ವಯಸ್ಸಾಗುತ್ತಿದ್ದಂತೆ ಮಾತ್ರವಲ್ಲ, ಇತ್ತೀಚಿನ ದಿನಗಳಲ್ಲಿ ಯುವ ಪೀಳಿಗೆಯಲ್ಲೂ ಕೀಲು ನೋವಿನ (Joint Pain) ಸಮಸ್ಯೆ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದೆ. ಬದಲಾದ ಜೀವನಶೈಲಿ, ತಪ್ಪು ಆಹಾರ ಪದ್ಧತಿ ಮತ್ತು ದೈಹಿಕ ಶ್ರಮದ ಕೊರತೆಯಿಂದಾಗಿ ಈ ಸಮಸ್ಯೆ ಸಮಾಜದಲ್ಲಿ ಸಾಮಾನ್ಯವಾಗುತ್ತಿದೆ. ಕೀಲು ನೋವಿಗೆ ಪ್ರಮುಖ ಕಾರಣಗಳು, ಅದಕ್ಕಿರುವ ಪರಿಹಾರ ಹಾಗೂ ವಹಿಸಬೇಕಾದ ಮುನ್ನೇಚ್ಚರಿಕೆ ಕ್ರಮಗಳು ಯಾವವು? ಇಲ್ಲಿದೆ ಮಾಹಿತಿ.
ಕೀಲು ನೋವಿಗೆ ಮುಖ್ಯ ಕಾರಣಗಳು: ದೇಹದಲ್ಲಿ ಯೂರಿಕ್ ಆಸಿಡ್ ಪ್ರಮಾಣ ಹೆಚ್ಚಾಗುವುದು, ಕೀಲುಗಳ ನಡುವಿನ ಕಾರ್ಟಿಲೇಜ್ ಸವೆಯುವುದು ಮತ್ತು ಕ್ಯಾಲ್ಸಿಯಂ ಅಥವಾ ವಿಟಮಿನ್ ʻಡಿʼ ಕೊರತೆಯಿಂದಾಗಿ ಕೀಲು ನೋವು ಕಾಣಿಸಿಕೊಳ್ಳುತ್ತದೆ. ಇದರೊಂದಿಗೆ ಆರ್ಥರೈಟಿಸ್ (ಸಂಧಿವಾತ), ಬೊಜ್ಜು ಅಥವಾ ದೇಹದ ಅತಿಯಾದ ತೂಕ ಕೀಲುಗಳ ಮೇಲೆ ಒತ್ತಡ ಹೇರುವುದರಿಂದ ನೋವು ಉಲ್ಬಣಗೊಳ್ಳುತ್ತದೆ. ದೈಹಿಕ ಚಟುವಟಿಕೆ ಇಲ್ಲದೆ ಒಂದೇ ಕಡೆ ದೀರ್ಘಕಾಲ ಕುಳಿತು ಕೆಲಸ ಮಾಡುವುದು ಕೂಡ ಇದಕ್ಕೆ ಪ್ರಮುಖ ಕಾರಣವಾಗಿದೆ.
ಪರಿಹಾರ ಮತ್ತು ಚಿಕಿತ್ಸೆ: ಆರಂಭಿಕ ಹಂತದ ಕೀಲು ನೋವಿಗೆ ನಿಯಮಿತ ವ್ಯಾಯಾಮ, ಯೋಗ ಮತ್ತು ಫಿಸಿಯೋಥೆರಪಿ ಉತ್ತಮ ಪರಿಹಾರ ನೀಡುತ್ತವೆ. ಆಹಾರದಲ್ಲಿ ಕ್ಯಾಲ್ಸಿಯಂ ಮತ್ತು ಒಮೆಗಾ-3 ಕೊಬ್ಬಿನಾಮ್ಲ ಸಮೃದ್ಧವಾಗಿರುವ ಹಾಲು, ಮೊಸರು, ಸೊಪ್ಪು ಹಾಗೂ ಒಣ ಹಣ್ಣುಗಳನ್ನು ಬಳಸಬೇಕು. ನೋವು ಹೆಚ್ಚಿದ್ದಾಗ ವೈದ್ಯರ ಸಲಹೆಯ ಮೇರೆಗೆ ಸೂಕ್ತ ಔಷಧಿ ಅಥವಾ ತೈಲ ಮರ್ದನ ಮಾಡಿಕೊಳ್ಳಬಹುದು. ತೂಕವನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳುವುದು ಕೀಲುಗಳ ಆರೋಗ್ಯಕ್ಕೆ ಅತ್ಯಂತ ಅಗತ್ಯ.
ತೆಗೆದುಕೊಳ್ಳಬೇಕಾದ ಮುನ್ನೇಚ್ಚರಿಕೆ: ಕೀಲು ನೋವು ಇರುವವರು ಅತಿಯಾಗಿ ಭಾರ ಎತ್ತುವುದನ್ನು ಮತ್ತು ಕಠಿಣವಾದ ಮೆಟ್ಟಿಲು ಹತ್ತುವುದನ್ನು ನಿಲ್ಲಿಸಬೇಕು. ದೀರ್ಘಕಾಲ ಒಂದೇ ಸಮನೆ ಕುಳಿತುಕೊಳ್ಳದೆ, ಮಧ್ಯೆ ಮಧ್ಯೆ ಸಣ್ಣದಾಗಿ ನಡೆದಾಡಬೇಕು. ಧೂಮಪಾನ ಹಾಗೂ ಮದ್ಯಪಾನದಂತಹ ಕೆಟ್ಟ ಅಭ್ಯಾಸಗಳಿಂದ ದೂರವಿರಬೇಕು.
ಓದುಗರ ಗಮನಕ್ಕೆ: ನೋವು ನಿವಾರಕ ಮಾತ್ರೆಗಳನ್ನು ಸ್ವಯಂ ವೈದ್ಯ ಪದ್ಧತಿಯಂತೆ ಅತಿಯಾಗಿ ಬಳಸಬಾರದು, ಇದು ಕಿಡ್ನಿಗಳ ಮೇಲೆ ಪರಿಣಾಮ ಬೀರಬಹುದು. ನೋವು ತೀವ್ರವಾಗಿದ್ದರೆ ತಕ್ಷಣವೇ ಮೂಳೆ ರೋಗ ತಜ್ಞರನ್ನು (Orthopedic) ಭೇಟಿಯಾಗಿ ಸೂಕ್ತ ತಪಾಸಣೆ ಮಾಡಿಸಿಕೊಳ್ಳುವುದು ಉತ್ತಮ.
