ಭಾರತೀಯ ನೌಕಾಪಡೆಯ ತರಬೇತಿ ಹಡಗು ಸುದರ್ಶಿನಿ 13 ದೇಶಗಳ 18 ಬಂದರುಗಳಿಗೆ ಭೇಟಿ ನೀಡಲಿದ್ದು, ಒಟ್ಟು 22,000 ನಾಟಿಕಲ್ ಮೈಲಿಗಳಿಗಿಂತ ಹೆಚ್ಚು ದೂರ ಕ್ರಮಿಸಲಿದೆ.
ನವದೆಹಲಿ: ಭಾರತೀಯ ನೌಕಾಪಡೆಯ ನೌಕಾ ತರಬೇತಿ ಹಡಗು ಐಎನ್ಎಸ್ ಸುದರ್ಶಿನಿ ಇಂದಿನಿಂದ (2026ರ ಜನವರಿ 20 ರಂದು) 10 ತಿಂಗಳ ಮಹತ್ವದ ಸಾಗರೋತ್ತರ ದಂಡಯಾತ್ರೆಯಾದ ‘ಲೋಕಯಾಣ–26’ ಯಾತ್ರೆಯನ್ನು ಅಧಿಕೃತವಾಗಿ ಆರಂಭಿಸಲಿದೆ. ಭಾರತದ ಶ್ರೀಮಂತ ಕಡಲ ಪರಂಪರೆ, ಸಮುದ್ರ ಸಂಸ್ಕೃತಿ ಹಾಗೂ ‘ವಸುದೈವ ಕುಟುಂಬಕಂ’ ಎಂಬ ಮಹಾಸಾಗರದ ದೃಷ್ಟಿಕೋನವನ್ನು ಜಾಗತಿಕ ಮಟ್ಟದಲ್ಲಿ ಪ್ರತಿಬಿಂಬಿಸುವ ಉದ್ದೇಶ ಈ ಯಾತ್ರೆಯ ಹಿಂದಿದೆ.
ಈ ದಂಡಯಾತ್ರೆಯ ಭಾಗವಾಗಿ ಐಎನ್ಎಸ್ ಸುದರ್ಶಿನಿ 22,000 ನಾಟಿಕಲ್ ಮೈಲುಗಳಿಗಿಂತ ಹೆಚ್ಚು ದೂರ ಪ್ರಯಾಣ ಮಾಡಲಿದ್ದು, 13 ದೇಶಗಳಲ್ಲಿನ 18 ಪ್ರಮುಖ ವಿದೇಶಿ ಬಂದರುಗಳಿಗೆ ಭೇಟಿ ನೀಡಲಿದೆ. ಈ ಸಮುದ್ರಯಾನವು ಭಾರತೀಯ ನೌಕಾಪಡೆಯ ವೃತ್ತಿಪರತೆ, ಕಡಲ ಶಕ್ತಿ ಮತ್ತು ಸ್ನೇಹಪರ ರಾಜತಾಂತ್ರಿಕತೆಯ ಪ್ರಬಲ ಸಂಕೇತವಾಗಿ ಹೊರಹೊಮ್ಮಲಿದೆ.
ಇದನ್ನೂ ಓದಿ: ದೇಶಿ ಕೈಗಾರಿಕೆಗೆ ಬಲ: ಪ್ರತಿ ಜಿಲ್ಲೆಯಲ್ಲಿ ಉದ್ಯೋಗ ಸೃಷ್ಟಿಸುವ ಗುರಿ
ಲೋಕಾಯಣ–26 ಯಾತ್ರೆಯ ಪ್ರಮುಖ ಆಕರ್ಷಣೆಯೆಂದರೆ, ಐಎನ್ಎಸ್ ಸುದರ್ಶಿನಿ ಎರಡು ಪ್ರತಿಷ್ಠಿತ ಅಂತರರಾಷ್ಟ್ರೀಯ ಎತ್ತರದ ಹಡಗು ಕಾರ್ಯಕ್ರಮಗಳಲ್ಲಿ ಭಾಗವಹಿಸಲಿದೆ. ಫ್ರಾನ್ಸ್ನ ‘ಎಸ್ಕೇಲ್ ಎ ಸೆಟ್’ (Escale à Sète) ಮತ್ತು ಅಮೆರಿಕದ ನ್ಯೂಯಾರ್ಕ್ನಲ್ಲಿ ನಡೆಯುವ ‘ಸೇಲ್ 250’ (SAIL 250) ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡು, ಭಾರತದ ಶತಮಾನಗಳ ಸಮುದ್ರಯಾನ ಪರಂಪರೆ, ನೌಕಾ ಸಂಪ್ರದಾಯಗಳು ಮತ್ತು ಕಡಲ ಸಾಂಸ್ಕೃತಿಕ ವೈಭವವನ್ನು ಜಗತ್ತಿನ ಮುಂದೆ ಪ್ರದರ್ಶಿಸಲಿದೆ.
