ನವದೆಹಲಿಯಲ್ಲಿ ನಡೆಯಲಿರುವ ಬ್ರಿಕ್ಸ್ ಶೃಂಗಸಭೆಯ ಲೋಗೋ ವಿನ್ಯಾಸಕ್ಕೆ ಸಾಂಸ್ಕೃತಿಕ ಸ್ಪರ್ಶ
ನವದೆಹಲಿ: ಈ ವರ್ಷ ನವದೆಹಲಿಯಲ್ಲಿ ನಡೆಯಲಿರುವ ಬ್ರಿಕ್ಸ್ (BRICS) ಶೃಂಗಸಭೆಗೆ ಸಂಬಂಧಿಸಿದಂತೆ ಅದರ ಲೋಗೋ, ಥೀಮ್ ಮತ್ತು ಅಧಿಕೃತ ವೆಬ್ಸೈಟ್ನ್ನು ವಿದೇಶಾಂಗ ಸಚಿವ ಡಾ. ಎಸ್. ಜೈಶಂಕರ್ ಅವರು ಇಂದು ಬಿಡುಗಡೆ ಮಾಡಿದರು.
ಈ ಸಂದರ್ಭದಲ್ಲಿ ನವದೆಹಲಿಯಲ್ಲಿ ಮಾಧ್ಯಮಗಳನ್ನುದ್ದೇಶಿಸಿ ಮಾತನಾಡಿದ ಡಾ. ಜೈಶಂಕರ್, ಶೃಂಗಸಭೆಯ ಅವಧಿಯಲ್ಲಿ ಜಾಗತಿಕ ಕಲ್ಯಾಣಕ್ಕಾಗಿ ಬ್ರಿಕ್ಸ್ ರಾಷ್ಟ್ರಗಳ ಸಾಮರ್ಥ್ಯವನ್ನು ಒಟ್ಟುಗೂಡಿಸಲು ಭಾರತ ಗಟ್ಟಿಯಾದ ಪ್ರಯತ್ನ ನಡೆಸಲಿದೆ ಎಂದು ಹೇಳಿದರು.
ಇದನ್ನೂ ಓದಿ: ಅನ್ನದಾತೆಯ ಸಂಕ್ರಾಂತಿ: ರೈತ ಮಹಿಳೆಯರಿಗೆ ಸಮರ್ಪಿತ ಸಂಭ್ರಮ
BRICSಗೆ 20 ವರ್ಷ – ಸಹಕಾರದ ಮಹತ್ವದ ಹಂತ: ಈ ವರ್ಷ ಬ್ರಿಕ್ಸ್ ತನ್ನ ಸ್ಥಾಪನೆಯ 20ನೇ ವರ್ಷವನ್ನು ಪೂರೈಸುತ್ತಿರುವುದು ವಿಶೇಷವಾಗಿದ್ದು, ಈ ಎರಡು ದಶಕಗಳಲ್ಲಿ ಬ್ರಿಕ್ಸ್ ವೇದಿಕೆ ಉದಯೋನ್ಮುಖ ಮಾರುಕಟ್ಟೆಗಳು ಮತ್ತು ಅಭಿವೃದ್ಧಿಶೀಲ ಆರ್ಥಿಕತೆಗಳ ನಡುವಿನ ಸಹಕಾರಕ್ಕೆ ಪ್ರಮುಖ ಅಂತಾರಾಷ್ಟ್ರೀಯ ವೇದಿಕೆಯಾಗಿಯೇ ಬೆಳೆಯುತ್ತಿದೆ ಎಂದು ಡಾ. ಜೈಶಂಕರ್ ಹೇಳಿದರು.
ಕಾಲಕ್ರಮೇಣ ಬ್ರಿಕ್ಸ್ ತನ್ನ ಕಾರ್ಯಸೂಚಿ ಮತ್ತು ಸದಸ್ಯತ್ವ ಎರಡನ್ನೂ ವಿಸ್ತರಿಸಿಕೊಂಡಿದೆ ಎಂದು ಅವರು ತಿಳಿಸಿದರು. ಜನ-ಕೇಂದ್ರಿತ ಅಭಿವೃದ್ಧಿ, ಸಂವಾದ ವಿಸ್ತರಣೆ ಮತ್ತು ಪ್ರಾಯೋಗಿಕ ಸಹಕಾರಕ್ಕೆ ಆದ್ಯತೆ ನೀಡುತ್ತಾ, ಬದಲಾಗುತ್ತಿರುವ ಜಾಗತಿಕ ವಾಸ್ತವಗಳಿಗೆ ಬ್ರಿಕ್ಸ್ ವೇದಿಕೆ ಸಮರ್ಪಕವಾಗಿ ಪ್ರತಿಕ್ರಿಯಿಸಿದೆ ಎಂದು ಅವರು ಒತ್ತಿ ಹೇಳಿದರು.
