AI ಯುಗದ ಸವಾಲಿನ ನಡುವೆ ಅಡೋಬ್ CEO ಸ್ಥಾನದಿಂದ ಶಂತನು ನಾರಾಯಣ್ ಕೆಳಗಿಳಿಯುವ ನಿರ್ಧಾರ
ನವದೆಹಲಿ: ಅಡೋಬ್ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಶಂತನು ನಾರಾಯಣ್ (Shantanu Narayen) ಅವರು ಸುಮಾರು 18 ವರ್ಷಗಳ ಬಳಿಕ ಸಿಇಒ ಹುದ್ದೆಯಿಂದ ಕೆಳಗಿಳಿಯಲಿದ್ದಾರೆ ಎಂದು ಕಂಪನಿ ಘೋಷಿಸಿದೆ.
ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ವೇಗವಾದ ಬೆಳವಣಿಗೆಗಳ ನಡುವೆ ಹೂಡಿಕೆದಾರರು ಕಂಪನಿಯ ಭವಿಷ್ಯದ ಸ್ಥಾನ ಕುರಿತು ಕಳವಳ ವ್ಯಕ್ತಪಡಿಸುತ್ತಿರುವ ಸಮಯದಲ್ಲಿ ಈ ಘೋಷಣೆ ಮಹತ್ವ ಪಡೆದುಕೊಂಡಿದೆ.
ಉತ್ತರಾಧಿಕಾರಿ ಆಯ್ಕೆಯವರೆಗೆ ಹುದ್ದೆಯಲ್ಲಿ ಮುಂದುವರಿಕೆ : ಕಂಪನಿ ಪ್ರಕಟಣೆ ಪ್ರಕಾರ, ಹೊಸ ಸಿಇಒ ಆಯ್ಕೆಯಾಗುವವರೆಗೆ ಶಂತನು ನಾರಾಯಣ್ ತಮ್ಮ ಹುದ್ದೆಯಲ್ಲಿ ಮುಂದುವರಿಯಲಿದ್ದಾರೆ. ನಂತರ ಅವರು ಕಂಪನಿಯ ಮಂಡಳಿಯ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಲಿದ್ದಾರೆ.
ಉದ್ಯೋಗಿಗಳಿಗೆ ಬರೆದ ಸಂದೇಶದಲ್ಲಿ ನಾರಾಯಣ್, “ಇದು ವಿದಾಯವಲ್ಲ, ಬದಲಾಗಿ ಆತ್ಮಾವಲೋಕನ ಮಾಡುವ ಸಮಯ” ಎಂದು ತಿಳಿಸಿದ್ದಾರೆ.
ಮೈಕ್ರೋಸಾಫ್ಟ್ CEO ಸತ್ಯ ನಾಡೆಲ್ಲಾ ಅಭಿನಂದನೆ: ಈ ಘೋಷಣೆಯ ಬಳಿಕ ಸತ್ಯ ನಾಡೆಲ್ಲಾ (Satya Nadella) ಅವರು ಸಾಮಾಜಿಕ ಜಾಲತಾಣದಲ್ಲಿ ಶಂತನು ನಾರಾಯಣ್ ಅವರ ಕಾರ್ಯವನ್ನು ಶ್ಲಾಘಿಸಿದ್ದಾರೆ. “ಅಡೋಬ್ನಲ್ಲಿ ದಂತಕಥೆಯಂತಿರುವ ನಾಯಕತ್ವಕ್ಕೆ ಅಭಿನಂದನೆಗಳು. ನೀವು ವಿಶ್ವದ ಪ್ರಮುಖ ಸಾಫ್ಟ್ವೇರ್ ಕಂಪನಿಗಳಲ್ಲಿ ಒಂದನ್ನು ನಿರ್ಮಿಸಿದ್ದೀರಿ ಮತ್ತು ಸೃಷ್ಟಿಕರ್ತರು, ಉದ್ಯಮಿಗಳು ಹಾಗೂ ಬ್ರ್ಯಾಂಡ್ಗಳಿಗೆ ಹೊಸ ಅವಕಾಶಗಳನ್ನು ತೆರೆದಿದ್ದೀರಿ,” ಎಂದು ಅವರು ಹೇಳಿದ್ದಾರೆ.
