ಸಿಹಿಗಾಗಿ ಸಕ್ಕರೆ ಬಳಸದೆ ಖರ್ಜೂರ, ನೈಸರ್ಗಿಕ ಬೆಲ್ಲ ಬಳಸಿ ಚಾಕೋಲೆಟ್ ತಯಾರಿಕೆ | ಕಷಾಯ ಮಾದರಿ ಚಾಕೋಲೆಟ್ ಹೆಚ್ಚು ಫೇಮಸ್
ಇತ್ತೀಚೆಗೆ ನೀವು ಯಾವುದೇ ಸೂಪರ್ ಮಾರ್ಕೆಟ್, ಝೊಮ್ಯಾಟೊ, ಝೆಪ್ಟೊ ಸೇರಿದಂತೆ ಎಲ್ಲ ಇ-ಗ್ರಾಸರಿ ಸೈಟ್‌ಗಳಲ್ಲಿಯೂ ಆರ್ಗ್ಯಾನಿಕ್ ಪ್ರಾಡಕ್ಟ್ ಎಂಬ ಲೇಬಲ್ ಅಂಟಿಕೊಂಡಿರುವ ಉತ್ಪನ್ನಗಳು ಕಾಣಸಿಗುತ್ತವೆ. ಸಾವಯವ ಕೃಷಿ ಪದ್ಧತಿ ಅಡಿಯಲ್ಲಿ ಬೆಳೆಯಲಾದ ಪದಾರ್ಥಗಳೆಂದು ಅತ್ಯಂತ ದುಬಾರಿ ಬೆಲೆಗೂ ಮಾರಾಟ ಮಾಡಲಾಗುತ್ತದೆ. ಪ್ರತಿ ಉತ್ಪನ್ನಗಳ ಮೇಲೆ ಆರ್ಗ್ಯಾನಿಕ್ ಎಂದು ಬರೆದಿರುತ್ತದೆಯಾದರೂ ಎಷ್ಟರಮಟ್ಟಿಗೆ ಸತ್ಯ ಎಂಬ ಸಹಜ ಅನುಮಾನ ನಮಗೆಲ್ಲರಿಗೂ ಬಂದಿರುತ್ತದೆ.
ಇಂಥದ್ದೇ ಅನುಮಾನ ಪುತ್ತೂರಿನ ಸುಬ್ರಹ್ಮಣ್ಯ ಮತ್ತು ಸ್ವಾತಿ ದಂಪತಿಗೆ ಬಂದಿತ್ತು. ಆಗವರು ಎಲ್ಲ ಪ್ರಾಡಕ್ಟ್‌ಗಳ ಮೇಲೆ ಸುಮ್ಮನೆ ಆರ್ಗ್ಯಾನಿಕ್ ಎಂದು ಬರೆದುರಿರುತ್ತಾರೆ ಹೊರತು ಯಾರೂ ನಿಜವಾಗಿಯೂ ಸಾವಯುವ ಕೃಷಿ ಪದ್ಧತಿಯಿಂದ ಉತ್ಪನ್ನಗಳ ತಯಾರಿಸಿರುವುದಿಲ್ಲ ಎಂದು ತಾವೇ ಮಾತನಾಡಿಕೊಂಡಿದ್ದರು. ಆಗಲೇ ನಾವೇಕೆ ನೈಸರ್ಗಿಕ ಪದಾರ್ಥಗಳ ಬಳಸಿ ಉತ್ಪನ್ನ ತಯಾರಿಸಿ ಜನರಿಗೆ ಕಡಿಮೆ ಬೆಲೆಗೆ ಮಾರಾಟ ಮಾಡಬಾರದು ಎಂಬ ಕಲ್ಪನೆ ಒಡಮೂಡುತ್ತದೆ.
ಏನನ್ನಾದರೂ ತಯಾರಿಸಬೇಕೆಂದು ನಿರ್ಧರಿಸಿದ್ದೇನೋ ನಿಜ ಆದರೆ ಏನನ್ನು? ಅದಕ್ಕೆ ಅವರು ಕಂಡುಕೊಂಡ ಉತ್ತರವೇ ಚಾಕೋಲೆಟ್ ಪ್ರಾಡಕ್ಟ್.
ಬೆಂಗಳೂರು ಟು ಪುತ್ತೂರು: ಬಾಲಸುಬ್ರಹ್ಮಣ್ಯ ಪಿಎಸ್ ಮತ್ತು ಸ್ವಾತಿ ಕಲ್ಲೇಂಗುಡಿ ದಂಪತಿಗಳಿಬ್ಬರೂ ಸಾಫ್ಟವೇರ್ ಇಂಜಿನಿರ‍್ಸ್. ಬೆಂಗಳೂರಿನ ಐಟಿ ಕಂಪನಿಗಳಲ್ಲಿ ಇಬ್ಬರಿಗೂ ಲಕ್ಷಾಂತರ ರೂಪಾಯಿ ಸಂಬಳ ಕೆಲಸ. ಪ್ರತಿದಿನವೂ ಅದೇ ಒತ್ತಡ, ಮೀಟಿಂಗ್, ಅದೇ ಕೆಲಸದಿಂದ ಬೇಸತ್ತಿದ್ದ ಅವರು ಸೃಜನಾತ್ಮಕವಾಗಿ ವಿನೂತವಾಗಿ ಏನನ್ನಾದರೂ ಮಾಡಬೇಕೆಂದು ಇದ್ದ ಕೆಲಸವನ್ನೂ ಬಿಟ್ಟು ತಮ್ಮ ಹುಟ್ಟೂರಾದ ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿಗೆ ವಾಪಸ್ಸಾದರು.
