ಐಪಿಎಲ್ 2026ರ ಸೀಸನ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಪರ ರನ್ ಮಳೆ ಹರಿಸುತ್ತಿರುವ ಸ್ಫೋಟಕ ಬ್ಯಾಟರ್ ಅಭಿಷೇಕ್ ಶರ್ಮಾ, ಮೈದಾನದಲ್ಲಿ ಎದುರಾಳಿ ಬೌಲರ್ಗಳನ್ನು ಬೆವರಿಳಿಸುತ್ತಿದ್ದಾರೆ. ಆದರೆ, ಇತ್ತೀಚೆಗೆ ಮೈದಾನದ ಹೊರಗಿನ ಒಂದು ಸಣ್ಣ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ. ವೃಂದಾವನದ ಪ್ರಸಿದ್ಧ ಬಂಕೆ ಬಿಹಾರಿ ದೇವಾಲಯಕ್ಕೆ ಭೇಟಿ ನೀಡಿದ್ದ ಅಭಿಷೇಕ್ ಶರ್ಮಾ ಅವರಿಗೆ ಅಲ್ಲಿ ಒಂದು ವಿಚಿತ್ರ ಅನುಭವ ಎದುರಾಗಿದೆ.
ತಮ್ಮ ತಾಯಿಯೊಂದಿಗೆ ದೇವರ ದರ್ಶನ ಪಡೆಯಲು ದೇಗುಲಕ್ಕೆ ಆಗಮಿಸಿದ್ದ ಅಭಿಷೇಕ್, ಸಂಪ್ರದಾಯದಂತೆ ತಮ್ಮ ಚಪ್ಪಲಿಗಳನ್ನು ಹೊರಗಡೆ ಬಿಟ್ಟು ಒಳಗೆ ಹೋಗಿದ್ದರು. ದರ್ಶನ ಮುಗಿಸಿ ಹೊರಬಂದಾಗ ಅವರು ಬಿಟ್ಟಿದ್ದ ಜಾಗದಲ್ಲಿ ಚಪ್ಪಲಿಗಳು ಕಾಣೆಯಾಗಿದ್ದವು. ವೈರಲ್ ಆಗಿರುವ ವಿಡಿಯೋದಲ್ಲಿ ಅಭಿಷೇಕ್ ಶರ್ಮಾ ಅವರು ಜನದಟ್ಟಣೆಯ ನಡುವೆ ಅತ್ತಿತ್ತ ನೋಡುತ್ತಾ ತಮ್ಮ ಪಾದರಕ್ಷೆಗಾಗಿ ಹುಡುಕಾಡುತ್ತಿರುವುದು ಕಂಡುಬಂದಿದೆ. ಎಕ್ಸ್ನಲ್ಲಿ ಹರಿದಾಡುತ್ತಿರುವ ಈ ವಿಡಿಯೋಗೆ ಹಿನ್ನೆಲೆ ಧ್ವನಿ ನೀಡಿರುವ ವ್ಯಕ್ತಿ, “ದೇಗುಲದ ಹೊರಗಡೆ ಸಾಕಷ್ಟು ಚಪ್ಪಲಿಗಳಿದ್ದವು, ಆದರೆ ಅಭಿಷೇಕ್ ಮತ್ತು ಅವರ ತಾಯಿಯ ಚಪ್ಪಲಿಗಳು ಮಾತ್ರ ಅಲ್ಲಿರಲಿಲ್ಲ” ಎಂದು ವಿವರಿಸಿದ್ದಾರೆ.
ಇದನ್ನು ಓದಿ: http://CSKvsGT ಸಮಬಲದ ಹೋರಾಟ: ಯಾರ ಪಾಲಾಗಲಿದೆ ಇಂದಿನ ಜಯ?
ಆದರೆ, ಇದೇನು ಉದ್ದೇಶಪೂರ್ವಕ ಕಳ್ಳತನವಲ್ಲ ಎಂಬುದು ಅಲ್ಲಿನ ಜನರ ಮಾತು. ವೃಂದಾವನದಂತಹ ಜನನಿಬಿಡ ಪುಣ್ಯಕ್ಷೇತ್ರಗಳಲ್ಲಿ ವಿಪರೀತ ದಟ್ಟಣೆ ಇರುವುದರಿಂದ, ಅಚಾನಕ್ಕಾಗಿ ಚಪ್ಪಲಿಗಳು ಅದಲುಬದಲಾಗುವುದು ಅಥವಾ ಬೇರೆಡೆ ಸರಿಯುವುದು ಸಾಮಾನ್ಯ ಸಂಗತಿಯಾಗಿದೆ. ಸ್ವಲ್ಪ ಸಮಯ ಗೊಂದಲದ ವಾತಾವರಣ ನಿರ್ಮಾಣವಾದರೂ, ಕೂಡಲೇ ಎಚ್ಚೆತ್ತ ದೇಗುಲದ ಆಡಳಿತ ಮಂಡಳಿಯು ಕ್ರಿಕೆಟಿಗ ಮತ್ತು ಅವರ ಕುಟುಂಬಕ್ಕೆ ಪರ್ಯಾಯ ಪಾದರಕ್ಷೆಗಳ ವ್ಯವಸ್ಥೆ ಮಾಡಿಕೊಟ್ಟಿದೆ. ಇದರಿಂದಾಗಿ ಅವರು ಯಾವುದೇ ಅಡಚಣೆಯಿಲ್ಲದೆ ತಮ್ಮ ಮುಂದಿನ ಪ್ರಯಾಣ ಮುಂದುವರಿಸಿದ್ದಾರೆ.
ಇನ್ನು ಕ್ರಿಕೆಟ್ ಮೈದಾನದ ವಿಚಾರಕ್ಕೆ ಬಂದರೆ, ಅಭಿಷೇಕ್ ಶರ್ಮಾ ಪ್ರಸ್ತುತ ಭರ್ಜರಿ ಫಾರ್ಮ್ನಲ್ಲಿದ್ದಾರೆ. ಈ ಬಾರಿಯ ಐಪಿಎಲ್ನಲ್ಲಿ ಕೇವಲ 7 ಪಂದ್ಯಗಳಿಂದ 323 ರನ್ ಕಲೆಹಾಕಿರುವ ಅವರು, ಅತಿ ಹೆಚ್ಚು ರನ್ ಗಳಿಸಿದವರ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿದ್ದಾರೆ. ಅದರಲ್ಲೂ ಇತ್ತೀಚೆಗೆ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಅವರು ಸಿಡಿಸಿದ 135 ರನ್ಗಳ ಅಮೋಘ ಇನ್ನಿಂಗ್ಸ್ ಅವರ ಬ್ಯಾಟಿಂಗ್ ಪರಾಕ್ರಮಕ್ಕೆ ಸಾಕ್ಷಿಯಾಗಿದೆ. ಮೈದಾನದಲ್ಲಿ ಶತಕ ಬಾರಿಸಿ ಮಿಂಚುತ್ತಿರುವ ಈ ಯುವ ಆಟಗಾರ, ದೇವಸ್ಥಾನದ ಮುಂದೆ ಚಪ್ಪಲಿ ಹುಡುಕುತ್ತಿರುವ ವಿಡಿಯೋ ಈಗ ಅಭಿಮಾನಿಗಳ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
