ಅಕ್ರಮ ಡೀಸೆಲ್ ಸಾಗಾಟ ಜಾಲ ಭೇದಿಸಿದ ಬೆಳಗಾವಿ ಪೊಲೀಸರು: ₹27 ಲಕ್ಷ ಮೌಲ್ಯದ ಟ್ಯಾಂಕರ್ ಹಾಗೂ 17 ಸಾವಿರ ಲೀಟರ್ ಡೀಸೆಲ್ ಜಪ್ತಿ, 7 ಆರೋಪಿಗಳ ಬಂಧನ
ಬೆಳಗಾವಿ: ಮಹಾರಾಷ್ಟ್ರದಿಂದ ಕರ್ನಾಟಕಕ್ಕೆ ಅಕ್ರಮವಾಗಿ ಪೆಟ್ರೋಲಿಯಂ ಉತ್ಪನ್ನ ಸಾಗಾಟ ನಡೆಸುತ್ತಿದ್ದ ಜಾಲವನ್ನು ಬೆಳಗಾವಿ ನಗರದ ಮಾಳಮಾರುತಿ ಪೊಲೀಸರು ಯಶಸ್ವಿಯಾಗಿ ಭೇದಿಸಿದ್ದಾರೆ. ಗೌಪ್ಯ ಮಾಹಿತಿ ಮೇರೆಗೆ ನಡೆದ ತಡರಾತ್ರಿ ಕಾರ್ಯಾಚರಣೆಯಲ್ಲಿ, ಟಾಟಾ ಕಂಪನಿಯ ಟ್ಯಾಂಕರ್ ಒಂದನ್ನು ವಶಕ್ಕೆ ಪಡೆದು, ಸುಮಾರು ₹27 ಲಕ್ಷ ಮೌಲ್ಯದ ಟ್ಯಾಂಕರ್ ಹಾಗೂ 17 ಸಾವಿರ ಲೀಟರ್ಗೂ ಅಧಿಕ ಡೀಸೆಲ್ ಅನ್ನು ಜಪ್ತಿ ಮಾಡಲಾಗಿದೆ. ಈ ಸಂಬಂಧ ಏಳು ಆರೋಪಿಗಳನ್ನು ಬಂಧಿಸಲಾಗಿದೆ.
ತಡರಾತ್ರಿ ಕಾರ್ಯಾಚರಣೆ – ಖಚಿತ ಮಾಹಿತಿಯ ಮೇರೆಗೆ ದಾಳಿ: ಪೊಲೀಸರು ನೀಡಿದ ಮಾಹಿತಿಯಂತೆ, ಜನವರಿ 20ರ ರಾತ್ರಿ ಸುಮಾರು 9 ಗಂಟೆಗೆ, ಆಟೋನಗರದ ಟಾಟಾ ಪವರ್ ಪ್ಲಾಂಟ್ನಿಂದ ಕಣಬರ್ಗಿ ಕಡೆ ಸಾಗುವ ಡಬಲ್ ರಸ್ತೆಯಲ್ಲಿ, ಒಂದು ಟ್ಯಾಂಕರ್ ಅಕ್ರಮವಾಗಿ ಡೀಸೆಲ್ ತುಂಬಿಕೊಂಡು ನಿಂತಿರುವ ಬಗ್ಗೆ ಖಚಿತ ಮಾಹಿತಿ ಲಭ್ಯವಾಗಿತ್ತು.
ಇದನ್ನೂ ಓದಿ: Deepfake video ವಿರುದ್ಧ ಸಾರ್ವಜನಿಕರಿಗೆ ಸುಧಾಮೂರ್ತಿ ಎಚ್ಚರಿಕೆ
ಈ ಮಾಹಿತಿ ಆಧರಿಸಿ, ಎಸಿಪಿ ಸಂತೋಷ ಸತ್ಯನಾಯಿಕ ಅವರ ಮಾರ್ಗದರ್ಶನದಲ್ಲಿ, ಮಾಳಮಾರುತಿ ಪೊಲೀಸ್ ಠಾಣೆಯ ಪಿಐ ಬಿ.ಆರ್. ಗಡ್ಡೇಕರ ಅವರ ನೇತೃತ್ವದಲ್ಲಿ ಪಿಎಸ್ಐ ಹೊನ್ನಪ್ಪ ತಳವಾರ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ದಾಳಿ ನಡೆಸಿದರು.
ದಾಖಲೆ ಇಲ್ಲದೆ ಇಂಧನ ಸಾಗಾಟ ಪತ್ತೆ: ಪೊಲೀಸರ ಪರಿಶೀಲನೆ ವೇಳೆ, ಯಾವುದೇ ಮಾನ್ಯ ದಾಖಲೆಗಳಿಲ್ಲದೆ ಮಹಾರಾಷ್ಟ್ರದಿಂದ ಕರ್ನಾಟಕಕ್ಕೆ ಡೀಸೆಲ್ ಸಾಗಿಸಲಾಗುತ್ತಿತ್ತು ಎಂಬುದು ದೃಢಪಟ್ಟಿದೆ.