ಇದನ್ನೂ ಓದಿ: ದಾಂಡೇಲಿ ಹಿರಿಯ ವಕೀಲ ಅಜಿತ್ ನಾಯ್ಕ ಕೊಲೆ ಪ್ರಕರಣ: ಆರೋಪಿಗೆ ಜೀವಾವಧಿ ಶಿಕ್ಷೆ
ಲೋಗೋ ವಿನ್ಯಾಸಕ್ಕೆ ಸಾಂಸ್ಕೃತಿಕ ಸ್ಪರ್ಶ: ಬ್ರಿಕ್ಸ್ ಶೃಂಗಸಭೆಯ ಲೋಗೋ ಕುರಿತು ವಿವರಿಸಿದ ಸಚಿವರು, ಬ್ರಿಕ್ಸ್ ಧ್ವಜದ ಬಣ್ಣಗಳಲ್ಲಿ ದಳಗಳನ್ನು ಹೊಂದಿರುವ ಕಮಲ ಹೂವು ಹಾಗೂ ಅದರ ಮಧ್ಯಭಾಗದಲ್ಲಿ ನಮಸ್ತೆ ಸೂಚಕವನ್ನು ಒಳಗೊಂಡ ವಿನ್ಯಾಸವನ್ನು ಪರಿಚಯಿಸಿದರು. ಈ ಲೋಗೋ ಭಾರತದ ಸಂಸ್ಕೃತಿ ಮತ್ತು ಆತಿಥ್ಯ ಪರಂಪರೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದರು.
ಲೋಗೋ ವಿನ್ಯಾಸಕ್ಕೆ ಸಾಂಸ್ಕೃತಿಕ ಸ್ಪರ್ಶವಿದೆ ಎಂದು ಬೆಂಬಲಿಗರು ಶ್ಲಾಘಿಸಿದರೆ, ಕೆಲ ವಿಮರ್ಶಕರು ಇದನ್ನು ಭಾರತದ 2016ರ ಬ್ರಿಕ್ಸ್ ಲೋಗೋದೊಂದಿಗೆ ಹೋಲಿಕೆ ಮಾಡಿರುವುದು ಕೂಡ ಗಮನಕ್ಕೆ ಬಂದಿದೆ.
ಇದನ್ನೂ ಓದಿ: ಒಕ್ಕಲುತನದ ಹೆಸರೇ ಸ್ವಾಭಿಮಾನದ ಬದುಕಿಗೆ ದೊಡ್ಡ ಶಕ್ತಿ
ಶೃಂಗಸಭೆಯ ಆದ್ಯತೆಗಳು: ಭಾರತದ ಬ್ರಿಕ್ಸ್ ಅಧ್ಯಕ್ಷತೆಯಲ್ಲಿ, ಕೆಳಗಿನ ಕ್ಷೇತ್ರಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ ಎಂದು ಡಾ. ಜೈಶಂಕರ್ ವಿವರಿಸಿದರು. ಆಹಾರ ಭದ್ರತೆ. ಶುದ್ಧ ಮತ್ತು ನವೀಕರಿಸಬಹುದಾದ ಇಂಧನ. ವಿಪತ್ತು ಸ್ಥಿತಿಸ್ಥಾಪಕತ್ವ. ಇವುಗಳೊಂದಿಗೆ, ಜಾಗತಿಕ ದಕ್ಷಿಣ (Global South) ಎದುರಿಸುತ್ತಿರುವ ಸವಾಲುಗಳ ಮೇಲೆ ವಿಶೇಷ ಗಮನ ಹರಿಸಲಾಗುವುದು ಎಂದು ಅವರು ಹೇಳಿದರು.
10 ಸದಸ್ಯರೊಂದಿಗೆ ವಿಸ್ತೃತ ಬ್ರಿಕ್ಸ್: ಇತ್ತೀಚಿನ ವಿಸ್ತರಣೆಯ ನಂತರ, ಬ್ರಿಕ್ಸ್ ಗುಂಪು ಈಗ 10 ಸದಸ್ಯ ರಾಷ್ಟ್ರಗಳನ್ನು ಒಳಗೊಂಡಿರುವ ಮಹತ್ವದ ಬಹುಪಕ್ಷೀಯ ವೇದಿಕೆಯಾಗಿದ್ದು, ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ವ್ಯವಸ್ಥೆಯಲ್ಲಿ ಅದರ ಪ್ರಭಾವ ದಿನೇ ದಿನೇ ಹೆಚ್ಚುತ್ತಿದೆ ಎಂದು ಸಚಿವರು ಅಭಿಪ್ರಾಯಪಟ್ಟರು.
