AI generated image
ಪ್ಯಾರಿಸ್ನ ವಿಮಾನ ನಿಲ್ದಾಣದಲ್ಲಿ ನಡೆದ ಈ ಘಟನೆ ಈಗ ಇಡೀ ಜಗತ್ತನ್ನೇ ಬೆರಗುಗೊಳಿಸಿದೆ. ಬೆಟ್ಟಿಂಗ್ ಜಗತ್ತಿನಲ್ಲಿ ಹವಾಮಾನದ ಮುನ್ಸೂಚನೆಗಳ ಮೇಲೆ ಹಣ ಹೂಡುವುದು ಸಾಮಾನ್ಯ. ‘ಪಾಲಿಮಾರ್ಕೆಟ್’ ಎಂಬ ಪ್ಲಾಟ್ಫಾರ್ಮ್ನಲ್ಲಿ ಜನರು ಪ್ಯಾರಿಸ್ನ ದೈನಂದಿನ ತಾಪಮಾನ ಎಷ್ಟಿರಬಹುದು ಎಂಬ ಬಗ್ಗೆ ಬೆಟ್ಟಿಂಗ್ ಕಟ್ಟುತ್ತಿದ್ದರು. ಆದರೆ, ಇಲ್ಲೊಬ್ಬ ಚಾಣಾಕ್ಷ ವ್ಯಕ್ತಿ ಯಾರಿಗೂ ಊಹಿಸಲೂ ಸಾಧ್ಯವಾಗದ ರೀತಿಯಲ್ಲಿ ವ್ಯವಸ್ಥೆಯನ್ನೇ ಬುಡಮೇಲು ಮಾಡಿ ಕೇವಲ ಎರಡೇ ದಿನಗಳಲ್ಲಿ ಸುಮಾರು 34,000 ಡಾಲರ್, ಅಂದರೆ ಭಾರತೀಯ ರೂಪಾಯಿಗಳಲ್ಲಿ ಅಂದಾಜು 28 ಲಕ್ಷಕ್ಕೂ ಅಧಿಕ ಹಣವನ್ನು ತನ್ನ ಜೇಬಿಗೆ ಇಳಿಸಿಕೊಂಡಿದ್ದಾನೆ.
ಈ ಇಡೀ ಕಥೆ ಶುರುವಾಗುವುದು ಪ್ಯಾರಿಸ್ನ ಚಾರ್ಲ್ಸ್ ಡಿ ಗೌಲ್ ವಿಮಾನ ನಿಲ್ದಾಣದ ರನ್ವೇ ಪಕ್ಕದಲ್ಲಿರುವ ಹವಾಮಾನ ಇಲಾಖೆಯ ಸೆನ್ಸರ್ನಿಂದ. ಪಾಲಿಮಾರ್ಕೆಟ್ ತನ್ನ ಬೆಟ್ಟಿಂಗ್ ಫಲಿತಾಂಶಗಳನ್ನು ಘೋಷಿಸಲು ಈ ಒಂದೇ ಒಂದು ಸೆನ್ಸರ್ನ ಅಂಕಿಅಂಶಗಳನ್ನು ಬಳಸುತ್ತಿತ್ತು. ಇದು ಆ ವ್ಯಕ್ತಿಯ ಗಮನಕ್ಕೆ ಬಂದಿತ್ತು. ಸಾಮಾನ್ಯವಾಗಿ ಆ ದಿನದ ತಾಪಮಾನ 18 ಡಿಗ್ರಿ ಸೆಲ್ಸಿಯಸ್ ಇರಬಹುದು ಎಂದು ಎಲ್ಲರೂ ಬೆಟ್ಟಿಂಗ್ ಕಟ್ಟಿದ್ದರೆ, ಈತ ಮಾತ್ರ ಯಾರೂ ನಿರೀಕ್ಷಿಸದ ’22 ಡಿಗ್ರಿ ಸೆಲ್ಸಿಯಸ್’ ಎಂಬ ಆಯ್ಕೆಯ ಮೇಲೆ ಅತ್ಯಂತ ಕಡಿಮೆ ದರಕ್ಕೆ ಬೆಟ್ಟಿಂಗ್ ಕಟ್ಟಿದ. ಹೊರಗಿನಿಂದ ನೋಡುವವರಿಗೆ ಇದು ಸೋಲುವ ಪಂತದಂತೆ ಕಂಡರೂ, ಆತನ ಬಳಿ ಒಂದು ಮಾಸ್ಟರ್ ಪ್ಲಾನ್ ಇತ್ತು.
