ತಿರುಪತಿ–ಶಿರಡಿ ನೇರ ಎಕ್ಸ್ಪ್ರೆಸ್ ಚಾಲನೆ: ನಾಲ್ಕು ರಾಜ್ಯಗಳ ಭಕ್ತರಿಗೆ ಐತಿಹಾಸಿಕ ದಿನ
ನವದೆಹಲಿ: ತಿರುಪತಿಯಿಂದ ಶಿರಡಿಗೆ ಮೊದಲ ಬಾರಿಗೆ ನೇರ ರೈಲು ಸಂಪರ್ಕ ಆರಂಭಗೊಂಡಿದ್ದು, ತಿರುಪತಿ–ಸಾಯಿನಗರ ಶಿರಡಿ ಎಕ್ಸ್ಪ್ರೆಸ್ ರೈಲಿಗೆ ಕೇಂದ್ರ ರೈಲ್ವೆ ಮತ್ತು ಜಲಶಕ್ತಿ ಖಾತೆ ರಾಜ್ಯ ಸಚಿವ ವಿ. ಸೋಮಣ್ಣ ಮಂಗಳವಾರ ದೆಹಲಿಯ ರೈಲ್ ಭವನದಿಂದ ವಿಡಿಯೋ ಕಾನ್ಫರೆನ್ಸ್ ಮುಖಾಂತರ ಹಸಿರು ನಿಶಾನೆ ತೋರಿಸಿದರು.
ಹೊಸ ಎಕ್ಸ್ಪ್ರೆಸ್ ರೈಲು ಆಂಧ್ರಪ್ರದೇಶ, ತೆಲಂಗಾಣ, ಕರ್ನಾಟಕ ಮತ್ತು ಮಹಾರಾಷ್ಟ್ರ ಸೇರಿದಂತೆ ನಾಲ್ಕು ರಾಜ್ಯಗಳ ಮಧ್ಯೆ ನೇರ ತೀರ್ಥಯಾತ್ರೆ ಸಂಪರ್ಕ ಒದಗಿಸುತ್ತಿದೆ. ತಿರುಪತಿ ಮತ್ತು ಶಿರಡಿ ನಡುವೆ ಈವರೆಗೂ ನೇರ ರೈಲು ಇರದ ಹಿನ್ನೆಲೆಯಲ್ಲಿ ಭಕ್ತರಿಗೆ ಇದು ದೊಡ್ಡ ಅನುಕೂಲವಾಗಲಿದೆ.
30 ಗಂಟೆಗಳ ಸುಗಮ ತೀರ್ಥಯಾತ್ರೆ ಪ್ರಯಾಣ: ಹೊಸ ರೈಲು ವಾರಕ್ಕೆ ಒಂದು ಬಾರಿ ಸಂಚರಿಸುವ ಸಾಪ್ತಾಹಿಕ ಸೇವೆಯಾಗಿದ್ದು, ಪ್ರಯಾಣಿಕರಿಗೆ ಸುಮಾರು 30 ಗಂಟೆಗಳ ಪ್ರಯಾಣ ಸಮಯದಲ್ಲಿ ಸುರಕ್ಷಿತ ಹಾಗೂ ಆರಾಮದಾಯಕ ಸೇವೆ ಒದಗಿಸುತ್ತದೆ. ಇದು ದಕ್ಷಿಣ ಕರಾವಳಿ ತೀರದ ತಿರುಪತಿ ಭಾಗದಿಂದ ಶಿರಡಿಗೆ ಮೊದಲ ನೇರ ಸೌಲಭ್ಯವಾಗಿದೆ.
ಮಾರ್ಗದಲ್ಲಿರುವ 31 ಪ್ರಮುಖ ನಿಲ್ದಾಣಗಳು: ತಿರುಪತಿ–ಶಿರಡಿ ಎಕ್ಸ್ಪ್ರೆಸ್ 31 ನಿಲ್ದಾಣಗಳನ್ನು ಸಂಪರ್ಕಿಸುವ ಪ್ರಮುಖ ಮಾರ್ಗ ಹೊಂದಿದೆ. ಇದರಲ್ಲಿ ನೆಲ್ಲೂರು, ಗುಂಟೂರು, ಸಿಕಂದರಾಬಾದ್, ಬೀದರ್, ಮನ್ಮಾಡ್ ಸೇರಿದಂತೆ ಹಲವು ಪ್ರಮುಖ ನಗರ ಹಾಗೂ ತೀರ್ಥ ಕ್ಷೇತ್ರಗಳು ಸೇರಿವೆ. ಹೊಸ ರೈಲು ತನ್ನ ಮಾರ್ಗದಲ್ಲಿ ಪರ್ಲಿ ವೈಜನಾಥ್ ಎಂಬ ಪ್ರಸಿದ್ಧ ಶಿವಕ್ಷೇತ್ರಕ್ಕೂ ಸಂಪರ್ಕ ಒದಗಿಸುವುದರಿಂದ ತೀರ್ಥ ಪ್ರವಾಸೋದ್ಯಮಕ್ಕೆ ಬಲ ದೊರೆಯಲಿದೆ.
ತೀರ್ಥಯಾತ್ರೆ ಮತ್ತು ಆರ್ಥಿಕ ಚಟುವಟಿಕೆಯ ಉತ್ತೇಜನ: ಸೋಮಣ್ಣ ಅವರು ರೈಲು ಸೇವೆಯ ಮಹತ್ವದ ಬಗ್ಗೆ ಮಾತನಾಡುತ್ತಾ, ನಾಲ್ಕು ರಾಜ್ಯಗಳ ಭಕ್ತರಿಗೆ ಇದು ಐತಿಹಾಸಿಕ ದಿನ. ಈ ರೈಲು ತೀರ್ಥಯಾತ್ರೆ, ಪ್ರವಾಸೋದ್ಯಮ ಮತ್ತು ಪ್ರಾದೇಶಿಕ ಆರ್ಥಿಕ ಚಟುವಟಿಕೆಗೆ ಹೊಸ ದಿಕ್ಕು ನೀಡಲಿದೆ. ದೇಶದ ಜೀವನಾಡಿಯಾಗಿ ರೈಲು ಸೇವೆ ಮತ್ತೊಂದು ದೊಡ್ಡ ಹೆಜ್ಜೆ ಇಟ್ಟಿದೆ” ಎಂದು ಹೇಳಿದರು.
ಹೊಸ ರೈಲು ಮಾರ್ಗವು ಯಾತ್ರಾರ್ಥಿಗಳಿಗೆ ಶೀಘ್ರ, ಸುರಕ್ಷಿತ ಮತ್ತು ಆರಾಮದಾಯಕ ದೀರ್ಘದೂರ ಪ್ರಯಾಣದ ಅನುಭವವನ್ನು ನೀಡುವುದರೊಂದಿಗೆ ಸಂಪರ್ಕ, ವ್ಯಾಪಾರ ಮತ್ತು ಪ್ರವಾಸೋದ್ಯಮಕ್ಕೆ ನೇರ ಉತ್ತೇಜನ ನೀಡಲಿದೆ ಎಂದರು