ತಮ್ಮ ಪಾಲಿಗೆ ಬಂದಿದ್ದ ಹಿರಿಯರ ಹೊಲದಲ್ಲಿ ಚಾಕೋಲೆಟ್ ತಯಾರಿಕೆಗೆ ಅತ್ಯಗತ್ಯವಾಗಿ ಬೇಕಾಗುವ ಕೋಕೋ ಸಸಿಗಳನ್ನು ನೆಟ್ಟು ಪೋಷಿಸುವುದರ ಜೊತೆಗೆ, ಅವರೇ ಚಾಕೋಲೆಟ್ ತಯಾರಿಕೆಗೆ ತೊಡಗಿಸಿಕೊಂಡರು. ಇಂದು ದೇಶೀಯ ಚಾಕೋಲೆಟ್ ಮಾರುಕಟ್ಟೆಯಲ್ಲಿ ನಂಬರ್ 1 ಕಂಪನಿಯಾಗಿ ಬೆಳೆದಿರುವ ಅನುತ್ತಮ ಎಂಬ ಬ್ರಾಂಡ್ ಹುಟ್ಟಿದ್ದು ಹೀಗೆ.
ಸ್ಪೈಸಿ ಟ್ಯಾಂಗ್ ಚಾಕೋಲೆಟ್‌ನಿಂದ ಕಂಪನಿ ಕ್ಲಿಕ್: ಸ್ವಾತಿ ಮತ್ತು ಸುಬ್ರಹ್ಮಣ್ಯ ನೈಸರ್ಗಿಕ ವಿಧಾನದಿಂದ ತಮ್ಮದೇ ಹೊಲದಲ್ಲಿ ಸ್ಥಾಪಿಸಿದ ತಯಾರಿಕಾ ಘಟಕದಲ್ಲಿ ಕರ್ನಾಟಕದಲ್ಲಿ ಪ್ರಸಿದ್ಧವಾಗಿರುವ ಶುಂಠಿಯಿಂದ ತಯಾರಿಸುವ ಸಾಂಪ್ರದಾಯಿಕ ಕಷಾಯದಿಂದ ಸ್ಫೂರ್ತಿ ಪಡೆದು ಬೆಲ್ಲ, ಶುಂಠಿ, ಪೆಪ್ಪರ್ ಬಳಸಿ ತಯಾರಿಸಲಾದ ಸ್ಪೈಸಿ ಟ್ಯಾಂಗ್ ಎಂಬ ಡಾರ್ಕ್ ಚಾಕೋಲೆಟ್ ಹೆಚ್ಚು ಜನಪ್ರಿಯತೆ ಗಳಿಸಿತು. ಅಲ್ಲದೇ ಇದಕ್ಕೆ 2021ರಲ್ಲಿ ಅಂತಾರಾಷ್ಟ್ರೀಯ ಚಾಕೋಲೆಟ್ ಅವಾರ್ಡ್ ಸಹ ಬಂದಿತು.
ಯಾವುದೇ ಚಾಕೋಲೆಟ್‌ಗಳಲ್ಲಿ ಸಕ್ಕರೆಯನ್ನು ಬಳಸುತ್ತಿಲ್ಲ. ಸಿಹಿಗಾಗಿ ಇವರು ಖರ್ಜೂರವನ್ನು ಬಳಸುತ್ತಿದ್ದಾರೆ. ಕೆಲವು ಚಾಕೋಲೆಟ್‌ಗಳಲ್ಲಿ ಶುದ್ಧ ಹಾಗೂ ನೈಸರ್ಗಿಕ ಬೆಲ್ಲವನ್ನು ಬಳಸುತ್ತಿದ್ದಾರೆ. ಸ್ವಾತಿ ಅವರೇ ಹೇಳುವಂತೆ ತಾವು ಆರಂಭಿಸಿದ ಅನುತ್ತಮ ಚಾಕೋಲೆಟ್ ಬ್ರಾಂಡ್ ದಿನೇ ದಿನೇ ಪ್ರಸಿದ್ಧಿ ಪಡೆಯುತ್ತಿದೆ.
ಉತ್ಪನ್ನಗಳಿಗೆ ಜನರಿಂದ ಬೇಡಿಕೆ ಹೆಚ್ಚುತ್ತಿದೆ. ಅಲ್ಲದೇ ನೈಸರ್ಗಿಕ ಪದಾರ್ಥಗಳನ್ನು ಬಳಸಿ ತಯಾರಿಸಲಾದ ಚಾಕೋಲೆಟ್ ಉತ್ಪನ್ನಗಳು ಅಂತಾರಾಷ್ಟ್ರೀಯ ಮಟ್ಟದ ಪ್ರಶಸ್ತಿಗಳನ್ನು ಪಡೆದಿವೆ. ಪುತ್ತೂರಿನಲ್ಲಿ ಹಲವು ಗ್ರಾಮೀಣ ಮಹಿಳೆಯರಿಗೂ ಉದ್ಯೋಗವನ್ನು ನೀಡಿದ್ದೇವೆ. ಅಷ್ಟರಮಟ್ಟಿಗೆ ಬೆಂಗಳೂರಿನ ಐಟಿ ಉದ್ಯೋಗ ತ್ಯಜಿಸಿ ಸ್ವಂತ ಉದ್ದಿಮೆ ಆರಂಭಿಸಿದ್ದು ಮನಸ್ಸಿಗೆ ತೃಪ್ತಿ ತಂದಿದೆ ಎನ್ನುತ್ತಾರೆ.
