ಹಾರ್ಡ್ ವೇರ್ ಫೇಲ್, AI ಕಡೆಗೆ ಗಮನ : ಹುಬ್ಬಳ್ಳಿ- ಮಂಗಳೂರು ಸರ್ವಸನ್ನದ್ಧ
ಬಿ.ಅರವಿಂದ
‘ಡಿಜಿಟಲ್ ಇಂಡಿಯಾ’ ಬಿಯಾಂಡ್ ಬೆಂಗಳೂರು ಆಗುತ್ತದೆಯೇ? ಕೇಂದ್ರ ಬಜೆಟ್ ಮೇಲೆ ಕರ್ನಾಟಕದ ಮಹತ್ವದ ನಿರೀಕ್ಷೆ
ಸಂ.ಕ.ಸಮಾಚಾರ ಹುಬ್ಬಳ್ಳಿ : ನೀರಾವರಿ, ರೈಲ್ವೆ, ಮೂಲಸೌಕರ್ಯ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಕೇಂದ್ರ ಬಜೆಟ್ ಬಗ್ಗೆ ನಿರೀಕ್ಷೆಗಳು ಸಹಜವಾಗಿಯೇ ಇವೆ. ಆದರೆ ಈ ಬಾರಿಯ ಕೇಂದ್ರ ಬಜೆಟ್ ಕುರಿತು ಕರ್ನಾಟಕ ರಾಜ್ಯವು ಹೊತ್ತಿರುವ ಪ್ರಮುಖ ನಿರೀಕ್ಷೆ ಒಂದೇ— ‘ಡಿಜಿಟಲ್ ಇಂಡಿಯಾ’ ಯೋಜನೆಯನ್ನು ‘ಬೆಂಗಳೂರು ಹೊರತಾಗಿ’ ವಿಸ್ತರಿಸುವುದೇ? ಎಂಬ ಪ್ರಶ್ನೆ.
‘ಡಿಜಿಟಲ್ ಕರ್ನಾಟಕ’ಕ್ಕೆ ಬೆಂಗಳೂರು ಹೊರತಾಗಿ ಒತ್ತು ನೀಡಬೇಕು ಎಂಬ ನಿರೀಕ್ಷೆ ಕಳೆದ ನಾಲ್ಕು ವರ್ಷಗಳಿಂದ ರಾಜ್ಯದ ವಿವಿಧ ಭಾಗಗಳಲ್ಲಿ ಕೇಳಿಬರುತ್ತಿದೆ. 2022ರಲ್ಲಿ ಧಾರವಾಡದಲ್ಲಿ ನಡೆದ ರಾಷ್ಟ್ರೀಯ ಯುವಜನೋತ್ಸವದ ಉದ್ಘಾಟನಾ ಸಮಾರಂಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಆಡಿದ್ದ ಮಾತುಗಳು ಈ ನಿರೀಕ್ಷೆಗೆ ಇನ್ನಷ್ಟು ಬಲ ನೀಡಿದ್ದವು.
ಇದನ್ನೂ ಓದಿ: ರಾಜ್ಯ ಸಾರಿಗೆ ಬಸ್, ನಿಲ್ದಾಣಗಳಲ್ಲಿ ತಂಬಾಕು ಜಾಹೀರಾತು ಸಂಪೂರ್ಣ ನಿಷೇಧ
ಆದರೆ 2023-24, 2024-25 ಹಾಗೂ 2025-26ರ ಆರ್ಥಿಕ ವರ್ಷದ ಕೇಂದ್ರ ಬಜೆಟ್ಗಳು ಕರ್ನಾಟಕದ ಮಟ್ಟಿಗೆ ಹೆಚ್ಚಾಗಿ ಹಾರ್ಡ್ವೇರ್ ಮತ್ತು ಉತ್ಪಾದನಾ ವಲಯಕ್ಕೆ ಸೀಮಿತವಾಗಿದ್ದವು. ಕೋವಿಡ್ ನಂತರ ಮಂಡಿಸಲಾದ ನಾಲ್ಕು ಬಜೆಟ್ಗಳಲ್ಲಿ ‘ಬೆಂಗಳೂರು ಹೊರತಾದ’ ಪ್ರದೇಶಗಳಲ್ಲಿ ಉತ್ಪಾದನಾ ಚಟುವಟಿಕೆಗಳನ್ನು ವಿಸ್ತರಿಸುವ ಉದ್ದೇಶದಿಂದ ಎಂಎಸ್ಎಂಇ ಹಾಗೂ ಎಸ್ಇಝಡ್ (ವಿಶೇಷ ಆರ್ಥಿಕ ವಲಯ)ಗಳಿಗೆ ಹೆಚ್ಚಿನ ಒತ್ತು ನೀಡಲಾಗಿತ್ತು.
