳಿಗೆ ಹಾಕಲು ಇಚ್ಛಿಸುವವರು 8277478507 ಅಥವಾ 0836-2214497 ಸಂಖ್ಯೆಯನ್ನು ಸಂಪರ್ಕಿಸಬಹುದು. ರೈತರು, ಕೃಷಿ ಮಹಿಳೆಯರು ಹಾಗೂ ಯುವಕರು ತಪ್ಪದೇ ಈ ಮೇಳದಲ್ಲಿ ಪಾಲ್ಗೊಂಡು ಕೃಷಿ ಜ್ಞಾನವನ್ನು ಹೆಚ್ಚಿಸಿಕೊಳ್ಳುವಂತೆ ಧಾರವಾಡ ಕೃಷಿ ವಿವಿ ಪ್ರಕಟಣೆಯಲ್ಲಿ ಮನವಿ ಮಾಡಿದೆ.
