ರೀಚಾರ್ಜ್ ‘ವಂಚನೆ’: ಟೆಲಿಕಾಂ ಕಂಪನಿಗಳ ವಿರುದ್ಧ ಚಡ್ಡಾ ವಾಗ್ದಾಳಿ

ಮೊಬೈಲ್ ರೀಚಾರ್ಜ್ ವ್ಯವಸ್ಥೆ ಬದಲಿಸಬೇಕು: ಸಂಸತ್ತಿನಲ್ಲಿ ರಾಘವ್ ಚಡ್ಡಾ ಆಗ್ರಹ

ನವ ದೆಹಲಿ: ಪ್ರಿಪೇಯ್ಡ್ ಮೊಬೈಲ್ ರೀಚಾರ್ಜ್ ವ್ಯವಸ್ಥೆ ಗ್ರಾಹಕರ ಮೇಲೆ ಅನ್ಯಾಯದ ಹೊರೆಯನ್ನು ಹಾಕುತ್ತಿದೆ ಎಂದು ಆಮ್ ಆದ್ಮಿ ಪಕ್ಷದ ಸಂಸದ ರಾಘವ್ ಚಡ್ಡಾ ಸಂಸತ್ತಿನಲ್ಲಿ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.

ರಾಜ್ಯಸಭೆಯಲ್ಲಿ ಮಾತನಾಡಿದ ಅವರು, ಟೆಲಿಕಾಂ ಕಂಪನಿಗಳು ಅನುಸರಿಸುತ್ತಿರುವ 28 ದಿನಗಳ ರೀಚಾರ್ಜ್ ಚಕ್ರವನ್ನು ಟೀಕಿಸಿ, ಇದನ್ನು “ಪ್ರಿಪೇಯ್ಡ್ ಗ್ರಾಹಕರ ಮೇಲೆ ನಡೆಯುತ್ತಿರುವ ಲೂಟಿ” ಎಂದು ಹೇಳಿದರು.

ಇನ್‌ಕಮಿಂಗ್ ಕರೆಗಳ (Incoming Calls) ನಿರ್ಬಂಧ ಪ್ರಶ್ನೆ: ರೀಚಾರ್ಜ್ ಅವಧಿ ಮುಗಿದ ಬಳಿಕ ಹೊರಹೋಗುವ ಕರೆಗಳನ್ನು ನಿರ್ಬಂಧಿಸುವುದು ಸಮಂಜಸವಾಗಬಹುದು. ಆದರೆ ಒಳಬರುವ ಕರೆಗಳನ್ನು ಹಾಗೂ ಸಂದೇಶಗಳನ್ನು ನಿರ್ಬಂಧಿಸುವುದು ಅನ್ಯಾಯ ಎಂದು ಅವರು ಪ್ರಶ್ನಿಸಿದರು.

ರೀಚಾರ್ಜ್ ಅವಧಿ ಮುಗಿದ ಕೂಡಲೇ ಬ್ಯಾಂಕಿಂಗ್ OTP, ಯುಪಿಐ ವ್ಯವಹಾರ ಸಂದೇಶಗಳು, ಆಸ್ಪತ್ರೆಗಳ ಮಾಹಿತಿ, ಉದ್ಯೋಗ ಸಂದರ್ಶನ ಕರೆಗಳು ಹಾಗೂ ಕುಟುಂಬದ ತುರ್ತು ಕರೆಗಳು ಕೂಡ ಬಳಕೆದಾರರಿಗೆ ತಲುಪುವುದಿಲ್ಲ. ಇದರಿಂದ ಸಾಮಾನ್ಯ ನಾಗರಿಕರು ಸಂಕಷ್ಟಕ್ಕೆ ಸಿಲುಕುವ ಸಾಧ್ಯತೆ ಇದೆ ಎಂದು ಅವರು ಹೇಳಿದರು.

28 ದಿನ ಯೋಜನೆ ‘ವಂಚನೆ’ : ಒಂದು ವರ್ಷದಲ್ಲಿ 12 ತಿಂಗಳುಗಳಿವೆ. ಆದರೆ 28 ದಿನಗಳ ಯೋಜನೆಯ ಕಾರಣದಿಂದ ಬಳಕೆದಾರರು ವರ್ಷಕ್ಕೆ 13 ಬಾರಿ ರೀಚಾರ್ಜ್ ಮಾಡಬೇಕಾಗುತ್ತದೆ ಎಂದು ಅವರು ಹೇಳಿದರು.

