ಸೈಬರ್ ವಂಚಕರ ಬೆದರಿಕೆಗೆ ಹೆದರಿ ವೃದ್ಧ ದಂಪತಿ ಸಾವು

ಬೆಳಗಾವಿ: ಸೈಬರ್ ವಂಚಕರ ಬೆದರಿಕೆ ಹೆದರಿ ವೃದ್ಧ ದಂಪತಿ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಖಾನಾಪುರ ತಾಲೂಕಿನ ಬೀಡಿ ಗ್ರಾಮದಲ್ಲಿ ನಡೆದಿದೆ.
ನಿವೃತ್ತ ರೈಲ್ವೆ ಉದ್ಯೋಗಿ ಡಿಯೋಗೋ ನಜರತ್(83), ಪಾವಿಯಾ ನಜರತ್(79) ಆತ್ಮಹತ್ಯೆ ಮಾಡಿಕೊಂಡ ವೃದ್ಧ ದಂಪತಿ. ಬೀಡಿ ಗ್ರಾಮದಲ್ಲಿರುವ ವೃದ್ಧ ದಂಪತಿಗೆ ಸೈಬರ್ ವಂಚಕರು ಕಾಲ್ ಮಾಡಿ ನಿಮ್ಮ ನಗ್ನ ವಿಡಿಯೋಗಳು ನಮ್ಮ ಬಳಿ ಇವೆ. ಹಣ ಕೊಡದೆ ಇದ್ದರೆ ನಿಮ್ಮ ಫೋಟೋ ವೈರಲ್ ಮಾಡುತ್ತೇವೆ ಎಂದು ಬೆದರಿಕೆ ಒಡ್ಡಿದ್ದರು ಎನ್ನಲಾಗಿದೆ.
ಈ ಬೆದರಿಕೆಗೆ ಹೆದರಿ ವೃದ್ಧ ದಂಪತಿ ಸೈಬರ್ ಕಳ್ಳರಿಗೆ 6 ಲಕ್ಷ ಹಣ ನೀಡಿದ್ದರು. ಆದರೆ ಅಷ್ಟಕ್ಕೆ ಸುಮ್ಮನಾಗದ ಸೈಬರ್ ವಂಚಕರು ನಂತರ ಇದೇ ಚಾಳಿ ಮುಂದುವರೆಸಿ ಮತ್ತಷ್ಟು ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಇದರಿಂದ ಮನನೊಂದ ಪಾವಿಯಾ ನಿದ್ದೆ ಮಾತ್ರೆ ಸೇವಿಸಿ ಆತ್ಮಹತ್ಯೆಗೆ ಮುಂದಾಗಿದ್ದಾರೆ. ಪತ್ನಿಯ ಸಾವನ್ನು ಕಂಡು ಕಂಗಾಲಾದ ಡಿಯೋಗೋ ನಜರತ್ ಡೆತ್‌ನೋಟ್ ಬರೆದಿಟ್ಟು ತಾನೂ ಕತ್ತು ಮತ್ತು ಕೈ ಕೊಯ್ದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಈ ಘಟನೆಯ ಬಗ್ಗೆ ನಂದಗಡ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.