ಮಧ್ಯ, ಉತ್ತರ, ಕಲ್ಯಾಣ ಹಾಗೂ ಕರಾವಳಿ ಕರ್ನಾಟಕದಲ್ಲಿ ಕೈಗಾರಿಕೆ ವಿಸ್ತರಣೆಗೆ ಕೇಂದ್ರ ಸರ್ಕಾರ ಹಲವು ಯೋಜನೆಗಳನ್ನು ಘೋಷಿಸಿದರೂ, ಈ ವಲಯಗಳಿಗೆ ಇದುವರೆಗೆ ಸ್ಪಷ್ಟ ಪ್ರಯೋಜನ ಕಂಡುಬಂದಿಲ್ಲ. ಭೂಮಿ ಲಭ್ಯತೆಯ ಸಮಸ್ಯೆ, ಭೂಸ್ವಾಧೀನದ ಗೊಂದಲ, ಕೇಂದ್ರ–ರಾಜ್ಯ ಸರ್ಕಾರಗಳ ನಡುವಿನ ಆಡಳಿತಾತ್ಮಕ ಹಾಗೂ ರಾಜಕೀಯ ಸಂಕೀರ್ಣತೆಗಳು ಈ ಯೋಜನೆಗಳ ಜಾರಿಗೆ ದೊಡ್ಡ ಅಡ್ಡಿಯಾಗಿವೆ.
ಇದನ್ನೂ ಓದಿ: ತುಮಕೂರು ಪಿಎಸ್ಐ ಲೋಕಾಯುಕ್ತರ ಬಲೆಗೆ
ಆದರೆ ‘ಡಿಜಿಟಲ್ ಕರ್ನಾಟಕ’ ಸಾಕಾರಗೊಳಿಸುವಲ್ಲಿ ಇಂತಹ ಭೂಮಿ ಹಾಗೂ ಭೌತಿಕ ಮೂಲಸೌಕರ್ಯದ ಅಡ್ಡಿಗಳು ಬಹುತೇಕ ಎದುರಾಗುವುದಿಲ್ಲ ಎಂಬ ಅಭಿಪ್ರಾಯ ತಜ್ಞರಲ್ಲಿ ಇದೆ. ಈ ಹಿನ್ನೆಲೆ ಈಗಾಗಲೇ ಮಂಗಳೂರು–ಉಡುಪಿ–ಮಣಿಪಾಲ್ ಸಾಫ್ಟ್ವೇರ್ ಟೆಕ್ನಾಲಜಿ ಪಾರ್ಕ್ (ಎಸ್ಟಿಪಿಎಲ್) ಕ್ಲಸ್ಟರ್ಗೆ ಕರ್ನಾಟಕ ಸರ್ಕಾರ ಟೆಂಡರ್ ಪ್ರಕ್ರಿಯೆ ಆರಂಭಿಸಿದೆ. ಮಂಗಳೂರಿನಲ್ಲಿ ಕೆಲ ಸಣ್ಣ ಐಟಿ ಕಂಪನಿಗಳು ಕಾರ್ಯನಿರ್ವಹಿಸುತ್ತಿದ್ದು, ಡಿಜಿಟಲ್ ವಲಯಕ್ಕೆ ಸೂಕ್ತ ವಾತಾವರಣ ನಿರ್ಮಾಣವಾಗುತ್ತಿದೆ.