ಆರೋಪಿತರನ್ನು ವಿಚಾರಣೆ ನಡೆಸಿದಾಗ, ಸ್ವಂತ ಲಾಭಕ್ಕಾಗಿ ಅಕ್ರಮವಾಗಿ ಇಂಧನ ಸಾಗಾಟ ನಡೆಸುತ್ತಿರುವುದು ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: ಸುನೀತಾ ವಿಲಿಯಮ್ಸ್ ನಾಸಾದಿಂದ ನಿವೃತ್ತಿ: 27 ವರ್ಷಗಳ ಬಾಹ್ಯಾಕಾಶ ಸೇವೆಗೆ ಗುಡ್ಬೈ
ಜಪ್ತಿ ವಸ್ತುಗಳ ಮೌಲ್ಯ: ಟಾಟಾ ಟ್ಯಾಂಕರ್ ಮೌಲ್ಯ: ₹12 ಲಕ್ಷ (ಅಂದಾಜು), ಡೀಸೆಲ್ (17,000+ ಲೀಟರ್) ಮೌಲ್ಯ: ₹15 ಲಕ್ಷ (ಅಂದಾಜು), ಒಟ್ಟು ಮೌಲ್ಯ: ಸುಮಾರು ₹27 ಲಕ್ಷ
ಬಂಧಿತ ಆರೋಪಿಗಳು: ಬಂಧಿಸಲಾದ ಆರೋಪಿಗಳು ವಿವಿಧ ರಾಜ್ಯಗಳಿಗೆ ಸೇರಿದವರಾಗಿದ್ದು ದಿನೇಶಕುಮಾರ, ಸುಖದೇವ್ ಬಿಯಾರಾಮ್ – (ರಾಜಸ್ಥಾನ). ಇಸ್ತಿಯಾಕ್ ಶೇಖ್, ಕುಂದನ್ ಮಾತ್ರೆ, ಪ್ರವೀಣ ಔತಿ – (ಮುಂಬೈ). ಸಮೀರ ಪರಾಂಗೆ – (ರಾಯಘಡ), ಅರಿಹಂತ – (ತುಮಕೂರು) ಪ್ರಕರಣ ಸಂಬಂಧ ವಿಸ್ತೃತ ತನಿಖೆ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: Smart Energyಯ ಪ್ರಮುಖ ಕೇಂದ್ರವಾಗಿ ಕರ್ನಾಟಕ ರೂಪುಗೊಳ್ಳಲಿದೆ
ಪೊಲೀಸರ ಕಾರ್ಯಕ್ಕೆ ಶ್ಲಾಘನೆ: ಈ ಯಶಸ್ವಿ ಕಾರ್ಯಾಚರಣೆಯಲ್ಲಿ, ಪಿಐ ಬಿ.ಆರ್. ಗಡ್ಡೇಕರ, ಪಿಎಸ್ಐಗಳು ಹೊನ್ನಪ್ಪ ತಳವಾರ, ಶ್ರೀಶೈಲ್, ಉದಯ ಪಾಟೀಲ, ಪಿ.ಎಂ. ಮೋಹಿತೆ, ಮಾಳಮಾರುತಿ ಠಾಣೆಯ ಇತರೆ ಸಿಬ್ಬಂದಿ ಪ್ರಮುಖ ಪಾತ್ರ ವಹಿಸಿದ್ದು, ಅವರ ಕಾರ್ಯವನ್ನು ಪೊಲೀಸ್ ಉಪ ಆಯುಕ್ತರು ಹಾಗೂ ಪೊಲೀಸ್ ಆಯುಕ್ತರು ಅಧಿಕೃತವಾಗಿ ಶ್ಲಾಘಿಸಿದ್ದಾರೆ.
ಅಕ್ರಮ ಇಂಧನ ಸಾಗಾಟದ ವಿರುದ್ಧ ಕಠಿಣ ಕ್ರಮ: ರಾಜ್ಯದಲ್ಲಿ ಇಂಧನದ ಅಕ್ರಮ ಸಾಗಾಟ ಮತ್ತು ಕಳ್ಳಬಜಾರ್ ತಡೆಗೆ ಪೊಲೀಸರು ಕಠಿಣ ಕ್ರಮ ಕೈಗೊಳ್ಳುತ್ತಿದ್ದು, ಭವಿಷ್ಯದಲ್ಲಿಯೂ ಇಂತಹ ಜಾಲಗಳ ವಿರುದ್ಧ ನಿರಂತರ ದಾಳಿ ಮುಂದುವರಿಯಲಿದೆ ಎಂದು ಪೊಲೀಸ್ ಇಲಾಖೆ ಸ್ಪಷ್ಟಪಡಿಸಿದೆ.
