ಬೆಂಗಳೂರು: ರಾಜ್ಯ ರಾಜಕೀಯದಲ್ಲಿ ಸಿಎಂ ಸಿದ್ದರಾಮಯ್ಯ ಹಾಗೂ ಡಿಸಿಎಂ ಡಿ.ಕೆ. ಶಿವಕುಮಾರ್ ನಡುವಿನ ಅಧಿಕಾರ ಹಂಚಿಕೆ ಮತ್ತು ನಾಯಕತ್ವದ ವಿಷಯದಲ್ಲಿ ಉದ್ಭವಿಸಿದ್ದ ಅಂತರ್ಮನಸ್ತಾಪದ ವದಂತಿಗಳಿಗೆ ತೆರೆ ಎಳೆಯುವಂತೆ, ಇಬ್ಬರೂ ಶನಿವಾರ ಬೆಳಿಗ್ಗೆ ಬೆಂಗಳೂರಿನ ‘ಕಾವೇರಿ’ ನಿವಾಸದಲ್ಲಿ ಉಪಾಹಾರ ಸಭೆ ನಡೆಸಿದರು. ಕಾಂಗ್ರೆಸ್ ಹೈಕಮಾಂಡ್ ಸೂಚನೆಯಂತೆ ಈ ಭೇಟಿ ಜರುಗಿದ್ದು, ನಂತರ ಇಬ್ಬರೂ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ “ಒಗ್ಗಟ್ಟು ಅಚಲ” ಎಂಬ ಸ್ಪಷ್ಟ ಸಂದೇಶವನ್ನು ನೀಡಿದ್ದಾರೆ.
ಹೈಕಮಾಂಡ್ ಸೂಚನೆ – ಒಗ್ಗಟ್ಟು ಪ್ರದರ್ಶನ : ಕುರ್ಚಿ ಗುದ್ದಾಟ, ದ್ವಂದ್ವ ನಾಯಕತ್ವ ಮತ್ತು ಅಧಿಕಾರ ಸಮನ್ವಯದ ಕುರಿತು ರಾಜ್ಯದ ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗಳು ನಡೆಯುತ್ತಿದ್ದ ಸಂದರ್ಭದಲ್ಲಿ, ಹೈಕಮಾಂಡ್ ಇಬ್ಬರಿಗೂ ಬೇಟಿ ನೀಡಿ ಗೊಂದಲ ನಿವಾರಣೆ ಮಾಡಿಕೊಳ್ಳಿ ಎಂದು ಸೂಚಿಸಿತ್ತು. ಅದರಂತೆ ಸಿಎಂ ನಿವಾಸದಲ್ಲಿ ನಡೆದ ಉಪಹಾರ ಸಭೆಯಲ್ಲಿ ಮುಂದಿನ ರಾಜಕೀಯ ತಂತ್ರದ ಬಗ್ಗೆ ಚರ್ಚೆ ನಡೆಸಲಾಗಿದೆ.
“ನಮ್ಮ ನಡುವೆ ಗೊಂದಲವೇ ಇಲ್ಲ”: ಸಭೆಯ ನಂತರ ಮಾತನಾಡಿದ ಸಿಎಂ ಸಿದ್ದರಾಮಯ್ಯ ಮಾತನಾಡಿ 2028ರ ಚುನಾವಣೆಯಲ್ಲಿಯೂ ಕಾಂಗ್ರೆಸ್‌ನ್ನು ಮತ್ತೆ ಅಧಿಕಾರಕ್ಕೆ ತರಬೇಕೆಂಬ ಗುರಿ ನಮ್ಮದು. ನಮ್ಮ ನಡುವೆ ಮನಸ್ತಾಪವೇ ಇಲ್ಲ. ಮುಂದೆಯೂ ಇರಲ್ಲ. ಬಿಜೆಪಿ–ಜೆಡಿಎಸ್ ಸುಳ್ಳು ಅಪವಾದಗಳಿಂದ ಗೊಂದಲ ಸೃಷ್ಟಿಸುವ ಪ್ರಯತ್ನ ಮಾಡುತ್ತಿದೆ; ಅದಕ್ಕೆ ನಾವು ಬಲಿಯಾಗುವುದಿಲ್ಲ.
