‘ಕಿಂಗ್’ ಕೊಹ್ಲಿ ಎಂದೇ ಖ್ಯಾತರಾಗಿರುವ ವಿರಾಟ್ ಕೊಹ್ಲಿಗೆ ಇದು ಬಹುಶಃ ಆಸ್ಟ್ರೇಲಿಯಾದ ಕೊನೆಯ ಪ್ರವಾಸ. 2027ರ ಏಕದಿನ ವಿಶ್ವಕಪ್ ನಂತರ ಅಂತರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳುವ ಸಾಧ್ಯತೆ ದಟ್ಟವಾಗಿರುವುದರಿಂದ, ಕಾಂಗರೂಗಳ ನಾಡಿನಲ್ಲಿ ತನ್ನ ಹೆಸರನ್ನು ಅಜರಾಮರವಾಗಿಸಲು ಸಿಕ್ಕಿರುವ ಕೊನೆಯ ಅವಕಾಶ ಇದಾಗಿದೆ.
ನಾಳೆ (ಅ. 23) ಅಡಿಲೇಡ್‌ನ ಓವಲ್ ಮೈದಾನದಲ್ಲಿ ನಡೆಯಲಿರುವ ಆಸ್ಟ್ರೇಲಿಯಾ ವಿರುದ್ಧದ ಎರಡನೇ ಏಕದಿನ ಪಂದ್ಯವು ಕೇವಲ ಒಂದು ಸಾಮಾನ್ಯ ಪಂದ್ಯವಲ್ಲ, ಬದಲಿಗೆ ಕೊಹ್ಲಿಯ ಪಾಲಿಗೆ ಐತಿಹಾಸಿಕ ದಾಖಲೆಗಳನ್ನು ಬರೆಯುವ ಸುವರ್ಣಾವಕಾಶ.
ವಿಶ್ವದಾಖಲೆಗೆ ಬೇಕಿದೆ ಕೇವಲ ಒಂದು ಶತಕ: ಅಡಿಲೇಡ್ ಓವಲ್, ವಿರಾಟ್ ಕೊಹ್ಲಿಯ ಪಾಲಿಗೆ ಅದೃಷ್ಟದ ಮೈದಾನ. ಇಲ್ಲಿ ತಮ್ಮ ಬ್ಯಾಟಿಂಗ್ ಪರಾಕ್ರಮವನ್ನು ಹಲವು ಬಾರಿ ಪ್ರದರ್ಶಿಸಿದ್ದಾರೆ. ಸದ್ಯ, ಆಸ್ಟ್ರೇಲಿಯಾದ ಒಂದೇ ಮೈದಾನದಲ್ಲಿ ಅತಿ ಹೆಚ್ಚು ಶತಕಗಳನ್ನು ಬಾರಿಸಿದ ವಿದೇಶಿ ಆಟಗಾರ ಎಂಬ ದಾಖಲೆಯನ್ನು ಇಂಗ್ಲೆಂಡ್‌ನ ದಂತಕಥೆ ಜ್ಯಾಕ್ ಹಾಬ್ಸ್ ಅವರೊಂದಿಗೆ ಹಂಚಿಕೊಂಡಿದ್ದಾರೆ.
ಹಾಬ್ಸ್ ಮೆಲ್ಬೋರ್ನ್‌ನಲ್ಲಿ 5 ಟೆಸ್ಟ್ ಶತಕ ಬಾರಿಸಿದ್ದರೆ, ಕೊಹ್ಲಿ ಅಡಿಲೇಡ್‌ನಲ್ಲಿ 3 ಟೆಸ್ಟ್ ಮತ್ತು 2 ಏಕದಿನ ಶತಕಗಳನ್ನು ಸಿಡಿಸಿ ದಾಖಲೆಯನ್ನು ಸರಿಗಟ್ಟಿದ್ದಾರೆ. ನಾಳಿನ ಪಂದ್ಯದಲ್ಲಿ ಕೊಹ್ಲಿ ಬ್ಯಾಟ್‌ನಿಂದ ಮತ್ತೊಂದು ಶತಕ ಸಿಡಿದರೆ, ಆಸ್ಟ್ರೇಲಿಯಾದ ಒಂದೇ ಮೈದಾನದಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಏಕೈಕ ವಿದೇಶಿ ಆಟಗಾರ ಎಂಬ ವಿಶ್ವದಾಖಲೆ ಕೊಹ್ಲಿ ಪಾಲಾಗಲಿದೆ.
ಸಾವಿರ ರನ್‌ಗಳ ಮೈಲಿಗಲ್ಲಿನ ಸನಿಹ: ಶತಕದ ಜೊತೆಗೆ, ಮತ್ತೊಂದು ಐತಿಹಾಸಿಕ ಮೈಲಿಗಲ್ಲು ಕೊಹ್ಲಿಗಾಗಿ ಕಾಯುತ್ತಿದೆ. ಅಡಿಲೇಡ್ ಮೈದಾನದಲ್ಲಿ ಈವರೆಗೆ 17 ಇನ್ನಿಂಗ್ಸ್‌ಗಳಿಂದ 975 ರನ್ ಗಳಿಸಿರುವ ಅವರು, ಸಾವಿರ ರನ್‌ಗಳ ಗಡಿ ತಲುಪಲು ಕೇವಲ 25 ರನ್‌ಗಳ ಅವಶ್ಯಕತೆಯಿದೆ. ಒಂದು ವೇಳೆ ಅವರು ಈ 25 ರನ್‌ಗಳನ್ನು ಗಳಿಸಿದರೆ, ಕಾಂಗರೂಗಳ ನಾಡಿನ ಒಂದೇ ತಾಣದಲ್ಲಿ ಸಾವಿರ ರನ್ ಪೂರೈಸಿದ ಮೊದಲ ವಿದೇಶಿ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ.
ಅಡಿಲೇಡ್ ಮೈದಾನಕ್ಕೂ ಕೊಹ್ಲಿಗೂ ಅವಿನಾಭಾವ ಸಂಬಂಧವಿದೆ. ತಮ್ಮ ಚೊಚ್ಚಲ ಟೆಸ್ಟ್ ಶತಕ, ನಾಯಕನಾದ ಮೊದಲ ಪಂದ್ಯದಲ್ಲೇ ಆಡಿ ಶತಕ ಸಿಡಿಸಿದ್ದು ಇದೇ ಮೈದಾನದಲ್ಲಿ. ಹೀಗಾಗಿ, ತಮ್ಮ ನೆಚ್ಚಿನ ಅಂಗಳದಲ್ಲಿ ಈ ಐತಿಹಾಸಿಕ ದಾಖಲೆಗಳನ್ನು ಬರೆಯಲು ಕೊಹ್ಲಿಗೆ ಇದಕ್ಕಿಂತ ಉತ್ತಮ ಅವಕಾಶ ಇನ್ನೊಂದಿಲ್ಲ. ಅವರ ‘ಕೊನೆಯ ಆಸ್ಟ್ರೇಲಿಯಾ ಪ್ರವಾಸ’ವು ಮರೆಯಲಾಗದ ನೆನಪಾಗಲಿದೆಯೇ ಎಂಬುದನ್ನು ಕಾದುನೋಡಬೇಕಿದೆ.
