ಜೆಲ್ಲಿ ಮೀನು ಕ್ರಾಂತಿ : ಭಾರತೀಯ ವಿಜ್ಞಾನಿಗಳ ಮಹತ್ವದ ಸಾಧನೆ

CSIR-NIO ಸಂಶೋಧನೆ: ಬೈ-ಕ್ಯಾಚ್ ಆಗಿದ್ದ ಜೆಲ್ಲಿ ಮೀನು ಈಗ ಬಯೋಮೆಡಿಕಲ್ ಸಂಪತ್ತು

ಕರಾವಳಿ ಪ್ರದೇಶಗಳಲ್ಲಿ ಮೀನುಗಾರರಿಗೆ ತೊಂದರೆಯಾಗುತ್ತಿದ್ದ ಜೆಲ್ಲಿ ಮೀನುಗಳನ್ನು ಅಮೂಲ್ಯ ಜೈವಿಕ ಸಂಪನ್ಮೂಲವನ್ನಾಗಿ ಪರಿವರ್ತಿಸುವಲ್ಲಿ ಭಾರತೀಯ ವಿಜ್ಞಾನಿಗಳು ಮಹತ್ವದ ಸಾಧನೆ ಮಾಡಿದ್ದಾರೆ.

CSIR-National Institute of Oceanography (CSIR-NIO) ಸಂಸ್ಥೆಯ ವಿಜ್ಞಾನಿಗಳು ಭಾರತದ ಕರಾವಳಿಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಸಿಗುವ ಜೆಲ್ಲಿ ಮೀನುಗಳಿಂದ ವೈದ್ಯಕೀಯ ಕ್ಷೇತ್ರಕ್ಕೆ ಉಪಯುಕ್ತವಾದ Type-II ಕೊಲೆಜನ್ ಹೊರತೆಗೆಯುವ ಹೊಸ ವಿಧಾನವನ್ನು ಅಭಿವೃದ್ಧಿಪಡಿಸಿದ್ದಾರೆ.

ಈ ಸಂಶೋಧನೆಯು ಕೇವಲ ವೈಜ್ಞಾನಿಕ ಸಾಧನೆ ಮಾತ್ರವಲ್ಲದೆ, ಸಮುದ್ರದ ತ್ಯಾಜ್ಯವನ್ನು ಆರ್ಥಿಕ ಸಂಪತ್ತಾಗಿ ಪರಿವರ್ತಿಸುವ ಪ್ರಯತ್ನ ಎಂದೂ ಪರಿಗಣಿಸಲಾಗಿದೆ.

ಬೈ-ಕ್ಯಾಚ್‌ನಿಂದ ಅಮೂಲ್ಯ ಸಂಪನ್ಮೂಲ: ಸಾಮಾನ್ಯವಾಗಿ ಮೀನುಗಾರರ ಬಲೆಗೆ ಅನಗತ್ಯವಾಗಿ ಬೀಳುವ ಜೆಲ್ಲಿ ಮೀನುಗಳನ್ನು ಬೈ-ಕ್ಯಾಚ್ (by-catch) ಎಂದು ಪರಿಗಣಿಸಲಾಗುತ್ತದೆ. ವಿಶೇಷವಾಗಿ Chrysaora, Rhizostoma pulmo, ತಳಿಗಳ ಜೆಲ್ಲಿ ಮೀನುಗಳು ಭಾರತದ ಕರಾವಳಿಯಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ.

ಈ ಜೆಲ್ಲಿ ಮೀನುಗಳನ್ನು ಸಂಶೋಧನೆಗಾಗಿ ಬಳಸಿಕೊಂಡು ವಿಜ್ಞಾನಿಗಳು ವಾಸನೆ ರಹಿತ ಮತ್ತು ನೀರಿನಲ್ಲಿ ಕರಗುವ Type-II ಕೊಲೆಜನ್ ಹೊರತೆಗೆಯುವ ಕೈಗೆಟುಕುವ ವಿಧಾನವನ್ನು ಅಭಿವೃದ್ಧಿಪಡಿಸಿದ್ದಾರೆ.