ಕೆಲ ಪಕ್ಷದವರು ಅವಿಶ್ವಾಸ ಪ್ರಸ್ತಾವನೆ ತರುವುದಾಗಿ ಹೇಳುತ್ತಿದ್ದಾರೆ ಅದು ಅಸಾಧ್ಯ. ಎರಡೂ ಪಕ್ಷಗಳಿಗೂ ಸಂಖ್ಯೆ ಜಾಸ್ತಿ ಇರುವ ಪರಿಸ್ಥಿತಿ ಇಲ್ಲ. ನಮ್ಮ ಕೆಲ ಶಾಸಕರು ಸಂಪುಟ ಪುನರ್‌ರಚನೆ ಕುರಿತು ದೆಹಲಿಗೆ ಹೋಗಿರುವ ವಿಷಯವೂ ಸುಮ್ಮನೆ ರಾಜಕೀಯ ವದಂತಿಯಷ್ಟೇ ಎಂದು ಸ್ಪಷ್ಟಪಡಿಸಿದರು.
“ನಮ್ಮದು ಒಂದೇ ಗುಂಪು – ಹೈಕಮಾಂಡ್ ಗುಂಪು”: ಜನರು ನಮ್ಮ ಮೇಲೆ ಅಪಾರ ನಂಬಿಕೆ ಇಟ್ಟುಕೊಂಡಿದ್ದಾರೆ. ಸಿದ್ದರಾಮಯ್ಯ ನೇತೃತ್ವದಲ್ಲಿ ಸರ್ಕಾರ ಉತ್ತಮವಾಗಿ ನಡೆಯುತ್ತಿದೆ. ನಾವು ಒಂದೇ ತಂಡ. ಹೈಕಮಾಂಡ್‌ವೇ ನಮ್ಮ ಮಾರ್ಗದರ್ಶಿ. 2028ಕ್ಕೆ ಮತ್ತೆ ಕಾಂಗ್ರೆಸ್ ಬೆಂಬಲ ಹೆಚ್ಚಿಸಿ, ಕೇಂದ್ರದಲ್ಲಿಯೂ ಅಧಿಕಾರ ಪಡೆಯುವ ಕಡೆಗೆ ಕೆಲಸ ಮಾಡುತ್ತೇವೆ ಎಂದರು.
ರಾಜಕೀಯಕ್ಕೆ ಸ್ಪಷ್ಟ ಸಂದೇಶ: ಈ ಉಪಾಹಾರ ಸಭೆ ಮತ್ತು ಜಂಟಿ ಪತ್ರಿಕಾಗೋಷ್ಠಿಯ ಮೂಲಕ ಕಾಂಗ್ರೆಸ್ ಇಬ್ಬರು ಅಗ್ರ ನಾಯಕರೂ ಒಗ್ಗಟ್ಟು ಅಚಲ ಎಂಬ ರಾಜಕೀಯ ಸಂದೇಶವನ್ನು ಕಳಿಸಿದ್ದಾರೆ. ರಾಜ್ಯದಲ್ಲಿ ನಡೆಯುತ್ತಿರುವ ನಾಯಕತ್ವದ ಚರ್ಚೆಗಳು, ಕುರ್ಚಿ ಗುದ್ದಾಟದ ವದಂತಿಗಳು ಮತ್ತು ವಿರೋಧ ಪಕ್ಷಗಳ ಆರೋಪಗಳಿಗೆ ಸ್ಪಷ್ಟ ಉತ್ತರ ನೀಡುವಂತಾಗಿದೆ.
