ಗೋಶಾಲೆಯಲ್ಲಿ ಬೆಂಕಿ: ಗೋವುಗಳು ಸುರಕ್ಷಿತ, ಹುಲ್ಲು ನಾಶ
ಬೆಂಗಳೂರು : ನಗರದ ಗ್ರಾಮಾಂತರ ಭಾಗದಲ್ಲಿ ಇರುವ ಗೋಶಾಲೆಯಲ್ಲಿ ಸಂಭವಿಸಿದ ಅಗ್ನಿ ಅವಘಡದಿಂದ ಹುಲ್ಲಿನ ಮೆದೆ ಸುಟ್ಟುಹೋದ ಘಟನೆ ಆತಂಕಕ್ಕೆ ಕಾರಣವಾಗಿದೆ.
ಕೊತ್ತನೂರು ಹೆಣ್ಹೆಣ್ಣೂರು ಬಂಡೆ ಸಮೀಪದಲ್ಲಿರುವ ಶ್ರೀ ಕೃಷ್ಣ ಗೋ ಸೇವಾ ಆಶ್ರಮದಲ್ಲಿ ಈ ಘಟನೆ ನಡೆದಿದೆ. ಆಶ್ರಮದೊಳಗಿನ ಒಣ ಹುಲ್ಲಿನ ಮೆದೆಗೆ ಬೆಂಕಿ ತಗುಲಿ ಕೆಲ ಭಾಗಗಳು ಸುಟ್ಟುಹೋಗಿವೆ.
ಹೇಗೆ ಸಂಭವಿಸಿತು? : ಪ್ರಾಥಮಿಕ ಮಾಹಿತಿಯ ಪ್ರಕಾರ, ಬೇಸಿಗೆ ತೀವ್ರತೆಯ ನಡುವೆ ಒಣ ಹುಲ್ಲಿನಲ್ಲೇ ಬೆಂಕಿ ಕಾಣಿಸಿಕೊಂಡಿದ್ದು, ಕ್ಷಣಾರ್ಧದಲ್ಲಿ ಹರಡಿದೆ. ಶೆಡ್ ಭಾಗಕ್ಕೂ ಬೆಂಕಿ ತಗುಲಿರುವುದಾಗಿ ತಿಳಿದುಬಂದಿದೆ. ಕೆಲವರು ಕಿಡಿಗೆಡಿಗಳು ಬೆಂಕಿ ಹಚ್ಚಿರುವ ಸಾಧ್ಯತೆಯನ್ನೂ ತಳ್ಳಿಹಾಕಲಾಗದ ಪರಿಸ್ಥಿತಿ ಇದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.
ತುರ್ತು ಕಾರ್ಯಾಚರಣೆ: ಘಟನೆಯ ಮಾಹಿತಿ ತಿಳಿದ ತಕ್ಷಣ ಅಗ್ನಿಶಾಮಕ ದಳ ಸ್ಥಳಕ್ಕೆ ಆಗಮಿಸಿ ಬೆಂಕಿ ನಂದಿಸುವ ಕಾರ್ಯಾಚರಣೆ ಕೈಗೊಂಡಿತು. ಸ್ಥಳೀಯ ಸ್ವಯಂಸೇವಕರು ಮತ್ತು ರಾಷ್ಟ್ರೀಯ ಪ್ರಜಾಪ್ರಭುತ್ವ ಸೇನೆ (RPS) ಕಾರ್ಯಕರ್ತರು ಕೂಡ ಫೈರ್ ಬ್ರಿಗೇಡ್ ಜೊತೆಗೂಡಿ ಬೆಂಕಿ ನಂದಿಸಲು ಸಹಕರಿಸಿದರು. ಸದ್ಯ ಪರಿಸ್ಥಿತಿ ಸಂಪೂರ್ಣ ನಿಯಂತ್ರಣದಲ್ಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಗೋಶಾಲೆಯ ಸ್ಥಿತಿ: ಆಶ್ರಮದಲ್ಲಿ ಅನೇಕ ಗೋವುಗಳನ್ನು ಪಾಲನೆ ಮಾಡಲಾಗುತ್ತಿದ್ದು, ಅವುಗಳ ಸುರಕ್ಷತೆಗೆ ತಕ್ಷಣ ಕ್ರಮ ಕೈಗೊಳ್ಳಲಾಗಿದೆ. ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ ಎಂದು ಮೂಲಗಳು ತಿಳಿಸಿವೆ. ಈ ಗೋಶಾಲೆಯನ್ನು ಗೌಸೇವಕ ಪುಖ್ರಾಜ್ ಜೀ ಅವರ ನೇತೃತ್ವದಲ್ಲಿ ನಿರ್ವಹಿಸಲಾಗುತ್ತಿದೆ.
RPS ಅಧ್ಯಕ್ಷ ರಾಕೇಶ್ ದೇಶರ್ಲಾ ಮಾತನಾಡಿ, “ಬೇಸಿಗೆಯಲ್ಲಿ ಗೋವುಗಳಿಗೆ ಮೇವು ಸಿಗುವುದು ಕಷ್ಟ. ಇಂತಹ ಸಂದರ್ಭದಲ್ಲಿ ಹುಲ್ಲಿನ ಮೆದೆ ಸುಟ್ಟುಹೋಗಿರುವುದು ನೋವಿನ ಸಂಗತಿ. ಈ ಘಟನೆಗೆ ಕಾರಣವೇನು ಎಂಬುದನ್ನು ಅಧಿಕಾರಿಗಳು ಸಮಗ್ರವಾಗಿ ತನಿಖೆ ನಡೆಸಬೇಕು” ಎಂದು ಆಗ್ರಹಿಸಿದರು.
ಅಗ್ನಿಶಾಮಕ ದಳ ಮತ್ತು ಸ್ವಯಂಸೇವಕರ ಶೀಘ್ರ ಕಾರ್ಯಾಚರಣೆಗೆ ಅವರು ಧನ್ಯವಾದ ತಿಳಿಸಿದ್ದಾರೆ.
