ಸೀರೆ, ಬರಿಗಾಲು, ಒಂದೇ ಗುರಿ; ಹೆಣ್ಣುಮಕ್ಕಳ ಶಿಕ್ಷಣಕ್ಕಾಗಿ ಓಡಿ ₹3,000 ಗೆದ್ದ ತಾಯಿ
ಹೆಣ್ಣುಮಕ್ಕಳ ಶಿಕ್ಷಣಕ್ಕಾಗಿ ಹಣ ಸಂಗ್ರಹಿಸುವ ಉದ್ದೇಶದಿಂದ 47 ವರ್ಷದ ತಾಯಿ ರಮಾಬಾಯಿ ರಣವೀರ್ ಅವರು ಯಾವುದೇ ವಿಶೇಷ ತರಬೇತಿ, ಕ್ರೀಡಾ ಶೂ ಅಥವಾ ಸಿದ್ಧತೆ ಇಲ್ಲದೆ 3 ಕಿಲೋಮೀಟರ್ ಮ್ಯಾರಥಾನ್ನಲ್ಲಿ ಭಾಗವಹಿಸಿ ಗೆಲುವು ಸಾಧಿಸಿರುವ ಘಟನೆ ಗಮನ ಸೆಳೆದಿದೆ. ಮಹಾರಾಷ್ಟ್ರದ ಬೀಡ್ ಜಿಲ್ಲೆಯ ಅಂಬಾಜೋಗಾಯಿಯಲ್ಲಿ ನಡೆದ ಸ್ಥಳೀಯ ಓಟದಲ್ಲಿ ಯುವ ಸ್ಪರ್ಧಿಗಳನ್ನು ಹಿಂದಿಕ್ಕಿ ಅವರು ಮೊದಲ ಸ್ಥಾನ ಪಡೆದಿದ್ದಾರೆ.
ಮಕ್ಕಳ ಶಿಕ್ಷಣದ ಖರ್ಚಿಗಾಗಿ ಸೀರೆಯುಟ್ಟು, ಬರಿಗಾಲಿನಲ್ಲಿ ಓಡಿ ಮ್ಯಾರಥಾನ್ ಗೆದ್ದ ಮಹಾರಾಷ್ಟ್ರದ 47 ವರ್ಷದ ತಾಯಿ ರಮಾಬಾಯಿ ರಣವೀರ್ ಅವರ ಹೃದಯಸ್ಪರ್ಶಿ ಓಟದ ವಿಡಿಯೋ ಹಾಗೂ ಅವರ ಕಥೆ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ದೇಶಾದ್ಯಂತ ಲಕ್ಷಾಂತರ ಜನರಿಗೆ ಪ್ರೇರಣೆಯಾಗಿದೆ
ರಮಾಬಾಯಿ ಅವರು ವೃತ್ತಿಯಲ್ಲಿ ಅಡುಗೆ ಕೆಲಸ ಮಾಡುತ್ತಿದ್ದು, ಸಾಮಾನ್ಯವಾಗಿ ಧರಿಸುವ ಸೀರೆಯಲ್ಲೇ ಓಟಕ್ಕೆ ಇಳಿದಿದ್ದರು. ಆರಂಭದಲ್ಲಿ ಧರಿಸಿದ್ದ ಚಪ್ಪಲಿ ಕೆಸರು ಮತ್ತು ಅಸಮತಟ್ಟಾದ ರಸ್ತೆಯಲ್ಲಿ ಜಾರುತ್ತಿದ್ದ ಹಿನ್ನೆಲೆಯಲ್ಲಿ ಅವುಗಳನ್ನು ತೆಗೆದು ಬರಿಗಾಲಿನಲ್ಲಿ ಓಟ ಮುಂದುವರಿಸಿದರು. ಕೊನೆಗೆ ಕಿರಿಯ ಹಾಗೂ ತರಬೇತಿ ಪಡೆದ ಸ್ಪರ್ಧಿಗಳನ್ನು ಹಿಂದಿಕ್ಕಿ ಮೊದಲಿಗರಾಗಿ ಗುರಿ ತಲುಪಿದರು.
ಈ ಗೆಲುವಿಗೆ ಅವರಿಗೆ ₹3,000 ನಗದು ಬಹುಮಾನ ಹಾಗೂ ಟ್ರೋಫಿ ದೊರೆತಿದೆ. ಬಹುಮಾನದ ಹಣವನ್ನು ತಮ್ಮ ಹೆಣ್ಣುಮಕ್ಕಳ ಪುಸ್ತಕಗಳು ಮತ್ತು ಶಿಕ್ಷಣದ ಖರ್ಚಿಗೆ ಬಳಸುವುದಾಗಿ ರಮಾಬಾಯಿ ತಿಳಿಸಿದ್ದಾರೆ. ರಮಾಬಾಯಿ ಅವರ ಪತಿ ಮುಂಬೈನಲ್ಲಿ ಸಂಭವಿಸಿದ ಅಪಘಾತದಲ್ಲಿ ಮೃತಪಟ್ಟ ಬಳಿಕ ಅವರು ತಮ್ಮ ಇಬ್ಬರು ಹೆಣ್ಣುಮಕ್ಕಳನ್ನು ಏಕಾಂಗಿಯಾಗಿ ಬೆಳೆಸುತ್ತಿದ್ದಾರೆ. ಕುಟುಂಬದ ಜವಾಬ್ದಾರಿಯೊಂದಿಗೆ ಅಡುಗೆ ಕೆಲಸ ಮಾಡುತ್ತಲೇ ಮಕ್ಕಳ ಶಿಕ್ಷಣಕ್ಕೆ ಬೆಂಬಲ ನೀಡುತ್ತಿದ್ದಾರೆ.
ಈ ಓಟದಲ್ಲಿ ರಮಾಬಾಯಿ ಅವರ ಮಗಳು ಪೂಜಾ ಕೂಡ ಭಾಗವಹಿಸಿ ಎರಡನೇ ಸ್ಥಾನ ಪಡೆದಿದ್ದಾರೆ. ತಾಯಿಯ ಓಟ ಕೇವಲ ಸ್ಪರ್ಧೆಯಲ್ಲಿ ಗೆಲ್ಲುವುದಕ್ಕಲ್ಲ, ಮಕ್ಕಳ ಭವಿಷ್ಯಕ್ಕಾಗಿ ಎಂಬುದು ಈ ಕಥೆಯ ವಿಶೇಷತೆಯಾಗಿದೆ.
ತರಬೇತಿ, ದುಬಾರಿ ಕ್ರೀಡಾ ಉಡುಪು ಅಥವಾ ಶೂಗಳಿಲ್ಲದಿದ್ದರೂ ದೃಢಸಂಕಲ್ಪ ಮತ್ತು ಮಕ್ಕಳ ಮೇಲಿನ ಪ್ರೀತಿಯಿಂದ ಸಾಧನೆ ಮಾಡಿದ ರಮಾಬಾಯಿ ಅವರ ಕಥೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಮೆಚ್ಚುಗೆಗೆ ಪಾತ್ರವಾಗಿದೆ.
ಪ್ರತಿ ಹೊಸ ಅಪ್ಡೇಟ್ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್ಡೇಟ್ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.