AI ಯುಗದ ಸವಾಲು : AI ಆಧಾರಿತ ಇಮೇಜ್ ಜನರೇಷನ್ ಸಾಧನಗಳು ಮತ್ತು ಹೊಸ ತಂತ್ರಜ್ಞಾನಗಳ ಬೆಳವಣಿಗೆಯಿಂದ ಸಾಫ್ಟ್ವೇರ್ ಉದ್ಯಮದಲ್ಲಿ ತೀವ್ರ ಸ್ಪರ್ಧೆ ಹೆಚ್ಚುತ್ತಿದೆ. ಉದಾಹರಣೆಗೆ Google ಅಭಿವೃದ್ಧಿಪಡಿಸಿರುವ AI ಇಮೇಜ್ ಜನರೇಷನ್ ಸಾಧನಗಳು ಬಳಕೆದಾರರಿಗೆ ಚಿತ್ರಗಳನ್ನು ಸುಲಭವಾಗಿ ಸೃಷ್ಟಿಸಲು ಮತ್ತು ಸಂಪಾದಿಸಲು ಸಹಾಯ ಮಾಡುತ್ತಿವೆ. ಇದರ ಪರಿಣಾಮವಾಗಿ ಕೆಲವು ಬಳಕೆದಾರರಿಗೆ ಪರಂಪಾರಿಕ ಸಾಫ್ಟ್ವೇರ್ ಉಪಕರಣಗಳ ಅಗತ್ಯ ಕಡಿಮೆಯಾಗುತ್ತಿದೆ ಎಂಬ ಅಭಿಪ್ರಾಯವೂ ವ್ಯಕ್ತವಾಗುತ್ತಿದೆ.
AI ಮೇಲೆ ಅಡೋಬ್ ಒತ್ತು : ಈ ಸವಾಲಿನ ನಡುವೆಯೂ ಅಡೋಬ್ ತನ್ನದೇ ಆದ AI ಉತ್ಪನ್ನಗಳ ಅಭಿವೃದ್ಧಿಗೆ ಒತ್ತು ನೀಡುತ್ತಿದೆ. ಕಂಪನಿಯ Firefly ಎಂಬ AI ಆಧಾರಿತ ಸೃಜನಶೀಲ ಸಾಧನವನ್ನು ಬಳಕೆದಾರರು ವೇಗವಾಗಿ ಅಳವಡಿಸಿಕೊಳ್ಳುತ್ತಿದ್ದಾರೆ. ಕಂಪನಿ ಹೇಳುವಂತೆ, ಈ AI ಉತ್ಪನ್ನಗಳಿಂದ ವಾರ್ಷಿಕ ಪುನರಾವರ್ತಿತ ಆದಾಯವು ಕಳೆದ ವರ್ಷಕ್ಕಿಂತ ಮೂರು ಪಟ್ಟು ಹೆಚ್ಚಾಗಿದೆ. “ಸೃಜನಶೀಲತೆಯ ಮುಂದಿನ ಯುಗ AI ಮತ್ತು ಹೊಸ ಕೆಲಸದ ಹರಿವುಗಳಿಂದ ರೂಪುಗೊಳ್ಳುತ್ತಿದೆ,” ಎಂದು ನಾರಾಯಣ್ ಹೇಳಿದ್ದಾರೆ.
ಶಂತನು ನಾರಾಯಣ್ ಸಾಧನೆ : ಶಂತನು ನಾರಾಯಣ್ 2007ರಲ್ಲಿ ಅಡೋಬ್ ಸಿಇಒ ಆಗಿ ಅಧಿಕಾರ ವಹಿಸಿಕೊಂಡರು. ಅವರ ನಾಯಕತ್ವದಲ್ಲಿ ಕಂಪನಿಯು ದೊಡ್ಡ ಮಟ್ಟದಲ್ಲಿ ಬೆಳವಣಿಗೆ ಕಂಡಿದೆ. ಉದ್ಯೋಗಿಗಳ ಸಂಖ್ಯೆ ಸುಮಾರು 3,000 ರಿಂದ 30,000 ಕ್ಕೂ ಹೆಚ್ಚು
ಕಂಪನಿಯ ಆದಾಯ $1 ಬಿಲಿಯನ್ನಿಂದ $25 ಬಿಲಿಯನ್ಗಿಂತ ಹೆಚ್ಚು,
ಅಡೋಬ್ನ ಜನಪ್ರಿಯ ಸಾಫ್ಟ್ವೇರ್ಗಳು: Adobe Photoshop, Adobe Premiere Pro, Creative Cloud ಅಪ್ಲಿಕೇಶನ್ಗಳು ಇವುಗಳು ಜಗತ್ತಿನಾದ್ಯಂತ ಸೃಜನಶೀಲ ವೃತ್ತಿಪರರ ಪ್ರಮುಖ ಸಾಧನಗಳಾಗಿ ಪರಿಣಮಿಸಿವೆ.