“28 ದಿನ × 13 ಬಾರಿ = 364 ದಿನ. ಇದು ಗ್ರಾಹಕರಿಂದ ಹೆಚ್ಚುವರಿ ಹಣ ಪಡೆಯುವ ವಿಧಾನವಾಗಿದೆ,” ಎಂದು ಅವರು ಆರೋಪಿಸಿದರು.

ಹೊಸ ನಿಯಮಗಳಿಗೆ ಆಗ್ರಹ : ರಾಘವ್ ಚಡ್ಡಾ ಕೆಲವು ಪ್ರಮುಖ ಸಲಹೆಗಳನ್ನು ಕೂಡ ಮುಂದಿಟ್ಟಿದ್ದಾರೆ. ರೀಚಾರ್ಜ್ ಅವಧಿಯನ್ನು 30 ಅಥವಾ 31 ದಿನಗಳ ಕ್ಯಾಲೆಂಡರ್ ತಿಂಗಳುಗಳಿಗೆ ಹೊಂದಿಸಬೇಕು, ಕೊನೆಯ ರೀಚಾರ್ಜ್ ನಂತರ ಕನಿಷ್ಠ ಒಂದು ವರ್ಷ ಇನ್‌ಕಮಿಂಗ್ ಕರೆಗಳು ಮತ್ತು SMS ಸೌಲಭ್ಯ ಇರಬೇಕು, ಮೊಬೈಲ್ ಸಂಖ್ಯೆಯನ್ನು ಕನಿಷ್ಠ ಮೂರು ವರ್ಷಗಳವರೆಗೆ ನಿಷ್ಕ್ರಿಯಗೊಳಿಸಬಾರದು, ಕರೆ ಸ್ವೀಕರಿಸಲು ಮಾತ್ರ ಬಳಸುವವರಿಗೆ ಕಡಿಮೆ ದರದ ‘ಇನ್‌ಕಮಿಂಗ್ ಮಾತ್ರ’ ಯೋಜನೆ ಪರಿಚಯಿಸಬೇಕು

ಮೊಬೈಲ್ ಈಗ ಅಗತ್ಯ ಸೇವೆ : ಮೊಬೈಲ್ ಫೋನ್ ಈಗ ಐಷಾರಾಮಿ ವಸ್ತುವಲ್ಲ. ಸಾಮಾನ್ಯ ನಾಗರಿಕರ ಬದುಕಿನಲ್ಲಿ ಅತ್ಯಗತ್ಯ ಸಾಧನವಾಗಿದೆ ಎಂದು ಚಡ್ಡಾ ಹೇಳಿದರು. ಭಾರತದಲ್ಲಿ ಸುಮಾರು 1.25 ಶತಕೋಟಿ ಪ್ರಿಪೇಯ್ಡ್ ಬಳಕೆದಾರರು ಇದ್ದು, ಇದು ಒಟ್ಟು ಟೆಲಿಕಾಂ ಮಾರುಕಟ್ಟೆಯ ಸುಮಾರು 90% ಭಾಗವಾಗಿದೆ ಎಂದು ಅವರು ಉಲ್ಲೇಖಿಸಿದರು.

ಟೆಲಿಕಾಂ ಕಂಪನಿಗಳ ಪಾತ್ರ: ಭಾರತದಲ್ಲಿ ಪ್ರಮುಖ ಟೆಲಿಕಾಂ ಸೇವಾ ಪೂರೈಕೆದಾರರು ಬಳಕೆದಾರರಿಗೆ ವಿವಿಧ ಡೇಟಾ ಮತ್ತು ಕರೆ ಯೋಜನೆಗಳನ್ನು ನೀಡುತ್ತಿವೆ. ಆದರೆ ಗ್ರಾಹಕರಿಗೆ ನ್ಯಾಯಸಮ್ಮತ ಹಾಗೂ ಪಾರದರ್ಶಕ ವ್ಯವಸ್ಥೆ ರೂಪಿಸಲು ಟೆಲಿಕಾಂ ಕಂಪನಿಗಳು ಕ್ರಮ ಕೈಗೊಳ್ಳಬೇಕು ಎಂದು ರಾಘವ್ ಚಡ್ಡಾ ಆಗ್ರಹಿಸಿದ್ದಾರೆ.