IND vs SA: 746 ದಿನಗಳ ‘ವನವಾಸ’ ಅಂತ್ಯ: ರಾಂಚಿಯಲ್ಲಿ ಆರ್ಭಟಿಸಿದ ಕಿಂಗ್ ಕೊಹ್ಲಿ!

IND vs SA: ಟೀಂ ಇಂಡಿಯಾದ ರನ್ ಮಷೀನ್ ವಿರಾಟ್ ಕೊಹ್ಲಿ, ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಪಂದ್ಯದಲ್ಲಿ ತಮ್ಮ ಹಳೆಯ ಖದರ್ ಪ್ರದರ್ಶಿಸಿದ್ದಾರೆ. ಎಂ.ಎಸ್. ಧೋನಿಯ ತವರೂರಾದ ರಾಂಚಿಯಲ್ಲಿ ನಡೆದ ಈ ಪಂದ್ಯದಲ್ಲಿ, ಕೊಹ್ಲಿ ತಮ್ಮ ಬ್ಯಾಟಿಂಗ್ ಶೈಲಿಯನ್ನು ತುಸು ಬದಲಿಸಿಕೊಂಡು, ಚೆಂಡನ್ನು ಮೈದಾನದ ಮೂಲೆಮೂಲೆಗೂ ಅಟ್ಟುವ ಬದಲು ನೇರವಾಗಿ ಬೌಂಡರಿ ಗೆರೆ ದಾಟಿಸುವ ಮೂಲಕ ಅಭಿಮಾನಿಗಳನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿದರು.

291 ದಿನಗಳ ನಂತರ ಬಂತು ಆ ‘ಸಿಕ್ಸರ್’: ಕಳೆದ ಕೆಲ ದಿನಗಳಿಂದ ಕೊಹ್ಲಿ ಬ್ಯಾಟ್‌ನಿಂದ ಬೌಂಡರಿಗಳು ಬರುತ್ತಿದ್ದವೇ ವಿನಃ, ಚೆಂಡು ಹಾರಿ ಹೋಗುತ್ತಿರಲಿಲ್ಲ. ಕೊನೆಯದಾಗಿ 2025ರ ಫೆಬ್ರವರಿ 12 ರಂದು ಅಹಮದಾಬಾದ್‌ನಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಕೊಹ್ಲಿ ಸಿಕ್ಸರ್ ಸಿಡಿಸಿದ್ದರು.

ಆ ನಂತರ ಬರೋಬ್ಬರಿ 291 ದಿನಗಳ ಕಾಲ ಅವರ ಬ್ಯಾಟ್‌ನಿಂದ ಒಂದೇ ಒಂದು ಸಿಕ್ಸರ್ ಬಂದಿರಲಿಲ್ಲ. ಇದೀಗ ರಾಂಚಿಯಲ್ಲಿ ಹರಿಣಗಳ ವಿರುದ್ಧದ ಕಾದಾಟದಲ್ಲಿ, ದಕ್ಷಿಣ ಆಫ್ರಿಕಾದ ಬೌಲರ್ ನಾಂಡ್ರೆ ಬರ್ಗರ್ ಎಸೆತವನ್ನು ಸಿಕ್ಸರ್‌ಗೆ ಅಟ್ಟುವ ಮೂಲಕ ಕೊಹ್ಲಿ ಆ ದೀರ್ಘಕಾಲದ ಬರವನ್ನು ನೀಗಿಸಿಕೊಂಡರು.

746 ದಿನಗಳ ಬಳಿಕ ಜೋಡಿ ಧಮಾಕ!: ವಿಶೇಷವೆಂದರೆ, ವಿರಾಟ್ ಕೇವಲ ಒಂದು ಸಿಕ್ಸರ್ ಬಾರಿಸಿ ಸುಮ್ಮನಾಗಲಿಲ್ಲ. ಬಾರ್ಟ್‌ಮನ್ ಬೌಲಿಂಗ್‌ನಲ್ಲೂ ಮತ್ತೊಂದು ಭರ್ಜರಿ ಸಿಕ್ಸರ್ ಬಾರಿಸಿದರು. ಈ ಮೂಲಕ ಒಂದೇ ಇನ್ನಿಂಗ್ಸ್‌ನಲ್ಲಿ ಎರಡು ಸಿಕ್ಸರ್ ಸಿಡಿಸಿದ ದಾಖಲೆ ಬರೆದರು. ಈ ಘಳಿಗೆಗಾಗಿ ಅಭಿಮಾನಿಗಳು ಬರೋಬ್ಬರಿ 746 ದಿನಗಳನ್ನು ಕಾಯಬೇಕಾಯಿತು!

ಹೌದು, ಇದಕ್ಕೂ ಮುನ್ನ ವಿರಾಟ್ ಕೊಹ್ಲಿ ಒಂದೇ ಏಕದಿನ ಇನ್ನಿಂಗ್ಸ್‌ನಲ್ಲಿ 2 ಅಥವಾ ಅದಕ್ಕಿಂತ ಹೆಚ್ಚು ಸಿಕ್ಸರ್ ಬಾರಿಸಿದ್ದು 2023ರ ವಿಶ್ವಕಪ್ ಸೆಮಿಫೈನಲ್ ಪಂದ್ಯದಲ್ಲಿ. ಅಂದು ಮುಂಬೈನಲ್ಲಿ ನ್ಯೂಜಿಲೆಂಡ್ ವಿರುದ್ಧ 117 ರನ್ ಗಳಿಸಿದ್ದಾಗ ಕೊಹ್ಲಿ 2 ಸಿಕ್ಸರ್ ಬಾರಿಸಿದ್ದರು.

ಅದಾದ ಬಳಿಕ ಈಗಲೇ (ನವೆಂಬರ್ 2025) ವಿರಾಟ್ ಬ್ಯಾಟ್‌ನಿಂದ ಇಂತಹ ಸ್ಫೋಟಕ ಆಟ ಮೂಡಿಬಂದಿರುವುದು. ಸಾಮಾನ್ಯವಾಗಿ ನೆಲದುದ್ದಕ್ಕೂ ಚೆಂಡನ್ನು ಬಾರಿಸಿ (Ground shots) ರನ್ ಗಳಿಸಲು ಇಷ್ಟಪಡುವ ಕೊಹ್ಲಿ, ಇದೀಗ ತಮ್ಮ ಆಟದ ವೈಖರಿಯಲ್ಲಿ ಬದಲಾವಣೆ ಮಾಡಿಕೊಂಡಿರುವುದು ಎದುರಾಳಿಗಳಿಗೆ ಎಚ್ಚರಿಕೆಯ ಗಂಟೆಯಾಗಿದೆ.