ಚಿತ್ರ: ಜಿ.ಎಸ್.ಟಿ
ನಿರ್ದೇಶನ: ಸೃಜನ್ ಲೋಕೇಶ್
ನಿರ್ಮಾಣ: ಸಂದೇಶ್
ತಾರಾಗಣ: ಸೃಜನ್ ಲೋಕೇಶ್, ಗಿರಿಜಾ ಲೋಕೇಶ್, ರಜನಿ, ಗಿರಿ, ತಬಲ ನಾಣಿ, ಸುಕೃತ್, ನಿವೇದಿತಾ, ಶೋಭರಾಜ್, ವಿನೋದ್ ಇತರರು.
ರೇಟಿಂಗ್ಸ್: 3.5
ಗಣೇಶ್ ರಾಣೆಬೆನ್ನೂರು
ಆತ ದುರಾಷ್ಟವಂತ. ಅದು ಎಷ್ಟರಮಟ್ಟಿಗೆ ಎಂದರೆ ಸಾವನ್ನು ಅರಸಿ ಹೋದರೂ, ಸಾವು ಕೂಡ ಆತನ ಬಳಿ ಸುಳಿಯುವುದಿಲ್ಲ..! ಇಂಥ ಅನ್‌ಲಕ್ಕಿ ಫೆಲೋಗೆ ಒಂದಷ್ಟು `ಆತ್ಮಗಳು’ ಜತೆಯಾಗುತ್ತವೆ… ಅಲ್ಲಿವರೆಗೂ ಸಜಾದಲ್ಲಿದ್ದಂತವನಿಗೆ ಮಜಾ ಸಿಗಲು ಶುರುವಾಗುತ್ತದೆ. ಆತನಿಗೆ ಸಾಥ್ ಕೊಡುವ ದೆವ್ವಗಳು ಎಷ್ಟು ಕರುಣಾಮಯಿಗಳು, ಸ್ನೇಹಮಯಿ-ದಯಾಮಯಿಗಳೆಂಬುದು ಕತೆಗೆ ಹೊಂದಿಕೊಂಡಿದೆ.
ಇದೊಂಥರ ಕಾಮಿಡಿ ಸಿನಿಮಾ ಅಥವಾ ಹಾರರ್ ಸಿನಿಮಾ ಎನ್ನಬಹುದು. ಎರಡನ್ನೂ ಸರಿಯಾಗಿ ಬ್ಲೆಂಡ್ ಮಾಡಿದರೆ ಜಿಎಸ್‌ಟಿ ಆಗುತ್ತದೆ ಎಂಬುದನ್ನು ನಟ-ನಿರ್ದೇಶಕ ಸೃಜನ್ ಲೋಕೇಶ್ ಇಡೀ ಸಿನಿಮಾದಲ್ಲಿ ಕಟ್ಟಿಕೊಟ್ಟಿದ್ದಾರೆ. ಮನರಂಜನೆಯನ್ನೇ ಪ್ರಧಾನವಾಗಿಸಿರುವ ಸೃಜನ್, ಲಾಜಿಕ್ ಬಿಟ್ಟು ಮ್ಯಾಜಿಕ್ ದೃಷ್ಟಿಕೋನದಲ್ಲಿ ಸಿನಿಮಾ ನೋಡಬೇಕು ಎಂಬುದನ್ನು ಆರಂಭದಲ್ಲೇ ಮನವರಿಕೆ ಮಾಡಿಬಿಡುತ್ತಾರೆ.
ಹೀಗಾಗಿ ದೆವ್ವಗಳನ್ನು ಸೀರಿಯಸ್ ಆಗಿ ತೆಗೆದುಕೊಳ್ಳುವಂತಿಲ್ಲ..! ಇಲ್ಲಿ ಪ್ರೀತಿಯಿದೆ, ಸೆಂಟಿಮೆಂಟ್, ಹಾರರ್, ಕಾಮಿಡಿ… ಹೀಗೆ ಎಲ್ಲದಕ್ಕೂ ಜಾಗ ಮಾಡಿಕೊಟ್ಟಿದ್ದಾರೆ. ಹಾಗೆಯೇ ನಿರ್ದೇಶನದ ಜತೆಗೆ ಪ್ರಮುಖ ಭೂಮಿಕೆಯಲ್ಲೂ ಕಾಣಿಸಿಕೊಂಡಿರುವ ಸೃಜನ್, ತನಗಿಂತ ಬೇರೆ ಕಲಾವಿದರಿಗೆ ಹೆಚ್ಚು ಅವಕಾಶ ಕಲ್ಪಿಸಿರುವುದು ಹೆಚ್ಚುಗಾರಿಕೆ.
ಮೊದಲಾರ್ಧದಲ್ಲಿ ಇಡೀ ಸಿನಿಮಾದ ಸಾರಾಂಶ ಒಪ್ಪಿಸಿ, ಸೆಕೆಂಡ್ ಹಾಫ್‌ನಲ್ಲಿ ಬೂಸ್ಟರ್ ಡೋಸ್‌ನಂತೆ ಕೆಲಸ ಮಾಡಿರುವುದು ಬ್ಯಾಂಕ್ ಎಪಿಸೋಡ್. ಭರಪೂರ ನಗುವಿನ ಅಲೆ ಅಲ್ಲಿ ತುಸು ಹೆಚ್ಚಾಗಿಯೇ ಇದೆ. ದೆವ್ವಗಳೆಲ್ಲವೂ ಒಂದಾಗಿ ಸೇರಿದಾಗ ಏನಾಗುತ್ತದೆ ಎಂಬುದಕ್ಕೆ ಇಲ್ಲಿ ಮಜವಾದ ಉತ್ತರವಿದೆ.
ನಟನೆಯಂತೆಯೇ ನಿರ್ದೇಶನದಲ್ಲೂ ತಾನು ಲೀಲಾಜಾಲ ಎಂಬುದನ್ನು `ಜಿಎಸ್‌ಟಿ’ ಮೂಲಕ ಸಾಬೀತುಪಡಿಸಿದ್ದಾರೆ ಸೃಜನ್. ಗಿರಿಜಾ ಲೋಕೇಶ್, ರಜನಿ, ಗಿರಿ, ತಬಲ ನಾಣಿ, ಸುಕೃತ್, ನಿವೇದಿತಾ, ಶೋಭರಾಜ್, ವಿನೋದ್ ಮುಂತಾದವರು ಪಾತ್ರಕ್ಕೆ ಅನುಗುಣವಾಗಿ ಅಭಿನಯಿಸಿದ್ದಾರೆ. ಚಂದನ್ ಶೆಟ್ಟಿ ಸಂಗೀತ ಈ ಚಿತ್ರಕ್ಕೆ ಪೂರಕವಾಗಿದೆ.