ಈ ಪ್ರಯಾಣದ ಅವಧಿಯಲ್ಲಿ 200ಕ್ಕೂ ಹೆಚ್ಚು ಭಾರತೀಯ ನೌಕಾಪಡೆ ಮತ್ತು ಭಾರತೀಯ ಕರಾವಳಿ ಕಾವಲು ಪಡೆಯ ಪ್ರಶಿಕ್ಷಣಾರ್ಥಿಗಳು ತೀವ್ರ ಹಾಗೂ ಸಮಗ್ರ ನೌಕಾಯಾನ ತರಬೇತಿಗೆ ಒಳಗಾಗಲಿದ್ದಾರೆ. ದೀರ್ಘ-ಶ್ರೇಣಿಯ ಸಾಗರ ಸಂಚರಣೆ, ಸಾಂಪ್ರದಾಯಿಕ ನೌಕಾಯಾನ ವಿಧಾನಗಳು ಮತ್ತು ಸಮುದ್ರದಲ್ಲಿನ ಜೀವನದ ಸೂಕ್ಷ್ಮ ಅಂಶಗಳನ್ನು ಅವರು ನೇರ ಅನುಭವದ ಮೂಲಕ ಕಲಿಯಲಿದ್ದಾರೆ.
ಇದನ್ನೂ ಓದಿ: 3ನೇ ವರ್ಷವೂ ಭಾಷಣ ತಿರಸ್ಕರಿಸಿ ಹೊರ ನಡೆದ ರಾಜ್ಯಪಾಲರು
ವಿವಿಧ ದೇಶಗಳ ನೌಕಾಪಡೆಗಳ ಪ್ರಶಿಕ್ಷಣಾರ್ಥಿಗಳೊಂದಿಗೆ ಸಂವಹನ ನಡೆಸುವ ಮೂಲಕ ವೃತ್ತಿಪರ ವಿನಿಮಯ, ಸಹಕಾರ ಮತ್ತು ಸ್ನೇಹದ ಶಾಶ್ವತ ಬಂಧಗಳು ಬೆಳೆಸಿಕೊಳ್ಳಲು ಅವಕಾಶ ದೊರೆಯಲಿದೆ. ಐಎನ್ಎಸ್ ಸುದರ್ಶಿನಿ ತನ್ನ ಯಾತ್ರೆಯ ಸಂದರ್ಭದಲ್ಲಿ ಭೇಟಿ ನೀಡುವ ದೇಶಗಳ ನೌಕಾಪಡೆಗಳೊಂದಿಗೆ ತರಬೇತಿ ಸಂವಾದಗಳು, ಕಡಲ ಪಾಲುದಾರಿಕೆ ಮತ್ತು ಸಹಯೋಗ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲಿದೆ.
ಇದರ ಮೂಲಕ ಕಡಲ ಸಹಕಾರವನ್ನು ಬಲಪಡಿಸುವುದರ ಜೊತೆಗೆ, ಶಾಂತ, ಸುರಕ್ಷಿತ ಮತ್ತು ಸಹಕಾರಿ ಮಹಾಸಾಗರದ ದೃಷ್ಟಿಕೋನವನ್ನು ಮುಂದೂಡುವಲ್ಲಿ ಭಾರತ ತನ್ನ ಬದ್ಧತೆಯನ್ನು ಪುನರುಚ್ಚರಿಸಲಿದೆ. ಈ ಸಮುದ್ರಯಾನವು ಸಾಂಸ್ಕೃತಿಕ ರಾಜತಾಂತ್ರಿಕತೆಯ ಪ್ರಬಲ ಸಂಕೇತವಾಗಿ ಪರಿಣಮಿಸಿದ್ದು, ರಾಷ್ಟ್ರಗಳ ನಡುವೆ ಪರಸ್ಪರ ನಂಬಿಕೆ, ಸಹಕಾರ ಮತ್ತು ಸ್ನೇಹದ ಸೇತುವೆಗಳನ್ನು ನಿರ್ಮಿಸುವ ಭಾರತೀಯ ನೌಕಾಪಡೆಯ ಸಂಕಲ್ಪವನ್ನು ಮತ್ತೊಮ್ಮೆ ಜಗತ್ತಿಗೆ ಪರಿಚಯಿಸಲಿದೆ.
ಇದನ್ನೂ ಓದಿ: ರಾಸಲೀಲೆ ವಿಡಿಯೋ ಪ್ರಕರಣ: DGP ರಾಮಚಂದ್ರ ರಾವ್ ಅಮಾನತು
ಗಮನಾರ್ಹವಾಗಿ, ಭಾರತೀಯ ನೌಕಾಪಡೆಯ ಎರಡನೇ ನೌಕಾ ತರಬೇತಿ ಹಡಗಾಗಿರುವ ಐಎನ್ಎಸ್ ಸುದರ್ಶಿನಿ ಈಗಾಗಲೇ 1,40,000 ನಾಟಿಕಲ್ ಮೈಲುಗಳಷ್ಟು ದೂರ ಸಂಚರಿಸಿದೆ. ‘ಲೋಕಾಯಣ–26’ ಯಾತ್ರೆಯ ಮೂಲಕವೂ ಈ ಹಡಗು ಜಾಗತಿಕ ವೇದಿಕೆಯಲ್ಲಿ ಭಾರತದ ಕಡಲ ಶಕ್ತಿ, ವೃತ್ತಿಪರತೆ ಮತ್ತು ಸದ್ಭಾವನೆಯ ದೂತರಾಗಿ ಕಾರ್ಯನಿರ್ವಹಿಸಲಿದೆ.