ಪೋರ್ಟಬಲ್ ಹೇರ್ ಡ್ರೈಯರ್ ಅಥವಾ ಸಣ್ಣ ಉಷ್ಣದ ಮೂಲವನ್ನು ಹಿಡಿದು ನೇರವಾಗಿ ಆ ಸೆನ್ಸರ್ ಬಳಿ ಹೋದ ಈತ, ಅಲ್ಪ ಸಮಯದವರೆಗೆ ಅದರ ಸುತ್ತಲಿನ ಗಾಳಿಯನ್ನು ಕೃತಕವಾಗಿ ಕಾಯಿಸಿದ. ಪರಿಣಾಮವಾಗಿ, ಸೆನ್ಸರ್ನಲ್ಲಿ ತಾಪಮಾನವು ಇದ್ದಕ್ಕಿದ್ದಂತೆ ಏರಿಕೆಯಾಗಿ ದಾಖಲಾಯಿತು. ಕೆಲವೇ ನಿಮಿಷಗಳಲ್ಲಿ ತಾಪಮಾನ ಮತ್ತೆ ಸಹಜ ಸ್ಥಿತಿಗೆ ಮರಳಿದರೂ, ಆ ದಿನದ ಗರಿಷ್ಠ ತಾಪಮಾನವಾಗಿ ಆ ವ್ಯಕ್ತಿ ಸೃಷ್ಟಿಸಿದ ‘ಫೇಕ್’ ಅಂಕಿಅಂಶವೇ ದಾಖಲಾಗಿತ್ತು. ಇದನ್ನು ಆಧರಿಸಿ ಪಾಲಿಮಾರ್ಕೆಟ್ ಆತನನ್ನು ವಿಜೇತ ಎಂದು ಘೋಷಿಸಿತು.
ಕೇವಲ ಏಪ್ರಿಲ್ 6ರಂದು ಮಾತ್ರವಲ್ಲದೆ, ಏಪ್ರಿಲ್ 15ರಂದು ಕೂಡ ಇದೇ ರೀತಿ ಮಾಡಿ ಎರಡನೇ ಬಾರಿಯೂ ಭಾರಿ ಮೊತ್ತವನ್ನು ಗೆದ್ದುಕೊಂಡ. ಆದರೆ, ಹವಾಮಾನದಲ್ಲಿ ಯಾವುದೇ ಬದಲಾವಣೆ ಇಲ್ಲದಿದ್ದರೂ ತಾಪಮಾನವು ನಿಮಿಷಗಳ ಕಾಲವಷ್ಟೇ ಏರಿಕೆ ಕಂಡು ಮತ್ತೆ ಕುಸಿಯುತ್ತಿರುವುದನ್ನು ಗಮನಿಸಿದ ಫ್ರಾನ್ಸ್ನ ಹವಾಮಾನ ಇಲಾಖೆ ಅಧಿಕಾರಿಗಳಿಗೆ ಸಂಶಯ ಶುರುವಾಯಿತು. ಕೂಡಲೇ ತನಿಖೆ ನಡೆಸಿದಾಗ ಈ ವಂಚನೆ ಬಯಲಿಗೆ ಬಂದಿದ್ದು, ಈಗ ಆ ವ್ಯಕ್ತಿಯ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸಲಾಗಿದೆ. ಒಂದು ಸಣ್ಣ ಹೇರ್ ಡ್ರೈಯರ್ ಮತ್ತು ಸೆನ್ಸರ್ನ ಭದ್ರತೆಯ ಲೋಪ ಹೇಗೆ ಕೋಟಿ ರೂಪಾಯಿಗಳ ಬೆಟ್ಟಿಂಗ್ ಮಾರುಕಟ್ಟೆಯನ್ನೇ ಅಲುಗಾಡಿಸಬಹುದು ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.