ಜನನ ಮತ್ತು ಹಿನ್ನೆಲೆ: ಇವರು 1963 ರಲ್ಲಿ ಭಾರತದ ಹೈದರಾಬಾದ್ನಲ್ಲಿ ಜನಿಸಿದರು. ಅವರು ಬೌಲಿಂಗ್ ಗ್ರೀನ್ ಸ್ಟೇಟ್ ವಿಶ್ವವಿದ್ಯಾಲಯದಲ್ಲಿ ಕಂಪ್ಯೂಟರ್ ಸೈನ್ಸ್ನಲ್ಲಿ ಸ್ನಾತಕೋತ್ತರ ಪದವಿ ಹಾಗೂ University of California Berkeley ನಲ್ಲಿ MBA ಪದವಿ ಪಡೆದಿದ್ದಾರೆ.
ಶಂತನು ನಾರಾಯಣ್ ವೃತ್ತಿಜೀವನ: ಶಂತನು ನಾರಾಯಣ್ 1998ರಲ್ಲಿ ಅಡೋಬ್ ಕಂಪನಿಗೆ ಸೇರಿದರು. 2005ರಲ್ಲಿ ಅಧ್ಯಕ್ಷ ಮತ್ತು ಸಿಒಒ, 2007ರಲ್ಲಿ ಸಿಇಒ, 2017ರಲ್ಲಿ ಮಂಡಳಿಯ ಅಧ್ಯಕ್ಷ, ಅಡೋಬ್ಗೆ ಸೇರುವ ಮೊದಲು ಅವರು Apple ಮತ್ತು Silicon Graphics ಸಂಸ್ಥೆಗಳಲ್ಲಿ ಕೆಲಸ ಮಾಡಿದ್ದರು.
ಸಾಧನೆ: ಅಡೋಬ್ ಕಂಪನಿಯನ್ನು ಸಾಫ್ಟ್ವೇರ್ ಮಾರಾಟದ ಮಾದರಿಯಿಂದ ಕ್ಲೌಡ್ ಆಧಾರಿತ ಸಬ್ಸ್ಕ್ರಿಪ್ಶನ್ ಮಾದರಿಗೆ ಬದಲಾಯಿಸುವಲ್ಲಿ ಇವರು ಪ್ರಮುಖ ಪಾತ್ರ ವಹಿಸಿದ್ದಾರೆ.
ಗೌರವ: ಭಾರತ ಸರ್ಕಾರವು ಇವರಿಗೆ 2019 ರಲ್ಲಿ ಪದ್ಮಶ್ರೀ ಪ್ರಶಸ್ತಿ ನೀಡಿ ಗೌರವಿಸಿದೆ
ಭಾರತದ ಐಟಿ ಪ್ರತಿಭೆ: ಭಾರತದ ಪ್ರತಿಭೆಗಳ ಬಗ್ಗೆ ನಾಡೆಲ್ಲಾ ಅವರಿಗೆ ಅಪಾರ ನಂಬಿಕೆಯಿದೆ. “ಭಾರತದ ಮಾನವ ಸಂಪನ್ಮೂಲವೇ ಅದರ ದೊಡ್ಡ ಆಸ್ತಿ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಭಾರತವು 2030ರ ವೇಳೆಗೆ ವಿಶ್ವದ ಅತಿದೊಡ್ಡ ಸಾಫ್ಟ್ವೇರ್ ಡೆವಲಪರ್ ಸಮುದಾಯವಾಗಲಿದೆ ಎಂದು ಅವರು ಭವಿಷ್ಯ ನುಡಿದಿದ್ದಾರೆ.
AI ಕ್ರಾಂತಿಯ ನಾಯಕತ್ವ: ಭಾರತವು ಕೇವಲ ತಂತ್ರಜ್ಞಾನವನ್ನು ಬಳಸುವ ದೇಶವಲ್ಲ, ಬದಲಾಗಿ AI (ಕೃತಕ ಬುದ್ಧಿಮತ್ತೆ) ಅನ್ವಯಗಳನ್ನು ಸೃಷ್ಟಿಸುವ ಕೇಂದ್ರವಾಗುತ್ತಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಸತ್ಯ ನಾಡೆಲ್ಲಾ ಮತ್ತು ಶಂತನು ನಾರಾಯಣ್ ಇಬ್ಬರೂ ಹೈದರಾಬಾದ್ ಪಬ್ಲಿಕ್ ಸ್ಕೂಲ್ನ ಹಳೆಯ ವಿದ್ಯಾರ್ಥಿಗಳಾಗಿದ್ದು, ಇತ್ತೀಚೆಗೆ ತಮ್ಮ ಶಾಲೆಯ ಶತಮಾನೋತ್ಸವದ ಸಂಭ್ರಮದಲ್ಲಿ ಒಟ್ಟಾಗಿ ಭಾಗವಹಿಸಿ ತಮ್ಮ ಹಳೆಯ ನೆನಪುಗಳನ್ನು ಹಂಚಿಕೊಂಡಿದ್ದರು.