ವೈದ್ಯಕೀಯ ಕ್ಷೇತ್ರಕ್ಕೆ ದೊಡ್ಡ ಸಹಾಯ : ಜೆಲ್ಲಿ ಮೀನುಗಳಿಂದ ಪಡೆಯುವ ಈ ಕೊಲೆಜನ್ ಹಲವು ಕ್ಷೇತ್ರಗಳಲ್ಲಿ ಉಪಯುಕ್ತ : ಗಾಯಗಳ ಚಿಕಿತ್ಸೆ: ಗಾಯಗಳನ್ನು ಬೇಗನೆ ಗುಣಪಡಿಸಲು ಮತ್ತು ಅಂಗಾಂಶಗಳ ಪುನರುತ್ಪಾದನೆಗೆ ಸಹಕಾರಿ. ಮೂಳೆ ಮತ್ತು ಕೀಲುಗಳ ಆರೋಗ್ಯ: ಮೂಳೆಗಳ ದುರಸ್ತಿ ಹಾಗೂ ವಯೋವೃದ್ಧರಲ್ಲಿ ಕೀಲು ನೋವು ಕಡಿಮೆ ಮಾಡಲು ನೆರವಾಗುತ್ತದೆ. ಚರ್ಮದ ಆರೈಕೆ: ಆಂಟಿ-ಏಜಿಂಗ್ ಗುಣಗಳಿಂದಾಗಿ ಕಾಸ್ಮೆಟಿಕ್ ಮತ್ತು ಸ್ಕಿನ್ ಕೇರ್ ಉತ್ಪನ್ನಗಳಲ್ಲಿ ಬಳಸಬಹುದು.

ಪ್ರಾಣಿಜನ್ಯ ಕೊಲೆಜನ್‌ಗೆ ಸುರಕ್ಷಿತ ಪರ್ಯಾಯ: ದನ ಅಥವಾ ಹಂದಿಯಿಂದ ತಯಾರಿಸಲಾದ ಕೊಲೆಜನ್‌ಗೆ ಹೋಲಿಸಿದರೆ ಜೆಲ್ಲಿ ಮೀನುಗಳಿಂದ ಪಡೆಯುವ ಕೊಲೆಜನ್ ಮಾನವ ಜೀವಕೋಶಗಳಿಗೆ ಹೆಚ್ಚು ಪೂರಕವಾಗಿದೆ. ಇದಲ್ಲದೆ ವೈರಾಣು ಸೋಂಕಿನ ಅಪಾಯ ಕಡಿಮೆ, ವಾಸನೆ ಇಲ್ಲ, ನೀರಿನಲ್ಲಿ ಸುಲಭವಾಗಿ ಕರಗುವ ಗುಣ, ಇವು ಇದರ ಪ್ರಮುಖ ವಿಶೇಷತೆಗಳಾಗಿವೆ.

ಪೇಟೆಂಟ್ ಪಡೆದ ಸಂಶೋಧನೆ: ಈ ವಿಶಿಷ್ಟ ತಂತ್ರಜ್ಞಾನಕ್ಕೆ ನವೆಂಬರ್ 2024ರಲ್ಲಿ ಪೇಟೆಂಟ್ ದೊರೆತಿದೆ ಎಂದು Council of Scientific and Industrial Research (CSIR) ತಿಳಿಸಿದೆ. ಇದು ಭಾರತದ ಸಮುದ್ರ ಜೈವಿಕ ಸಂಶೋಧನೆಗೆ ಮತ್ತೊಂದು ಮಹತ್ವದ ಸಾಧನೆಯಾಗಿ ಪರಿಗಣಿಸಲಾಗಿದೆ.

ಕೈಗಾರಿಕಾ ಬಳಕೆಗೆ ತಂತ್ರಜ್ಞಾನ ಹಸ್ತಾಂತರ: ಈ ತಂತ್ರಜ್ಞಾನವನ್ನು ವಾಣಿಜ್ಯಿಕವಾಗಿ ಬಳಸಲು ಸಂಶೋಧನಾ ಸಂಸ್ಥೆ ಕೈಗಾರಿಕೆಗಳೊಂದಿಗೆ ಒಪ್ಪಂದಗಳನ್ನು ಮಾಡುತ್ತಿದೆ. ಉದಾಹರಣೆಗೆ, ಮಹಾರಾಷ್ಟ್ರದ ರಾಯಗಡದಲ್ಲಿರುವ The Kelp Agro & Minerals ಸಂಸ್ಥೆಯೊಂದಿಗೆ ಕೊಲೆಜನ್ ಅಭಿವೃದ್ಧಿಗೆ ಸಂಬಂಧಿಸಿದಂತೆ Non-Disclosure Agreement (NDA) ಸಹಿ ಮಾಡಲಾಗಿದೆ.

ಮೀನುಗಾರರಿಗೆ ಆರ್ಥಿಕ ಲಾಭ : ಈ ತಂತ್ರಜ್ಞಾನದಿಂದ ಸಮುದ್ರದ ತ್ಯಾಜ್ಯ ಎಂದು ಪರಿಗಣಿಸಲಾದ ಜೆಲ್ಲಿ ಮೀನುಗಳು ಈಗ ಆರ್ಥಿಕ ಸಂಪತ್ತಾಗಿ ಪರಿವರ್ತನೆ ಆಗುವ ಸಾಧ್ಯತೆ ಇದೆ. ಕರಾವಳಿ ಪ್ರದೇಶದ ಮೀನುಗಾರರಿಗೆ ಹೆಚ್ಚುವರಿ ಆದಾಯದ ಮೂಲ ಸಿಗಬಹುದು.