ಹುಬ್ಬಳ್ಳಿಯ ರಾಜನಗರ ಮೈದಾನದಲ್ಲಿ ಮಾಜಿ ಸ್ಪಿನ್ನರ್ಗೆ ಅಪರೂಪದ ಗೌರವ
ಹುಬ್ಬಳ್ಳಿ: ರಾಜನಗರದಲ್ಲಿರುವ Karnataka State Cricket Association (ಕೆಎಸ್ಸಿಎ) ಕ್ರೀಡಾಂಗಣದ ಪೆವಿಲಿಯನ್ನ ಒಂದು ಬ್ಲಾಕ್ಗೆ ಕರ್ನಾಟಕದ ಮಾಜಿ ಆಟಗಾರ ಸುನಿಲ್ ಜೋಶಿ ಅವರ ಹೆಸರು ನಾಮಕರಣ ಮಾಡಲಾಗಿದೆ. ಈ ನಾಮಕರಣ ಕಾರ್ಯಕ್ರಮ ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಯಿತು.
ಪೆವಿಲಿಯನ್ ಬ್ಲಾಕ್ ಉದ್ಘಾಟನೆಯನ್ನು ಬಿಸಿಸಿಐ ದೇಶೀಯ ವಿಭಾಗದ ಮುಖ್ಯಸ್ಥ ಮಿಥುನ್ ಮನ್ಹಾಸ್ ನೆರವೇರಿಸಿದರು. ಈ ಗೌರವ ಕ್ಷಣವನ್ನು ಕಂಡ ಸುನಿಲ್ ಜೋಶಿ ಭಾವುಕರಾಗಿ ಕೆಲಕಾಲ ಮಾತು ಬರದೆ ನಿಂತರು. ನಂತರ ಮಾತನಾಡಿದ ಅವರು, “ನನಗೆ ಇಷ್ಟು ದೊಡ್ಡ ಕೀರ್ತಿ ಸಿಗುತ್ತದೆ ಎಂದುಕೊಂಡಿರಲಿಲ್ಲ. ಇದು ನನ್ನ ಜೀವನದ ಹೆಮ್ಮೆಯ ದಿನ. ರಾಷ್ಟ್ರಕವಿ ಕುವೆಂಪು ಹೇಳಿದಂತೆ, ‘ನಿನ್ನ ಇಂದಿನ ದಿನ ಯಾರಿಗಾದರೂ ಪ್ರೇರಣೆ ಆಗುತ್ತದೆ’ ಎಂಬ ಮಾತು ಇಂದು ನನ್ನ ಜೀವನದಲ್ಲಿ ನಿಜವಾಗಿದೆ,” ಎಂದರು.
ಇದನ್ನೂ ಓದಿ: ಮಂತ್ರಾಲಯದಲ್ಲಿ ರಾಘವೇಂದ್ರ ರಾಜ್ಕುಮಾರ್ಗೆ ಗೌರವ ಡಾಕ್ಟರೇಟ್
ಗದಗದಲ್ಲಿ ಜನ್ಮ ಪಡೆದಿದ್ದರೂ ಹುಬ್ಬಳ್ಳಿ ತನ್ನ ಕ್ರಿಕೆಟ್ ಭವಿಷ್ಯ ಕಟ್ಟಿಕೊಟ್ಟ ತಾಯ್ನಾಡು ಎಂದು ಅವರು ಸ್ಮರಿಸಿದರು. “ಭಾರತದ ಪರ ಆಡುತ್ತೇನೆ ಎಂದುಕೊಂಡಿರಲಿಲ್ಲ. ಆದರೆ ಈ ಮಟ್ಟಿಗೆ ಬೆಳೆಯಲು ನನ್ನ ಪರಿಶ್ರಮ ಹಾಗೂ ಗುರುಗಳ ಮಾರ್ಗದರ್ಶನ ಕಾರಣ,” ಎಂದು ಹೇಳಿದರು.
ತಮ್ಮ ಕೋಚ್ ದಯಾನಂದ ಶೆಟ್ಟಿ, ಎ.ಕೆ. ಕ್ರಿಕೆಟ್ ಅಕಾಡೆಮಿ, ಪಾಲಕರು, ಸಹೋದರ ಅಶೋಕ, ಆಯ್ಕೆ ಸಮಿತಿ ಹಾಗೂ ಪತ್ನಿಗೆ ಧನ್ಯವಾದ ಅರ್ಪಿಸಿದರು. “ನನ್ನ ಮಗ ಆರ್ಯನ್ ಜೊತೆ ಹೆಚ್ಚು ಸಮಯ ಕಳೆಯಲು ಆಗಲಿಲ್ಲ. ಆದರೆ ಕುಟುಂಬದ ಬೆಂಬಲವೇ ನನ್ನ ಶಕ್ತಿ,” ಎಂದು ಭಾವುಕರಾದರು.
ಇದನ್ನೂ ಓದಿ: ಧಾರವಾಡದಲ್ಲಿ ಉಗ್ರಗೊಂಡ ಉದ್ಯೋಗಾಕಾಂಕ್ಷಿಗಳ ಹೋರಾಟ: ಸಚಿವರ ಭಾವಚಿತ್ರಗಳಿಗೆ ಚಪ್ಪಲಿ ಸೇವೆ
ಈ ಕಾರ್ಯಕ್ರಮದಲ್ಲಿ ಕೆಎಸ್ಸಿಎ ಅಧ್ಯಕ್ಷ ವೆಂಕಟೇಶ ಪ್ರಸಾದ, ಕಾರ್ಯದರ್ಶಿ ಸಂತೋಷ ಮೆನನ್, ಜಂಟಿ ಕಾರ್ಯದರ್ಶಿ ಬಿ.ಕೆ. ರವಿ, ಖಜಾಂಚಿ ಮಧುಕರ, ಉಪಾಧ್ಯಕ್ಷ ಸುಜೀತ್ ಸೋಮಸುಂದರ್ ಸೇರಿದಂತೆ ಹಲವರು ಭಾಗವಹಿಸಿದ್ದರು.
ಕಾರ್ಯಕ್ರಮದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಕ್ರಿಕೆಟ್ ಅಭಿಮಾನಿಗಳು ಹಾಗೂ ಮಾಜಿ ಆಟಗಾರರು ಸುನಿಲ್ ಜೋಶಿಗೆ ಅಭಿನಂದನೆಗಳ ಸುರಿಮಳೆಗೈಯುತ್ತಿದ್ದಾರೆ. ಕೆಎಸ್ಸಿಎ ಈ ಗೌರವವನ್ನು ಯುವ ಕ್ರಿಕೆಟಿಗರಿಗೆ ಪ್ರೇರಣೆಯಾಗಲಿದೆ ಎಂದು ತಿಳಿಸಿದೆ.