ಬಯಲುನಾಡಿನತ್ತ ಗಮನಹರಿಸಿದರೆ, ಹುಬ್ಬಳ್ಳಿಯಲ್ಲಿ ಇನ್ಫೋಸಿಸ್ನ ಭಾರೀ ಕ್ಯಾಂಪಸ್ ಹಲವು ವರ್ಷಗಳಿಂದ ನಿರ್ಮಾಣಗೊಂಡು ನಿಂತಿದೆ. ಬೆಳಗಾವಿ ಐಟಿ ಕ್ಷೇತ್ರದತ್ತ ಹೆಜ್ಜೆ ಇಡುವ ತಯಾರಿಯಲ್ಲಿದ್ದು, ದಾವಣಗೆರೆ ಮಧ್ಯ ಕರ್ನಾಟಕದ ಐಟಿ ಹಬ್ ಆಗುವ ಸಾಧ್ಯತೆಗಳನ್ನು ಹೊಂದಿದೆ. ಆದರೂ ಸ್ಪಷ್ಟ ಕೇಂದ್ರಿತ ಐಟಿ ಸವಲತ್ತುಗಳು ಹಾಗೂ ಬಜೆಟ್ ಆಧಾರಿತ ಯೋಜನೆಗಳು ಬೆಂಗಳೂರು ಹೊರತಾಗಿ ಯಾವ ಭಾಗಕ್ಕೂ ಲಭ್ಯವಿಲ್ಲ.
ಇದನ್ನೂ ಓದಿ: ಲಂಚಕೋರ ಇನ್ಸ್ಪೆಕ್ಟರ್ನ ಹೈಡ್ರಾಮಾ ವೈರಲ್!
ಈ ಕಾರಣದಿಂದ ಮಧ್ಯ, ಉತ್ತರ, ಕಲ್ಯಾಣ ಹಾಗೂ ಕರಾವಳಿ ಕರ್ನಾಟಕದ ಪ್ರತಿಭಾವಂತ ಯುವಕರು ಇಂದಿಗೂ ಉದ್ಯೋಗಕ್ಕಾಗಿ ಬೆಂಗಳೂರು, ಮಹಾರಾಷ್ಟ್ರದ ಪುಣೆ ಹಾಗೂ ತೆಲಂಗಾಣದ ಹೈದರಾಬಾದ್ಗಳನ್ನೇ ಅವಲಂಬಿಸಬೇಕಾದ ಪರಿಸ್ಥಿತಿ ಮುಂದುವರಿದಿದೆ.
ಈ ಹಿನ್ನೆಲೆಯಲ್ಲಿ ಕೇಂದ್ರ ಬಜೆಟ್ ಮಂಡನೆಗೆ ಮುನ್ನವೇ ‘ಸಂಯುಕ್ತ ಕರ್ನಾಟಕ’ ದಿನಪತ್ರಿಕೆಯಲ್ಲಿ ಬಿ. ಅರವಿಂದ ಅವರು ಲೇಖನದ ಮೂಲಕ ಜಾಗೃತಿ ಮೂಡಿಸಿದ್ದು, ಬೆಂಗಳೂರು ಕೇಂದ್ರಿತ ಡಿಜಿಟಲ್ ಅಭಿವೃದ್ಧಿಯಿಂದ ಹೊರಬಂದು ರಾಜ್ಯದ ಎಲ್ಲಾ ಭಾಗಗಳ ಆಶಾದಾಯಕ ಕನಸುಗಳತ್ತ ಗಮನ ಹರಿಸಬೇಕೆಂದು ಒತ್ತಾಯಿಸಿದ್ದಾರೆ. ಈ ಲೇಖನವು ಮಧ್ಯ, ಉತ್ತರ, ಕಲ್ಯಾಣ ಹಾಗೂ ಕರಾವಳಿ ಕರ್ನಾಟಕದ ಜನತೆಯ ದೀರ್ಘಕಾಲದ ನಿರೀಕ್ಷೆಗಳಿಗೆ ಸ್ಪಷ್ಟ ಧ್ವನಿಯಾಗಿ ಹೊರಹೊಮ್ಮಿದೆ.
