ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆದ CBSE ಪ್ರಶ್ನೆಪತ್ರಿಕೆ QR ಕೋಡ್ ಘಟನೆ
ನವದೆಹಲಿ: Central Board of Secondary Education (ಸಿಬಿಎಸ್ಇ) ನಡೆಸಿದ 12ನೇ ತರಗತಿಯ ಗಣಿತ ಪರೀಕ್ಷೆಯ ಪ್ರಶ್ನೆಪತ್ರಿಕೆಯಲ್ಲಿ ಇರುವ ಕ್ಯೂಆರ್ ಕೋಡ್ ಒಂದು ಯೂಟ್ಯೂಬ್ ವೀಡಿಯೊಗೆ ಲಿಂಕ್ ಆಗಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ವಿದ್ಯಾರ್ಥಿಗಳು ಮತ್ತು ಪೋಷಕರಲ್ಲಿ ಗೊಂದಲಕ್ಕೆ ಕಾರಣವಾಗಿದೆ. ಈ ಕುರಿತಂತೆ ಮಂಡಳಿ ಸ್ಪಷ್ಟನೆ ನೀಡಿದ್ದು, ಪ್ರಶ್ನೆಪತ್ರಿಕೆಗಳು ಸಂಪೂರ್ಣವಾಗಿ ನಿಜವಾದವು ಹಾಗೂ ಪರೀಕ್ಷೆಯ ಭದ್ರತೆಯಲ್ಲಿ ಯಾವುದೇ ಉಲ್ಲಂಘನೆ ನಡೆದಿಲ್ಲ ಎಂದು ತಿಳಿಸಿದೆ.
ಸಿಬಿಎಸ್ಇ 12ನೇ ತರಗತಿಯ ಗಣಿತ ಪರೀಕ್ಷೆ ಮಾರ್ಚ್ 9 ರಂದು ನಡೆದಿತ್ತು. ಪರೀಕ್ಷೆಯ ಬಳಿಕ ಕೆಲವು ಪ್ರಶ್ನೆಪತ್ರಿಕೆಗಳ ಸೆಟ್ಗಳಲ್ಲಿ ನೀಡಲಾಗಿದ್ದ ಕ್ಯೂಆರ್ ಕೋಡ್ಗಳನ್ನು ಸ್ಕ್ಯಾನ್ ಮಾಡಿದಾಗ, ಅದು ನೇರವಾಗಿ ಯೂಟ್ಯೂಬ್ ವೀಡಿಯೊಗೆ ಹೋಗುವುದನ್ನು ಕೆಲವರು ಗಮನಿಸಿ ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡಿದ್ದಾರೆ.
‘ರಿಕ್ರೋಲ್’ ತಮಾಷೆಗೆ ಕಾರಣವಾದ ಕ್ಯೂಆರ್ ಕೋಡ್: ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿದಾಗ ಅದು Never Gonna Give You Up ಎಂಬ ಪ್ರಸಿದ್ಧ ಹಾಡಿನ ವೀಡಿಯೊಗೆ ಹೋಗುತ್ತಿರುವುದು ಕಂಡುಬಂದಿದೆ. ಈ ಹಾಡು 1987ರಲ್ಲಿ ಬ್ರಿಟಿಷ್ ಗಾಯಕ Rick Astley ಬಿಡುಗಡೆ ಮಾಡಿದ ಜನಪ್ರಿಯ ಗೀತೆಯಾಗಿದ್ದು, ಇಂಟರ್ನೆಟ್ನಲ್ಲಿ “ರಿಕ್ರೋಲ್” ಎಂಬ ತಮಾಷೆಯಾಗಿ ಪರಿಚಿತವಾಗಿದೆ.
ಈ ಸಂಗತಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ನಂತರ, ಪ್ರಶ್ನೆಪತ್ರಿಕೆಗಳ ಸುರಕ್ಷತೆ ಬಗ್ಗೆ ವಿದ್ಯಾರ್ಥಿಗಳು ಮತ್ತು ಪೋಷಕರಲ್ಲಿ ಪ್ರಶ್ನೆಗಳು ಮೂಡಿದವು.
CBSE ಮಂಡಳಿಯ ಸ್ಪಷ್ಟನೆ: ಈ ಕುರಿತು ಸಿಬಿಎಸ್ಇ ಪ್ರಕಟಣೆ ಹೊರಡಿಸಿ, “ಪ್ರಶ್ನೆಪತ್ರಿಕೆಗಳು ನಿಜವಾದವು ಎಂಬುದನ್ನು ಮಂಡಳಿ ದೃಢಪಡಿಸಿದೆ. ಪ್ರಶ್ನೆಪತ್ರಿಕೆಗಳ ಭದ್ರತೆಯಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳಲಾಗಿಲ್ಲ. ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಲಾಗಿದ್ದು, ಭವಿಷ್ಯದಲ್ಲಿ ಇಂತಹ ಸಮಸ್ಯೆಗಳು ಮರುಕಳಿಸದಂತೆ ಕ್ರಮ ಕೈಗೊಳ್ಳಲಾಗುತ್ತದೆ,” ಎಂದು ತಿಳಿಸಿದೆ.
ಸಾಮಾನ್ಯವಾಗಿ ಪ್ರಶ್ನೆಪತ್ರಿಕೆಯಲ್ಲಿ ನೀಡಲಾಗುವ ಕ್ಯೂಆರ್ ಕೋಡ್ ಅನ್ನು ಪತ್ರಿಕೆಯ ನೈಜತೆಯನ್ನು ಪರಿಶೀಲಿಸಲು ಮತ್ತು ಭದ್ರತೆ ಹೆಚ್ಚಿಸಲು ಬಳಸಲಾಗುತ್ತದೆ. ಯಾವುದೇ ಅನುಮಾನಾಸ್ಪದ ಸಂದರ್ಭಗಳಲ್ಲಿ ಅದನ್ನು ಸ್ಕ್ಯಾನ್ ಮಾಡಿ ಪ್ರಶ್ನೆಪತ್ರಿಕೆ ನಕಲಿ ಅಥವಾ ಸೋರಿಕೆಯಾದುದೇ ಎಂದು ಪರಿಶೀಲಿಸುವ ವ್ಯವಸ್ಥೆ ಇದಾಗಿದೆ.
ಮಂಡಳಿಯಿಂದ ಮುಂದಿನ ಕ್ರಮ: ಕ್ಯೂಆರ್ ಕೋಡ್ ವಿವಾದದ ಹಿನ್ನೆಲೆಯಲ್ಲಿ ಸಿಬಿಎಸ್ಇ ತಾಂತ್ರಿಕ ಪರಿಶೀಲನೆ ನಡೆಸುತ್ತಿದೆ. ಮುಂದಿನ ಪರೀಕ್ಷೆಗಳಲ್ಲಿ ಪ್ರಶ್ನೆಪತ್ರಿಕೆಗಳ ಡಿಜಿಟಲ್ ಸುರಕ್ಷತೆಯನ್ನು ಇನ್ನಷ್ಟು ಬಲಪಡಿಸುವ ಕ್ರಮಗಳನ್ನು ಕೈಗೊಳ್ಳಲಾಗುತ್ತದೆ ಎಂದು ಮಂಡಳಿ ತಿಳಿಸಿದೆ.
